2 Maka 7
7
1Omu bunaku obwo enyina emwe mushanju zikakwatwa hamwe na nyinabo; omugabe yaabagyemesereza kurya enyama y'empunu etarikwikirizibwa Iteeka, obwo naababonabonesa naabatsibuza eminyaafu n'enkoba. 2Omwe omuribo yaagamba omu mwanya gwabo ati: Nooyenda kutukyenguuza ngu otumanyeho ki? Manya tweteekateekire kufa okukira okuhenda ebiragiro bya baatatenkuriitwe.
3Omugabe agira ekiniga kingi, aragiira kucumika esefuriya n'ekyoma ekikarangirwaho. 4Babicumika ahonaaho. Mpaho aragiira ku bacwaho orurimi rw'ow'agamba, bakamwihaho ekikoba ky'omutwe, bakamutemaho engaro n'ebigyere, abarumuna na nyina bamuhangire amaisho. 5Ku yaabaire atakiine geehiga, omugabe yaaragiira ku bamutwara aha muriro naakiitsya, bakamukarangira aha kyoma ekikarangirwaho. Ekisooroora kirikuruga aha kikarango ku kyataamiraine, abarumuna na nyinabo baagumyana kufa bahamire, nibagira bati: 6Mukama Ruhanga naatureeba, kandi omu mazima atwiniire esaasi, nk'oku Musa yaakigambire omu kyeshongoro kye, naahamiza abantu butunu, obu yaagira ati: Naija kugirira abairu be esaasi.
7Ow'okubanza aha nyina-emwe ku yaaherize kwitwa atyo, baareeta owa kabiri kumushungisa. Baamubambuuraho ekikoba ky'omutwe hamwe n'eishokye, baamubuuza bati: Noija kwikiriza kurya ekirikuzira, okukira okureeba buri rugingo rw'omubiri gwawe nirusaasibwa? 8Yaabagarukamu omu rurimi rwa baishebo ati: Ngaaha! Batyo nabo baamubonabonesa nk'oku baabonabonesa ow'okubanza. 9Ku yaabaire ari haihi kwitsya ogw'aha muheru, yaagira ati: Imwe nshoberwa zikyeenirwe 'mwe, nobu muraatwihe omu magara aga, kwonka Omugabe w'ensi yoona oryatuzoora, atuhe amagara masya agatarihwaho; ahabw'okuba twafa nituturwa amateeka ge.
10Ogwo ku yaarugireho, owa kashatu nawe baamushungisa. Ku baamuragiire kushohoza orurimi, yaarushohoza ahonaaho kandi yaagorora emikono ye n'obumanzi. 11Yaagamba agunduukire ati: Ebi nkabiheebwa Ow'omu iguru, mbwenu ahabw'amateeka ge tindikubyeta kantu, ahabw'okuba nyine amatsiko ngu aryabingarurira. 12Ku yaagambire ebyo, omugabe n'abu yaabaire aine baatangaarira omutima gw'ogwo mutsigazi ahabw'okuba okubonabonesibwa kwe tarakwetsire kantu.
13Nawe ku yaafiire, baita kubi owa kana nibamubonabonesa, nk'oku baagira bari. 14Ku yaabaire ari haihi kufa, yaagira ati: Ni kirungi omuntu kwitwa abantu, haza akagira amatsiko ahari Ruhanga ngu aryatuzoora; kwonka imwe timurizookyera magara!
15Bwanyima baareeta owa kataano, nawe baamwita kubi. 16Ogu we yaahanga amaisho omugabe, yaamugira ati: Ahabw'okugira obushoboorozi aha bantu, nikyo orikukorera eki orikwenda, haza naiwe ori ow'okufa. Kwonka otateekateeka ngu Ruhanga atsigireho eihanga ryaitu. 17Gumizamu oreebe ku amaani ge ag'obushoboorozi gatarikwija kukubonabonesa hamwe na baijukuru baawe!
18Ogwo ku baamwihireho, baareeta owa mukaaga. Ku yaabaire ari haihi kufa, yaagira ati: Orekye kwebeihabeihera busha. Manya itwe nitubonabonesibwa ahabw'ebibi bi twacumwire ahari Ruhanga waitu; nikyo ebi by'okutangaaza bibeereireho, 19kwonka iwe oyehangire kurwanisa Ruhanga, oteekiita ngu torikwija kufubirwa.
20Nyinabo akaba ow'okutangaarirwa munonga, kandi oshemereire kuguma naijukwa naahaisibwa. Nobu yaareebire abatabani mushanju nibahwerekyerera omu izooba rimwe, akakigumira n'obumanzi ahabw'okugira amatsiko ahari Mukama; 21yaagumya buri omwe naamugambira omu rurimi rwa baishenkuru. Ahabw'okugira omutima gw'obumanzi nobu araabe yaabaire aine ebiteekateeko by'abakazi, akeeteera ebinyomyo nk'omushaija, yaabagira ati: 22Tindikumanya oku mwatonzirwe omu nda yangye. Tiinye naabahaire amagara n'omwitsyo, kandi tiinye naatengyenekire engingo za buri omwe omuriimwe. 23N'ahabw'ekyo Omuhangi w'ensi owaabumburikire omuntu naakitandika, akataho obukomooko bw'ebintu byona, ahabw'embabazi ze naija kubagarurira amagara n'omwitsyo, ahabw'okuba mwayoga amagara gaanyu ahabw'amateeka ge.
24Antiyoko akeehurira ngu yaagaywa, yaateekateeka ngu emigambire y'ogwo mukazi neemujuma. Murumuna waabo orikuhereeruka niwe yaabaire akitsigaireho ahuriire. Antiyoko yaamwehanangiriza ti mu bigambo byonka, kureka yaataho n'okumuraganisa naarahira, ku arikwija kumutungisa, akaganagana, yaaba arekire emitwarize ya baishenkuru; kandi ngu naija kumuhindura munywani we amuhe obukuru bw'okureeberera ebintu by'eihanga. 25Ogwo mutsigazi ku yaayangiire kimwe kumutega okutu, omugabe yaayeta nyina kwija ahu ari, yaamwehanangiriza kuhabura ogwo mutsigazi kwekiza. 26Omugabe ku yaaherize kugamba nawe bingi, nyina yaayemera kugambira omutabani ku aikiriza. 27Nyina ku yainamire yaamuhika haihi, yaagamba omu rurimi rw'owaabo naagaya ogwo mugabe enshaarizi orikuhata, ati: Mwana wangye, ngirira esaasi. Nkamara ameezi mwenda ori omu nda yangye nkutwaire, naakwonkyeza emyaka eshatu, naakurera, naakworora okuhitsya ahi waahika, kandi naaguma ninkureeberera. 28Mbwenu mwana wangye, naakweshengyereza, hanga amaisho eiguru n'ensi, oreebe byona ebibirimu, haza omanye ku Ruhanga atarabihangire naabiiha omu bintu ebiriho; n'abantu nikwo yaabahangire. 29Otatiina ogu mubaagi, kureka teera bakuru baawe ekishembere kirungi. Oikirize okufa, nyentsya ahabw'embabazi za Ruhanga mbone kukugarukana na bakuru baawe.
30Ku yaabaire naakigamba, ogwo mutsigazi yaagira ati: Mutegyereize ki? Tindikwija kworobera kiragiro ky'omugabe, kureka ninkuratira eky'omu Iteeka eryahairwe baatatenkuriitwe barireeteirwe Musa. 31Kwonka iwe ocumire enaama y'okukora kubi Abayudaaya omu miringo yoona, buzimazima torikwija kukira mukono gwa Ruhanga. 32Manya itwe nitubonabona nituturwa ebibi byaitu. 33Kandi Mukama waitu ohuriire, ku araabe atugiriire ekiniga akaanya kakye akatujuukirira naatuhana, hoona naija kugarukana n'abaheereza be. 34Kwonka iwe, muntu mubi 'we omusiisi ekihagaro omu bantu boona, reka kwetunguurira busha, okagira ebihagi nooyesiga ebitahamire, obangiire omukono abaana b'Ow'omu iguru. 35Tokahonokire kucwerwa orubanja Ruhanga Rukiraboona, oreeba byona. 36Manya beene waitu ku baherize kugumisiriza okubonabona kw'akaanya kakye, baanywa enshuro y'amagara agatahwaho agu Ruhanga yaaraganiise. Kwonka iwe, Ruhanga aryakucwera orubanja, oryaheebwa ekifubiro kihikire ahabw'emyetunguuro yaawe. 37Nyowe nka bakuru bangye naahayo omubiri gwangye n'amagara gangye ahabw'amateeka ga baatatenkuriitwe. Mbwenu nimpoogyera Ruhanga, arahukye kugirira eihanga ryaitu embabazi, naiwe ebibonabono n'enfu bikureetere kwatura ku niwe aba Ruhanga wenka, 38nyowe na bakuru bangye tureetere Omushoboorozi wa byona kurekyera aho kugirira eihanga ryaitu kashanga. 39Omugabe ku areeba onu yaamugambira bwahwayo, ekiniga kimucwa amaraka, amutwaza kubi munonga okukira abandi. 40Atyo afa ari mwere, naayesigira kimwe Mukama. 41Aha muheru gwa boona, nyinabo nawe afa akurata abatabani. 42Mbwenu okurya ebitambirwe n'eby'okubonabonesa abantu okurengyesereize, ka bigarukire aha.
Ebya Yuda Makabeho n'abazigu be
Currently Selected:
2 Maka 7: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.