Sélimɛ 33

Yakuba nɛ́ Ezawu pe 'pe kàsii kúɔ wè

1Bà Yakuba 'yiʔɛ yɛ̀gɛ gè nɛ̀ wéli wè, a wi 'Ezawu nyaa wi wi kpàlí nɛ́ siɛnnɛ sirasiin ní. A wi sí pìile tíla bèle nɛ̀ kɛn pe yàala mɛ́ bèle, a wi 'Leya wuulo kɛn bèle wi mɛ́, nɛ́ Arasɛli wuulo kɛn bèle wi mɛ́, nɛ́ sùkulocɛlilɛ siinwuulo kɛn bèle pe mɛ́. 2A wi 'sùkulocɛlilɛ kínige bèle nɛ́ pe pìile ní bèle, nɛ́ Leya nɛ́ wi pìile taʔa bèle pe nɛ̄, nɛ́ kúɔ nɛ́ Arasɛli nɛ́ Yusufu taʔa wè pe nɛ̄. 3Á wire tíimɛ kíni pe mìɛni yiʔɛ mɛ́. Bà wi sɛ́ni nɔ̀gí wi luɔ nɛ̄ wè, a wi 'tuu nɛ̀ yiʔɛ cúbulo gè dàala nɛ̄ lè fúɔ nɛ̀ taa tɔliyɔ kɔlisiin. 4A Ezawu sí fali nɛ̀ fɛ̀ nɛ̀ sɛ́nì wi kpàli, nɛ̀ sɛ́nì wi wáa nɛ̀ mígi nɛ́ wi suɔn suɔn gàangbuʔulo nɛ̄ gèle, a pe siin pe 'fali nɛ̀ nyɛni. 5A Ezawu ga yiʔɛ yɛ̀gɛ gè nɛ̀ wéli wè, a wi 'cɛlilɛ nyaa bèle nɛ́ pìile ní bèle, a wi 'Yakuba yúgo wè nɛ́ jo: «Báli sí bīɛlɛ bàli bèle nɛ́ muɔ ní wè ?»

A Yakuba sí jo: «Mi pìile bīɛlɛ, bàli ní Kulocɛliɛ 'mi kpúʔɔ wè nɛ̀ pe kɛn muɔ baakuɔwɔ mɛ́ wè.»

6A sùkulocɛlilɛ pe 'pɛn nɛ́ pe pìile ní bèle, nɛ̀ pɛ́nì tuu nɛ̀ cúbulo. 7A Leya nɛ́ wi pìile ní bèle, a peli míɛni 'pɛn nɛ̀ pɛ́nì tuu nɛ̀ cúbulo. A Yusufu nɛ́ Arasɛli, a peli míɛni 'pɛn nɛ̀ pɛ́nì tuu nɛ̀ cúbulo.

8A Ezawu wi sí wi yúgo nɛ́ jo: «Gáa sí ma yé je kúɔ nɛ́ yajuugbuʔulo gálì ní gèle gàli ní mi kpàli gèle ?»

A Yakuba sí jo: «Mi 'puu nɛ caa mi kɛnmɛ pi- muɔ dɛ́ni, mi kàfɔli.»

9A Ezawu sí jo: «Lɔri yé náʔa m'mɛ́ nìʔɛrɛ nɛ cɔni. ‑Muɔ wori yaʔa dè baa.»

10A Yakuba sí wi náari nɛ́ jo: «ʔé ! Mi nɛ muɔ fiɛn wī, a ki yē muɔ nɛ tɔ́ri nɛ́ mi ní wè, ma fɔ̀li ki nɛ̄ má kpuʔɔrɔ dáà suɔ dè. Nɛ́ ki cɛ́n bà muɔ nɛ́ mi ní, we 'wìye nyaa wè, á muɔ 'mi sɔ́migɔ nɛ̀ kpàli wè, a mi 'ki nyaa majo mi nyɛ́nì Kulocɛliɛ yiʔɛ nyaa wī. 11Kire nɛ̄ mi nɛ muɔ náari, ma fɔ̀li kpuʔɔrɔ dáà nɛ̄ dè, dàa mi 'kɛn muɔ mɛ́ dè. Nɛ́ ki cɛ́n Kulocɛliɛ nyɛ́nì 'mi kpúʔɔ nɛ̀ lɔriniʔɛrɛ kɛn m'mɛ́; yɛrɛ sáa yē m'mɛ́.» Bà wi 'ki juu nɛ̀ taʔala mmɛ gè, a Ezawu wi pɛ́nì yéri ki nɛ̄.

12A Ezawu wi 'jo: «Ye‑ yɛ̀ we‑ pínɛ weri waa; m'bé kíni yeli yiʔɛ mɛ́.»

13A Yakuba sí jo: «ʔé ! Mi kàfɔli, muɔ nyɛ́nì ki cɛ́n pìile pe 'yìrige, pe wè gbɛ̀nɛ tári fáariʔ. Nɛ̀ pínɛ, yajuuro yē mi mɛ́, sìnbacɛlilɛ nɛ́ síkacɛlilɛ, nɛ́ nɛ̀nɔminɔ, dàa ti 'pìile kanʔa pe‑ ŋɔri bèle. A mi 'jo tánʔana ŋàʔana lè bè kpíʔile cɛngɛ nigbe gè, ti mìɛni bé kùu ! 14Kire nɛ̄, mi kàfɔli, mari waa mi yiʔɛ nɛ̄, mi nɛ muɔ náari wī. Mi béri waa muɔ kúrugu funnyige nɛ̄, bè yɛli nɛ́ yajuuro ti tánʔagɛnnɛ ní lè, dàa dī mi yiʔɛ mɛ́ gè, nɛ́ pìile pe tánʔagɛnnɛ ní lè, fúɔ bè taa mi‑ sa nɔ̀ mi kàfɔli wi tiʔɛ nɛ̄ gè, Seyiiri kùlo mɛ́ lè.»

15A Ezawu sí wi yɛ: «Ma sí yéri ki nɛ̄, mi‑ siɛnnɛ pálì yaʔa nɛ́ muɔ ní.»

A Yakuba 'wi yɛ: «Gáa nɛ̄ muɔ je kire kpíʔile bɛ̀ ? Muɔ- taa kpuʔɔrɔ taʔa mi nɛ̄, mi kàfɔli.»

16Kire cɛnnugo gè, a Ezawu 'koli nɛ̀ koligo líɛ gè nɛ̀ kɛ́ Seyiiri kùlo mɛ́ lè, 17a Yakuba wire 'kɛ́ Sukɔti kàʔa mɛ́. A wi sɛ́nì saʔa faan baa, nɛ́ kpátaaya kpúɔn nɛ̀ wi yajuuro nyɔ́gɔ dè baa. Kire kɛnmɛ nɛ̄ a pe 'kò nɛ ki tiʔɛ yeri gè Sukɔti (ki kɔri wire wī: kpátaaya tiʔɛ).

18Bà Yakuba 'kɔ́n Mɛsopotamii kùlo mɛ́ lè nɛ̀ pɛn gbɛ̀nwɛ wè Kanaa kùlo mɛ́ lè, á yafiɛn sì wi taa wèʔ, a wi kɛ́nì yɛ̀ nɛ̀ sɛ́nì tɛ́ni Sikɛmi kàʔa táanni gè. 19Nɛ̀ ki tiʔɛ dàala suɔ lè, tiʔɛ gíì nī wi yé wi fɛ̀ni saʔa kóri gè; wi yé ni suɔ Kamɔri jaala mɛ́ bèle, walifiiwe walikpegele dabataan (100)#33.19 Siɛnnɛ bálì pe lɛ̀lɛ nī lè, pe nɛ̂ cé gbɛ́nɛ sìnbapori suɔ nɛ́ walifiiwe walipile nigbe ní lè.. Kamɔri wire wi 'puu Sikɛmi tuu wè. 20A wi Kulocɛliɛ gbùʔɔrɔdiʔɛ faan nɛ̀ yérige baa ki tiʔɛ nī gè, nɛ̀ ki míʔɛ le gè nɛ ki yeri Eli Eloye Isirayɛli (ki kɔri wire wī: Kulocɛliɛ wi yē Isirayɛli Kulocɛliɛ).

Currently Selected:

Sélimɛ 33: sev

Highlight

Copy