2 Maka 6
6
1Ku hahingwireho omwanya mukye, omugabe yaatuma omunyaishengyero wa Ateene kugyemesereza Abayudaaya kureka emicwe ya baishenkurubo, n'okurekyera aho kukuratira amateeka ga Ruhanga, 2kandi n'okuhagaza Nyaruju ey'omuri Yerusalemu, bakagihongyera Zeusi ruhanga waabo ow'emizaano; n'ey'omuri Geriziimu kugihongyera Zeusi ruhanga okunira abagyenyi, nk'oku abatuuzi baamwo baabaire bagira.
3Okubagyema kukora ekyo kibi kubasaasa, kandi kukaba kutarikubaasa kwemerwa. 4Ahabw'okuba Nyaruju Abanyamahanga bakaba bagiraariramu enkyeera nibataagurira, nibacundaniramu na baamaraaya, kandi nibashambaniramu n'abakazi omu bishengye ebirikwera, bataho n'okureetamu eby'okutamba ebitambo bitahikire. 5Eitambiro rikaba rishwekwa ebitambo ebirikuzira, ebitarikwikirizibwa iteeka. 6Omuntu weena akaba azibirwa kukuza Sabato, nari okugira amagyenyi g'ebiro bikuru bya baishenkurubo, nobu kwakuba okwegamba ku ari Omuyudaaya.
7Aha mukoro gw'okwezi kw'ekiro ky'okuzaarwa kw'omugabe, Abayudaaya bakaba bagyemwa kurya amara g'ebitambirwe. Mbwenu ekiro kikuru kya Diyoniso ku kyahikire, baaragiirwa kugyendera omu mishororongo kuha Diyoniso emandwa ekitiinwa, bajwaire ebishaba by'orucwamba. 8Ahabw'okuhabura kwa Putolemaayo, ekiragiro kikashohozibwa kyatwekyerwa ab'omu ndembo z'Abaguriiki ezihereraineho, ngu batwaze batyo Abayudaaya baayo, babagyemesereze kurya ebitambirwe; 9ngu abaraayangye kutooreza emicwe y'ekiguriiki babaite; obwo kikaba nikireebwa butunu ku akagwe kaabagwera. 10Eky'okureeberaho, bakareeta abakazi babiri babataire aha rubanja rw'okushara abaana baabo; baarabya abo bakazi omu rurembo nibabooreka abantu boona, abaana baabo nibabarengyeerera aha mabeere; bwanyima baabarengyeza aha rugo bacurikire emitwe. 11Abandi abaateeraniire omu nyanga eza haihi kukuza eizooba rya mushanju bwesherekye, bakabarega ahari Filipo, baabookyeza hamwe boona. Manya okutiina Ruhanga kwabo kukabazibira kwerwanaho, bataire munonga omutima ahari eryo izooba ririkukirira kimwe agandi kuba eririkwera.
Eki Ruhanga yaikiririize Abayudaaya kubonabonesibwa
12Mbwenu niinyehanangiriza abarikushoma ekitabo eki, okuteehwa matsiko ahabw'ebihikiirizi nk'ebyo, kureka okumanya ngu ebyo bifubiro bikateebwaho ti habw'okuhwerekyereza eihanga ryaitu, kureka ahabw'okurihana. 13Omu mazima okutareka abatatiina Ruhanga kugumira aho omwanya muraingwa, kureka okubafubira ahonaaho, n'akamanyiso karikworeka embabazi nyingi. 14Manya agandi mahanga Ruhanga agagumisiririza atakagafubiire, okuhitsya obu gahika aha rugyero rw'ebibi byago ebirengyesereize. Kwonka itwe tatutwaza atyo, 15ngu atakaatufubira ebibi byaitu byaherize kurengyesereza. 16N'ahabw'ekyo takarekaga kutugirira embabazi nobu atuhanisa ebihikiirizi, aba atatutsigireho itwe abantu be ahabwe. 17Ebyo twabigamba kutwijutsya. Mbwenu ka tugumizemu ekyo kitebyo nitukicwera hagufu.
Eleyazaari okwitirwa ediini
18Eleyazaari, omwe aha bahandiiki b'eiteeka abakuru, omushaija ohikire omu ngingo za bukuru kandi ow'ekitiinwa, bakamugyema kwashama akarya enyama y'empunu. 19Kwonka we ahabw'okusiima okufa aine ekitiinwa, okukira okugumaho ahagaire, akeetwara aha kabaaho naacwera egyo nyama, 20yaatwaza nk'oku abantu emanzi batwaza nobu baakuba nibakunda amagara.
21Abaabaire nibareeberera ebitambo ebitarikwikirizibwa iteeka, ahabw'okumanyana n'ogwo mugurusi okumara omwanya muraingwa, bakamuta aha rubaju baamwehanangiriza kwereetera enyama ei arikubaasa kurya, ngu ayegire nk'orikurya enyama y'ebitambirwe, ebi omugabe yaaragiire, 22ngu ku araakore atyo akire okwitwa, kandi ahabw'okuba ni munywani waabo wa ira, aikirize bamukorere eky'embabazi ekyo. 23Kwonka Eleyazaari, ahabw'emyaka ye n'ekitiinwa ky'obugurusi bwe n'enju zi yaabaire amezire, aine amagara gataine nkoorezo okwiha omu buto, na munomuno ahabw'eiteeka eririkwera eri Ruhanga yaabahaire, akamaramaza yaayangira kimwe kukikora, yaabagambira butunu ku bamwohereza okuzimu owa Nyamuteza.
24Yaabagira ati: Okukora ekintu nk'ekyo tikushemereire bantu b'ekingano kyangye, eminyeeto etakaagira ngu Eleyazaari omu mwaka gwe gwa makumi mwenda akatsigisibwa ediini ye, yaakuratira ey'abanyamahanga, 25kandi ahabw'okwehurubaasa kwangye, ngu nkaamara akaanya nkiriho, mbahabise ntaireho n'okuhagaza n'okuhemura obugurusi bwangye. 26Manya obwa hati nobu nkwetantara ekifubiro ky'abantu, kwonka yaaba ngumaho nari nfa, tindihonoka mukono gw'Omushoboorozi wa byona. 27N'ahabw'ekyo ku ndikuhayo amagara gangye kimanzi, niinyija kweyoreka ku ndikutwaza nk'oku kishemereire obugurusi bwangye, 28haza ntsigire eminyeeto eky'okureeberaho kirungi eky'okufa gye nyekundiire, niinyesiima ahabw'amateeka g'ekitiinwa agarikwera.
Ku yaaherize kugamba ebyo, ahonaaho yaaza aha kyoma ekirikutakisa. 29Abaaba nibamutwaza gye omu kaanya kakye akaahingura bamwiniire omutima murungi, baamuhindukana baamugirira omutima mubi, nibateekateeka ngu ebi yaagamba n'eby'obushazi. 30Ku yaabaire ari haihi kufa nibamwasha, yaaborooga ati: Mukama omu kwetegyereza kwe okurikwera, naamanyira kimwe ngu nobu hati naakuba ntafiire, hoona nyine obusaasi butakareebwaga omu mubiri gwangye ahabw'okuteerwa, kwonka omu mutima ninshemerererwa oku kubonabonesibwa ahabw'okuba nimmutiina.
31Nikwo yaafiire atyo, atsigire eky'okureeberaho ky'ekitiinwa n'ekiijutsyo ky'obumanzi; ti ha barikunyeeta bonka, kureka n'aha ihanga rye ryona.
Oku enyina-emwe mushanju zaitiirwe ediini
Currently Selected:
2 Maka 6: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.