2 Maka 5
5
1Omuri ago magingo Antiyoko akahurura, yaateera Misiri omurundi gwa kabiri. 2Reero ab'omuri Yerusalemu boona baareeba eby'okutangaaza okumara ebiro haihi makumi ana; ab'ahambaraasi bajwaire eby'ezaabu nibahigira omu kaabunga; nibabareeba bari omu bimbuuro, bakwaitse eby'okurwanisa byabo: amacumu na zaarurara ezinyontoirweyo 3ebyo bimbuuro by'abarwani b'ahambaraasi bakaba batengire orugamba, nibateera kandi nibagungira ab'aha rubaju oru n'oru nibahungura engabo, nibashanguruza amacumu, nibarekyera emango, ebijwaro byabo by'ezaabu nibimurinkana, kandi bajwaire eby'orugamba eby'emiringo yoona. 4Abantu boona baashaba ngu okwo kworekwa kubagirire akaso karungi.
5Enkuru ku yaabugire, ngu Antiyoko afiire, Yasooni yaatwara abantu nka rukumi n'okukiraho, yaateera Yerusalemu. Amahe garikurindira aha rugo gaagyemeserezibwa kugarura ekibunu enyima, orurembo rwakwatwa, Menelaaho yaasingirwa omu kigo ekirindirwamu eby'okurwanisa. 6Yasooni yaagumizamu ataine saasi, naita abatuuzi bagyenzi be, atarikuteekateeka ku omuntu okusingura orugamba afeereirwe bagyenzi be guba guri omugisha mubi ogurikukira endiijo yoona. Kwonka we akateekateeka ngu eminyago ei yaanyagire, akaginyaga abazigu, batari bagyenzi be ab'eihanga rye. 7Nobu yaakozire ekyo, tarabaasize kwetungira obutegyeki, kureka enaama mbi ei yaacumiire bagyenzi be ekamurugiramu okuhemuka, yaagaruka yaahungira omu nsi y'Abamooni; 8omuheru gwe gwaba ogw'enaku nyingi. Manya ku yaatabaariziibwe omu maisho ga Areta omutegyeki w'Abaharabu, yaahunga naaruga omu rurembo naaza omu rundi, abantu boona bamubingire nibamwanga nk'ogomeire ebiragiro, bamutamiirwe kimwe nk'omucwekyerezi w'eihanga rye kandi omwitsi wa bagyenzi be; baamubinga bamuhitsya aha nyambukiro ya Misiri. 9Ogwo owaabaire abingire abantu baingi omu ihanga ryabo akabazaasya, nawe yaafa azaahire yaaherize kutemba obwato kuza omu Balakedemooni, ngu akaarindirwayo buhooro ahabw'okugira nabo obuzaare. 10Ogwo owaabingire baingi bakafa bataziikirwe, akabura ow'okumucurira, ahabw'okuba taraziikirwe mu muringo gwona, nobu kwakuba okutunga omwanya omu kituuro kya baishenkuru.
Antiyoko Epifane okunyaga eby'omuri Nyaruju
11Amakuru g'ekyabaireho ekyo ku gaahikire omugabe, yaateekateeka ngu Buyudaaya egomire, yaaruga Misiri aine ekiniga kingi, yaakwata orurembo n'amahe ge. 12Yaaragiira abaserukare be kutagira ou baasaasira, kureka okwitira kimwe boona abaahungiire omu maju gaabo. 13Mpaho baita abato n'abakuru, baacwekyereza eminyeeto n'abakazi n'abaana, baita abaishiki n'abeereere. 14Omu biro bishatu byonka haafa abantu obukumi munaana, obukumi buna baitana bakwataine, n'abaatunzirwe kuba abahuuku baingana n'abaitsirwe.
15Ekyo Antiyoko tikramunanwire, yaayehangamura kutaaha omuri Nyaruju erikukirira kimwe kuba erikwera omu nsi yoona, ayebembeirwe Menelaaho owaabaire ari endeebya omu by'eiteeka n'aha ihanga rye. 16Yaakwatsa ebikopo ebirikwera engaro zihagaire. Ebintu ebi abandi bagabe baabaire batoizire ahabw'okusiima Ruhanga, kwongyera ekitiinwa n'okuhimbisisa ogwo mwanya, yaabikwatsa engaro ziteeziibwe. 17Antiyoko ahabw'okwetunguura tiyaamanya ku Mukama amazire akaanya ainiire ab'omu rurembo ekiniga ahabw'ebibi byabo, kandi ku nikyo kimureeteire kutata mutima aha Mwanya Ogurikwera. 18Kwonka kuri bataragizire bibi bingi, ogu mushaija Ruhanga akaamwasire, areka kukora ekyo kintu, yaahikaho ati amucwa amaryo, aba nka Heliyodooro ou Omugabe Seleuko yaatumire kushwijuma eby'omu ibiikiro. 19Manya Mukama taratooraine ihanga ahabw'Omwanya Ogurikwera, kureka ogwo mwanya nigwo yaatooraniire eryo ihanga. 20N'ahabw'ekyo ogwo mwanya nyakabara nagwo gukahikwaho ebihikiirizi ebyagwereire eihanga, ngu na bwanyima gubone kutunga ebirungi byaryo; kandi ebi baatsigisiibweho ekiniga ky'Omushoboorozi wa byona, bikagarurwaho n'ekitiinwa kyabyo kyona obu Mukama Rugambwa yaagarukana nabo.
Abategyeki bakuru abu Antiyoko yaatumire Buyudaaya
21Antiyoko ahabw'okwetunguura, ku yaaherize kunyaga ebicweka by'efeeza akakaikuru kamwe n'obusiriira munaana ebi yaihire omuri Nyaruju, yaayehuuta, yaaza Antiyokiya n'amaryo, obwo naateekateeka ngu naabaasa kugyendera omu bwato aha itaka n'okugyendesa amaguru aha nyanja. 22Reero atsiga Buyudaaya abategyeki bakuru b'okubonabonesa abantu: omuri Yerusalemu yaatsigamu Filipo enzaarwa ya Furugiya, kandi omu micwe ari enshaarizi okukira owaamuhaire obukuru. 23N'omuri Geriziimu yaatsigamu Anduroniko. Ahari abo taho Menelaaho owaategyekyeise abatuuzi bagyenzi be omwaga ogurikukira ogu abandi baabaitsize. 24Antiyoko ogwo ahabw'obubisha bu yaabaire ainiire abatuuzi b'omuri Buyudaaya, akoohereza Apoloniyo omukuru w'eihe ry'Abamusiya n'engabo obukumi bubiri n'enkumi ibiri, yaamuragiira kwita abashaija bakuru boona n'okutunda abakazi n'aboojo kuba abahuuku. 25Ogwo mushaija ku yaahikire omuri Yerusalemu, yaayeyoreka nk'omuntu w'obusingye, ategyereize eizooba rya Sabato eririkwera. Sabato ku yaahikire yaareeba Abayudaaya batarikukora, yaaragiira engabo ze kutenga orugamba. 26Boona abaizire kubareeba yaabaitsa rurara, bwanyima yairuka yaataaha omu rurembo hamwe n'abashaija be abahagatiire eby'okurwanisa, yaita abantu baingi munonga.
27Kureka Yuda Makabeho n'abandi nka mwenda, baahungira omu ihamba. We na bagyenzi be baatuura omu nshozi nk'enyamaishwa nibarya ebishaka, ngu batakaakwatanisa n'abandi kurya ebirikuzira.
Abayudaaya okugyemwa kukuratira emigyenzo y'Abakaafiiri
Currently Selected:
2 Maka 5: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.