Mar 10
10
1Yesu, ku yaarugire okwo, yaaza omu kyanga kya Buyudaaya na seeri ya Yorudaani. Ebimbuuro by'abantu byagaruka byamuteeraniraho; nawe yaabeegyesa nk'okwe.
2Abafarisaayo bamwe baamuhika, baamubuuza nibamutega bati: Omu iteeka nikiikirizibwa omushaija kushenda omukazi we? 3Nawe yaabagarukamu ati: Imwe Musa akabaragiira ata? 4Baamugira bati: Musa akaikiriza omushaija kuhandiika ebaruha y'okushenda omukazi we, ngu babone kutaanira kimwe. 5Yesu nikwo kubagira ati: Manya eki yaabahandiikiriire ekyo kiragiro, n'ahabw'okugangaara kw'emitima yaanyu; 6kwonka okwiha omu kutandika kw'okuhangwa, Ruhanga akabahanga omushaija n'omukazi. 7Nikyo omuntu atsigiraho ishe na nyina, akahamira aha mukazi we, 8bombi bakaba omubiri gumwe; baba batakiri babiri kureka omwe. 9N'ahabw'ekyo eki Ruhanga yaateeraine, hatarigira omuntu owaakitaanisa.
10Ku yaagarukire omu nju, abatendekwa be baayongyera kukimubuuza; 11nawe yaabagira ati: Omushaija orikushenda omukazi we, akashwera ondi, aha mukazi we ogwo naaba ashambaine. 12N'omukazi orikwangana, akashwerwa ondi mushaija, nawe biri ashambaine.
Yesu n'abaana bato
(Mat. 19:13-15; Luk. 18:15-17)
13Abantu bakareetera Yesu abaana bato ngu abakwateho; abatendekwa be baabakabukira. 14Yesu ku yaakireebire, kyamugwisa kubi munonga, atyo yaabagira ati: Murekye abaana bato baije, bampikye, mutabazibira; ahabw'okuba abari nk'abo obukama bwa Ruhanga n'obwabo. 15Buzimazima nimbagambira nti: Weena otarikwikiriza bukama bwa Ruhanga nk'omwana muto taributaahamu. 16Atyo yaababumbatira, yaabaha omugisha naabataho engaro.
Eby'omutsigazi omutungi
(Mat. 19:16-30; Luk. 18:18-30)
17Yesu ku yaabaire naimutsya orugyendo, omushaija yaija nairuka, yaamutsimbira amaju, yaamubuuza ati: Mwegyesa murungi, nkaakora ki nkabona kutunga amagara agatahwaho? 18Yesu yaamugira ati: Noonyetera ki murungi? Manya tihabaho murungi, kureka Ruhanga wenka. 19Noomanya ebiragiro ku bigira biti: Otariita, otarishambana, otariiba, otariha obwamushinja bw'ebishuba, otariryangatanisa, otiine shoimwe na nyoko. 20Onu yaamugarukamu ati: Mwegyesa, ebyo byona ntuura nimbihitsya okwiha omu buto bwangye. 21Yesu nikwo kumutsimba eriisho, akamukunda, akamugira ati: Mbwenu nooburwaho ekintu kimwe. Irooko, otunde ebi oine; ebiraabirugyemu, obihe abooro; mbwenu obwo oryatunga eitungo omu iguru; haza oije onkuratire. 22Onu ku ahurira ebyo, ahinduriza ahamaisho, agyenda aine obujune, ahabw'okuba akaba aine eitungo ringi.
Okwerinda obutungi
23Yesu nikwo kubabuzyamu amaisho, akagambira abatendekwa be ati: Ka kigumire abatungi kutaaha omu bukama bwa Ruhanga! 24Abatendekwa be batangaarira ebyo bigambo; kwonka Yesu agumizamu abagira ati: Baana 'mwe, ka kigumire abeesiga obutungi kutaaha omu bukama bwa Ruhanga! 25Manya nikirahukira engamira kuraba omu kahengyere k'empitirizo, okukira omutungi kutaaha omu bukama bwa Ruhanga. 26Kwonka bo baatangaara okukiraho; baagambirana bati: Mbwenu shi, n'oha orikubaasa kujunwa? 27Yesu nikwo kubatsimba eriisho, akabagira ati: Aha bantu tikirikubaasika, kwonka ahari Ruhanga tikwo kiri; ahabw'okuba Ruhanga abaasa byona.
Ebihembo by'okutsigaho byona ahabwa Kristo
28Petero atyo amubuuza ati: Reeba, itwe tukatsigaho byona, twakukuratira! 29Yesu amugarukamu ati: Buzimazima nimbagambira nti: Tihariho muntu owaatsigireho eka ye, nari abarumuna, nari banyaanya, nari ishe, nari abaana be, nainga ebibanja ahabwangye n'ahabw'Amakuru Marungi, 30otarizimuurirwa maju n'abarumuna na banyaanya na baanyina n'abaana n'ebibanja emirundi igana n'okukiraho omu busingye obu, otaireho n'okuhiiganisibwa, kwonka omu busingye oburiija akatunga amagara agatahwaho. 31Manya baingi ab'okubanza baryaba ab'okuhereeruka, kandi ab'okuhereeruka baryaba ab'okubanza.
Yesu okuranga obwa kashatu eby'okubonabonesibwa kwe
(Mat. 20:17-19; Luk. 18:31-34)
32Ku baabaire bari omu muhanda nibainamuka Yerusalemu, Yesu abeebembeire, abatendekwa be baatangaara, kandi n'abandi abaabaire babakuratiire baatiina. Yaagaruka yaata eikumi na babiri hangahari, yaatandika kubagambira ebirikwija kumubaho, 33ati: Reeba, nitwinamuka Yerusalemu, kandi Omwana w'omuntu naija kuheebwayo aha bahongyerezi abakuru n'aha bahangu b'eiteeka, bamucwere orubanja rw'okwitwa, bamurekurire Abanyamahanga. 34Reero bamushungise, bamucwere amacwante, kandi bamwite; haza ku haraahingureho ebiro bishatu, azookye omu bafiire.
Beene Zebedaayo okweshabira obukuru
(Mat. 20:20-28)
35Yakobo na Yohaana beene Zebedaayo, bakamuhika, baamugira bati: Mwegyesa, nitukweshengyereza, otukorere kyona eki turaakushabe. 36Yaabagarukamu ati: Mbwenu nimwenda ngu mbakorere ki? 37Baamugira bati: Ku oriba waahikire omu kitiinwa kyawe, otwikirize, omwe akushutame aha rubaju rwa buryo, ondi aha rwa bumosho. 38Yesu yaabagira ati: Timurikumanya ki murikushaba. Ebyo nimubaasa kunywa ekikopo eki ndaanywe, n'okubatizibwa oku ndaabatizibwe? 39Baamugarukamu bati: Nitubaasa. Yesu yaabagira ati: Eego, ekikopo eki ndaanywe, naimwe muryakinywa, n'okubatizibwa oku ndaabatizibwe, naimwe muryakubatizibwa. 40Kwonka okushutama aha rubaju rwangye rwa buryo nari aha rwa bumosho, ti kwangye kukugaba, kureka n'okw'abo abaakuteekateekyeirwe.
Omukuru okuba omuheereza w'abandi
41Reero abandi eikumi ku baakihuriire, baagwerwa kubi Yakobo na Yohaana; 42Yesu nikwo kubeeta, akabagira ati: Nimumanya ku abeetwa abategyeki b'Abanyamahanga babategyekyesa eikama, kandi n'abakuru baabo babaragiirisa obushoboorozi. 43Kwonka tikwo kiri omuriimwe. Weena orikwenda kuba mukuru omuriimwe, abe omuheereza waanyu, 44kandi omuriimwe orikwenda kuba ow'okubanza, abe omuhuuku wa boona. 45Manya Omwana w'omuntu taraizire kuheerezibwa, kureka okuheereza, n'okuhayo amagara ge kuba ekarabo ya baingi.
Yesu okuhumuura empumi haihi na Yeriko
(Mat. 20:29-34; Luk. 18:35-43)
46Bakataaha Yeriko; Yesu ku yaabaire naarugayo aine abatendekwa be n'ekimbuuro ky'abantu, baashanga Baritimaayo mwene Timaayo, omusheegi empumi ashutami aha rubaju rw'omuhanda. 47Ku yaahuriire ngu ni Yesu owa Nazareeti, yaatandika kwamuza ati: Yesu, mwene Daudi, ngirira embabazi! 48Baingi baamukabukira nibamugambira ngu ahuname; kwonka we yaayamuza okukiraho ati: Mwene Daudi, ngirira embabazi! 49Yesu yaayemerera, yaagira ati: Nimumwete, aije. Batyo baayeta egyo mpumi, baagigira bati: Guma; imuka, reeba, naakweta. 50Atyo anaga omunagiro gwe, abandaituka, ahika ahari Yesu. 51Yesu amubuuza ati: Nooyenda ngu nkukorere ki? Egyo mpumi emugarukamu eti: Mukama wangye, niinyenda ngu ndeebe. 52Yesu amugira ati: Yegyendere; okwikiriza kwawe kwakukiza. Ahonaaho areeba, agyenda amukuratiire omu muhanda.
Kristo okutaaha omuri Yerusalemu n'ekitiinwa
(Mat. 21:1-11; Luk. 19:28-40; Yoh. 12:12-19)
Currently Selected:
Mar 10: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
