Luka 17

Ɓusəɗin hipe a ɗaha

(Matta 18:6-7, 21-22; Markus 9:42)

1Yesu dzəktəna a ɗa kutə wuran, wa: «Gəni ituvəɗinariya səlay a ɗaha ka a ala hipe de á za bə ga, ahan gɨkiya ba. Amá palase a ɗu gə abə wuran gaka ituvəɗinariya səlay a ɗaha ka sahan! 2Zlaɗa gə ǎ nje ɗuhan saŋa, agwadza ɗa nəŋkinde van a taŋw nde, ɗa dzəfkilde a heye de, aŋade a aŋa təvənariya səlay aba a ɗu ɓile kini a ɗa mishishina de saŋa ala a hipe de. 3Ɗifɨna zlə sləmay ba kərətta apə ŋa kwan‑a. Abə kine mamay mbəziyakana me ga, sləkənaŋade. Abə mbəɗkakude zaɗay ene, ɓushɨnika. 4Aŋa gha giyakana hipe səlay ciɓa a fəgəmɗay ɓile de kini, abə ba mbuɗiŋa tsaw ala a ma aka de səlay ciɓa a nəɗay a dzaɗiyaka, wa: “Əŋ mbəɗakude zaɗay hwa” ga, ɓushɨnika.»

Ɗəfɗipənŋa a Askwaf‑a

5Ɗa slənɗay ɗa dzakəna a Ɗuduwuna, wa: «Ɗəfənhəmənaŋade a ɗəfɗipənŋa man.» 6Ɗuduwuna zləmkənhətənaŋa, wa: «Abə ɗəfɗipənŋa kwan a nəkay ba ka shef pili i duna ga, gha kwa dzakina a kevirke gə na saŋa kwene, ika: “Kətede ada akəna, le ciba a heye de” kini, á tsukkikuna.»

Ɗu sləra gə gika bə sləra ene

7«Wiya ayikunde i ɗu sləra ene gə mbətsən kuvak, bi tsəgən daba hay, abə nidaw ada a kiɓa ni, dzana, wa: “Nay ba yakwa yakwa ala aŋade a ipəɗay saŋa?” 8Bira dzana, wa: “Ɗawuka ɗəfka, fetɨde a ifətɗay sləra aka de, tsəmiwede əŋ pɨka te, əŋ shaka, ta ikə piya, ikə sawa iyaka bə təku?” 9Sləkəɗəna təku me a ɗu sləra ene sahan, aɗaba gika sləra gə wuran ɗəfkənaŋade saŋa? 10I kwan kini ba kugunhan. Abə kwa gika sləra gə Askwaf ɗəfəkunaŋade ba cecena saŋa ga, jena kwene, ika: “Mene ba ma ɗa sləra ɗaya, ma gika ba s'igə ɗa ɗəfəkmənaŋa sləŋa.”»

Yesu mbər ɗa dərve tə jem

11Yesu aba apə ŋa ciba ka a ləɗay ala a Zheruzalem ga, laka a laɗayede a dagava wutə Samariya ka atə Galile. 12Laka a hu s'iŋgeɗe de ga, ɗa dərve jem ɗa laka a ŋgərɗinande ba ŋgərɗay, ɗa tatavaka dzaɗ‑dzaɗɗa i me ciba. 13Ɗa hətskəlde a ŋguləhɗay abi nzəɗa, wa: «Yesu, malum, yəmmənde səke mərga!» 14Yesu ane tsatsəktənakude, dzəktəna, wa: «Len mbezlɨnlehətan ŋa kwan a ɗa slumə ɗaha hay atə Askwaf#Lewi 14:2.» Wutan ane zlama wutə aba apə ŋa ləɗay‑a ga, ɗa mburaka ba laŋ‑laŋŋa. 15Ɗu ɓile tan ba tsaka mbəraka ga, mbəɗiŋa ala a ma Yesu de, ghaya zəmbəla Askwaf abi pa taŋw. 16Naya a hətsɗinka galəmnzay miveŋ ene ba təppa apə higay‑a, kaya a sləkəɗɗin me. Dagwa sahan humas ɗa Samariya. 17Mezlene Yesu, wa: «Ɗaha jem saŋa ba cecena tan ɗa mburaka ba laŋŋa bəhe? I mà, ede ta ɗaha tahke saŋa? 18Ba ɗu ɓile tan kini dzamika bə a nəɗay a ɗəɗəmɗika Askwaf, si ba mbirkwe saŋa ɓile dəgiya!» 19Mezlene dzakəna, wa: «Slabakude, le adaw, ɗəfɗipənŋa aka zluwikina.»

Nəɗay gurɗay s'Askwaf

(Matta 24:23-28, 37-41)

20Farisa hay ɗa mbutsəkənamiya a Yesu‑a, wa: «Gurɗay s'Askwaf mà, ǎ nay bəgəna?» Zləmkənhətənaŋa, wa: «Gurɗay s'Askwaf ga, ǎ nay ka igə ɗa caka al aray ba. 21À ɗá dzakuna bə zlama adəɓa, wa: “Na wuran akəna,” bi wa: “Tá wuran alata.” Aɗaba gurɗay s'Askwaf sahan niya aba a duvak kwan de.»

22Dzəktəna a ɗa kutə wuran, wa: «Zlama hənɗay gem hay s'iŋgeɗe niya à ɗá nay, à kwá kum ba tsaɗika hənɗay gem ɓile a hənɗay gem hay s'i Kine ɗu səlammərzheŋ de, amá à kwá caka ba. 23À ɗá dzakuna, wa: “Na wuran akəna, tá wuran alata.” Amá kwene len ba, ɗivɨrintənarde ba. 24Ba ka i pə s'aray s'aveŋ gə tamandar‑a ada a dalbe ɓile ka, ha likiya ala a dalbe s'iŋgeɗe de saŋa ga, Kine ɗu səlammərzheŋ kini à ɗá caka ba kugunhan bək mbəɗɗiŋa ene. 25Amá ga, si shaka te zlaɗa hay gərgərgəra ba duna, ɗa zamane bəkwa saŋa ɗa ɓərpəna te a zhek‑a. 26Ba s'igə gaka a zamane Nuhu de saŋa ga, a hənɗay gem hay Kine ɗu səlammərzheŋ de kini ǎ ge ba kugunhan#Tamandar 6:5-8. 27Ɗaha hay ɗa pəka, ɗa saka, ɗa tuvək hər hay, ɗa vurəktən dile hay tan a mizhe hay, ha ala a bəga de Nuhu lide a palambak s'ahwam de. Ahwam kəɗɗil duniya, naya a ndərɓəɗitənakude ba cecena tan#Tamandar 7:6-24. 28Zlama adəɓa, ǎ giya ba ka aŋa gaka a zamane Ludu de: Ɗaha hay ɗa pəka, ɗa saka, ɗa suməka away hay, aŋa ɗa suməkəla, ɗa mbətska away hay tan, ɗa hahənka adaw hay tan saŋa. 29Amá bək naɗayede Ludu ada Suduma ka ga, Askwaf ndəɗitənaŋade akwa atə slahan hay ene ba ka kuwan hay a ɗa hu sahan, duləktənakude ba cecena#Tamandar 18:20–19:25. 30Bəga abə Kine ɗu səlammərzheŋ ǎ dziŋede kini ǎ ge ba kugunhan.

31«Bək sahan ga, gha ɗu gə gəɗika apə adaw‑a kini á fatay bə cine ala adide a ləɗay a tsəm s'away hay ene. Ɗu gə a kuvak de kini á mbəɗŋa bə cine ala adaw. 32Rirɨkkinakude igə zak gaɗaya apə hər Ludu‑a saŋa#Tamandar 19:26. 33Ɗu gə abə gus tsufə ŋa ene ga, ǎ səzəla, amá ɗu gə abə səskəla ga, ǎ nje ŋa ene. 34Na əŋ dzakuna: Luvaɗ bək sahan ga, gha ɗaha caw wutə aba apə mahənɗay ɓile ka kini, à ɗá hula ɗu ɓile, ɗu ɓile à ɗá harənde. 35Gha hər hay caw ɗa gən van amazhekde kini, à ɗá hula ɗu ɓile, ɗu ɓile à ɗá harənde. [ 36Gha ɗaha caw wutə a kuvak de kini, à ɗá hula ɗu ɓile, ɗu ɓile à ɗá harənde.]» 37Mezlene ɗa kutə wuran ane ɗa mbutsəkənamiya, wa: «Ɗuduwuna, ahan sahan mà, ǎ ge a magəna de?» Wuran zləmkənhətənaŋa, wa: «Ba ma gə mətska s'away ǎ za apəna saŋa ga, makwada hay kini à ɗá məslŋa aba ala a ma sahan de#Ayuba 39:30.»

Currently Selected:

Luka 17: mlr

Highlight

Copy