Luk 5
5
1Eizooba rimwe Yesu akaba ayemereire haihi n'enyanja ya Genesareeti, aine ekimbuuro ky'abantu nikimumiganiraho kuhurira ekigambo kya Ruhanga. 2Yaanaga amaisho, yaareeba amaato abiri gari haihi n'enkungu y'enyanja. Abajubi bakaba bagarugiremu niboozya obutimba bwabo. 3Yaaza omu bwato bumwe obwabaire buri obwa Simooni, yaamushaba ku abwirizayo kakye kuruga aha nkungu. Atyo yaabushutamamu, yaayegyesa abantu.
4Ku yaaherize kwegyesa, yaagira Simooni ati: Nimwirire ahagati y'enyanja, mutegye obutimba bwanyu mubone kukwatsa. 5Simooni yaamugarukamu ati: Mwegyesa, turaire nitwehenenga, twabura eki twakwatsa; kwonka ahabw'eki waagamba ka ntegye obutimba. 6Ku baakozire batyo, baakwatsa ebyenyanja bingi munonga, obutimba bwabo bwatandika kucweka; 7batyo baayetesa engaro bagyenzi baabo abaabaire bari omu bundi bwato, kwija kubakwatsa. Baija baijuza ago maato gombi, gaabura hakye kumirwa.
8Simooni Petero ku yaakireebire, yaajuumara aha bigyere bya Yesu naagira ati: Mukama wangye, ndeka, manya ndi omusiisi! 9Ahabw'okuba we n'abu yaabaire aine boona bakagwa omu katangaaro, ahabw'ebyenyanja bingi ebi baakwatsire, 10kandi Yakobo na Yohaana beene Zebedaayo, bagyenzi ba Simooni, nabo bakatangaara. Mpaho Yesu yaagambira Simooni ati: Otatiina; okwiha hati noija kuguma noojuba abantu. 11Ku baahikize amaato gaabo aha nkungu, baatsigaho byona, baamukuratira.
Yesu okushemeza omubembe
(Mat. 8:1-4; Mar. 1:40-45)
12Yesu ku yaabaire ari omu kirorero kimwe, haija omushaija obembire weena. Ku yaareebire Yesu, yaajuumara yaamweshengyereza ati: Mukama wangye, ku oraabe nookisiima, noobaasa kunshemeza. 13Yesu yaagorora omukono, yaamukoraho naagira ati: Eego ninkisiima, shemera. Ahonaaho ebibembe byamurugaho. 14Yaamuragiira ati: Otagira ou waakigambira, kureka irooko oyeyorekye omuhogyerezi, kandi ahabw'okushemezibwa kwawe ohongye eki Musa yaaragiire kuhamiza abantu. 15Okurangaanwa kwe kwagumizamu nikubuga; ebimbuuro by'abantu byaguma nibiteerana kuhurira ebi arikugamba n'okutambirwa endwara zaabo. 16Kwonka we obundi akaba abatsigaho, aza omu mwanya ogwehereire kushaba.
Yesu okusaasira ebibi ozingazingirwe n'okumukiza
(Mat. 9:1-8; Mar. 2:1-12)
17Eizooba rimwe, Yesu ku yaabaire naayegyesa, omu baabaire nibamuhurira hakaba harimu Abafarisaayo n'abahangu b'eiteeka, abaarugire omu buri kyaro eky'omuri Galilaaya na Buyudaaya na Yerusalemu; kandi amaani ga Nyakubaho gakaba gamurimu kukiza abantu. 18Omuri ago magingo haija abashaija baheekire aha katanda omuntu ozingazingirwe. Baamiganisa kumutaasyamu, ngu bamurambikye omu maisho ge. 19Ku baabuzire ah'okumurabya ahabw'okufundaana kw'abantu, baatemba aha mutwe gw'enju, baahiga amategura baamurabyaho nibamushuumiza aha katanda ke, baamuhitsya ahagati y'abantu omu maisho ga Yesu. 20Ku yaareebire baine okwikiriza, yaagira ati: Muntu 'we, waasaasirwa ebibi byawe. 21Abahangu b'eiteeka n'Abafarisaayo baatandika kwebuuza nibagira bati: Ni muntu ki ogu orikurogota? N'oha orikubaasa kusaasira ebibi, kureka Ruhanga wenka? 22Yesu yaamanya ebiteekateeko byabo, yaabagarukamu ati: Nimwetomboitera ki mutyo omu mitima yaanyu? 23Mbwenu ekirikurahuka ni kiiha? Okugira nti: Waasaasirwa ebibi byawe, nari okugira nti: Imuka ogyende. 24Mbwenu ka mboorekye ku Omwana w'omuntu aine obushoboorozi omu nsi kusaasira ebibi. Atyo yaagambire ozingazingirwe ati: Ninkuragiira, imuka oiheho ekitanda kyawe, otaahe. 25Ahonaaho yaimuka boona bagamutaireho, yaihaho eki yaabaire arambiireho, yaataaha omuka naahimbisa Ruhanga. 26Boona baashoberwa, kandi baahimbisa Ruhanga bagwire omu katangaaro batiinire, nibagira bati: Eri izooba twareeba ekitakareebwaga.
Yesu okweta Leevi n'okurya n'abasiisi
(Mat. 9:9-13; Mar. 2:13-17)
27Ekyo ku kyahwaire, Yesu yaashohora, yaareeba omushorooza w'omushoro orikwetwa Leevi ashutami omu ishoroorezo ry'omushoro; yaamugira ati: Nkuratira! 28N'onu yaatsigaho byona, yaimuka yaamukuratira.
29Bwanyima Leevi ogwo yaamuteekyera obugyenyi bwingi omu nju ye; kandi omu baayetsirwe hakaba harimu abashorooza b'omushoro baingi n'abandi bari hamwe nabo aha meeza. 30Abafarisaayo n'abahangu b'eiteeka ab'omu kigombe kyabo, nikwo kwetomboitera abatendekwa be bati: Ahabw'enki nimurya n'abashorooza b'omushoro n'abasiisi kandi nimunywa nabo? 31Yesu yaabagarukamu ati: Abahuriire tibo beetenga omufumu, kureka abarwaire. 32Tindaizire kweta bahikiriire, kureka abasiisi ngu beegarukyemu.
Okubuuza Yesu aha by'okwesiibyakwo
(Mat. 9:14-17; Mar. 2:18-22)
33Bwanyima bakagambira Yesu bati: Abatendekwa ba Yohaana kaingi beesiibyakwo kandi bashaba, n'abatendekwa b'Abafarisaayo nikwo okwo; kwonka abaawe batuura nibarya kandi nibanywa. 34Yesu yaabagarukamu ati: Nimubaasa muta kusiibyakwo abakwe, kishwera akibaine? 35Kwonka obunaku buryahika, kishwera abaihweho; haza obwo nibwo baryesiibyakwo.
36Kandi yaabacwera enfumu ezi, ati: Tihariho muntu otaagura ekiremu aha mwenda musya akakiteera aha mukuru. Ku yaakukikora, takaataagura mwenda musya kwonka, kureka n'ekiremu eki yaiha aha musya tikikaizihira mukuru.
37Kandi tihariho muntu oshuka viino nsya omu furebe nkuru. Ku yaakukikora, viino egyo ekaabarura ezo furebe, eyatika, nazo zisiisikara. 38Manya viino nsya eba ey'okushukwa omu furebe nsya. 39Kandi tihariho oba yaanywaire viino enkuru akenda ensya, kureka agira ti: Enkuru niyo nungi.
Abatendekwa okucwa obushiisha ahari Sabato
(Mat. 12:1-8; Mar. 2:2-28)
Currently Selected:
Luk 5: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
