Sir 51
51
1Ai Mukama kandi omugabe, ndyakusiima nkuhimbise,
iwe Ruhanga Omujuni wangye.
Ninsiima eiziina ryawe,
2ahabw'okuba okaba omurinzi wangye kandi omuhwezi wangye.
Okaanyiha omu kuhwerekyerera
n'omu mutego gw'orurimi rurikubeiherera abandi
n'omu kanwa karikugamba ebishuba.
Okaba omuhwezi wangye omu maisho g'abantaahiriire.
3Wanjuna ahabw'obwingi bw'embabazi zaawe
n'ahabw'obukuru bw'eiziina ryawe.
Okaanyiha omu barikunena amaino, abarangariire kummira;
waanyiha omu mikono y'abarikunsherura kuunyita
n'omu kubonabona kwingi okunaayemeire.
4Okaanyiha omu muriro ogwanturukire oku n'oku
gukambuza obwikizo,
n'ahagati y'omuriro ogu ntarahembire.
5Okaanyiha okuzimu omu nda ya Nyamuteza
omu b'endimi z'abarikugamba ebihagaro n'ebishuba.
6Endimi z'abatahikiriire abarikubeiherera abandi omu maisho g'omugabe.
Nkahika aha ncwamba za rufu,
amagara gangye gaahika haihi n'okuzimu owa Nyamuteza.
7Bakanturuka oku n'oku, naabura ow'okumpa emikono.
Naasherura ow'okumpwera, yaabura.
8Bwanyima, ai Mukama, naijuka embabazi zaawe
n'ebi waakozire omu biro bya ira,
n'oku ojuna abarikukutegyereza
okabaiha omu mikono y'abazigu baabo.
9Ntyo naakuhoogyera niinyema omu nsi,
naakushaba ku onyiha omu maino ga rufu.
10Nkeeshengyereza Mukama Ishe wa Mukama wangye,
okutantsigaho omu biro by'okubonabona,
omu bunaku bu hatariho w'okumpa emikono,
akandwanisiza orikwetunguura.
11Ndyaguma mpimbise eiziina ryawe,
nyeshongore eby'okukusingiza ninkusiima.
Okwo kushaba kwangye kukahurirwa,
12ahabw'okuba okanjuna okuhwerekyerera,
waanyiha omu muringo mubi gw'obwehwa matsiko.
N'ahabw'ekyo ndyaguma nkusiime kandi nkusingize,
ntaireho n'okuhimbisa eiziina ryawe, ai Mukama.
Ekijengo ky'okusherura Obwengye
13Obu naabaire nkiri muto, ntakatandikire ngyendo zangye,
nkaba nshaba Obwengye butunu niinyeshengyereza.
14Nkaba mbushabira omu maisho ga Nyaruju
kandi ndyabusherura okuhitsya aha muheru.
15Okwiha aha kurabya okuhitsya aha kuhiisa kw'ebijuma by'emizaabibu,
omutima gwangye gukaba gubushemerererwa.
Ekigyere kyangye kikatoora akahanda kagororokire,
okwiha omu buto naabuza omu kirari.
16Nkatega kakye okutu, naabutunga,
haza naabutungiramu okwegyesibwa kuhango.
17Ntyo naagyenda omu maisho mbwine.
N'ahabw'ekyo ndyaha ekitiinwa ompa obwengye.
18Manya nkamaramaza kugira emitwarize y'Obwengye,
naagira omutima gurikuronda ebirungi,
kandi tindigira bu mpemukire.
19Amagara gangye gakaitanira Obwengye,
naaba ogumire omu mitwarize yangye.
Nkatega eiguru emikono, naatongyeza okutabumanya.
20Nkabutaho omutima, haza ku naayeyerize, naabutunga.
Okwiha aha kutandika bukampaisa okwetegyereza,
n'ahabw'ekyo tindinagiirirwa.
21Omutima gwangye gukagira ekihika ky'okubusherura,
naatunga ekintu kirungi.
22N'ahabw'ekyo Mukama akampa ekiconco ky'orurimi,
naanye ndyarumuhimbisisa.
23Imwe abatakeegyesiibwe, nimumpikye haihi,
mucumbikye omu ishomero ryangye.
24Mbwenu ahabw'enki nimugira ngu
mwine eki murikuburwa omuri ebyo,
kandi ahabw'eki emitima yaanyu eine ekyaka?
25Nkaashamya akanwa naagira nti:
Ebyo bintu nimubyetungire mutabiguzire mpiiha.
26Nimute ebitsya byanyu omu nkomo mubone kwegyesibwa,
kandi okwo kwegyesibwa nikushangwa haihi.
27Nimwereebere oku ntarahendekire,
kwonka nkeetungira ekihuumuro.
28Nimwegyesibwe nimuhayo ekirundo ky'efeeza,
haza eryabatungisa ezaabu nyingi.
29Nkaabaasibwa ki amagara gaanyu gashemerererwa embabazi ze,
mureka kuhemuka mwaba nimumuhimbisa.
30Mukore omurimo gwanyu obunaku obwatairweho butakahikire,
reero obunaku obwa Ruhanga ku burihika,
aryabaha ebihembo byanyu.
Currently Selected:
Sir 51: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.