1 Maka 1
1
Ebya Alekisandero n'abakungu be
1Bwanyima Alekisandero mwene Filipo Omunyamakedoniya, owaarugire omu nsi ya Kiitimu, ku yaaherize kusingura Dariyo omugabe w'Abaperisiya n'Abameedi, yaamuhungurira, yaaba omugabe. Bwabiso Alekisandero ogwo akaba ari omugabe wa Buguriiki. 2Akarwana engamba nyingi, yaakubuura ebigo, yaita abagabe b'omu nsi. 3Yaagumizamu yaahika aha mbaju ina z'ensi, yaanyaga amahanga maingi. Ku yaareebire ensi yaacureera, yaagira amaryo maingi, yaayetunguura. 4Yaarundaana eihe ry'amaani maingi munonga, yaategyeka ensi nyingi n'amahanga; abategyeki baago baaguma nibamuha emishoro.
5Bwanyima yaarwara, yaamanya ku arikwija kufa. 6Yaatuma abakungu be abarikukira abandi boona ekitiinwa, abu yaayoroirwe nabo okwiha omu buto, yaababaganisiza obugabe bwe akihuriire. 7Mbwenu Alekisandero ogwo, ku yaabaire amazire aha ngoma emyaka ikumi n'ebiri, yaafa.
8Reero abakungu be baatandika kutegyeka, buri omwe omu kyanga kye. 9Ku yaaherize kufa, boona baayemekwa baaba abagabe, na batabani baabo abaabahunguriire baaguma nibatwaza batyo okumara emyaka mingi; haza baareetera abantu kukora ebibi bingi omu nsi.
Abaisiraeli okutooreza emicwe y'ekiguriiki
10Omuribo hakakomookamu mwijukuru waabo enkozi y'ebibi, niwe Antiyoko Epifane, mwene Antiyoko omugabe. Antiyoko Epifane akaba atwairwe Rooma ari nk'omukwato. Bwanyima yaatandika kutegyeka omu mwaka gwa igana na mukumi ashatu na mushanju ogw'omu busingye bw'Abaguriiki.
11Omu biro ebyo omuri Isiraeli hakaimukamu abantu ebihaze, baahabisa baingi nibabagira bati: Nimurekye tukore endagaano n'Abanyamahanga abatwehinguririize, ahabw'okuba okwiha twataaha nabo, tuhikirweho ebintu bingi. 12Ekyo kihanuuro baakisiima. 13Bamwe aharibo baaza ow'omugabe baine omuhimbo; nawe yaabaikiriza kukuratira emigyenzo y'Abanyamahanga. 14Batyo baayombeka omuri Yerusalemu ekizaaniro, nk'oku emigyenzo y'Abanyamahanga eri; 15baayegira nk'abatashazirwe, baayecwa aha ndagaano erikwera. Baateerana n'Abanyamahanga, baayeroha omu bibi.
Antiyoko Epifane okunyaga eby'omuri Nyaruju
16Antiyoko ku yaareebire obugabe bwe bwahama, yaamaramaza kuba omugabe wa Misiri, ngu abone kutegyeka obugabe bwombi. 17Yaateera Misiri n'eihe ry'amaani, eriine ebigaari n'enjojo n'ab'ahambaraasi n'emeeri nyingi. 18Yaarwana orugamba na Putolemaayo omugabe wa Misiri; Putolemaayo yaakuba yaahunga, abantu be baahutaazibwa, baingi baagwaho. 19Endembo z'ebigo bigumire zaakwatwa, Misiri yoona yaanyagwa.
20Antiyoko ku yaaherize kusingura Misiri, yaatabaarukayo omu gwa igana na makumi ana n'eshatu. Yainamuka, yaateera Isiraeli, yaahika Yerusalemu aine eihe ry'amaani. 21Yaataaha omu Mwanya Ogurikwera n'amaryo, yaihamu eitambiro ry'ezaabu n'ekikondo ky'etabaaza n'ebyamwo byona. 22Yaihamu n'emeeza eteebwaho emigaati y'Okumurika, n'ebikopo by'okunywaisa, ebitoizirwe n'enyabya n'ebintu by'ezaabu eby'okwotereraho obubaani, omukingo, ebirunga n'amahunde g'ezaabu ag'omu maisho ga Nyaruju; byona yaabyaya. 23Yaatwara efeeza n'ezaabu n'ebintu by'obuguzi bwingi n'eby'obutungi ebyabaire bisherekirwe, ebi yaagwireho. 24Byona yaabitwara, yaagarukayo
owe omu nsi ye,
aitsire abantu baingi kandi
naagambisa amaryo maingi.
25Abaisiraeli boona ahi baabaire
batwire baacura munonga.
26Abategyeki n'abakuru omu ihanga baatsinda,
empangare n'abatsigazi baagwa enshazi,
abakazi oburungi bwabo bwahwa amaizi.
27Weena oyetwa kishwera yaatonzya
n'omugore ori omu rusiika yaacura.
28Nangwa n'ensi yaatengyeeta ahabw'abagitwiremu,
n'ab'enju ya Yakobo boona enshoni zaabashweka.
29Ku hahingwireho emyaka ebiri, omugabe yaayohereza omu ndembo za Yuda omushorooza mukuru w'omushoro, yaija Yerusalemu n'eihe rihango. 30Yaabagambira n'oburyarya ebigambo by'okureeta obusingye, baamwikiriza. Kwonka orwo rurembo yaarujumbukana kitaraariire, yaaruteera munonga, yaita Abaisiraeli baingi. 31Yaanyaga eby'omuri orwo rurembo, yaarwotsya, amaju gaarwo n'engo zigeehinguririize yaabisheenya. 32Yaatwara abakazi n'abaana bari enkwatwa, yaabanyaga n'amatungo. 33Bwanyima abo babisha orurembo rwa Daudi baarwombekaho orugo ruraingwa rugumire n'eminaara ehamire, rwaba ekigo kyabo ky'okwerindiramu abazigu. 34Baatamu abantu enyabibi kandi ebihaze abaayehamize. 35Bakabiika omuri ekyo kigo eby'okurwanisa n'ebyokurya n'ebindi bintu ebi baanyagire Yerusalemu; baaguma omwo bari ab'akabi kahango.
36Ekyo kigo kyaba ekyetindo ky'okurwanisa
Omwanya Ogurikwera, kyaba omuzigu
mubi ow'Abaisiraeli ow'ebiro byona.
37Baaguma nibasheesha eshagama y'abataine
rubanja aha mbaju zoona ez'Omwanya Ogurikwera;
nangwa n'ogwo mwanya baaguhagaza.
38Mbwenu abatuuzi b'omuri Yerusalemu ku baabahungire,
Yerusalemu yaahinduka obutaaho bw'Abanyamahanga;
yaaba etakimanywa baijukuru, abaana baayo baagitsigaho.
39Omwanya gwayo Ogurikwera gwaba ekirungurura
nk'eihamba, amagyenyi gaayo gaahinduka amaganya,
Zaasabato zaayo zaaba ez'okugaaniizibwa,
ekitiinwa kyayo kyaba eky'okugaywa.
40Okuhemuka kwayo kwaza omu
mwanya gw'ekitiinwa kyayo ekya ira;
okweraata kwayo kwahinduka okucura.
Okuhiiganisa Abayudaaya abanyadiini
41Bwanyima omugabe yaahandiikira ab'omu bugabe bwe bwona, ku boona baba eihanga rimwe; 42kandi aba buri ihanga ku bareka emicwe yaabo. 43Abanyamahanga boona baikiriza ekiragiro ky'omugabe. Baingi nangwa n'omu Baisiraeli baakuratira ediini ye bashemereirwe, baatambira emandwa ebitambo, baashiisha Sabato. 44N'omugabe yaaha entumwa amabaruha kugatwara Yerusalemu n'omu ndembo za Yuda, naaragiira abaayo kukuratira emicwe y'endugamahanga omu nsi egyo, 45kuzibira okutoija eby'okucwetsya n'okutamba ebitambo n'okutoija ebyokunywa omu Mwanya Ogurikwera, okushiisha Zaasabato n'ebiro bikuru ebyaragiirwe, 46kuhagaza Nyaruju n'abarikugiheererezamu; 47okwombeka amatambiro n'ebikaari ebirimu endaaro z'emandwa, n'okutamba empunu n'enyamaishwa zirikuzira, 48n'okurereera kushara batabani baabo, ngu beehagazise ebirikuzira n'ebihagaire, 49ngu babone kwebwa eiteeka n'okureka kukuratira ebyatairweho. 50Kandi ngu weena otarikukuratira ekiragiro ky'omugabe, aitwe. 51Ebyo bigambo yaabihandiikira ab'omu bugabe bwe bwona. Yaataho abareeberezi b'okurinda eihanga, yaaragiira ab'omu ndembo za Yuda kutamba ebitambo omu buri rurembo. 52Baingi omu baayangire kukuratira eiteeka, baakwatanisa nabo, baakora ebibi omu ihanga. 53Baareetera Abaisiraeli kweshereka omu myanya y'okuhungiramu.
54Mbwenu aha kiro kya ikumi na bitaano ky'okwezi kwa Kisileevu, omu mwaka gwa igana na makumi ana n'etaano, bakata ekihagaro ekirikuzirira kimwe aha itambiro ry'ebihongwa ebicwetsya. Kandi baayombeka amatambiro omu ndembo za Yuda ezeehinguririizeho; 55baayoterera obubaani aha miryango y'amaju n'omu nguuto. 56Ebitabo by'eiteeka rya Musa ebi baashangiremu, baabitaagataagura, baataho n'okubyotsya. 57Weena ou baabaire bashanga aine ekitabo ky'Endagaano, nari naakuratira eiteeka rya Musa, omugabe akaba aragiire ngu bamwite. 58Baagumizamu batyo nibakora eby'obwinazi aha Baisiraeli abu baabaire bashanga omu ndembo buri kwezi.
59Reero aha kiro kya makumi abiri na bitaano eby'okwo kwezi, baatambira ekitambo aha itambiro ry'Abanyamahanga eryabaire riri aha mutwe gw'eitambiro rya Mukama ery'ebicwetsyo. 60Kandi omu iteeka, omugabe akaba aragiire kwita abakazi abashariise abaana baabo, 61n'okwita ab'eka yaabo hamwe n'ababashazire, n'abeereere kubahanika omu maraka ga baanyinabo.
62Kwonka baingi omuri Isiraeli bakahama, baamaramaza okutarya birikuzira. 63Baihamu ogw'okwitwa okukira okuhagazibwa ebyokurya, nari okwita endagaano erikwera, haza kwo baafa. 64Kasahanga ya Ruhanga yaagwera etyo Abaisiraeli.
Ebya Matatiya n'abatabani
Currently Selected:
1 Maka 1: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.