Yoane 9

Nter adipr Yes mun a mis mabama

1Nter awasamp Yes, ya kutar muna a mis mabama teshi mabotr mante.

2Baronki bante kungor bampe : Kumu ! ntshu aker bube na, muot nywe, mpe isante, mpe inyante isin ye ama mot ba nko ntshu a mis mabama ?

3Yes kusakr yampe : Muot nywe kuaker mey mabe bo, i babot ante ake, bo ; di isina keka mayemp ma Ntsampe musoru u kat a muot nywe ;

4Nter ingwa rusu, busek minyi ruker mayemp ma yone amatom minyi ; butu awiy bunta, rek a muot uyeb uker iket u kat a bu bo.

5Nter ingwak minyi u kat a bat, minyi rungwak ru muer mua bat,

6Nter aman yante utot nkos, ya kupur masoenyi mante u man, ya kuputur nto a man, ya kukor u mis ma muna a mis mabama.

7Kek ya kunor yampe : Yaka uwawok u rues ra Siroa mpar a rinta ampe : Rutom. Ya amawe kuwawok, ya kuwikarui ntshu atara

8Basi kump ante nto ake bene bamakuntar buso buso ampe : mun biromp bampe : Yone, ka yante nywe arompok mikuang asina ?

9Bana bamwetsh kusakr bampe : Ya yone ; bana bamwetsh bekra bampe : Bo ; di yante amak mpuany ; di yante yampe : Minyi nywe.

10Ba kunor bampe : Mis mawo munkampu mpuenyi ?

11Ya kusakr yampe : Muot mwetsh ngur ba ampe, Yes, imputur masoenyi nto a man, imakor u mis, keka imantor yampe : Yaka u rues ra Siroa uwawok, minyi rumurwe, keka rungoko, kek runkampra runtara.

12Ba kungor bampe : Ya an kue muot yos ? Yante kusakr : Minyi rek rayeb.

13Ba kuwitshuari yona ntshu awaka mis mabama ngwa Bafarisai.

14Rusu raputur Yes masoenyi rakampr yante mis mabama, rawar nkira mu basi Yuda.

15Bafarisai kungor ake bamet bampe : Ya antar mpueny ? Ya kubasuengs, amakor man maputur nto masoenyi u mis, minyi rungoko, keka runtara.

16Isin kankos Bafarisai bana bamwetsh bampe : Muot nywe kuatoa ngwa Ntsampe bo, isin yante uyer rusu ru nkira bo. Di bana bekra bampe : Muot me iyeb uker bisana bine mpuenyi ? Banta baukusiks pantshi u kat a ba.

17Ba kukaror mun a mis mabama bampe : Wene ake unor mpueny isina imaikampr yante mis mawo ? Ya kusakr yampe : Angwa profete.

18Di basi Yuda uyes bo ampe, yante awak muna a mis mabama, amatar kakaka nter aura banta isante nto inyante.

19Ba kubawor bampe : Yone muana a binu ntshu nork binu ampe, tshua ma mot ntshu a mis mabama ? A kekanko yante antar mpuenyi ?

20Isante nto inyante kusakr bampe : Tshumayeb yone muan a bitu, atoa ntshu a mis mabama.

21Di bitu rek tshuayeb mpe antar mpuenyi kekanko. Bitu rek tshuayeb ntshu mankampr mis bo. Ya nguetare, ngoror ana yante, ya apatot isin yante yamet.

22Babot ante batot nkos isin banta bapak ra basi Yuda ; isina basi Yuda bamakueriy mey ma ba ampe ; mpe muot ayeb ampe, Yes awar Kristo, ba buming u kat a mpur uromp.

23Isina kankos babot ante atot ba ampe : Ya nguetare, ngoror ana yante.

24Bafarisai kukaur muot yona ntshu awak mis mabama pur ntshi mpe, banta kunor bampe : Tonos Ntsampe bitu tshuamayeb muot yoso angwak muot me.

25Ya kusakr yampe : Mpe angwak muot me, minyi rek rayeb ; di minyi rumayeb na rine, rawak minyi muna mis mabama, kekanko rumatar.

26Ba kukangor bampe : Ya amaiker biye ? Ankampr mis mawo mpueny?

27Ya kubasaks yampe : Minyi rumabisuengs binu rek buaoka ? Isin ye ingont binu ukaok ? Binu bungont kupiru baronk bante?

28Ba kunto mising bampe : Wene ronki rante, di bitu tshu baronk ba Moise.

29Bitu tshuamayeb Ntsampe atotok nto a Moise, di muot nywe, bitu rek tshuayeb mpok ato yante.

30Muot yona kubasaks yampe : Rine ruey risisim mpe binu rek bayeb mpe ya ato kue ; di kekanko ya amakampr mis mami.

31Bit tshuamayeb Ntsampe kuangok bat babe bo ; mpe muot apuiminy Ntsampe aker ruwont rante, ya yoso ntshu ngokok Ntsampe.

32Bitu ketshuatuok ampe muot amayeb udipr mis ma mun a mis mabam bo.

33Mpe muot nywe yaruwar ka muot a Ntsampe bo, keyare yeb uker ruey bo.

34Ba kunsaks : Wene bamaibot kat bube a barabara, wene utshusuengs bitu ! Ba kuming u kat a mpuru uromp.

35Yes amaok, bamaming, nter amwens ya nto ante, ya kunor yampe : Wene umayes Muan a Ntsampe ?

36Yante kusakr yampe : Ya nake Kumu ! isina keka minyi runyes ?

37Yes kunor yampe : Wene umantar, ya yamet ikutoti nto awo.

38Ya kuror yampe : Minyi rumayes Kumu ! Ampis ya kubor mamonko a sin buso buante.

39Yes kutot yampe : Minyi ramawiy u kat a bat isina kutent butent bune, isin keka bene bungwak rek utar butar, nto ake bunkutari bupiru bin a mis mabama.

40Bafarisai bana bamwetsh bawar nto ante, nter aok ba mey mene, kunor bampe : A bitu ake tshungwar tshu bin a mis mabama ?

41Yes kubaror yampe : Mpe barakuwar bin a mis mabama, keka reke bawar i bube bo ; di kekanko binu biampe : Tshumpak tar. Isin kankos bube bua binu bumayor.

Currently Selected:

Yoane 9: EJK2012

Highlight

Copy