Kut 41
41
1Ku haahingwireho emyaka ebiri, Faraaho yaaroota ayemereire aha rubaju rw'omugyera. 2Omuri ogwo mugyera, haarugamu ente mushanju zigomokire zirikubereshera, zaayahukira ekibingo zaakirya. 3Reero haakurataho ezindi mushanju mbi zihururukire, zaaruga omuri Nailo zaayemerera aha nkungu yaayo aha rubaju rwa ziri. 4Ente mbi ezihururukire zaarya ziri ezigomokire ezirikubereshera. Faraaho nawe nikwo kusisiimuka.
5Ku yaagarwireyo kugwejegyera, yaaroota obwa kabiri; yaareeba ebishiisha mushanju by'engano birikukondakonda kandi birungi, bikuriire aha mushengye gumwe. 6Reero haakurataho obundi bushiisha mushanju bunyurwize kandi bwomiibwe omuyaga gw'oburugwa-izooba. 7Haza obwo bushiisha bunyurwize bwamira ebishiisha omushanju ebirikukondakonda, ebiijwire enjuma zeezire. Faraaho ku asisiimuka, ashanga kiri ekirooto. 8Omu kasheeshe omutima gwe gugira obujune, atuma ku bamwetera abafumu b'omuri Misiri boona n'abanyabwengye baamwo. Faraaho abagambira eby'ekirooto kye, kwonka habura owaakimurootororera.
Faraaho okugambira Yosefu ebi arootsire
9Bwanyima omugabuzi mukuru w'obyokunywa agambira Faraaho ati: Eri izooba niinyijuka eki naashobize. 10Manya Faraaho obu yaagwerwa kubi abaheereza be, akanta omu kihome n'omuteeki we mukuru omu nju y'omukuru w'abarinzi; 11ekiro kimwe nyowe nawe tukaroota, buri omwe ekirooto kye n'amakuru gaakyo. 12Obwo tukaba twineyo omutsigazi Omuheburaayo orikuheereza omukuru w'abarinzi. Ku twamugambiire, yaaturootororera ebirooto byaitu, buri omwe naamushoboororera amakuru g'eki arootsire. 13Haza oku yaaturootororoire nikwo byabaire, nyowe naagarurwa aha murimo gwangye, kwonka omukuru w'abateeki yaahanikwa.
14Mpaho Faraaho yaatuma ku beeta Yosefu. Nabo baamureeta ahonaaho nibamwiha omu kihome. Reero ku yaaherize kumwa n'okujwara ebindi bijwaro, yaaza kureebana na Faraaho. 15Faraaho nikwo kugira Yosefu, ati: Ndootsire ekirooto, haza habuzire ow'okukirootorora. Mbwenu mpuriire nibakugambaho ngu ku orikuhurira ekirooto, noobaasa kushoboorora amakuru gaakyo. 16Yosefu agarukamu Faraaho, ati: Tiinye, kureka Ruhanga niwe araakugarukyemu Nyakusinga Faraaho ekiraakugirire akaso karungi.
17Mpaho Faraaho agira Yosefu, ati: Ndootsire nindeeba nyemereire aha nkungu ya Nailo, 18reero ente mushanju zigomokire zirikubereshera, zaaruga omuri Nailo zaariira omu kibingo. 19Handi hakye ezindi nte mushanju zaija zizikuratiire, ezi ntakareebaga muri egi nsi ya Misiri yoona, zihururukire, mbi, zihwaire aha magufa. 20Ezo nte zihururukire ezihwaire aha magufa zaariira kimwe ziriya ente mushanju ezigomokire ezibandize. 21Kwonka ku ziziriire waashusha oti tizaazirya, ahabw'okuba zigumire zihwaire aha magufa nk'okwazo. Ntyo nsisiimuka. 22Hoona ndootsire nindeeba ebishiisha mushanju, ebikuriire aha mushengye gumwe, ebiijwire enjuma kandi birungi. 23Naagaruka naareeba ebishiisha mushanju bihotokire, binyurwize kandi byomiibwe omuyaga gwa burugwa-izooba. 24Reero ebishiisha biri ebinyurwize byamira omushanju ebirungi. Ku mbigambiire abanyabwengye, haabura ow'okubinshoboororera.
Yosefu okurootororera Faraaho
25Bwanyima Yosefu agira Faraaho ati: Ekirooto kyawe, Nyakusinga, ni kimwe; Ruhanga akworekire eki arikwenda kukora. 26Ente mushanju enungi niyo myaka mushanju; kandi n'ebishiisha mushanju ebirungi niyo myaka mushanju; haza ekirooto ni kimwe. 27Ente mushanju ezihururukire, ezihwaire aha magufa, eziizire zizikuratiire, niyo myaka mushanju, n'ebishiisha mushanju ebitarimu njuma, ebyomiibwe omuyaga gwa burugwa-izooba, nabyo niyo myaka mushanju y'enjara. 28Nyakusinga eki naakugambira nikwo kiri. Ruhanga akworekire eki arikwenda kukora. 29Nihaija kubaho emyaka mushanju y'omweru mwingi omu nsi ya Misiri yoona. 30Kwonka ku erihwaho, haryabaho emyaka mushanju y'enjara, haza egyo myaka yoona omushanju ey'omweru eyebe omu nsi ya Misiri, enjara emareho ensi, 31ogwo mweru gube gutakimanywa omu nsi ahabw'egyo njara erikurataho, ahabw'okuba eryaba eri nyingi munonga. 32Nyakusinga ekikureeteire kuroota ekyo kirooto kabiri n'ahabw'okuba Ruhanga amaririire ku kibaho, kandi naija kubibaisaho juba.
Yosefu okuhabura Faraaho
33N'ahabw'ekyo, Nyakusinga, oshemereire kusherura omuntu orikwetegyereza kandi ow'obwengye; omuhe obushoboorozi bw'okutegyeka ensi ya Misiri. 34Nyakusinga kandi oteho ab'okureeberera egi nsi, baihe kimwe kya kataano aha bi ensi ya Misiri eyerize omuri egyo myaka mushanju y'omweru. 35Barundaane ebyokurya byona eby'omuri egyo myaka mirungi erikwenda kwija, bahunikye ebyokurya by'omujuma omu ndembo; nk'oku iwe Faraaho oraabaragiire kandi babirinde. 36Ebyo byokurya bibe eby'okubiikirwa ensi ya Misiri eby'okwerindisa enjara erikwija kugiteera egyo myaka mushanju; ensi erekye kwitwa enjara.
Faraaho okukuza Yosefu
37Eki Yosefu yaagambire kikasiimwa Faraaho n'abagaragwa be boona. 38Faraaho yaagira abagaragwa be ati: Ebyo tukaabaasa kubona omuntu nk'ogu oine Mutima wa Ruhanga? 39Faraaho nikwo kugira Yosefu ati: Nk'oku Ruhanga yaakworeka ebi byona, tihariho orikwetegyereza kandi ow'obwengye nkaiwe. 40Mbwenu niiwe waaza kureeberera eka yangye, n'abantu bangye boona batwaze nk'oku oraabaragiire, kureka eki ndaakukizeho obukuru n'ekitebe kyangye ky'obugabe. 41Kandi Faraaho agira Yosefu ati: Reeba naakuha ensi ya Misiri yoona ogitegyekye. 42Mpaho Faraaho ayejuura aha rukumu empeta ye eriho akamanyiso, agijweka Yosefu omu rukumu; amujweka ebijwaro bya kitaani enungi, amujweka omukuufu gw'ezaabu omu maraka. 43Atyo amutembesa ekigaari kye kya kabiri, reero bamuteerera akaari bati: Mumuhigize! Nikwo yaamutegyekyeise atyo ensi ya Misiri yoona.
44Faraaho ayongyera agira Yosefu ati: Niinye Faraaho, kwonka tihariho muntu orikora ekintu kyona omuri egi nsi ya Misiri, otamwikiriize. 45Mpaho Faraaho ayeta Yosefu eiziina Zaafenatapanea, amuhingira Asenata muhara wa Potifeera omuhongyerezi wa Oni. Yosefu atyo obushoboorozi bwe bubuga omu nsi ya Misiri yoona.
Ebi Yosefu yaakozire omu myaka y'omweru n'ey'enjara
46Yosefu obu yaaza omu maisho ga Faraaho omugabe wa Misiri akaba aine emyaka y'obukuru makumi ashatu. Ku yaarugire omu maisho ga Faraaho yaagyenda naaraba omu nsi ya Misiri yoona. 47Omu myaka mushanju y'omweru, ensi ekeeza munonga. 48Mpaho Yosefu yaarundaana ebyokurya byona omuri egyo myaka mushanju ensi ya Misiri ekyeerize; yaabihunika omu bitara by'omu ndembo. Buri rurembo yaaruhunikamu ebyokurya ebyarugire omu misiri erwehinguririize. 49Haza yaahunika ebyokurya bingi munonga ebirikwingana n'omusheenyi gw'aha nyanja, okuhitsya obu yaarekyeire aho kubirenga, ahabw'okuba bikaba bitakibaasa kurengwa.
50Emyaka y'enjara obu yaabaire etakahikire, Yosefu akaba yaazaire abatabani babiri abu yaazaire ahari Asenata muhara wa Potifeera omuhongyerezi wa Oni. 51Yosefu omutabani owaabandize kuzaarwa yaamweta Manaase, ahabw'okuba akagira ati: Ruhanga yaanyebesa okufa kubi kwangye kwona, n'eka ya tata yoona. 52Owa kabiri yaamweta Efuraimu, ati: Ahabw'okuba Ruhanga ankanyisiize omuri egi nsi naabonaboneiremu.
53Emyaka mushanju y'omweru ogwabugire omu nsi ya Misiri ku yaahwaireho, 54endiijo myaka mushanju y'enjara yaatandika nk'oku Yosefu yaagambire. Ensi zoona zaateerwa enjara, kwonka Misiri yaaguma eine ebyokurya. 55Reero ensi ya Misiri ku yaateirwe enjara, abantu baatakira Faraaho kubaha ebyokurya. Nawe yaagira Abanyamisiri, ati: Muze owa Yosefu! Kyona eki araabagambire mukikore. 56Mpaho enjara ku yaabugire nsi, Yosefu yaigura ebitara, yaaguza Abanyamisiri ebyokurya, ahabw'okuba enjara ekaba eri nyingi munonga omu nsi ya Misiri. 57Haza ensi yoona yaija Misiri ahari Yosefu kugura engano, ahabw'okuba enjara ekaba eri nyingi omu nsi yoona.
Bakuru ba Yosefu okuza Misiri kushaka
Currently Selected:
Kut 41: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
