Sélimɛ 34

Sikɛmi wi 'Dina cúʔɔ wè

1Bà lɛ̀lɛ láà kɛ́nì kúɔ lè, a Dina 'yiri, Leya nɛ́ Yakuba póri wè, nɛ̀ kɛ́ bàa kùlo sinborilo síɛri bèle. 2Nàguɔ wáà 'puu baa, pe 'wi ye Sikɛmi. Wi tuu Kamɔri wire wi 'puu pe kùlofɔli wè; Eviyé wuu wi 'puu. Bà Sikɛmi sɛ́nì Dina nyaa wè, a Sikɛmi 'wi cò fànʔa nɛ̀ sínɛ nɛ́ wi ní nɛ̀ wi cúʔɔ. 3Kire kàduʔumɛ, Dina wè, Yakuba póri wè, a wi 'Sikɛmi dɛ́ni wè kpuʔɔ. A wi 'gbòbori nɛ̀ juu nɛ́ sinboriwo ní wè, nɛ̀ wi fungo nyígi gè. 4A Sikɛmi wi sɛ́nì ti juu wi tuu Kamɔri mɛ́ wè nɛ́ jo: «Sinboriwo ŋáà líɛ wè ma kɛn mi mɛ́ wi‑ kò mi cuɔ.»

5Nɛ̀ ki yaʔa Yakuba cé ki lúʔu dí Sikɛmi nyɛ́nì tuu wire póri Dina nɛ̄ wè, nɛ̀ wi cúʔɔ. Bɛ̀ Yakuba jaala pe yé kɛ́ yajuuro nàʔadiʔɛ nī gè nyàʔa nī gè, a wi 'pìiri fúɔ nɛ̀ taa a pe kɛ́nì pɛn.

6A Kamɔri wè, Sikɛmi tuu wè, a wi 'kɛ́ nɛ̀ sɛ́nì Dina náari wè Yakuba mɛ́.

7Bà Yakuba jaala pe yé kɔ́n yajuuro nàʔadiʔɛ nī gè nɛ̀ pɛn wè, a pe pɛ́nì ki lúʔu gàa ki yé kpíʔile bile gè. A pe funyɔ yi 'yɛ̀ kpuʔɔ fúɔ nɛ̀ nyɛ́nigɛ, nɛ́ ki cɛ́n Sikɛmi cé kapiigbuʔɔ kpíʔile Isirayɛli nī wè, nɛ́ Yakuba póri cáan wè nɛ̀ taa fànʔa nɛ̄, kire gáà kiì yé yɛli siɛn cɛ ki kpíʔile gèʔ.

8A Kamɔri sí pe yɛ: «Mi jaa Sikɛmi wè, yeli póri wi tɔ̀ni nɛ̀ wi dɛ́ni. Mi nɛ yeli fiɛn wī, ye‑ wi kɛn wi mɛ́ cɛliwɛ. 9Yeli nɛ́ weli ní bèle, we bé nyafɛnigɛ kpíʔile nɛ́ wìye ní, béri cepɔriyɔ kpínʔini yè nɛ́ wìye ní. Yeli béri yeli pórilo kanʔa bèle weli mɛ́, weli míɛni béri weli pórilo kanʔa bèle yeli mɛ́. 10Yeli bé kò nɛ́ weli ní, yeli bé gbɛ̀ tɛ́ni náʔa kùlo nī lè, bè gbɛ̀ dàala taa náʔa weli mɛ́, bèri nyaari de mári yìye mɛ́ de yeli kele kúu gèle.»

11A Sikɛmi míɛni wi 'juu nɛ́ sinboriwo wi tuu ní wè, nɛ́ wi lɔbilɔ ní bèle nɛ́ jo: «Ye‑ nyinimɛ taa mi nɛ̄, a yeli 'jo yɛgɛ ó yɛgɛ gè, m'bé ki kɛn yeli mɛ́. 12Ye‑ wali nyuɔ káà tìɛ nìʔɛgɛ gàa yeli nɛ caa cepɔrigɔ lɔri dè, ye‑ cepɔrigɔ cɛngɛ yakɔnrɔ míɛni tìɛ dè, m'bé ti caa gɛn yeli mɛ́. Yé sí taa ye sinboriwo wire kɛn m'mɛ́ cɛliwɛ.»

Yakuba jaala pe 'Dina kàsii tún wè

13A Yakuba jaala pe 'Sikɛmi nɛ́ wi tuu Kamɔri fáanni wè, nɛ́ ki cɛ́n Sikɛmi wi yé peli cɔni Dina cúʔɔ wè. 14A pe sí pe yɛ nɛ́ jo: «Weli sǐ gbɛ̀ kire kpíʔileʔ, bè weli cɔni Dina kɛn wè nàguɔ wáà mɛ́ ŋàa wī kɛnɛkɛnɛ sìngbiʔile nī wèʔ. Ki bé puu fìɛrɛ weli mɛ́. 15Weli sǐ gbɛ̀ yéri ki nɛ̄ʔ. Kaala nigbe sí yē náʔa: a yeli míɛni 'fɔ̀li nɛ̀ yéri weli wori nɛ̄ dè, kire gī, yeli 'yɛli bè yeli nàguɔlɔ pe mìɛni kɛnɛkɛnɛ kpíʔile wè wī. 16A yeli 'yéri tire nɛ̄ dè, weli béri weli pórilo kanʔa bèle yeli mɛ́, weli míɛni béri yeli wuulo líi bèle, weli bé tɛ́ni nɛ́ yeli ní, we mìɛni bè kò siɛnfelige nigbe. 17A yeli sì yéri tire nɛ̄ dèʔ bè yeli kɛnɛkɛnɛ kpíʔile wè, weli bé weli cɔni líɛ wè bè kɛ́ nɛ́ wi ní wī.»

18A pe siɛnrɛ ti 'Kamɔri nɛ́ wi jaa Sikɛmi dɛ́ni wè, 19a nàgapunwɔ wi 'fali nɛ̀ ŋàʔana bé sa ki kpíʔile gàa pe 'juu gè, nɛ́ ki cɛ́n Yakuba póri wi 'láa puu wi nɛ̄ kpuʔɔ. Ki 'nyaa Sikɛmi wire wi 'puu, wi tuu siɛnnɛ nī bèle, ŋàa pe 'puu nɛ kpóri wè.

20A Kamɔri nɛ́ wi jaa Sikɛmi ní wè, a pe sɛ́nì nɔ̀ kàʔa ki nàkpanʔa wìile nɛ̄ lè, nɛ̀ siɛnrɛ dáà juu dè nɛ̀ tìɛ pe nɛ̄, nɛ́ jo: 21«Siɛnnɛ bálì bèle pe nyɛ́nì yéri ki nɛ̄ bè puu yanyige nɛ̄ nɛ́ weli ní. Ye‑ ki yaʔa pe‑ kò nɛ́ weli ní, pe sí de nyaari pìye mɛ́ de pe kele kúu gèle weli kùlo nī lè. Ye‑ ki wéli, kùlo ni wè kpuɔlɔʔ kayɔbiyɔ yi mìɛni nɛ̄ lé ? Weli béri pe pórilo líi bèle cɛlilɛ, bé míɛni de weli pórilo kanʔa bèle pe mɛ́. 22Gàa sí gī baa gè, siɛnnɛ bálì piyě fɔ̀li ki nɛ̄ bè kò nɛ́ weli ní we‑ kò siɛnnuminɔʔ, a weli nàguɔlɔ pe mìɛni sì yéri ki nɛ̄ bè kɛnɛkɛnɛ kpíʔile wè bɛ̀ peli tíɛlɛʔ. 23Pe yajuuro dè, nɛ́ pe lɔri ní dè, ti mìɛni sǐ puu lé weli mɛ́ʔ ? Kire nɛ̄, ye‑ tí we‑ yéri pe siɛnrɛ nɛ̄ dè, pe‑ sí kò nɛ́ weli ní.»

24Siɛnnɛ bálì pe mìɛni pe 'puu tɛ́ninɛ nàkpanʔa wìile nī lè, a pe 'Kamɔri nɛ́ wi jaa Sikɛmi siɛnrɛ lúʔu dè. A kire kàʔa nàguɔlɔ pe mìɛni 'kɛnɛkɛnɛ kpíʔile wè.

25Cɛnyɛ taanri kàduʔumɛ gè, bà kɛnɛkɛnɛ nɔmirɔ ti 'puu nɛ tíin nɛ pe yáa dè, a Yakuba jaala siin 'yɛ̀ nɛ̀ sɛ́nì tuu pe nɛ̄, Simɛyɔ nɛ́ Levii, Dina wi lɔbilɔ bèle#34.25 Simɛyɔ nɛ́ Levii ní wè, nɛ́ Dina ní wè, pe taanri pe 'puu nuufɔnuwɔ pìile; pe yàa wire wi 'puu Leya wè. Wéli baa 29.33-34..

A pe 'pe kapiɛngbuɔn ŋuʔɔnɔ líɛ gèle nɛ̀ sɛ́nì tuu kàʔa nɛ̄ gè, nɛ̀ ki yaʔa kàʔa siɛnnɛ piyè puu nɛ kapiɛnnɛ wuʔu sɔ̀ngí gèʔ. A pe 'nàguɔlɔ pe mìɛni kpúu. 26A pe 'Kamɔri nɛ́ wi jaa Sikɛmi 'kpúu wè nɛ́ ŋuʔɔnɔ ní gèle, nɛ́ Dina cò wè nɛ̀ yige Sikɛmi saʔa nī gè, nɛ̀ kɛ́ nɛ́ wi ní.

27A Yakuba jaasɛnminɛ pe 'pɛn nɛ̀ pɛ́nì kúbilo fùʔuro bèle, nɛ̀ kàʔa ki yɛrɛ ti mìɛni líɛ, bɛ̀ ki 'nyaa siɛnnɛ bálì pe yé peli cɔni cúʔɔ wè. 28A pe 'síkaala cò bèle, nɛ́ sìnbaara ní dè, nɛ́ nìɛyɛ ní yè, nɛ́ sèfɛngɛlɛ ní gèle, dàa ti 'puu kàʔa nī gè, nɛ́ dìi ti 'puu nyàʔa nī gè. 29A pe 'siɛnnɛ bálì pe lɔri ti mìɛni líɛ nɛ̀ kɛ́, nɛ́ pe pìile ní bèle, nɛ́ pe cɛlilɛ ní bèle, nɛ̀ pe 'yɛrɛ ti mìɛni 'koli kpógori saaya nī yè.

30A Yakuba wi 'juu nɛ́ Simɛyɔ nɛ́ Levii ní wè nɛ́ pe yɛ: «Yeli nyɛ́nì yawuʔɔ wáa mi nɛ̄ díɛʔ, nɛ̀ mi yaʔa mi‑ nɛ númɔ kùlo náà siɛnnɛ mɛ́ bèle, Kanaa siɛnnɛ bèle nɛ́ Perezi siɛnnɛ ní bèle. Siɛnnɛ cɛ̀ri bīɛlɛ m'mɛ́; pe mìɛni bé sí ga pìye pínɛ bè ba tuu mi nɛ̄ bè mi kpúu, mi nɛ́ mi wuulo ní bèle#34.30 Wéli baa Fàn 7.7; 26.5; Ŋún 105.12..»

31A wi jaala pe sí wi yɛ: «Weli bé ki yaʔa mmɛ gè lé, siɛnnɛ bálì pe 'weli cɔni kpíʔile wè majo nàjaacuɔ wī#34.31 Wéli baa 49.5-7. ?»

Currently Selected:

Sélimɛ 34: sev

Highlight

Copy