Luk 16
16
1Kandi Yesu akagaruka yaagambira abatendekwa be ati: Hakaba hariho omushaija omutungi, oine omukuru w'eby'eka ye, ou baamumuregyeire ngu naashiishagura ebintu bye. 2Yaayeta ogwo muntu, yaamugira ati: Ebi ndikukuhuriraho biri bita? Gira, onshoboororere eby'omurimo gwawe, ahabw'okuba tokigaruka kuba mukuru w'ebyangye. 3Ogwo mukuru nikwo kwebuuza ati: Manya mukama wangye yaaza kuunyaka obukuru, mbwenu ngire nta? Mpingye? Ka ntaine gahinga! Nshabiirize? Obwo shi, baryandeebesa maisho ki? 4Otyo! Mbwenu naamanya eki ndaakore bambinga aha murimo, abantu babone kuntaasya omu maka gaabo. 5Atyo ayeta omwe omwe omu baabaire baine amabanja ga mukama we. Ow'okubanza amugira ati: Oine eibanja ririkwingana ki ahari mukama wangye? 6Onu ati: Endengo igana z'amajuta. Ogwo mukuru amugira ati: Kwata orupapura rwawe oru, oru orikwihurizibwaho, oshutame ahonaaho, ohandiikye makumi ataano. 7N'ondi amubuuza ati: Iwe oine eibanja ririkwingana ki? Onu ati: Ebitenga igana by'engano. Ogwo mukuru amugira ati: Ija oiheho orupapura rwawe, ohandiikye makumi munaana. 8Mukama waabo akasiima ogwo mukuru w'eby'eka ye otari mwesigwa, ahabw'okuba enyabwengye. Manya abantu b'ensi egi omu kutwazana na bagyenzi baabo nibakiza obwengye abantu b'omushana.
Okukoresa gye empiiha
9Kandi nimbagambira nti: Mwetungire abanyamikago n'eitungo ry'obugobya, nyentsya ku ririba ryabahwaireho, babataasye omu maka agatahwaho.
10Manya oyesigwa omu bikye, ayesigwa n'omu bingi; kandi oteesigwa mu bikye, tayesigwa n'omu bingi. 11Mbwenu ku muraabe mutari beesigwa mu kukoresa eitungo ry'obugobya, n'oha oribeesiga akabakwatsa eitungo ery'amazima? 12Kandi ku muraabe mutarikwesigwa mu by'abandi, n'oha oribaha ekyanyu kukyetegyekyera? 13Tihariho muheereza obaasa kuheereza abakama babiri; ahabw'okuba aryayangaho omwe, akunde ondi; nari aryahamira ahari omwe, agaye ondi. Manya timurikubaasa kuheereza Ruhanga kandi n'eitungo.
Eby'eiteeka n'obukama bwa Ruhanga
(Mat. 5:31-32; 11:12-13; Mar. 10:11-12)
14Abafarisaayo abu eby'amatungo byabaire bitwaire omutima, ku baahuriire ebyo byona, baamushekyerera. 15Nawe yaabagira ati: Niimwe buzima abeeyoreka abantu nk'abahikiriire, kwonka Ruhanga naamanya emitima yaanyu. Manya eki abantu bakugisiriza, Ruhanga akinuga.
16Okuhitsya omu biro bya Yohaana, hakaba nihakora eby'eiteeka n'eby'abarangi; okwiha obwo Amakuru Marungi g'obukama bwa Ruhanga gatuura nigarangirirwa, kandi buri omwe aitanira okubutaahamu.
17Nikirahuka eiguru n'ensi kuhwaho, okukira akamanyiso kamwe k'aha nyuguta okuruga omu iteeka.
18Weena oshenda omukazi we akashwera ondi aba ashambaine, kandi omushaija oshwera omukazi oshenzirwe iba, biri ashambaine.
Omutungi na Lazaaro
19Hakaba hariho omushaija omutungi, owaabaire ajwara emyenda ya bujwa n'eya kitaani, buri izooba naarya gye ajarami. 20Kandi aha irembo rye hakaba habyamaho omushaija omworo orikwetwa Lazaaro, owaabaire weena ari ebironda; 21atwire naayetenga kurya obukunkumuka burikuruga aha meeza y'ogwo mutungi. Kandi n'embwa zikaba ziija, zirigatsa ebironda bye. 22Bwanyima omworo ogwo yaafa, yaatwarwa baamaraika ei Aburahamu atuura. Omutungi nawe yaafa, yaaziikwa.
23Ku yaabaire ari okuzimu omu busaasi burengyesereize, yaimutsya amaisho yaareeba Aburahamu ari okwo hare, Lazaaro amuhereire. 24Yaahooga munonga ati: Ai bambe, taata Aburahamu, naafa! Ngirira esaasi, otume Lazaaro ogwo akoze enshonga y'orukumu rwe omu maizi, ahorahoze orurimi rwangye, ahabw'okuba nimpembererwa munonga omuri eki kibengye ky'omuriro. 25Aburahamu yaamugarukamu ati: Mwana wangye, ijuka omu biro by'amagara gaawe ku waatungire ebirungi, Lazaaro we akatunga ebibi, mbwenu we hati obu naaruhuurwa; iwe ori omu busaasi bwingi. 26Kandi t'ekyo kyonka: ahagati yaitu hariho oruhanga orurikuzibira omuntu weena orikwenda kucwekanisa kuruga kunu kwija okwo, nari kuruga okwo kwija kunu.
27Omutungi ogwo agarukamu ati: Taata, ninkweshengyereza, tuma Lazaaro owa tata, 28ahabw'okuba nyineyo barumuna bangye bataano, abagambire bukiri kare, nyentsya nabo batakaija omuri ogu mwanya gw'obuhuruzi. 29Aburahamu amugira ati: Baine ebi Musa n'abarangi baayegyeise, babe nibyo baakuratira. 30Omutungi ati: Ngaaha, taata Aburahamu, ku haakugira owaabahikaho naaruga omu bafiire, bakaayegarukamu. 31Aburahamu amugarukamu ati: Ku baraabe batahuriire Musa n'abarangi, tibariikirizisibwa muntu weena, nobu yaakuba ozookire omu bafiire.
Okuhabisa abandi
(Mat. 18:6-7, 21-22; Mar. 9:42)
Currently Selected:
Luk 16: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
