1 Maka 13
13
1Simooni ku yaahuriire ngu Turiifo ahurwize eihe rihango kuteera ensi ya Yuda n'okugicwekyereza, 2kandi ku yaareebire abantu batiinire nibatetema, yainamuka Yerusalemu, yaateeranira hamwe abantu, 3yaabagumya naabagira ati: Imwe mwenka nimumanya ebintu bikuru ebi nyowe na beene tata n'ab'omuryango gwe twakozire ahabw'ebiragiro n'ahabw'Omwanya Ogurikwera; kandi nimumanya engamba n'eby'oburemeezi ebi twagizire. 4Ebyo nibyo byareeteire beene tata boona kuhwerekyerera ahabwa Isiraeli, kandi niinye ntsigaireho nyenka. 5Mbwenu nikikabure nyowe kukiza amagara omu bunaku bw'akabi; ahabw'okuba tiinyine ki ndikuhitsa beene tata; 6kureka niinyija kuhoorera eihanga ryangye n'Omwanya Ogurikwera, n'abakazi baanyu n'abaana baanyu. Manya amahanga goona ahabwa rwango geeteeraine kutucwekyereza.
7Abantu ku baahuriire ebyo bigambo, emitima yaabagaruka omunda; 8baagarukamu n'eiraka rihango bati: Niiwe waaba omwebembezi waitu omu mwanya gwa Yuda na Yonataani murumuna waawe. 9Turwanire engamba, haza kyona eki oraaturagiire nitwija kukikora. 10Atyo ahuruza engabo ze zoona, arahukiiriza kumaririza Yerusalemu naayombekaho ebigo aha mbaju zoona. 11Ayohereza Yoopa Yonataani mwene Abusalomu aine eihe rihango, abingamu abagitwiremu kandi agigumamu.
Simooni okubinga Turiifo
12Bwanyima Turiifo akaruga Putolemaayo n'eihe rihango kuteera ensi ya Yuda, aine Yonataani bamurinzire. 13Simooni nawe yaasiisira omuri Adida aharikureebana n'oruhita. 14Turiifo ku yaamanyire ngu Simooni agiire omu bigyere bya Yonataani omurumuna, kandi ngu ari haihi kumurwanisa, yaatumaho entumwa naamugira ati: 15Eki tugumiize aha Yonataani murumuna waawe, n'ahabw'eibanja ry'empiiha zi yaagurize omu ibiikiro ry'obugabe, ahabw'emirimo ei yaabaire naakora. 16Mbwenu tutwekyere ebicweka by'efeeza nk'akasiriira kamwe, na babiri omuri batabani be, babe omukwato gw'okutuhamiza ngu ku araarekurwe tarikwija kutugomera, haza nitwija kumurekura.
17Simooni amanya ku Turiifo arikumuryarya, kwonka atuma kureeta empiiha n'abatabani, ngu atakaareeta enzigu omu bantu, bakagira ngu, 18ekyamwitiise n'ahabw'okuba Simooni taramutwekyeire mpiiha n'abatabani. 19Atyo ayohereza abatabani n'ebicweka by'efeeza nk'akasiriira kamwe, kwonka Turiifo tahikiiriza ki yaagambire, ayanga kurekura Yonataani.
20Ebyo ku byahwaire, Turiifo yaija kuteera ensi n'okugicwekyerza yaayekiikuura naareetwa ogwa Adora. Simooni n'ab'eihe rye baaguma nibagyenda bamwezingiriire, kumurwanisiza ah'arikuza hoona. 21Haza obwo abari omu kigo ekirindirwamu baaguma niboohereza entumwa ahari Turiifo, nibamwehanangiriza ku aija ahi bari naareetwa ogw'eihamba, kandi ku abatwekyera ebyokurya. 22Turiifo nikwo kutebeekanisa abe boona ab'ahambaraasi kugyenda, kwonka ekyo kiro haagwa orubaare rwingi munonga, rwamuzibira kuzayo; yaimutsya orugyendo, yaaza omu nsi ya Giliyaadi. 23Ku yaahikire haihi na Basikama, yaita Yonataani, baamuziikayo. 24Bwanyima Turiifo yaakuba yaagarukayo omu ihanga rye.
Simooni okuziika amagufa ga Yonataani Modeyini
25Simooni akatuma ab'okureeta amagufa ga Yonataani omurumuna, yaamuziika Modeyini orurembo rwa baishenkuru. 26Isiraeli yoona yaamuririra munonga, yaamara ebiro bingi neemucurira. 27Bwanyima Simooni akombeka ekiijutsyo aha kituuro kya ishe n'abarumuna; yaakireihisa ngu kibone kureebwa, yaakitaho amabaare gasoomoire, erimwe omu maisho n'erindi enyima. 28Kandi yaayombeka piramidi mushanju ezirikureebana, ahabwa ishe na nyina na beene ishe bana. 29Ahari piramidi ezo akataho eby'amaringaringo: yaazombekaho enyomyo mpango kuzeehinguririza; kandi aha mutwe gw'ezo nyomyo yaasharuraho eby'okurwanisa ebi baanyagire, kuba ekiijutsyo ky'ebiro byona. Reero aha rubaju rw'eby'okurwanisa yaataho amaato gasharwirwe, ngu gabone kureeberwa hare boona abarikuraba ogw'enyanja. 30Ekyo kiijutsyo ki yaayombekire omuri Modeyini kikiriyo na hati.
Demetiriyo okwikiriza Simooni ebi yaamushabire
31Turiifo akagobeza Antiyoko omugabe omuto, yaamwita; 32yaaba omugabe omu mwanya gwe, yaajwara ekirunga kya Asiya, yaareebesa ensi enaku. 33Simooni akombeka ebigo by'abaserukare omuri Buyudaaya, yaabiziguuritsya engo ziriho eminaara miraingwa n'ebisiika bihango n'amarembo n'ebihongorezo, kandi omuri ebyo bigo yaahunikamu ebyokurya. 34Akatoorana abantu, yaabatuma aha Mugabe Demetiriyo naamushaba kugira ebi yaasaasira eihanga; ahabw'okuba byona ebi Turiifo yaakozire bikaba biri okunyaga. 35Omugabe Demetiriyo yaamugarukamu gye ebi yaamushabire naamuhandiikira ebaruha egi ati: 36Nyowe Omugabe Demetiriyo naakuhandiikira iwe Simooni omuhongyerezi omukuru kandi munywani w'abagabe, hamwe n'abakuru omu ihanga n'eitaagi ry'Abayudaaya, nimbaramutsya. 37Tutungire ekirunga ky'ezaabu n'eitaagi ry'omukindo ebi mwatutwekyeire, kandi tweteekateekire kukora eby'okugira obusingye naimwe, n'okuhandiikira abaami baitu kubasaasira omushoro. 38Ebi twabaikiriize byona nibiija kugumaho, n'ebigo bi mwayombekire nibiija kuba ebyanyu 39ebi mubaire nimutushobeza n'ebi mubaire nimutushaagiza okuhitsya eri izooba twabibasaasira, twabaihaho n'omushoro gw'eihanga ogu mubaire mutakahaire; n'emishoro yoona ebaire neeshoroozibwa omuri Yerusalemu terikwija kushoroozibwa bundi.
40Omuriimwe ku haraabe harimu abahikire kutaahibwa omu baserukare baitu abarinzi, bahandiikwe, habeho obusingye ahagati yaitu. 41Omu mwaka gwa igana na makumi mushanju Isiraeli ekakira okutegyekwa Abanyamahanga, 42abantu baatandika kuhandiika omu bihandiiko byabo n'omu ndagaano zaabo ekirikugira kiti: Omu mwaka gw'okubanza ogwa Simooni omuhongyerezi omukuru omutegyeki kandi omwebembezi w'Abayudaaya.
Simooni okukwata Gazara n'ekigo ky'omuri Yerusalemu
43Omu biro ebyo Simooni akateera ensiisira aharikureebana na Gazara, yaagigotesa amahe yaakora ekyoma ky'okugotesa, yaakireeta omuri orwo rurembo, yaafumura gumwe aha minaara, yaagukwata. 44Abaabaire bari omuri ekyo kyoma ky'okugota baaguruka, baaragara omu rurembo, rwabamu akajagararo kahango. 45Abashaija baamwo n'abakazi baabo n'abaana baatemba ahaiguru y'ebisiika bajwaire emyenda etaagukire, baaborooga n'eiraka rihango, nibeeshengyereza Simooni kugira nabo obusingye; 46baamugira bati: Otatutura ebibi bi twakozire, kureka otugirire embabazi. 47Simooni akora nabo endagaano, arekyera aho kurwana nabo; kwonka ababinga omuri orwo rurembo; ayeza amaju agaabaire garimu emandwa zaabo, arutaahamu nibeeshongora eby'okuhimbisa Ruhanga; 48arwihamu oburofa bwona, arutamu abantu abarikukuratira eiteeka; ayongyera kugumya ebigo byarwo, ayeyombekyeramu n'enju.
49Abantu ab'omu kigo ekirindirwamu eky'omuri Yerusalemu bakaba bazibiirwe kugura ebintu n'okubitunda, na bwanyima kugaruka. Ekyo kyabareetera kugira enjara nyingi eyaitsire baingi omuribo.
50Baarugaho baatakira Simooni kukora nabo eby'okureeta obusingye, nawe yaakora atyo. Kwonka yaababingamu, yaayeza ekyo kigo yaakiihaho ekihagaro. 51Aha kiro kya abiri na bishatu eky'okwezi kwa kabiri omu mwaka gwa igana na makumi mushanju na gumwe, Abayudaaya baarutaahamu nibahimbisa Ruhanga, baine amataagi g'enkindo n'enanga n'enshandaazo n'eby'emirya ebirikujumeera, n'ebyeshongoro by'okuhimbisa n'ebindi byeshongoro, ahabw'omuzigu rurangaanwa kusingurwa akaihwa omuri Isiraeli. 52Bwanyima Simooni yaataho ekiragiro, ku buri mwaka baguma nibakora omukoro gw'ekyo kiro n'amashemererwa. Yaagumya ebigo by'ekibuga kya Nyaruju okwekiikuura ekigo ekirindirwamu, we n'abashaija be baaba nimwo baatuura. 53Simooni ku yaareebire omutabani Yohaana yaaba omushaija, yaamuhindura omukuru w'amahe, yaatuura omuri Gazara.
Okufa kwa Demetiriyo n'okusingiza Simooni
Currently Selected:
1 Maka 13: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.