Amangʼana agha Abhatomwa 3

Peetero arahwënia ritengʼo

1Urusikö urwöndë, Peetero bhaana Yohana, bhaaghëëyë mo-bhogho ubhwa risengerro irya Waryobha, saa kenda isya omobhasö. Enkaagha iyö, yo enkaagha eno Abhayahudi bhaasaasaamanga Waryobha. 2Mo-bhogho hayö haangʼë na ekesaku keno kyaabherekerwanga igha Ikiiya, yaarenga-ho ömöntö ritengʼo ukurwa hano yaaibhööywë. Yaagheghwanga na abhantö kera sikö, bhano bhaamuhiranga, bhamotoora haangʼë na ekesaku kiyö, okore asabhe seehera ko-bhantö bhano bhaasohanga mo-bhogho ubhwa risengerro.

3Ömöntö uyö hano yaarööshë Peetero bhaana Yohana bharatuna okosoha mo-bhogho ubhwa risengerro irya Waryobha, akabhasabha bhamohaane-ko seehera. 4Peetero bhaana Yohana, bhakamomaaherra bhököngʼu, Peetero akamötëëbhya igha, “Tomaaherre!” 5Akabhamaaherra, eno araitengʼera igha, mbamohaana-ko kyokyonswe keera.

6Kasi Peetero akamötëëbhya igha, “Teneena ehera handë esahaabhu hë, kasi keno neenakyo, nkyo ndaakohaane. Ku iriina irya Yëësu Kiristo uwa Nazarëëti, ni-igha wemerre oghende!” 7Peetero akamoghoota okobhoko ukwa bhoryo, akamwimërrya. Hayö na hayö igho, simbuuswë na ebherenge ibhya amaghörö agha ritengʼo, bhekaanyoora singuru, 8akatuumatuuma, akasimya okoghenda umwene igho ataghöötërrëywë. Akasoha mo-bhogho ubhwa risengerro irya Waryobha hamwë na bhaabho Peetero na Yohana, eno aratuumatuuma na ukukumya Waryobha. 9Abhantö bhonswe igho bhakamomaaha araghenda na ukukumya Waryobha. 10Hano bhaamanyirë igha, no-oora akwikaranga arasabherra mo-kesaku ikya risengerro irya Waryobha, keno kyaabherekerwanga igha Ikiiya, bhakaroghoora bhonswe igho keno kyaabhaayë kö-möntö uyö.

Peetero arëëghya abhantö mo-bhogho ubhwa risengerro

11Enkaagha iyö ömöntö uyö yaaisunganga bhaabho Peetero na Yohana, abhantö bhonswe igho bhakabhakenyerra, bhararoghoora bhököngʼu. Ahasë hano bhaabho Peetero na Yohana bhaarë, haabherekerwanga igha, Ëghösöryö iya Seremaani.

12Hano Peetero yaarööshë abhantö bhayö, akabhatëëbhya igha, “Bhare Abhaisiraëri bharikyane, n-kwakë mokoroghorra engʼana iyö? Moratotongʼaarra, nkokanya mörë igha no-bhotoro ubhwëtö mbwo bhuhwënëri ömöntö ono? Handë igha, öbhöntö ubhwa heene ubhwëtö mbwo bhöghërrë aghëndirë? 13Ti-igho hë! Waryobha uwa abhakörö abhëëtö, Ibhurahimu, Isaaka, na Yaakobho, we atöönëri Yëësu, ömököri uwaaye uwa emeremo, Yëësu uyö, we amuhwënëri. Mbe, Yëësu uyö, we oora mwaahirrë igha abhotorrwe ikiina ikya ukwitwa! Kora hano Piraato yaatunirë igha amohaatere, bhëënyu mokaanga, 14mokasabha Piraato igha abhatashorre umwiti, kasi atakaabhatashorra Yëësu. Mokaanga Yëësu Ömöhörëëru uwa Waryobha, ono ingʼarëëyë ku-Waryobha. 15Ku bhuyö mokamwita, na mbe we esemoko iya öbhöhöru bhwonswe igho hano bhöhëkëëyë! Kasi Waryobha akamuryökya ukurwa mo-bhaku, na bhëëtö m-bëëtö abhaimërërri abha ukuryoka ukwaye. 16Ömöntö uyö mokomaaha hano, mmomomanyirë bhuuya. Ahwëniibhwi ko bhono akumiri iriina irya Yëësu. Nu-mukumo ughwaye ku-Yëësu ngwo ghökörrë ahwënirë kya igho mokomaaha.

17“Bhoono abhahiiri abhëëtö, ghayö ghonswe igho mwaakörëëyë Yëësu, bhëënyu na abhanene abhëënyu, nemanyirë igha, mwaakörrë motamanyirë keno mwaakoranga. 18Kasi ghayö ngaaikörrë, okore Waryobha ahekerani amangʼana ghaara yaaraarëkirë kare iyö okohetera ko-bharööti abhaaye bhonswe igho igha, Kiristo uwaaye areeteeswa. 19Ku bhuyö, mohongore ëbhëbhë ibhyënyu, mukyore ku-Waryobha, abharuusiri-ho ëbhëbhë ibhyënyu, okore siishe senkaagha sensambaaroku, isya okobha-ho ukwa Omonene. Hayö ho Waryobha araabhamuunyi ko okotoma Yëësu Kiristo. 20Uyö we yaahorwa ukurwa okosemoka ko okoghera iya bhëënyu. 21Ni-igha Yëësu atighare mu-ryobha, okohekera enkaagha eno Waryobha arekora ëbhëntö bhyonswe igho mu-kyaro, bhebhe ebhehya, kya bhono yaaghambirë ukurwa kare okohetera ko-bharööti abhaaye abhahörëëru.

22“M-maheene Mosa#3:22 Mosa. Maaha mo-faharaasa. yaaghambirë igha, ‘Omonene Waryobha uwëëtö, arebhaahorra ömörööti kya öni mö-bhëënyu muyö. Mobhenga moramwitegherra bhuuya, kera engʼana eno arebhatëëbhyanga. 23Ömöntö wowonswe ono ataritegherra ömörööti uyö, narighirwa na ukusikibhwa amakora ghonswe igho.’#3:22-23 Maaha mo-ketabho ikya Eheetoko iya Etoraati 18:15, 18:18-19. 24Kora abharööti bhonswe igho, ukusimirya Samwëri na abhandë bhano bhaamörööbhëëyë, mbaaröötirë amangʼana ghano ghakwikora ku-sinsikö seno. 25Amaraghanio ghano Waryobha yaaraghaini ko okohetera ko-bharööti, n-ko okoghera iya bhëënyu. Kora nkosanga mörë imuuma#3:25a Imuuma. Maaha mo-faharaasa. eno Waryobha yaakörrë na abhakörö abhëënyu. Waryobha yaaraghaini Ibhurahimu#3:25b Ibhurahimu. Maaha mo-faharaasa. igha, ‘Ko okohetera urwebhoro urwaho, abhantö abha ibhyaro bhyonswe igho hano bhëhëkëëyë, mbarengʼoorwa.’#3:25c Maaha mo-ketabho ikya Okosemoka 22:18, 26:4. 26Ku bhuyö, hano Waryobha yaaryökëri Yëësu ömököri uwaaye uwa emeremo, nkö-bhëënyu yaamötömirë mbere, okore abhangʼoore ko okobharuusya bhonswe igho mo-bhoghogho ubhwënyu bhono moonabho.”

Currently Selected:

Amangʼana agha Abhatomwa 3: ssc

Highlight

Copy