Ruuka 1

Ubhwandëki ubhwa Ëkëbhörërryö

1Omosookwa Teofiro uwëëtö, abhantö abhaaru bhaakora omotono ughwa ukwandeka amangʼana ghano ghaakörrwë mö-bhëëtö. 2Mbaandëkirë amangʼana kya ghaara twaatëëbhiibhwi na bhano bhaagharööshë ukurwa okosemoka. Abhantö bhayö, m-baara bhaaraarekanga engʼana iya Waryobha. 3Öni wonswe naabhöörërëëyi bhuuya amangʼana ghayö, ku bhuyö ndööshë igha nkwandekere bhuuya amangʼana ghayö, 4okore omanyërri obhoheene ubhwa amangʼana ghano wëëghibhwa.

Öbhörööti ubhwa ukwebhorwa ukwa Yohana Omobhatiisya

5Yaare-ho ömösëngëri#1:5a Ömösëngëri. Maaha mo-faharaasa engʼana, Abhasëngëri. ono yaabherekerwanga igha Zakaria, ko-nkaagha eno Herode#1:5b Herode. Maaha mo-faharaasa engʼana, Herode Ömökörö. yaarë omokama uwa Yudea. Zakaria uyö, nu-uwa rikomo irya öbhösëngëri ubhwa Abhiya yaarë. Na Ërizaabhëti mokaaye, wonswe nu-uwa eka iya ömösëngëri Haruuni yaarë. 6Bhonswe igho bhabhërë bhayö, m-bantö abha heene bhaarë ku-Waryobha. Na ko okoghoota amaraghërryö na imighiro ighya Waryobha, tebhaarë na isoro hë. 7Kasi bhoono, tebhaarë na omoona hë, ko bhoora Ërizaabhëti m-moghomba yaarë, na waanyöörrë bhonswe igho bhaghötirë.

8Urusikö urwöndë, Zakaria yaakoranga emeremo ighya öbhösëngëri ku-Waryobha, ko bhoora nu-rwiru urwa rikomo iryaye rwaarë. 9Ko okorengʼaana na seteemo isya öbhösëngëri kya igho syaarë, ekekoobhwe kekaghwera Zakaria, okore asohe mu-nyumba iya Omonene Waryobha, ahootere-mo Waryobha ëkörösö. 10Enkaagha eno Zakaria yaahuutanga ëkörösö, abhantö abhaaru mbaaikomaini kebhara hayö, bharasaasaama-ho Waryobha.

11Kamwë igho, maraika uwa Omonene Waryobha#1:11 Maraika uwa Omonene Waryobha. Maaha mo-faharaasa. akamobhooshokera muyö. Maraika uyö, yaarenga aimërëëyë bhoryo ubhwa riighyö irya okosambera-ko ëkörösö. 12Bhuyö Zakaria yaamörööshë igho, akaitakya, akoobhoha bhököngʼu!

13Kasi maraika uyö akamötëëbhya igha, “Uwe Zakaria, otakoobhoha. Engʼana eera waasaasaamirë Waryobha, aighuurë. Ku bhuyö, mokaaho naraakwebhorre omoona uwa ikishaasha, omoroke igha Yohana. 14Omoona uyö nareghera mushomerwe bhököngʼu, na ukwebhorwa ukwaye, nkoreghera abhantö abhaaru bhashomerwe. 15Ko bhoora Omonene Waryobha narimwitengʼera abhe omonene. Omoona uyö atakaasha ukunywa idivai#1:15a Idivai. Maaha mo-faharaasa. kora hake hë, handë bheno bhekoghoota kya amarwa. Ko bhoora naretangatwanga na Umwika Ömöhörëëru#1:15b Umwika Ömöhörëëru. Maaha mo-faharaasa. akërëngë mo-nda iya nyakuwaabho. 16Narekora Abhaisiraëri abhaaru bhahonshokere Waryobha Omonene uwaabho. 17Enkoro iyaaye na obhotoro ubhwaye, mberebha kya ibhya Ëriya.#1:17 Ëriya. Nö-mörööti uwa kare ono Abhayahudi bhaaitengʼeranga igha, Ëriya uyö we akaatangatirë ukuusha, okore asëëmëri Kiristo enshera. Maaha mo-ketabho ikya 1 Abhakama ekesosa ikya 17 okohekera 2 Abhakama ekesosa ikya 2. Maaha mo-ketabho ikya Maraaki 3:1, 4:5-6. Naretangatera Omonene, okore amösëëmëri abhantö. Ko bhoora nareghera senkoro isya abhaibhöri sighwerrane na isya abhaana abhaabho. Narekora abhamangarru bhakyore ko-bhongʼaini ubhwa abhantö abha heene ko-Monene Waryobha.”

18Ho Zakaria yaabhöörri maraika uyö igha, “Bhoono ghayö iyakë gharaabhe! Rëndë mbe öni na mokaane, bhonswe igho twaghota.”

19Maraika uyö akamohonshora igha, “Nö-öni Ghabhuriëri. Nö-öni nkwemerra haangʼë na Waryobha. Ku bhuyö Waryobha antömirë ku-uwe, okore nköntëëbhi engʼana inshiiya eno. 20Kasi ko bhono otakumiri amangʼana aghaane, noraabhe rimuumu. Tootore okoghamba hë, okohekera hano engʼana iyö erehekerana. Na nerebha ko-nkaagha yaako.”

21Enkaagha iyö, abhantö bhano bhaaghanyanga Zakaria kebhara hayö, bhakaroghoora bhono yaatëghëtirë ukurwa mu-nyumba iya Waryobha muyö. 22Hano yaarishökirë, tiyaatörrë ukushumaasha nabho hë. Akasimya ököbhöörökërrya na amabhoko. Bhakangʼura kamwë igho igha, arööshë amamaaho#1:22 Amamaaho. Amangʼana ghano ghwakweshera ömöntö araayë, kiyö ne-kerooto. Kasi ghano ghakumweshera ataraayë ghayö ngo amamaaho. mu-nyumba iya Waryobha. Akaghëndërrya okobha rimuumu.

23Hano urwiru urwaye urwa okokora emeremo mu-nyumba iya Waryobha rwaahööyë, akakyora yeeka. 24Hano ghayö ghaahëtirë, Ërizaabhëti mokaaye akaimökya enda, akaibhisa mu-nyumba imyëri etaano, araghamba igha, 25“Omonene Waryobha we ankörëëyë ghano. Anhiitirë, kora anduusiiyi-ho sënsöni seno naarë nasyo mo-bhantö.”

Öbhörööti ubhwa ukwebhorwa ukwa Yëësu

26Hano enda iya Ërizaabhëti yaahikiri imyëri esansabha, Waryobha akatoma maraika Ghabhuriëri aghi mo-mokowa ughwa Ghariraaya mu-mughi ughwa Nazarëëti. 27Akaghya ku-mwisëkë intindë, ono yaabherekerwanga igha Maryamu. Maryamu uyö, yaarenga aghambëëywë öbhökwë na Yusufu. Yusufu uyö, nu-uwa eka iya omokama Daudi#1:27 Daudi. Maaha mo-faharaasa. yaarë. 28Mbe, maraika akaghya ko-Maryamu, akamötëëbhya igha, “Ndakökëërya uwe ono wangʼoorwa. Omonene Waryobha hamwë arë na uwe.”

29Hano Maryamu yaaighuurë amangʼana ghayö, akaroghoora bhököngʼu. Akaibhöörya igha, “Kana! Eno yo në-nkëërya kë?”

30Kasi maraika uyö akamötëëbhya igha, “Uwe Maryamu otakoobhoha. Ko bhoora örööbhö urwa Waryobha nku-uwe rörë. 31Maaha mbe, noraaimöki enda, webhore omoona uwa ikishaasha, omoroke igha Yëësu. 32Narebha omonene. Narebherekerwanga igha, Omoona uwa ono arëngë kighörö iya bhyonswe igho. Omonene Waryobha naremokora abhe ömötöngi uwa Abhaisiraëri kya igho Daudi ömökörö uwaaye yaarë. 33Narenagha okobha Omokama uwa eka iya Yaakobho, amakora ghonswe igho. Obhokama ubhwaye tebhorebha nu-muhiko hë.”

34Maryamu akabhöörya maraika uyö igha, “Amangʼana ghayö iyakë gharaabhe. Na mbe ni-ntindë ndë?”

35Maraika akamohonshora igha, “Umwika Ömöhörëëru narikwitoomera, na obhotoro ubhwa Waryobha ono arëngë kighörö iya bhyonswe igho, mburikukundikirya kya ikiiriiri. Ku bhuyö omoona ono uryebhora, narebha ömöhörëëru. Narebherekerwanga igha Omoona uwa Waryobha.#1:35 Omoona uwa Waryobha. Maaha mo-faharaasa. 36Kora umuhiiri uwaaho Ërizaabhëti ono bhaaghambanga igha m-moghomba, ne-nda arë! Nokaanyoora m-mukungu, kasi aana enda iya imyëri esansabha. 37Ni-igho gharë, ko bhoora ku-Waryobha, teeho engʼana ënköngʼu hë.”

38Maryamu akamohonshora igha, “Öni nö-mököri uwa emeremo uwa Omonene Waryobha ndë. Ghabhe ku-öni kya bhuyö oghambirë.” Maraika uyö akatanora, akaghya.

Maryamu araghya ökökëërya Ërizaabhëti

39Ko-nkaagha iyöiyö, Maryamu akemokera-mo këmwë, ukughya ko-Ërizaabhëti mokaa Zakaria. Akaghya mu-singuku isya Yuuda, akahika mu-mughi ghono Zakaria yaamënyirë-mo. 40Akasoha mu-nyumba, akakëërya Ërizaabhëti. 41Ni-igho Ërizaabhëti yaaighuurë ënkëërya iya Maryamu, omoona akahooya mo-nda iyaaye. Ërizaabhëti akatangatwa na Umwika Ömöhörëëru. 42Mbe, akasimya okoghamba bhököngʼu igha, “Mo-bhakari bhonswe igho, nu-uwe wangʼoorwa. Na omoona ono uryebhora, wonswe yangʼoorwa. 43Öni n-kë neenakyo! Kora nyakuwaabho Omonene uwëëtö aishirë ökönkëërya? 44Ni-igho nighuurë ënkëërya iyaaho igho, omoona yahooya mo-nda iyaane ku ukushomerwa. 45Uwe wangʼoorwa, ko bhoora waaikërëëyi amangʼana agha Omonene Waryobha ghano yaakötëëbhëri igha ngaraabhe.”

Rirëëtyö irya Maryamu

46Maryamu akaghamba igha,

“Enkoro yaane nkukumya ërë Omonene Waryobha,

47kora nkushomerwa ërë na Waryobha, Ömötöörya uwaane.

48Ko bhoora nokaanyoora igha ömöntö omoke ndë,

kasi anhiitirë, öni omoghorwa uwaaye.

Ku ukurwa reero, abhantö abha amakora ghonswe igho,

mbaraamberekerenga igha, uwa obhongʼoore.

49Waryobha uwa obhotoro, ankörëëyë amangʼana agha ököröghöörya.

Eteemo iyaaye, në-hörëëru.

50Nköghëndërrya arë ukwabhera abhantö bhano bhakumwighwera,

ko makora ghonswe igho.

51Kasi abha ikiheemere mo-senkoro isyabho,

nkobhanyaraghania arë ko obhotoro ubhwaye.

52Abhatöngi abha obhotoro obhonene, abharuusiri öbhötöngi ubhwabho.

Kasi abhahaabhu abhainyökëri.

53Aighötëri bhano bhasëngëëyë.

Kasi abhaamë, abhakënyëri amabhoko masa.

54Atöörri Isiraëri ömököri uwa emeremo uwaaye,

ko bhono ahiitirë okobhakorra ikyabhera.

55Ni-igho yaarenga araghaini abhakörö abhëëtö,

Ibhurahimu na abheebhorwa abhaaye, ko makora ghonswe igho.”

56Mbe, Maryamu akaikara wa Ërizaabhëti hayö imyëri etatö. Ho bhoono akamanya ukukyora yeeka waabho.

Ukwebhorwa ukwa Yohana Omobhatiisya

57Hano sinsikö isya ukwebhora ukwa Ërizaabhëti syaahikirë, akeebhora omoona uwa ikishaasha. 58Hano bhahiiri bhaaye na abhamenyani abhaaye, bhaaighuurë kya bhono Omonene Waryobha yaabhëëyë Ërizaabhëti, bhakashomerwa hamwë nawe.

59Hano omoona uyö yaahikiri sinsikö monaane, bhakamuhira okosaarwa. Bhaatunanga okomoroka igha Zakaria, iriina irya suwaabho. 60Kasi nyakuwaabho akaanga, akaghamba igha, “Ti-igho hë. Arokwe igha Yohana.”

61Bhakamohonshora igha, “Ndarra mo-bhahiiri abhëënyu bhonswe igho, taaho ono aana iriina riyö hë?”

62Bhoono mbe, bhakabhöörya Zakaria ku ukumwörökërrya na amabhoko, abhatëëbhi iriina reno akutuna okoroka omoona uwaaye. 63Zakaria akabhasabha orobhaau, hano bhaamohaayë, akandeka-ko igha, “Iriina iryaye ni-igha Yohana.” Bhakaroghoora bhonswe igho.

64Örörëmë urwaye rokaghashoka kamwë igho, akasimya ukushumaasha aratöönia Waryobha. 65Abhamenyani abhaaye bhonswe igho, bhakaroghoora bhököngʼu.

Engʼana iyö, ekaromaana bhököngʼu mu-mighi ghyonswe igho, ighya mu-singuku isya ikyaro ikya Yudea. 66Abhantö bhonswe igho bhano bhaaighuurë engʼana iyö, bhakabha bharaibhöörya mo-metwe ighyabho igha, “Kana, omoona ono iyakë arebha?” Mbaaibhöörri igho, ko bhoora obhotoro ubhwa Omonene Waryobha, hamwë bhwaarë na omoona uyö.

Rirëëtyö irya Zakaria

67Zakaria, suwaabho omoona uyö, akatangatwa na Umwika Ömöhörëëru, akaghamba amangʼana agha öbhörööti igha,

68“Akumibhwi Omonene uwëëtö, Waryobha uwa Abhaisiraëri,

ko bhoora atotaarëëyë bhëëtö abhantö abhaaye, atutunguuyi.

69Atohaayë Ömötöörya uwa obhotoro,

ukurwa mo-eka iya Daudi ömököri uwaaye uwa emeremo.

70Akörrë kya bhono yaaraghaini kare iyö,

okohetera ko-bharööti abhaaye abhahörëëru.

71Yaaraghaini igha, nakaaghërrë tohone ukurwa ko-bhabhisa abhëëtö,

na mo-mabhoko agha bhonswe bhano bhatörëghirë.

72Ghwiki yaaghambirë igha, naraabherenga abhakörö abhëëtö,

na ukuhiita Imuuma#1:72 Imuuma. Maaha mo-faharaasa. iyaaye ëhörëëru.

73Yaatyanëëyë ömökörö uwëëtö Ibhurahimu igha,

74-75naritutungurya ukurwa mo-mabhoko agha abhabhisa abhëëtö,

okore tomosaasaamenga totakoobhoha,

kö öbhöhörëëru na obhoheene,

sinsikö syonswe igho isya öbhöhöru ubhwëtö.

76Bhoono uwe moona uwaane, abhantö mbarekobherekeranga igha,

ömörööti uwa Waryobha ono arëngë kighörö iya bhyonswe igho.

Ko bhoora noretangatera Omonene Waryobha,

ömösëëmëri enshera iyaaye.

77Nooreraarekera abhantö abhaaye igha,

mbarëtööribhwa ku ukwabherwa ëbhëbhë ibhyabho.

78Waryobha uwëëtö atwabhëëyë,

ko okotoreetera öbhötöörya ubhwaye ukurwa mu-ryobha,

kya emerengaari ighya iryobha,

79ngeremorekera bhonswe igho bhano bharëngë mu-kisuntë,#1:79 Bhano bharëngë mu-kisuntë m-bano bhatamanyirë Waryobha. Maaha mo-ketabho ikya Isaaya 9:1-2.

na bhano bhakoghania uruku.

Ghwiki mboretotangata tohete ko-nshera iya omorembe.”

80Omoona uyö akakiina, akahera, akabha na singuru mo-nkoro iyaaye. Hano yaabhaayë ömöntö ömökörö, akaghya okomenya ku-riköngö. Akaikara-yo okohekera enkaagha iyaaye eno yaaiyörökëri ko-Bhaisiraëri.

Currently Selected:

Ruuka 1: ssc

Highlight

Copy