Sélimɛ 17

Kulocɛliɛ wi 'nyakungɛngɛ fìɛ tìɛ wè Birayima nɛ̄

1Lɛ̀lɛ líì nī Birama yiʔɛlɛ togosicɛri nɛ́ kpɔrigɔ nɛ́ kacɛri taa wè, a Yewe 'wìi tìɛ wi nɛ̄ nɛ́ jo: «Mi wī Ŋɔri Ti Mìɛni Kulocɛliɛ wè. Te síngi mi yiʔɛ mɛ́, ma puu dìgire fùn, 2bà m'bé ní mi nyuɔ kún gè gɛn muɔ mɛ́, gàa mi yé juu muɔ mɛ́ gè, gàa mi yé juu muɔ nɛ́ mi sunʔɔmɔ ní bè. M'bé sí tɔ̀ni muɔ kpíʔile siɛnniʔɛmɛfɔli.»

3A Birama 'fali nɛ̀ tuu nɛ̀ yiʔɛ cúbulo gè dàala nɛ̄ lè.

A Kulocɛliɛ ń'nɛ̀ juu nɛ́ wi ní, nɛ́ jo: 4«Mi wè, mi nyɛ́nì mi nyakungɛngɛ kpíʔile gè nɛ́ muɔ ní: muɔ bé tɔ̀ni bé ba puu siɛnfeliniʔɛyɛ tuuliʔɛ. 5Piyě ní de muɔ yeri Biramaʔ (ki kɔri wire wī: tuufɔli ŋáà pe 'kpóri wè), nɛ̀ ki cɛ́n muɔ míʔɛ ki bé puu Birayima (ki míʔɛ kɔri wire wī: tuufɔli ŋáà wī siɛnniʔɛmɛfɔli), nɛ́ ki cɛ́n mi nyɛ́nì muɔ kpíʔile kùlogolo siɛnniʔɛnɛ tuuliʔɛ. 6Kányiʔɛ nɛ̄, m'bé tɔ̀ni pìsiʔi tɛ́ni gè muɔ nɛ̄, m'bé ki yaʔa kùlogolo bé yiri muɔ nī, kùlofɔlilɔ bé yiri muɔ pìile nī bèle.

7«M'bé 'koli mi nyakungɛngɛ siɛnrɛ nɛ̄ dè dìi mi yé juu mi nɛ́ muɔ sunʔɔmɔ ní bè, bé ní koli ti sɔ́migɔ juu nɛ́ muɔ kɛ̀ngɛlɛ ke mìɛni siimɛ ní bè; ki bé puu bànguɔ nyakungɛngɛ. M'bé kò muɔ Kulocɛliɛ, bé ní puu muɔ siimɛ wuulo pe Kulocɛliɛ, muɔ kàduʔumɛ gè. 8Kanaa kùlo náà nī muɔ tɛ́ni lè, lire náà nī muɔ 'puu nabɔnwɔ wè, m'bé ni mìɛni kɛn muɔ mɛ́, muɔ nɛ́ muɔ siimɛ wuulo ní bèle muɔ kàduʔumɛ gè; ni bé puu yeli woli lɛ̀lɛ ó lɛ̀lɛ nī. M'bé kò pe Kulocɛliɛ.»

9A Kulocɛliɛ ń'nɛ̀ ki juu Birayima mɛ́ nɛ́ jo: «Muɔ wè, muɔ bé mi nyakungɛngɛ siɛnrɛ cò dè, muɔ nɛ́ muɔ siimɛ wuulo ní bèle muɔ kàduʔumɛ gè, kɛ̀ngɛlɛ ke mìɛni nī. 10Dàa tire dī mi nyakungɛngɛ siɛnrɛ dè, dàa dī mi nɛ́ yeli sunʔɔmɔ ní bè nɛ́ muɔ siimɛ wuulo ní bèle bàli pe báan muɔ kàduʔumɛ gè, dàa yeli bé cò dè: nàguɔlɔ pe mìɛni 'yɛli bè kɛnɛkɛnɛ kpíʔile wè.

11«Kɛnɛkɛnɛ wè, wire wi bé puu nyakungɛngɛ ki fìɛ wè, mi nɛ́ yeli sunʔɔmɔ ní bè. 12A nàgabile ni 'cɛnyɛ kataanri taa wè, yeli 'yɛli bè wi kɛnɛkɛnɛ kpíʔile wè. Bà ki béri kpínʔini kɛ̀ngɛlɛ ke mìɛni nàgabigele mɛ́, nɛ́ nàguɔlɔ bálì bīɛlɛ pe wè muɔ wésiile bèleʔ, kire 'jo sùkulolo bálì pe 'sii muɔ kpáa nī gè, nɛ́ sùkulolo bálì pe 'suɔ nabɔnminɔ mɛ́ bèle nɛ́ wali ní wè. 13Sùkulolo bálì pe 'sii muɔ kpáa nī gè nɛ́ bàli pe 'suɔ nɛ́ wali ní wè, pe mìɛni 'yɛli pe‑ pe kɛnɛkɛnɛ. Bà ki bé kpíʔile mi nyakungɛngɛ ki fìɛ wi bé puu yeli céri nɛ̄ dè, ki bé puu nyakungɛngɛ gáà kiǐ ga kúɔ gèʔ. 14A nàguɔ ŋíì cíi nɛ́ jo wiǐ kɛnɛkɛnɛ kpíʔile wè bè ki fìɛ taʔa wè wìi nɛ̄ wèʔ, kire nàguɔ wi bé yige péwu wi tuu siɛnnɛ nī bèle; kire nàguɔ wi nyɛ́nì mi nyakungɛngɛ siɛnrɛ cíi dè.»

15A Kulocɛliɛ wi ń'nɛ̀ ki juu Birayima mɛ́ nɛ́ jo: «Sarayi wè, muɔ cuɔ wè, muɔ sì ń'de wi yeri Sarayi cíginiʔ; nɛ̀ láʔa pàngɛ nɛ̄ gè, pe béri wi yeri Sara (ki kɔri wire wī: kùlofɔli póri). 16M'bé diba taʔa wè Sara nɛ̄ wè, bé sí jaafɔli kɛn muɔ mɛ́ Sara wire kɛnmɛ nɛ̄. Mi diba wi bé puu wi nɛ̄ fúɔ bè taa kùlogolo ke ba yiri wi nī; siɛnfeliye yi kùlofɔlilɔ bé ba yiri wi nī.»

17A Birayima 'tuu nɛ̀ yiʔɛ cúbulo gè dàala nɛ̄ lè, nɛ́ tíʔɛ nɛ́ ki sɔ̀ngi wi fungo nī gè nɛ́ jo: «Yiʔɛlɛ dabataan (100) nàguɔ bé ní gbɛ̀ pùɔ sii í ? Yiʔɛlɛ togosicɛri nɛ́ kpɔrigɔ cuɔ bé ní gbɛ̀ sii í ?»

18A Birayima 'ki juu Kulocɛliɛ mɛ́ nɛ́ jo: «Cí ! A muɔ 'taa nɛ̀ diba taʔa wè Simayira wire nɛ̄ wè, nɛ́ wi yaʔa a wi 'kò sìi nɛ̄ muɔ yiʔɛ mɛ́ gè o !»

19A Kulocɛliɛ 'jo: «ʔúnʔun: muɔ cuɔ Sara wire wī bé jaafɔli sii muɔ mɛ́. Muɔ bé wi míʔɛ le gè bèri wi yeri Siaga (ki kɔri wire wī: kátaanra pùɔ). M'bé ní koli mi nyakungɛngɛ siɛnrɛ nɛ̄ dè bè ti sɔ́migɔ juu nɛ́ wi ní, wire nɛ́ wi siimɛ wuulo ní bèle, gàa ki bé puu bànguɔ nyakungɛngɛ gè. 20Gàa ki 'Simayira wuʔu kúɔ gè, mi nyɛ́nì muɔ náarigɛ lúʔu gè. M'bé diba taʔa wè wi nɛ̄, bé pìsiʔi tɛ́ni gè wi nɛ̄, bé wi siimɛ niʔɛ bè. Kàfɔlilɔ kiɛ nɛ́ siin bé yiri wi siimɛ nī bè; m'bé wi siimɛ kpíʔile bè kùpolo láà. 21Nɛ̀ ki yaʔa m'bé ní koli mi nyakungɛngɛ siɛnrɛ nɛ̄ dè, bè ti sɔ́migɔ juu nɛ́ Siaga ní wè, ŋàa Sara bé sii wè yiɛlɛ láà bìinɛ ŋáà nī wè.»

22Bà Kulocɛliɛ 'juu nɛ̀ kúɔ nɛ́ Birayima ní wè, a wi 'núgo Birayima táanni nɛ̀ kɛ́ naamɛ.

23A Birayima 'fali nɛ̀ wi jaa Simayira cò wè nɛ́ wi kɛnɛkɛnɛ nɛ́ nàguɔlɔ bálì pe mìɛni pe yé puu wi kpáa nī gè, nɛ́ bàli pe yé sii baa bèle nɛ́ bàli pe yé suɔ nɛ́ wali ní wè. A Birayima 'pe mìɛni kɛnɛkɛnɛ kpíʔile wè kire cɛnnugo gè, nɛ̀ yɛli nɛ́ dàa ní Kulocɛliɛ yé juu wi mɛ́ wè. 24Birayima yé yiʔɛlɛ togosicɛri nɛ́ kpɔrigɔ nɛ́ kacɛri taa lɛ̀lɛ líì nī pe 'wi kɛnɛkɛnɛ wè. 25Wi jaa Simayira wè, wire yé yiʔɛlɛ kiɛ nɛ́ taanri taa lɛ̀lɛ líì nī pe 'wi kɛnɛkɛnɛ wè. 26Kire cɛnnugo gè, Birayima nɛ́ wi jaa Simayira ní wè, a pe mìɛni siin 'kɛnɛkɛnɛ kpíʔile wè, 27nɛ́ wi kpáa nàguɔlɔ ní bèle, bàli pe yé sii baa wi kpáa nī gè nɛ́ bàli pe yé suɔ nabɔnminɔ mɛ́ bèle nɛ́ wali ní wè, a pe mìɛni 'wúɔ nɛ̀ kɛnɛkɛnɛ kpíʔile wè nɛ́ wi ní.

Currently Selected:

Sélimɛ 17: sev

Highlight

Copy