Yoane 21
21
Nter asoru Yes ngwa baronki bante u kor irib ra Garirea
1Ampis muna Yes kusoru ngwa baronki bante, u kor a mas manen ma Tiberiade, yante asoru nko :
2Simon Petero, Tomas auraka banta Didime, Natanaer nsi Kana u kat a Garirea, nto a ban ba bora Zebede nto baronki bekra bape ba Yes bawa irak rumwetsh.
3Simon Petero kubaror yampe : Rumawe uwawat basue. Banta kunor bampe : A bitu tshuwe nto awo ake, ba kutou bamanyingn u kat a buat bumwetsh, i butu buna banta uwat iket bo.
4Nyies butu Yes anyemt u nkor a mas ; di baronki uyeb bo ampe, yante awa Yes.
5Yes kubaror yampe : Ban, binu rek buawar nto iket rudja ? Banta kunsaks bampe : Bo.
6Ya kubaror yampe : Bok ana butey urubampi ru nuema rou ra buat, binu bapamon. Banta bamabok nkos ; di banta uyeb ukabunan bo, isina buiki bu basue banen.
7Ronki rawont Yes kuror Petero yampe : Angwa Kumu. Simon Petero nter aok ya nkos ampe, awa Kumu, ya kurat iper rante nto nkueri muante, isina yante awar butaka, ya kurokuo u kat a mas.
8Di Baronki bekra bawiy nto a buat bawinani butey buayora nto basue ; isin banta kebawar tare nto a muin mu nkuentshi bo, rueri masanke makuem mape.
9Nter ator banta u muin mu nkuentshi u man, banta kutar mayar ma tshiya manaminya nto a sue u ruk ra tshunta nto a kat, Yes kubaror yampe :
10Witshuar ana basue bunguat binu.
11Simon Petero kubanta u kat a buat, konan butey u muin mu nkuentshi buayora nto basue banen masanke makuem mape ibasatu ; awar banta ba buiki di butey ubatu bo.
12Yes kubaror yampe : Widji ana, baronki bante ya ronki rumwetsh uyeb ungor bo ampe : Wene u nake ? Bamayeb, yante awa Kumu.
13Yes kuses u kora banta kurab kat, yante kubawek, ya kuka bawek ake sue.
14Ine yawar soruo ntshi nsat ntshi asoru Yes ngwa baronki bante, ampis aumu yante kat minyiu.
15Ampis nter aman ba udja, Yes kuror Simon Petero yampe : Simon, muan a bora Yonas, wene umareb upont urek bene imapont banta ? Yante kunsaks yampe : E, Kumu ! Wene umayeb minyi rumaiwont. Yes kunor yampe : Djis bana bami bu mameme.
16Yes kukanor ntor ntshi mpe : Simon, muan a bora Yonas, umaponta ? Petero kunsaks yampe : E, Kumu ! Wene umayeb minyi rumaiwont. Yes kunora yampe : Djis bana bami bu mameme.
17Yante kunor ntor ntshi nsat : Simon, muan a bora Yonas, umaponta ? Petero kubuak piu yankebi isina amanor yante ntor ntshi nsat ampe : Umaponta ? Yante kunsaks yampe : Kumu ! Wene umayeb mey makima, wene umayeb minyi rumaiwont. Yes kunor yampe : Djisa bana bami bu mameme.
18Barabara, barabara, minyi rik irori : Nter awak wene burenke burunka, wene waratk wene amet, wene wawek irak rawontk wene, di nter inun wene, yeusangn mayatsh mawo, keka yuekra yeirats, yeiwaitshuari u irak yeruwar wene rek wont bo.
19Yante amanor nkos, isina kuyebs ampe, nto iwa ru nake yerutonos Petero Ntsampe. Nter aman ya utot nkos, yante kunor yampe : Rabs ami.
20Petero kubarm ya kutar ronki rawont Yes, awiyi mpis a banta, ya yone nter aukudji banta bisima bikokoro ntshu ayekmu tor a Yes ntshu amangor ampe : Kumu ! nake ntshu maisariy ?
21Nter amantar Petero, ya kuror Yes yampe : Kumu ! muot nywe yeiker biye ?
22Yes kunor yampe : Mpe minyi rawont nte iwar a mony kakaka nter ikawiy minyi, rungwar ruey rawo ? Wene rabs ami.
23Ruey rine ramatshakr u kat a ban ba Ntsampe bampe : ronki rine kuiwu bo. Di Yes keasuen Petero ampe, yekuiwu bo ; di yante aror yampe : Mpe minyi rawont yante iwar a mony kakaka nter ikawiy minyi, rungwa ruey rawo ?
24Ronki rine ratot mey mene ramamapont ; bitu tshuamayeb bukentshi buante bungwak bua barabara.
25Yes amaker mey mekra ma buiki ; mpe tshuarak mapunt makima, minyi rukan mikanta mia manta mia buiki keka miamarek bat ba man.
Currently Selected:
Yoane 21: EJK2012
Highlight
Share
Copy
Want to have your highlights saved across all your devices? Sign up or sign in
Copyright © 2012, ASAREB, Suisse MiDi BIBLE
