1 Maka 14
14
1Omu mwaka gwa igana na makumi mushanju n'ebiri, Omugabe Demetiriyo akahuruza amahe, yaaza Bumeediya kwihayo ab'okumuha emikono kurwanisa Turiifo. 2Arusaake omugabe wa Perisiya na Meediya ku yaahuriire ngu Demetiriyo ataire ensi ye, yaatuma omwe aha bakuru b'amahe ge kumukwata ahuriire. 3Onu atyo agyenda, asingura eihe rya Demetiriyo, amukwata amureetera Arusaake, n'onu amuta omu kihome.
4Ensi ekamara ebiro bya Simooni byona ehuumwire.
Akasherurira eihanga rye ebirungi,
emitegyekyere ye yaabashemeza,
ahabw'okuba akaguma naaheebwa
ekitiinwa ebiro bye byona.
5Ekyakizire ebitiinwa bye byona n'okukwata
Yoopa akagihindura enyambukiro,
akaigura omuhanda gw'okuza
omu birwa by'aha nyanja.
6Akairizayo emyatano y'eihanga rye,
yaategyekyera kimwe egyo nsi.
7Akagarura enkwatwa nyingi;
yaategyeka Gazara na Beetizuuri
n'ekigo ekirindirwamu,
yaakiihamu ekihagaro,
tihaagira owaamuza omu kaso.
8Bakahinga ensi yaabo n'obusingye.
Eitaka ryayeza ebihingirwe n'emiti
y'omu mpita yaayana ebijuma.
9Abagurusi bakashutama omu mihanda,
boona baagaaniira aha by'okuganagana kwabo,
abatsigazi baayehumbika ebitiinwa n'ebijwaro by'orugamba.
10Ab'omu ndembo akabatungira ebyokurya,
yaabaha n'eby'okwerindisa abazigu,
okuhitsya obu okurangaanwa kwe
kwahikire aha muheru gw'ensi.
11Akagaruraho obusingye omu nsi
Isiraeli yaashemererwa okutakareebwaga.
12Ibara muntu yaabukaarira omu mizaabibu
ye n'omu mitiini ye, hatariho n'omwe orikubatiinisa.
13Omuri egyo nsi tiharatsigaireho w'okubarwanisa,
abagabe b'omuri ebyo biro baasiitagurwa.
14Akaha amaani abacureezi b'omu bantu be,
yaacondooza eby'omu iteeka,
yaamaraho ebihaze hamwe n'enkozi z'ebibi.
15Omwanya Ogurikwera akaguhindura ogw'ekitiinwa,
yaagwongyeramu eby'okukoresa.
Okukwatanisa kw'Abayudaaya n'Abasiparuta n'Abarooma
16Kikamanywa omuri Rooma kyahika na Siparuta, ku Yonataani afiire, haza kyabasaasa munonga. 17Kwonka ku baahuriire ngu Simooni mukuru we niwe abaire omuhongyerezi omukuru omu mwanya gwe, kandi ku arikutegyeka ensi n'endembo zaamwo, 18baamuhandiikira aha bishate by'omuringa, kugaruraho omukago nawe n'okukwatanisa omu ngamba, ebi baabaire baine na Yuda na Yonataani abarumuna; 19haza ebyo byashomerwa omu maisho g'eishengyero omuri Yerusalemu.
20Eki nikyo kihandukururo ky'ebaruha ei Abasiparuta baamutwekyeire: Itwe abategyeki n'orurembo rw'Abasiparuta twakuhandiikira, iwe Simooni omuhongyerezi omukuru n'abakuru omu ihanga n'abahongyerezi n'abandi ab'eihanga ry'Abayudaaya, nitubaramutsya imwe beene waitu. 21Entumwa ezi waatumire aha bantu baitu zitugambiire eby'okurangaanwa kwawe n'ekitiinwa kyawe, kandi tushemerereirwe okwija kwabo. 22Reero ebi bagambire tubitaire omu birango byaitu eby'abantu boona tuti: Numeniyo mutabani wa Antiyoko na Antipateri mutabani wa Yasooni, entumwa z'Abayudaaya, batwizireho kugaruraho omukago gwabo naitwe. 23Kishemeize abantu baitu kwakiira abo bashaija n'ekitiinwa, n'okuta omu mabiikiro g'ebihandiiko by'eihanga ekihandukururo ky'ebi bagambire, ngu Abasiparuta babone kutunga ekihandiiko ky'okuguma nibabiijukiraho. Nabo baayoherereza Simooni omuhongyerezi omukuru ekihandukururo kyabyo.
24Ebyo ku byahwaire, Simooni yaatuma Numeniyo Rooma, aine engabo ya zaabu mpango ey'oburemeezi bwa shilingi nk'akasiriira kamwe, kuhamya okukwatanisa kwe n'Abarooma.
Ebitiinwa bi Simooni yaahairwe
25Abantu ku baahuriire ebyo ebyabaireho, baagira bati: Mbwenu Simooni n'abatabani tubasiime tuta? 26Ahabw'okuba we n'abarumuna n'eka ya ishe bahamire kimanzi; baarwana, baabinga abazigu ba Isiraeli, baagitungira okwetegyeka. 27Batyo baakora ekihandiiko aha bishate by'omuringa, baakita aha nyomyo aha Rushozi Siyooni.
Eki nikyo kihandukururo ky'ebi baahandiikire: Aha kiro kya ikumu na munaana eky'okwezi Eluuli, omu mwaka gwa igana na makumi mushanju n'ebiri, nigwo mwaka gwa kashatu ogwa Simooni omuhongyerezi omukuru rugambwa, 28omuri Asarameli omu ruteerane ruhango rw'abahongyerezi n'abantu n'abategyeki b'eihanga hamwe n'abakuru omu ihanga, ebi ahaifo nibyo byaturangiriirwe:
29Emirundi mingi engamba ku zaabaire zibaho omu ihanga eri, Simooni mwene Matatiya omuhongyerezi w'omuri beene Yoharibu n'abarumuna, bakaba beenaga omu kabi, bagungira abazigu b'eihanga ryabo, ngu babone kurinda Omwanya Ogurikwera n'eiteeka; batyo baareetera eihanga ryabo ekitiinwa kingi. 30Yonataani akataaruura ab'eihanga rye, yaaba omuhongyerezi waabo omukuru, bwanyima yaaziikwa na baishenkuru.
31Abazigu baabo ku baamaramaize kuteera eihanga ryabo n'okukwata Omwanya Ogurikwera, 32Simooni yaimuka, yaarwanira eihanga rye. Akashohoza empiiha ze ahabwe nyingi kutungira amahe g'eihanga rye eby'okurwanisa n'okubaihura emishaara. 33Akahamya ebigo by'endembo za Buyudaaya, ei akare abazigu baabaire baabiika eby'okurwanisa, yaatayo abarinzi Abayudaaya. 34Kandi akahamya ebigo bya Yoopa ey'aha rubaju rw'enyanja, na Gazara eri aha myatano ya Azooto, ei ira abazigu baabaire batuura, yaatayo Abayudaaya; ezo ndembo yaazitamu ebyabaire nibyetengwa ahabw'okuzigaruraho.
35Abantu bakeetegyereza obwesigwa bwa Simooni n'ekitiinwa ki yaamaririire kutungira eihanga rye; baamuhindura omwebembezi waabo kandi omuhongyerezi omukuru, ahabw'okukora ebyo byona n'ahabw'obwinganisa n'obwesigwa ebi yaabaire ainiire eihanga rye. Akacwa obwengye bwona kutunguura eihanga rye. 36Haza omu biro bye ebintu bikaganagana ahabwe, Abanyamahanga baabingwa omu nsi, nk'oku ab'omu rurembo rwa Daudi omuri Yerusalemu baabingirwe. Manya bakaba beeyombekyeire ekigo ky'okwerindiramu eki baabaire basyokamu, bakateera emyanya ehereraine n'Omwanya Ogurikwera, bakahagaza oburungi bwagwo. 37Akagutamu Abayudaaya, yaagwombekamu ebigo by'okurinda egyo nsi n'orwo rurembo, yaaraihisa ebisiika bya Yerusalemu.
38Ahabw'ebyo byona Omugabe Demetiriyo akamuhamya omu buhongyerezi obukuru, 39yaamuhindura omwe ahari banywani b'omugabe, yaamuha ebitiinwa bingi. 40Manya akahurira ku Abayudaaya Abarooma babeetsire banywani baabo, abarikukwatanisa nabo omu ngamba kandi beene waabo, haza ku Abarooma baayakiire n'ekitiinwa entumwa za Simooni. 41Nikyo Abayudaaya n'abahongyerezi baabo baacwereiremu ku Simooni aba omwebembezi waabo kandi omuhongyerezi omukuru ebiro byona, okuhitsya obu omurangi orikwesigwa ariboneka, 42kandi ngu abe omutegyeki waabo omukuru, areeberere Omwanya Ogurikwera, ateho abantu b'okukora emirimo yaagwo n'ab'okukora ey'eihanga n'ab'okurinda eby'okurwanisa n'ebigo n'Omwanya Ogurikwera; 43ngu boona bamuhurire, n'endagaano ezirukukorwa omu nsi zihandiikwe omu iziina rye, kandi ngu ajware ebya bujwa n'ebya zaabu. 44Haza hatarigira omuntu n'omwe nari omuhongyerezi oriikirizibwa kwihaho kimwe ahari ebyo ebyahamibwa, nainga kuhakanisa eki yaagamba, nobu kwakuba okutaho oruteerane omu nsi, we ataikiriize; nari okujwara ebya bujwa nainga ekikwatsi ky'ezaabu. 45Weena orikora ebitarikwikirizana n'ebi ebyahinguzibwa nari yaihaho kimwe aharibyo, aryafubirwa.
46Mpaho abantu boona baikiriza kuha Simooni obushoboorozi bw'okukora, nk'ebyahamiibwe ebyo oku biri. 47Simooni nawe akasiima kandi yaikiriza kuba omuhongyerezi omukuru, kuba omukuru w'amahe, omwembezi w'Abayudaaya n'abahongyerezi, n'okuba omurinzi waabo boona. 48Baaragiira kuhandiika ebyahamiibwe ebyo aha bishate by'omuringa, n'okubihanika aharikureebwa omu myanya ehereraine n'Omwanya Ogurikwera, 49n'okubiika ebihanduukururo byabyo omu ibiikiro, ngu Simooni n'abatabani babone kubitunga ahi baraabyendere hoona.
Antiyoko VII okuhamya obukuru bwa Simooni
Currently Selected:
1 Maka 14: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.