Amangʼana agha Abhatomwa 2

Ukuusha ukwa Umwika Ömöhörëëru urusikö urwa Pentekosite

1Hano inyangi iya Abhayahudi yaahikirë, eno bhaabherekeranga igha Pentekosite,#2:1 Pentekosite. Maaha mo-faharaasa. waanyöörrë abheegha abha Yëësu bhonswe igho, bhaikomaini hamwë. 2Enkaagha eno waanyöörrë bhaikaayë muyö, kamwë igho, bhakaighwa okoherra ukwa rikama, reraherra bhököngʼu. Omoherro ghuyö, ghwaarwërëëyë mu-ryobha, ghokeeshora mu-nyumba yonswe igho, iyö bhaare-mo. 3Kamwë igho, bhakamaaha ëbhëntö kya ëbhëmörë ibhya omorro, bhekabhaikarra bhonswe igho. 4Abhantö bhayö bhonswe igho, bhakaishöribhwa Umwika Ömöhörëëru, bhakasimya okoghamba ebheghambo ebhehya, kya bhono Umwika Ömöhörëëru yaabhahaayë obhotoro bhuyö.

5Bhaare-ho Abhayahudi Yërusarëëmu hayö, bhano bhaasookanga Waryobha. Abhantö bhayö, bhaarwërëëyë kera ahasë ko-kebhara kono. 6Hano abhantö bhayö bhaaighuurë ikituri, bhakaasha-ho abhaaru, kera ömöntö mo-bhantö muyö akaroghoora, ko bhoora yaaighuurë ekeghambo ikyaye, keraghambwa na abhantö abha Yëësu bhayö. 7Engʼana iyö yaabharöghöörri bhököngʼu, bhakateebhania igha, “Momaahe mbe, bhano bhonswe igho bhakoghamba hano te-Bhaghariraaya? 8Bhoono n-kë kebhaayë, bhëëtö bhonswe igho toraighwa bharaghamba ko-bheghambo ibhyëtö? 9Mö-bhëëtö mono, bhaamo abhantö abha ukurwa mu-kyaro ikya Abhapaati, Abhamëëdi, na Abhaeramu. Bhano bhaarwërëëyë Mesopotamia, Yudea iyö, Kapadokia, Ponto na Asia Enke,#2:9 Asia Enke. Yo bhoono igho ekobherekerwa igha Bhuturuki. 10Furighia, Pamfiria, na kora Miisiri yonswe. Bhaaho bhano bhaarwërëëyë sembaara isya Ribhiya seno sërëngë haangʼë na umughi ughwa Kirene. Na abhaghëni abhandë bhano bhaarwërëëyë Ruumi. Abhandë, m-Bayahudi ekenaina, na abhantö abhandë, te-Bhayahudi hë, kasi bhaasoha mu-diini iya Ikiyahudi. 11Abhandë, m-Bakerete, na abhandë m-Baarabhu. Na bhëëtö bhonswe igho, toraighwa abhantö bhano bharaghamba mo-bheghambo ibhyëtö, bharakumya Waryobha ko mangʼana amarito ghano akörrë.”

12Abhantö bhonswe igho bhano bhaarë hayö, bhakaroghoora bhököngʼu, tebhaamanyirë keno kyaabhaayë hë. Bhakabhoorania igha, “Kana bhamurë ensonga iya amangʼana ghano në-ëëhë?” 13Kasi abhandë bhakasimya okokaara abhantö abha Yëësu bhayö igha, “Ni-divai ebhaghöötirë.”

Obhoraarëki ubhwa Peetero urusikö urwa Pentekosite

14Ho bhoono Peetero yaaimërëëyë hamwë na abhatomwa bharikyaye ikömi na ömwë. Akakongera abhantö bhayö bhököngʼu igha, “Bhëënyu Abhayahudi abha Yërusarëëmu hano, na bhëënyu Abhayahudi bhano murwërëëyë mu-bhyaro ibhyëndë, mwitegherre bhuuya, mböörökërri engʼana eno. 15Motakaakanya igha abhantö bhano na-marwa ghabhaghöötirë, tebhanyööyë marwa hë. Bhoono bhëënyu temokomaaha igha n-saa taatu ëkërë iya nyinkyo? 16Kasi amangʼana ghano, n-gaara ghaaghambirwë na Waryobha okohetera kö-mörööti Yöëri, haara yaaghambirë igha,

17‘Nendehomerra abhantö bhonswe igho Umwika uwaane, ko-senkaagha isya umuhiko.

Abhaana abhëënyu abha ikishaasha, na abha ikiisëkë, bhareekora öbhörööti,

abhamura abhahiku, mbaremaaha amamaaho,#2:17 Amamaaho. Amangʼana ghano ghwakweshera ömöntö araayë, kiyö ne-kerooto. Kasi ghano ghakumweshera ataraayë ghayö na-mamaaho.

na abhaghaaka, bharerootanga ebherooto.

18Kora abhaghorwa abhaane abha ikishaasha na abha ekekari nendebheterra Umwika uwaane Ömöhörëëru, ko-senkaagha siyö,

bhareekora öbhörööti.

19Ndekora ebheghwa mu-ryobha,

na ekemanyërryö ko-kebhara kono,

abhantö mbaremaaha ebhemanyërryö ibhya amaanyinga na omorro,

na ikitu ikya iryöki iryaru.

20Iryobha ndirisyöribhwa rebhe ikisuntë,

umwëri ngorekangaara kya amaanyinga.

Ghonswe igho ghayö, ngarikora urusikö oronene urwa ubhuhika ubhwa Omonene Waryobha rotaraahika.

21Kera ömöntö ono ukwitengʼera iriina irya Omonene Waryobha, uyö naraatööribhwi.’#2:17-21 Maaha mo-ketabho ikya Yöëri 2:28-32.”

22Peetero akaghëndërrya okoghamba igha, “Bhëënyu bhare Abhaisiraëri, munyitegherre bhuuya! Waryobha yaatöörrë Yëësu uwa Nazarëëti harabhu igho bhöröngë bhwënyu, ko enshera iya amakono, na ebhemanyërryö ibhyaru mö-bhëënyu mono, ghayö mmoghamanyirë bhuuya. 23Yëësu uyö, yaarëëtirwë kö-bhëënyu, ko bhono Waryobha yaamanyirë, na kya bhono yaatunanga ukurwa okosemoka. Kasi bhëënyu mokamohaneka ko-mosarabha, mokamwita, ko okohetera ko-bhantö bhano bhatarë Abhayahudi.#2:23 Abhantö bhano bhatarë Abhayahudi. Ko enshera iyëndë eratora okobha igha, abhantö abhaghogho. 24Kasi Waryobha yaamuryökëri ukurwa mo-bhaku. Akamuruusirya-ho öbhörrö ubhwa uruku, ko bhoora singuru isya uruku, tesekaatörrë okomorebherra hë. 25Kora omokama Daudi wonswe yaaghambirë amangʼana agha Yëësu ghayö igha,

‘Naarööshë Omonene uwaane,

araghëndërrya okobha hamwë na öni sinsikö syonswe igho.

Na ko bhono igha M-boryo bhwane arë,#2:25 M-boryo bhwane arë. Ensonga iya amangʼana ghayö ni-igha Waryobha we ömötöörya uwaane. tinsingisibhwi hë.

26Ku bhuyö enkoro iyaane, nkosambaaroka ërë,

örörëmë urwane, nkukirirrya rörë,

kora ömöbhërë ughwane, nguritengʼera öbhöhöru sinsikö syonswe igho,

27ko bhoora tuntighe mu-kyaro ikya abhaku#2:27 Mu-kyaro ikya abhaku. Maaha mo-faharaasa engʼana, Ikyaro ikya abhaku. hë.

Tuwikërri ömöbhërë ughwa Ömöhörëëru uwaaho, ghughunde hë.

28Öghërrë manyirë enshera iya öbhöhöru,

noraaghere nshomerwe bhököngʼu, ko bhono örëngë haangʼë na öni.’#2:25-28 Maaha mo-ketabho ikya Zabhuri 16:8-11.”

29Peetero akaghëndërrya okoghamba igha, “Abhakumya bharikyane, nkobhatëëbhya ndë neena ubhweseghe igha, Daudi ömökörö uwëëtö yaakwa, akabheekwa. Nanyabhoono embeehera iyaaye n-hano ërë. 30Daudi uyö, m-mörööti yaarë, yaamanyirë igha, Waryobha yaamoraghaini ku ukumutyanera igha, nakaahaayë ömöntö uwa eka iya omokama Daudi, obhokama ubhwa Daudi. 31Daudi yaarööshë amangʼana bhono ghakaabhaayë mbere iyö, ku bhuyö, yaashumaashëëyë ukuryoka ukwa Kiristo,#2:31a Kiristo. Uyö we Waryobha yaahööyë igha, atööri abhantö na okobhatonga mo-Bhokama ubhwaye. Maaha mo-faharaasa. igha, takaatighirwë mu-kyaro ikya abhaku hë, handë igha, Waryobha ikërri ömöbhërë ughwa Kiristo ghughunde.#2:31b Maaha mo-ketabho ikya Zabhuri 16:10. 32Yëësu uyö, yaaryökiibhwi na Waryobha ukurwa mo-bhaku, na bhëëtö bhonswe igho bhano toohano, na-bhaimërërri abha engʼana iyö. 33Waryobha amuriiniri, amökörrë omonene, kora amötöörrë bhoryo ubhwaye. Na Taata Waryobha, akörrë kya bhoora yaaraghaini igha, akaahaayë Yëësu Umwika Ömöhörëëru ko okoghera iya bhëëtö. Ku bhuyö Yëësu atöhömërrëëyë Umwika Ömöhörëëru. Kiyö bhoono nkyo bhëënyu mukwighwa, na ukwimaahera bhëënyu abheene. 34Daudi umwene tiyaarinirë mu-ryobha hë, kasi yaaghambirë igha,

‘Omonene Waryobha yaatëëbhëri Omonene uwaane igha,

“Ikara bhoryo ubhwane hano, ahasë hano hakosookwa bhököngʼu,

35okohekera hano ndekokora otashere hansë abhabhisa abhaaho.” ’#2:34-35 Maaha mo-ketabho ikya Zabhuri 110:1.”

36Peetero akamarërrya ko okoghamba igha, “Ku bhuyö, Abhaisiraëri bhonswe igho, ni-igha momanye bhuuya igha, Waryobha, akörrë Yëësu uyö, okobha Omonene na Kiristo. Na Kiristo uyöuyö, we mwaahanëkirë ko-mosarabha haara, mokamwita!”

37Mbe, hano abhantö bhayö bhaaighuurë amangʼana ghayö Peetero yaaghambirë, bhakanyahaareka bhököngʼu mo-senkoro isyabho. Bhakabhöörya Peetero na abhatomwa bharikyaye igha, “Bhoono bhamurë abhëëtö iyakë tokaakora?” 38Peetero akabhatëëbhya igha, “Kera ömöntö mö-bhëënyu muyö, ahongore ëbhëbhë ibhyaye, abhatiisibhwi ku iriina irya Yëësu Kiristo, okore aabherwe, ahaanwe ituho eno ërëngë igha, nu-Mwika Ömöhörëëru. 39Ku bhuyö momanye igha, Waryobha yaaraghaini ghayö, ko okoghera iya bhëënyu, na abheebhorwa abhëënyu, na Abhakyaro bhano bharëngë hare iyö,#2:39 Abhakyaro bhano bharëngë hare iyö. Ensonga iyaamo eratora okobha igha, abhantö bharëngë hare iyö, handë igha abhantö bhano bharyebhorwa kare iyö. bhonswe igho bhayö, Omonene uwëëtö Waryobha narebhabherekera.”

40Peetero akaghëndërrya okobhakangʼasërrya amangʼana amaaru, agha okobhakaania na okobharaghërrya. Akabhasaasaama ko okoghamba igha, “Mwikërri Waryobha abhatööri, okore murwe mo-rekora righogho reno, motakaasha ukushibhibhwa.” 41Mbe, abhantö kya ëbhëkwë bhitatö, bhakakumya amangʼana agha Peetero, bhakabhatiisibhwa. Abheegha abha Yëësu bhakaaruha bhököngʼu urusikö ruyö.

Obhosangi mo-bheegha abha Yëësu

42Abheegha abha Yëësu bhaanaghirë mö-mëëghyö agha abhatomwa abha Yëësu. Bhaasanganga hamwë omokaate, na okosaasaama Waryobha. 43Abhatomwa abha Yëësu bhaakoranga amakono amaaru, na ebhemanyërryö, kora abhantö bhonswe igho bhaaröghöörrë bhököngʼu, bhakahaha. 44Abhakumya abha Yëësu bhonswe igho mbaarë na öbhömwë, mbasanganga hamwë, na ukutwenerana ëbhëntö bheno bhaarë nabhyo. 45Bhaaghöryanga ëbhëntö ibhyabho, na seehera seno bhaanyooranga-mo, mbaatwenneranga kera ömöntö ko okorengʼaana na obhohabhë ubhwaye. 46Bhaasikananga mo-bhogho ubhwa risengerro irya Waryobha#2:46 Risengerro irya Waryobha. Maaha mo-faharaasa. sinsikö syonswe igho. Bhaasanganga omokaate mu-sinyumba isyabho, na okorya hamwë ibhyakorya bhashömëëywë mo-senkoro isyabho. 47Mbaakumyanga Waryobha, ku bhuyö bhakahanshwa na abhantö bhonswe igho. Kera urusikö Omonene Yëësu yaatööryanga abhantö abhandë. Abhantö bhayö bhaatööriibhwi mbaabhanga hamwë na abhakumya bharikyabho abha esango iyö.

Currently Selected:

Amangʼana agha Abhatomwa 2: ssc

Highlight

Copy