Yoane 5
5
Nter aber Yes ikat
1Ampis muna, rusu ru nianko ri basi Yuda kuwiy, Yes kuwe ra Yerusarem.
2U Yerusarem u kor ikuik ri Mameme, ipek ra mas rumwetsh rawak, rukompua ra rinta i rutot ri basi Hebreu#5:2 Hebreu : rukompua ri basi Yuda ampe : kuwe u muin nto ake rutot ri basi Israer nto ake basi Yuda., Betesda, rawar a mper itan.
3U kat a mper sine, bat ba buiki babesak ona, babero ba mis mabama, nto batikiya, nto bikat, banta baukubaki per a mas.
4Isin wantsho a Kumu awomnk u kate ipek rine mun iswenki, muna iswenki, anyisk mas, nter aker manta nkos, muot ntshu urokuo u kate buso, buwar buante buberu buawak ante.
5Nunka mwetsh awak ona, i buwar mabur masa masat nto mabur inana.
6Yes amantar yante ames, yante kuyeb amabik a bunta, yante kungor yampe : Umangan uberuo ?
7Mero kunsaks yampe : Kumu ! minyi reke a muot ntshu mpok minyi u kat a mas nter inyisr manta, nter awe minyi, yuekra itaroku u buso buami.
8Yes kunor yampe : Katua, sent ipon rawo, sampa.
9Itank rina muot yona kuberu; ya kusent ipon rante kusamp, rusu rina rawar rusu ru nkira ri basi Yuda.
10Basi Yuda kuror muot yona ntshu aberuo bampe : Ankana rusu ru nkira, ikin usent ipon rawo.
11Yante kubasaks yampe : Ntshu mampers, yante mantor ampe : Rab ipon rawo, sampa.
12Ba kungor bampe : Muot yoso nake mairor ampe : Raba ipon rawo, sampa ?
13Ya muot yona ntshu aberu buwar uyeb bo mpe nake ; isina Yes awe usamp u kat a bat ba buiki bawar u irak ri rina.
14Ampis warawar Yes kukamon u kat a mpur a Ntsampe, yante kunor yampe : Rent, koy wamabero ; rek ukaker mey mabe, isina mpe waker bube bukarek ka bune bu a kwetsh a kwetshi buapawiy ngwa wene.
15Muot yona kuwe, wasuengs basi Yuda ampe, Yes amamers. Nter aukusuengs Yes bat mey mante nto ake misante.
16Isin mey mene nkos, basi Yuda akusos ba Yes mey mumons ntshuro, isin aker yante mey mene rusu ru nkira.
17Di Yes kubasaks yampe : Tata aker ngun kakaka a kekanko, a minyi ake ruker.
18Isin kankos basi Yuda kureks usot undjak, ka na isina apuintsh yante rusu ru nkira bo, di isina atot yante ampe ; Ntsampe Isante, nko yante awar rueri rumwetsh a Ntsampe.
19Yes kubaror yampe : Barabara, barabara, minyi rik birori, Muan uyeb uker ruey yamet bo, nko atar yante akera Isante, mey makima maker Tata, Muan ake ikak maker aya.
20Isin Tata awont Muan, yante amansuintsh mey makima munkerk yante, yante ipansuintsh mayemp mareka mene bunen, nkos keka binu bukany.
21Nko Tata angumnk bat bawa ikabawek mony, nkos keka Muan angwekek mony abat bawont yante.
22Tata kuankutentisi mey ma muot bo, yante aweke Muan bunono bukima butentents.
23Isin keka bat bakima bupuiminy Muan nko apuiminy banta Tata. Ntshu ubera upuiminy Muan, yante yake puiminy Tata ntshu amantom minyi bo.
24Barabara, barabara, minyi, rik birori, yone ioka ruey rami, mpe yante ayes yona amatom minyi, muot yona iwar a mony usir bo, yekuiwar u utent ibantsha rukuak bo, di yante amasamp iwa, amanyingin u kat a mony.
25Barabara, barabara, minyi rik birori, itankua yeruwiy kuwiy, rinta ramawiy, yeruok minyiu rubera ra Muan a Ntsampe, bene yeburuok yebuwar a mony.
26Nko ingwaka Tata nto a mony u kat ante yamet, yante amak awek Muan mony u kat ante.
27Yante amangwek ake bunono butent isina awar yante Muan a Muot.
28Rek ana basisu bo, isin mey mene, isina itankua yeruwiy kuwiy, bene bakima bungwak u kate marompa yebuokuok ruey rante.
29Bene bakera busek yebuumu iumu ra mony, bene bakera bube ake yebuumu iumu rukuak.
30Minyi rak yeb uker ruey miamet bo, minyi runtentek nko ingok minyi, butente buami bungwak a barabara, isina minyi kurunsotk ruwont rami bo, di minyi runsotok ruwont ra Tata amatom minyi.
31Mpe minyi rakanyis miamet, rukanyi rami rek rawar barabara bo.
32Muot yuekr itot isin minyi, minyi rumayeb meye mutot yante isin minyi, manta mungwak ma barabara.
33Binu bamatom bat ngwa Yoane, mey matot ya mawar ma barabara.
34Minyi rak sot bo mey muntotok bat, di minyi runtot nkos isina keka binu bubant.
35Yoane awar muinta muatemuo, binu buamawont unianga nto a muint muante itankua kakek.
36Bukentshi buami buamarek bua bora Yoane bunen, isin mayemp mamapek Tata isin kumaker, mayemp mene munkerk minyi, mungwak binkongot biami.
37Tata ntshu amatom minyi, yante yamet amatot mey mami. Binu kubatuok ruey rante pokr imwetsh bo, kubatutar ake buso buante bo.
38Meye mante rek a manta u kat mitem mia bin bo ; isin aber binu uyes yone ntshu atom.
39Kebet ana mey mu mukant mua Ntsampe, isina kat a manta binu buyes bumon mony usir bo, manta muntotok bukentshi isin minyi.
40Di binu uwont bo uwiy u kor ami, isin kurab mony.
41Minyi kerunsotk ruton rami ngwa bat bo.
42Di minyi rumayeb nsong mua Ntsampe rek a mu u kate mitem mia binu.
43Minyi ramawiya i rukompua ra Tata, binu bamamper minyi ; mpe muot yuekra awiya i rukompua rante yamet, keka binu bunab.
44Binu buyeb uyes mpuenyi ? Binu bene bungondk ruton ra bene bamwetsh, binu usot ruton rawiya ngwar Ntsampe yamet bo.
45Rek ana bukanan ampe, minyi ruwabisor buso bua Tata, Moise ntshu unkutikiri binu, yante yeibisor.
46Isina mpe binu bamayes Moise, keka binu bukantshyes ake minyi, isina yante apunta isin minyi.
47Mpe binu uyes bo meye mapunta Moise, binu buyes mey mami ipu mpuenyi?
Currently Selected:
Yoane 5: EJK2012
Highlight
Share
Copy
Want to have your highlights saved across all your devices? Sign up or sign in
Copyright © 2012, ASAREB, Suisse MiDi BIBLE
