Luk 18
18
1Bwanyima Yesu akabacwera enfumu nk'oku kirikwetengwa okuguma nibashaba batarikuhwa matsiko. 2Yaabagira ati: Hakaba hariho omuramuzi omu kirorero kimwe, owaabaire atatiina Ruhanga, nobu kwakuba okweta aha muntu. 3Kandi omuri ekyo kirorero hakaba harimu omufaakazi, owaagumire naija ahu ari, naamweshengyereza ati: Nshoboorora n'onyemi kubi. 4Ogwo muramuzi yaamara omwanya muraingwa ayangire, kwonka bwanyima yaayegarukamu ati: Nobu ndaabe ntarikutiina Ruhanga, nobu yaakuba omuntu weena, 5kwonka ahabw'omufaakazi ogu okuguma nanganzya, nshemereire kumushoboorora. Kitari ekyo naija kugumizamu nandusya.
6Mukama nikwo kubagambira ati: Nimuhurire eki omuramuzi otahikiriire arikugamba. 7Mbwenu shi, Ruhanga tarireeba abatoorainwe be nibakorerwa eby'oburyo, abamuhoogyera nyomushana na nyekiro, nangwa nobu yaakutuuraho kubahwera? 8Nimbahamiza nti: Aryataho omutima kureeba ngu baakorerwa ebihikire kandi juba. Mbwenu shi Omwana w'omuntu ku ariija, aryashanga omu nsi omu hakirimu okwikiriza?
Enfumu y'Omufarisaayo n'omushorooza w'omushoro
9Yesu akacwa enfumu egi, naagigambira abantu bamwe abaabaire nibeemanya ku bari abahikiriire, kandi nibagaya abandi boona. 10Ati: Abashaija babiri bakaza omuri Nyaruju ya Mukama kushaba; omwe ari Omufarisaayo n'ondi ari omushorooza w'omushoro. 11Omufarisaayo yaayemerera hangahari, yaashaba ati: Ai Ruhanga, ninkusiima; ahabw'okuba nyowe tindi mwambuzi okora ebitahikire, omushambani nk'abandi bantu, kandi munomuno tindi nk'ogu mushorooza w'omushoro. 12Nyesiibyakwo kabiri buri biro mushanju, kandi mpa kimwe kya ikumi eki ebi ntunga byona. 13Omushorooza w'omushoro we yaayemerera hangahari okukiraho, kandi atarikwehanga kureeba ahaiguru, kureka okwemaamaata naagira ati: Ai Ruhanga, onsaasire nyowe omusiisi! 14Nimbagambira nti: Ogu mushaija akagaruka owe omuka agarukaine na Ruhanga, okukira mugyenzi we; ahabw'okuba weena oyetunguura, aryabundikwa; kandi weena oyebundika, aryatunguurwa.
Yesu n'abaana bato
(Mat. 19:13-15; Mar. 10:13-16)
15Abantu bakareetera Yesu nangwa n'abeereere, ngu abakwateho. Abatendekwa be ku baakireebire, baabakabukira. 16Kwonka Yesu yaabeeta naagira ati: Murekye abaana baije bampikye, mutabazibira; ahabw'okuba abari nk'abo, obukama bwa Ruhanga n'obwabo. 17Buzimazima nimbagambira nti: Weena otarikwikiriza bukama bwa Ruhanga nk'omwana muto, taributaahamu.
Eby'omutsigazi omutungi
(Mat. 19:16-30; Mar. 10:17-31)
18Omwe omu bategyeki akabuuza Yesu ati: Mwegyesa murungi, nkaakora ki kutunga amagara agatahwaho? 19Yaamugira ati: Noonyetera ki murungi? Manya tihariho murungi kureka Ruhanga wenka. 20Noomanya ebiragiro ku bigira biti: Otarishambana, otariita, otariiba, otariha obwamushinja bw'ebishuba, otiine sho na nyoko.
21Onu yaagarukamu ati: Ebyo byona ntuura nimbihitsya, okwiha omu buto bwangye. 22Yesu ku yaahuriire ekyo, yaagira ati: Okibuzirweho ekintu kimwe kyonka. Tunda ebi oine byona; ebiraabirugyemu obigabire abooro, mbwenu nibwo oritunga eitungo omu iguru; haza oije onkuratire. 23Onu ku yaahuriire ekyo, yaagira obujune, ahabw'okuba akaba ari omutungi munonga.
24Yesu yaamutsimba eriisho, yaagira ati: Ka kigumire abatungi kutaaha omu bukama bwa Ruhanga! 25Manya nikirahukira engamira kuraba omu kahengyere k'empitirizo, okukira omutungi kutaaha omu bukama bwa Ruhanga.
26Abaakihuriire nikwo kugira bati: Mbwenu shi, n'oha orikubaasa kujunwa? 27Nawe yaabagarukamu ati: Ekitabaasika ha bantu, kibaasika ahari Ruhanga.
Ebihembo by'okutsigaho byona ahabwa Kristo
28Na Petero nikwo kugira ati: Reeba, itwe tukatsigaho byona ebi twine, twakukuratira. 29Yesu ati: Buzimazima nimbagambira nti: Tihariho n'omwe owaatsigireho enju ye n'omukazi na beene ishe n'abazaire be, nari abaana ahabw'obukama bwa Ruhanga, 30otarizimuurirwa bingi n'okukiraho omu biro ebi, kandi omu busingye oburiija akatunga amagara agatahwaho.
Yesu okuranga obwa kashatu eby'okubonabonesibwa kwe
(Mat. 20:17-19; Mar. 10:32-34)
31Bwanyima Yesu yaata ikumi na babiri hangahari, yaabagira ati: Reeba nitwinamuka Yerusalemu, kandi kyona ekyahandiikirwe abarangi aha Mwana w'omuntu nikiija kubakwo. 32Ahabw'okuba naija kuheebwayo aha Banyamahanga, reero bamushungise, bamutwaze kubi, bamucwere amacwante; 33ku baraaheze kumwasha, bamwite, haza aha kiro kya kashatu azookye omu bafiire. 34Kwonka bo tibaine ki baihiremu, eki yaabagambiire kikabacuramirira, tibaamanya makuru gaakyo.
Okuhumuura empumi haihi na Yeriko
(Mat. 20:29-34; Mar. 10:46-52)
35Yesu ku yaabaire nairira haihi na Yeriko, yaashangaho omushaija empumi ari aha rubaju rw'omuhanda naashabiiriza. 36Egyo mpumi, ku yahuriire ebimbuuro by'abantu nibihingura, yaabuuza ekyabaho. 37Baamugira bati: Yesu Omunyanazareeti naahingura. 38Nawe nikwo kweta munonga ati: Yesu mwene Daudi, ngirira embabazi! 39Abantu abaabaire beebembeire baamukabukira nibamugira bati: Hunama! Kwonka we yaayongyera kwamuza ati: Mwene Daudi, ngirira embabazi! 40Yesu yaayemerera, yaaragiira ku bamumureetera. Ku yaamuhikire, yaamubuuza ati: 41Nooyenda ngu nkukorere ki? Onu yaamugarukamu ati: Mukama wangye, niinyenda ngu ndeebe! 42Yesu yaamugira ati: Reeba! Okwikiriza kwawe nikwo kwakukiza. 43Ahonaaho yaareeba, yaamukuratira naasiima Ruhanga, kandi boona abaakireebire baahimbisa Ruhanga.
Yesu na Zakaayo
Currently Selected:
Luk 18: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
