2 Maka 8
8
1Yuda owaabaire naayetwa Makabeho na bagyenzi be, bakaza omu byaro bwesherekye, baayeta beene waabo, baahandiika abaagumire bahamiire omu diini y'Ekiyudaaya, baarundaana abantu nk'enkumi mukaaga. 2Baayeshengyereza Mukama kugirira embabazi abaabaire nibahatwa embaju zoona, n'okugirira esaasi Nyaruju ehagaziibwe abatatiina Ruhanga, 3kusaasira orurembo orwabaire nirucwekyerezibwa kandi ruri haihi kusheenyagurirwa kimwe, n'okutega okutu eboroogo y'abarikumuhoogyera nibaitwa, 4okwijuka okwitira busha abeereere abataine kabi, n'ebicumuro by'okurogota aha iziina rye, n'okworeka ku arikwangira kimwe ekyetwa ekibi.
5Makabeho ku yaaherize atyo kutebeekanisa eihe rye, Abanyamahanga baaremwa kumuza omu kaso, ahabw'okuba Ruhanga owaabaire abainiire ekiniga akaba yaagizire embabazi. 6Makabeho yaaguma naija kitamanyirwe, endembo n'ebyaro abikoomeera omuriro, yaakwata emyanya mikuru, yaabinga abazigu batari bakye. 7Makabeho ogwo akareeba ngu obunaku bwa nyekiro nibwo burikumugyendera gye kuteera ababisha, obumanzi bwe bwarangaanwa hoona.
Yuda Makabeho okusingura Abanyamahanga
8Filipo ku yaareebire Yuda yaatandika kuhama mporampora, kandi naayeyongyera kusingura kaingi, yaahandiikira Putolemaayo omutegyeki mukuru owa Koilesiriya na Foinikiya kuha emikono abantu b'omu bugabe. 9Putolemaayo nikwo kutoorana Nikanoori mwene Paturokulo, omwe ahari banywani b'omugabe abakuru, akamutuma kwebembera Abanyamahanga b'omu mahanga goona, abatari hansi y'obukumi bubiri, kucwekyereza ab'eihanga rya Buyudaaya boona. Yaamutaho Gorigiya omukuru w'eihe, kandi omushaija omanyiriire eby'engamba. 10Nikanoori akamaramaza kutunda Abayudaaya omu buhuuku, ngu abone kutungira omugabe ebicweka by'efeeza z'omushoro obukaikuru bubiri zi yaabaire naihuzibwa Abarooma. 11Atyo yaatuma ahonaaho aha b'omu ndembo z'aha mwegyeego gw'enyanja, naabeeta kubaguza abahuuku Abayudaaya, yaabaraganisa kubaha abahuuku makumi mwenda ahabw'ebicweka by'efeeza nka rukumi atarikumanya ku Omushoboorozi wa byona ari haihi kumucwera orubanja.
12Enkuru ekahika Yuda ku Nikanoori ateire. Yuda ku yaagambiire bagyenzi be oku engabo zaija kubateera, 13abaabaire bari kikwaya batarikwesiga Ruhanga omwinganisa, baaha ensi ebigyere, baahunga. 14Abandi baatunda ebintu byabo ebitsigaireho, kandi ago magingo baayeshengyereza Mukama kujuna abu Nikanoori otatiina Ruhanga yaabaire atunzire atakabahikire; 15ti habwabo bonka, kureka n'ahabw'endagaano zi yaakozire na baishenkurubo, akabeeterera eiziina rye eririkwera kandi ery'ekitiinwa. 16Reero Makabeho yaahuruza abantu be, baahika enkumi mukaaga; yaabeehanangiriza okutatiina bazigu, nobu kyakuba ekimbuuro kihango ky'Abanyamahanga abaabaire nibaija kubarwanisiza busha; kureka ngu barwane kimanzi, 17nibaijuka eby'obwinazi ebi abo Banyamahanga baakozire aha Mwanya Ogurikwera, n'oku baabonaboneise ab'omu rurembo bakabashungisa, bakataho n'okuhwerekyereza emitwarize ya baishenkurubo. 18Yaabagira ati: Manya bo nibeesiga eby'okurwanisa n'obumanzi bwabo, kwonka itwe nitwesiga Ruhanga ow'obushoboorozi bwona, orikubaasa kwinika ati omutwe akagwisaho abarikwija kuturwanisa, nobu bakuba barugire omu nsi yoona.
19Akongyera yaabagambira obunaku obu baishenkurubo baaheebwa emikono omu busingye bwa Senakeribu, obu abantu akasiriira kamwe n'obukumi munaana n'enkumi itaano baahwerekyerera. 20Nobu barwana n'Abagalatiya orugamba orwabaireho omuri Babulooniya, obu abantu enkumi munaana zoona baahurura hamwe n'Abamakedoniya enkumi ina; reero Abamakedoniya ku baamigisiriziibwe munonga, bariya enkumi munaana, ahabw'obuhwezi obu baatungire niburuga omu iguru, baacwekyereza abantu akasiriira kamwe n'emitwaro ebiri, baatwara eminyago mingi.
21Ku yaagambire ebyo, boona baaguma, baayeteekateekyera okufeera amateeka gaabo n'ensi yaabo. Atyo eihe yaaricwamu ebicweka bina, 22kandi yaaha obukuru beene ishe aba: Simooni na Yosefu na Yonataani, buri omwe kukurira ekicweka kye ekirikuhitsya abantu rukumi na magana ataano. 23Okwongyera ahari ekyo, yaatoorana Eleyazaari kushoma eby'omu Kitabo Ekirikwera boona nibahurira, kandi yaabaha ekigambo ky'okubagumya ekirikugira kiti: Ruhanga niwe muhwezi waitu. Bwanyima atyo we wenka ayebembera ekicweka ky'okubanza, arwana orugamba na Nikanoori.
24Ahabw'Ow'Obushoboorozi bwona kukwatanisa nabo omu rugamba, bakaita abazigu barikweshumba enkumi mwenda, baahutaaza kandi baamuzya baingi ab'omu ihe rya Nikanoori, baabatuntumura boona.
Yuda Makabeho okunyaga Abanyamahanga
25Abayudaaya bakanyaga empiiha z'abaabaire baizire kubagura kubahindura abahuuku. Ku baababingire baabahitsya hareho, baagyemeserezibwa kugaruka, ahabw'okuba obunaku bukaba bwarengire. 26Manya rikaba riri eizooba eryebembera Sabato, nikyo bataragumiizemu bababingire. 27Mbwenu ku baaherize kurundaana eby'okurwanisa by'abazigu n'okubacwijura eminyago, baayehenengyerera ebya Sabato, nibahimbisa Mukama kandi nibamusiima munonga ahabw'okubarinda, bakahika ahari eryo izooba ri yaabateeraireho kuba ery'okutandikiraho kubakorera eby'embabazi. 28Sabato ku yaahwaire, baakora aha minyago, baagiha abaabonabonesiibwe n'abafaakazi n'efuuzi; endiijo minyago eyaatsigaireho baagibagana, baagibaganisiza n'abaana baabo. 29Ku baaherize kukora ebyo, baayeshengyerereza hamwe Ruhanga ow'embabazi, nibamuhoogyera, ngu agarukanire kimwe n'abairu be.
Okusingurwa kwa Timoteeho na Bakide
30Omu ngamba zi baarwaine n'engabo za Timoteeho na Bakide, bakabaitamu abantu barikweshumba obukumi bubiri, baakubuura ebigo ebirwanirwamu ebirikukirira kimwe oburaingwa, kandi baabaganisa eminyago mingi munonga, baagigabira abaabonabonesiibwe n'efuuzi n'abafaakazi n'abaakuzire, emigabo erikwingana n'eyaabo. 31Eby'okurwanisa by'abazigu ebi baarundaine byona baabibiika gye omu myanya ehamire, eminyago eyaatsigaireho baagitwara Yerusalemu. 32Bakaita omukuru w'amahe ga Timoteeho, omuntu mubi munonga owaabaire agangize Abayudaaya. 33Ku baabaire nibakora emikoro y'obusinguzi omuri Yerusalemu orurembo rwa baishe, baayotsya abaabaire batwekire amarembo agarikwera, obariiremu Kaliseteene n'abandi abahungiire omu kaju; batyo baaheebwa ekihembo ekikwire okutatiina Ruhanga kwabo.
Okuhunga kwa Nikanoori
34Nikanoori, ekyo kibura kyayatiire kimwe, owaabaire areetsire abashuubuzi rukumi kugura Abayudaaya, 35ahabw'obuhwezi bwa Mukama, ku yaaherize kucuubwa amaryo abarikumurwanisa abu yaabaire naagaya, yaajuura ekijwaro kye ekirungi, yaakwata omuhanda wenka nk'omuhuuku orikutoroka, yaacwekanisa ensi okuhitsya obu yaahiiriirwe akahika Antiyokiya, eihe rye ryaherize kucwekyerezibwa. 36Ogwo owaabaire ayehaireyo kutungira Abarooma omushoro naakwata abantu ba Yerusalemu, yaarangirira butunu ku Abayudaaya baine orikubarwanirira, kandi ku hatariho orikubaasa kubasingura, ahabw'okuba bakaba nibakuratira amateeka agu orikubarwanirira yaataireho.
Oku Antiyoko Epifane yaafiire kubi
Currently Selected:
2 Maka 8: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.