Ruuka 2

Ukwebhorwa ukwa Yëësu

(Mataayo 1:18-25)

1Ko-nkaagha iyö iya ukwebhorwa ukwa Yohana, Kaisaari#2:1 Kaisaari ne-ngʼana iya Ekeratiini. Ensonga iyaamo ni-igha omonene uwa abhakama, ni-igho abhakama abha Ikiruumi bhaibherekeranga. Maaha mo-faharaasa. Aughusto yaaraghërrëëyi abhantö bhonswe igho abha mu-bhyaro bheno yaatonganga, bhaghende ukwandekwa. 2Ukwandekwa kuyö, nkwo kwaarë ukwa mbere, kono kwaakörrwë enkaagha eno Kurëiniö yaarë ömötöngi uwa omokowa ughwa Siria. 3Ku bhuyö abhantö bhonswe igho, bhakaghya ukwandekwa, kera ömöntö akaghya ukwandekwa mu-mughi ughwa waabho.

4Yusufu wonswe akatanora ukurwa mu-mughi ughwa Nazarëëti, ughwa mo-mokowa ughwa Ghariraaya, akatiira ukughya mu-mughi ughwa Bhëtërëhëëmu, ughwa mo-mokowa ughwa Yudea. Yaaghëëyë-yo ko bhoora Bhëtërëhëëmu ngwo ghwaarë umughi ughwa Daudi. Na Yusufu uyö, nu-uwa eka iya Daudi yaarë. 5Yusufu akaghya ukwandekwa hamwë na Maryamu. Maryamu uyö, no-oora Yusufu yaarenga aghambëëyë öbhökwë. Enkaagha iyö, Maryamu ne-nda yaarë, bhutindi bhökörö. 6Hano bhaarë Bhëtërëhëëmu hayö, enkaagha iya ukwitoorania ukwa Maryamu ekahika. 7Akeebhora omoona uwa ikishaasha omotangi. Akamubhisya singibho, akamoraarya mu-ritubha irya okoraaghërrya-mo situgho. Yaaibhörëëyë muyö ko bhoora bhaabhörrwë umweya mu-sinyumba isya abhaghëni.

Abharëësya abha situgho bharabhooshokerwa na maraika

8Bhaare-ho abharëësya bhano bhaarenga bhaghëëyë rishanshu, bhararaarerra situgho isyabho ubhutikö. 9Kamwë igho, bhakabhooshokerwa na maraika uwa Omonene Waryobha na emerengaari ighya Omonene Waryobha, ghekabhamërëkya mbaara syonswe igho. Bhakoobhoha bhököngʼu. 10Kasi maraika uyö akabhatëëbhya igha, “Motakoobhoha, mbarëëtëëyë engʼana inshiiya, eno irishomera bhököngʼu abhantö bhonswe igho. 11Engʼana iyö ni-igha, Ömötöörya uwëënyu aibhööywë reero mu-mughi ughwa Daudi. Ömötöörya uyö, we Kiristo#2:11 Kiristo. Uyö we Waryobha yaahööyë igha, atööri abhantö na okobhatonga mo-Bhokama ubhwaye. Maaha mo-faharaasa. Omonene. 12Keno nkyo ekemanyërryö ikyënyu. Moraanyoore ekengʼerre keraariibhwi mu-ritubha irya situgho, kibhisiibhwi singibho.”

13Hake igho, amakomo na amakomo agha abhamaraika#2:13 Abhamaraika. Maaha mo-faharaasa. ukurwa mu-ryobha ghakatora. Bhakabha bharatöönia Waryobha igha,

14“Toratöönia Waryobha ono arëngë mu-ryobha.

Abhantö bhano ahanshirë ko-kebhara kono, bhabhe na omorembe!”

15Hano abhamaraika bhayö bhaakyörrë mu-ryobha, abharëësya bhayö bhakatëëbhania igha, “Toghende Bhëtërëhëëmu, tomaahe ghayö Omonene atötëëbhëri.” 16Bhakeemokera-mo këmwë. Hano bhaahikirë, bhakanyoora-ho Yusufu na Maryamu, na ekengʼerre keraariibhwi mu-ritubha irya situgho. 17Hano abharëësya bhayö bhaarööshë omoona uyö, bhakaraarekera abhantö bhonswe igho amangʼana ghano maraika yaabhatëëbhëri, agha omoona uyö. 18Abhantö bhonswe igho bhano bhaaighuurë ghayö abharëësya bhaaghambirë, bhakaroghoora bhököngʼu. 19Kasi Maryamu umwene, akakira nagho mo-nkoro iyaaye. Akabha araghaitegherra. 20Ho bhoono abharëësya bhayö bhaakyörrë, bharatöönia Waryobha na ukumukumya ko-ghonswe igho, ghano bhaaighuurë, na ghano bhaarööshë. Ko bhoora, bhuyö bhaatëëbhiibhwi, mbo ghaarë.

21Hano omoona uyö yaahikiri sinsikö monaane, akasaarwa. Bhakamoroka igha Yëësu. Iriina riyö, n-deera yaarökirwë na maraika kora nyakuwaabho ataraamwimökërya enda.

Yëësu arahirwa mu-risengerro irya Waryobha

22Ho bhoono yaahikirë enkaagha iya okosendoorwa ukwa Yusufu na Maryamu kya igho amaraghërryö agha Mosa ghaaraghërryanga. Bhakahira Yëësu Yërusarëëmu,#2:22a Yërusarëëmu. Maaha mo-faharaasa. okore bhamotoore mbere iya Omonene Waryobha.#2:22b Maaha mo-ketabho ikya Amangʼana agha Abharaawi 12:2-4. 23Mbaakörrë igho, ko bhoora yaarenga yandëkirwë mo-maraghërryö agha Omonene Waryobha igha, “Omoona uwa ikishaasha omotangi, ni-igha abhe ömöhörëëru ko-Monene Waryobha.”#2:23 Maaha mo-ketabho ikya Ukurishoka 13:2, 12, 15. 24Engʼana iyëndë eno yaaghërrë bhakaghya Yërusarëëmu, nu-kuruusya ikimwenso, okore bhahekerani amaraghërryö agha Omonene Waryobha agha ukwirabhya. Amaraghërryö ghayö gharaghamba igha, “Muruusi ikimwenso ikya ibhighuuti bhibhërë, handë amaana abhërë agha ibhighuuti.”#2:24 Maaha mo-ketabho ikya Amangʼana agha Abharaawi 12:6-8.

25Yaare-ho ömöntö nyabhorebhe Yërusarëëmu hayö, ono yaabherekerwanga igha Simeoni. Ömöntö uyö, yaaingʼarëëyë ku-Waryobha kora m-möntö uwa heene yaarë. Yaaighombanga amaahe ököröörisibhwa ukwa Abhaisiraëri. Umwika Ömöhörëëru hamwë yaarë nawe. 26Okanyoora Umwika Ömöhörëëru amötëëbhëri igha, tarikwa igho atarööshë Kiristo uwa Omonene Waryobha. 27Simeoni uyö, akaghya mo-bhogho ubhwa risengerro irya Waryobha,#2:27 Mo-bhogho ubhwa risengerro irya Waryobha. Muyö mo Abhayahudi bhaamwenseranga-mo Waryobha. Mbaaghyanga-mo okosaasaama hano sinsikö isya sinyangi syaahikanga. Maaha mo-faharaasa engʼana, Risengerro irya Waryobha. atangatirwë na Umwika Ömöhörëëru. Akanyoora-ho abhaibhöri abha Yëësu bharahira omoona mu-risengerro, okore bhakore bhono amaraghërryö ghaaraghërryanga. 28Akaghegha omoona mo-mabhoko aghaaye na eno aratöönia Waryobha igha,

29“Bhoono Omonene ömötöngi uwa bhyonswe igho,

untighe öni omoghorwa uwaaho, nkwe ko-morembe

kya bhono waantëëbhëri.

30Ko bhoora ndööshë öbhötöörya ubhwaho.

31Öbhötöörya bhuyö, mbwo ösëëmëri bhomaahwe na abhantö bhonswe igho.

32Öbhötöörya bhuyö, mbwo obhorabhu

bhono bhoraamorekere Abhakyaro, bhamanye.

Na ghwiki, abhantö abhaaho Abhaisiraëri

bhanyoore emerengaari, gheno gheraaghere bhatöönibhwi.”

33Amangʼana agha omoona uyö ghano Simeoni yaaghambirë, ngaaröghöörri abhaibhöri abha Yëësu. 34Simeoni akabhangʼoora, akatëëbhya Maryamu nyakuwaabho Yëësu igha, “Ighwa mbe! Omoona ono, Waryobha yaamösëëmya igha, narighwësya Abhaisiraëri abhaaru, na ghwiki nariinyökya Abhaisiraëri abhandë abhaaru. Narebha ekemanyërryö, ikya abhantö ukunyeerana senkaani. 35Ku bhuyö, amaitegherro ghano ghabhisirwë mo-senkoro isya abhantö, ngaremanywa aharabhu igho. Na uwe Maryamu, nuriighwa öbhörrö bhököngʼu mo-nkoro iyaaho kya ono öbhëtirwë na umushonge.”#2:35 Amangʼana ghayö ensonga yaamo ni-igha, arighwa öbhörrö ko okohanekwa na ukwitwa ukwa Yëësu.

36Na ghwiki yaare-ho umukungu ömörööti ono yaabherekerwanga igha Ana. M-mwisëkë uwa Fanwëri yaarë, uwa ekabhira iya Asheeri. Ana uyö, yaaikaayë na mushaasha uwaaye imyoka muhungatë igho, mushaasha uwaaye akakwa. 37Akaikara musinö ighoigho okohekera imyoka merongo monaane na inye. Na yaaikaranga mo-bhogho ubhwa risengerro irya Waryobha muyömuyö arasaasaama na ukwisasa ibhyakorya ubhutikö na omobhasö. 38Hano Simeoni yaashumaashanga na Maryamu, Ana yaaimërëëyë haangʼë hayö. Akasimya ukukumya Waryobha enkaagha iyöiyö. Akaraareka amangʼana agha omoona uyö ko-bhantö bhonswe igho bhano bhaaghanyanga igha, Waryobha naritungurya Yërusarëëmu.

39Hano Yusufu na Maryamu bhaamarrë okokora ghonswe igho ghano amaraghërryö agha Omonene Waryobha ghaaraghërryanga, bhakakyora waabho mo-mokowa ughwa Ghariraaya, mu-mughi ughwa Nazarëëti. 40Omoona uyö akakiina, akahera, akabha na singuru, obhongʼaini, na örööbhö urwa Waryobha.

Yëësu mu-risengerro irya Waryobha

41Abhaibhöri abha Yëësu mbaaghyanga Yërusarëëmu ku-nyangi iya Epasaka#2:41 Epasaka. Maaha mo-faharaasa. imyoka ghyonswe igho. 42Hano Yëësu yaahikiri imyoka ikömi na ibhërë, bhakatiira nawe ukughya ku-nyangi, kya igho eteemo iyaabho yaarë. 43Hano inyangi yaahööyë, abhaibhöri abha Yëësu bhakakyora yeeka. Kasi umwene akatighara Yërusarëëmu. Abhaibhöri abhaaye tebhaamanyirë engʼana iyö hë. 44Mbaakanyanga igha, n-hamwë arë nabho, mo-bhantö bhayö bhaaghendanianga hamwë nabho ukukyora ka. Hano bhaaghëndirë igho, urusikö rokaheta bhataraamomaaha, bhakasimya okomotonera mo-bhahiiri bhaabho, na mo-bhasaani abhaabho. 45Hano yaabhabhörrë, bhakakyora Yërusarëëmu ukumutuna. 46Urusikö urwa katatö, bhakamunyoora arëngë mo-bhogho ubhwa risengerro irya Waryobha. Yaarenga aikaayë ghatëghatë iya abhëëghya abha amaraghërryö agha Mosa arabhaitegherra, na okobhabhöörya amangʼana. 47Abhantö bhonswe igho bhano bhaaighuurë kya igho yaaghambanga, bhakaroghoora bhököngʼu, ko okoghera iya obhomanyi ubhwaye ubhwa amangʼana, na okohonshora ukwaye.

48Hano abhaibhöri abhaaye bhaamörööshë, abheene bhonswe bhakaroghoora. Nyakuwaabho akamöbhöörya igha, “Ë, moona uwaane! N-kwakë ötökörrë igho? Öni na suwëënyu twaarë tohahirë bhököngʼu hano twaarë ukukutuna.”

49Umwene akamohonshora igha, “N-kwakë mwaarë kuntuna? Nko okoghamba igha, temwaarë momanyirë igha, ni-igha mbe mu-risengerro irya Taata?” 50Kasi abhaibhöri abha Yëësu, tebhaamanyërrëëyi ensonga iya rihonshoro riyö hë.

51Mbe, akangʼaaraara na abhaibhöri abhaaye ukughya Nazarëëti, yaabhasookanga. Nyakuwaabho akaitegherra amangʼana ghayö ghonswe igho, akakira nagho mo-nkoro iyaaye. 52Yëësu akaghëndërrya ukukiina, akahera, akabha na obhongʼaini. Yaatëghëryanga Waryobha, na abhantö.

Currently Selected:

Ruuka 2: ssc

Highlight

Copy