Malëkë 3

Yeesu wabelusi libakë mu cilumbu ci saba

(Mat 12.9-14; Lik 6.6-11)

1Vyaasi yin'ka, Yeesu kukotë mu cizutununu, mwabë libakëlë wuvolë likaandë li kooko. 2Sifalisyaanu bëlëtalaangë Yeesu ningë naandi wukum'belusi cilumbu ci saba, mu kum'bakë sintoondo. 3Yeesu kukaambë muutu wabë wuvolë likaandë li kooko : « Manë n'telë, we yisi fë katyaasi ku meeyi. » 4Naandi wusë bëkaambë : « Bufweeni cilumbu ci saba, mu kuvaangë liboti voo libi, mu kuvatulë muutu, voo mu kum'biikë kufwe? » Akasi, baawu bësye n'vutulilë mbeembu ko. 5Yeesu kwazungini ntalu yi likaanzi mu baawu, cyaali i cyuundë byan'kotili mu cibilë ci bukafëkini bu mitimaawu, na kukaambë libakë beenë : « Nonunë kooko kwaaku. » Naandi kunonunë kwaawu i kwaawu kubelukë. 6Sifalisyaanu kubasikë i bisë lengë kotë fuundu, yimunë bo bëke cinguuku cimweekë ci Eloodë, mu kufwiikë buni bëkuvondilë Yeesu.

Mpaapë baatu bakwiisë ke Yeesu

7Foofë, Yeesu yimunë bilaanzi byaandi kuvolikë ku nkoonzu liyaangë. Mpaapë baatu kun'laandë, banë bëfuminë ku libweeti li Ngalilee, ku libweeti li Zudee, 8ku livulë li Yelusaleemë, ku libweeti li Yidumee i ku lweeku lun'ka lu mwiilë Yulëdaanu, ku mëbweeti më mëvulë më Tiilë i Sidoonë. Mpaapë baatu bë mëbweeti i mëvulë be moomo, abu bayuwu manë kulëvaangaangë, baawu kwiisë ke naandi. 9Boobo, Yeesu kukaambë bilaanzi byaandi bëm'belikilë bwaatu, mu kumaangë mpaapë baatu kun'fyetikini. 10Licyelikë, bo kulëbelusyaangë mpaapë baatu, babooso bëlëbeelaangë bëlëtoombaangë kun'siimbë. 11Baatu bo bëvwaatu ke biluunzi bibi, bunë bam'moni, baawu kusiimbë li kubongëmë fë maalu maandi bwendi ke losukaangë : « Njeeyi wuli Mwaanë Nzaambi! » 12Kasi Yeesu, wusë bëkaambë yi n'kaswaandi yooso, bëleembu kutubë nani kukeeli.

Yeesu wasoolë kuumi mimbunzi wali

(Mat 10.1-4; Lik 6.12-16)

13Kumanoofo, Yeesu wusë makë ku yilu moongo i naandi kutelë bo kuzolë mu kun'salilë i baawu kwiisë kuke naandi. 14Mu baawu yivaandi, kufolikë likomo li kuumi li baatu bwaali bo kusoolë, kulëteelë mimbunzyaandi, kusiloobo, bwiinji bëkalë yaandi i mu kubëfilë mu ke loongë libuungu li Nzaambi, 15yimunë lutumu lukukulilë biluunzi bibi. 16Tala likuumi bëbwaali baawu aba: Simu – awu kuvaanë lizinë Pyeelë#3.16 lizinë li Pyeelë: Mat 16.16-18. Za 1.42. – 17Zaakë mwaanë Zebedee i Za nkombaandi – baawu aba, Yeesu wusë kubëtelë Bwanalëzeesë, dedë: « baanë bë civelë#3.17 Lik 9.54. » – 18Andëlee, Filiipë, Batelëmi, Matye, Tomë, Zaakë li mwaanë Alëfee, Tadee, Simu wunë wun'nwaninë cikaangë mu si syaandi, 19i Zuda Iskalyootë, awu wun'sumbisi Yeesu.

Yeesu yimunë libaambë lyaandi

20Yeesu wusë vutukë lu bwaalë i nkoongë baatu kube zutënooso i bisë be podyooso ko kubakë mëkanë më kwambulilë. 21Libaambë li Yeesu lye yuwu lyaliili, baawu kwiisë mu kun'venë, kasi baawu bëlëtubaangë : « Naandi walawukë. »

Yeesu wavutulë n'vutu mu maambu mo bun'futikilë

(Mat 12.22-32; Lik 11.14-23; 12.10)

22Miloonji n'kaakë bo bëfuminë ku livulë li Yelusaleemë, kukaambë baatu : « Naandi wuvwaatu ke Belëzebuulë#3.22 Belëzebuulë: Mat 10.25. , fumu biluunzi bibi, mwaawu kulë mu kukulilaangë biluunzi bibi. » 23Mu bwaawu, Yeesu kutelë miloonji n'kaakë i wusë bëkambilë mu sisasafë : « Kwisilë bunye, Satënë kube kulilooso Satënë? 24Mooti lwaangu lukabukë lwaveekë yi lwaveekë, lwaawu kuzingilë bunye? Lwaawu mëzingulu mpa. 25Mooti yivaandi cifuumbë cikabukë cyaveekë yi cyaveekë, cifuumbë be cyooci mëzingulu mpa. 26Satënë oboobo, mooti wulë mu kuyinwanisi naveekë i naveekë, ningë ti naveekë wuyikabulë, lutumu lwaandi kupodi ve kuziingë i lwaawu kusiitë. »

27« Kaambofo, muutu ve wum'podi kukotë ku n'zo yi wo wuke yi n'viingu mu kutafë biimë byaandi, kukaambu kutekë kun'vidë bikonyi. Vandyoobo, yakë li kutafë byakë byooso binë kubakë. 28Cibeeni, yilukaambë, mësumu mooso më baatu mën'kobukë i busafu booso bën'vaangë mu Nzaambi. 29Kasi wosuku wun'safulë Ciluunzi ci Saantu, sasabi mësumu maandi misë n'kobuku ko, mësumu maandi mën'kalililë sakë yi sakë. »

30Yeesu wubëkambilë obo, cibilë bëlëtubaangë : « Ciluunzi cibi cyan'vwaatë. »

Mamë i banë bë nguli bë Yeesu

(Mat 12.46-50; Lik 8.19-21)

31Foofë, mamaandi i banë yaandi bë nguli kutuukë ku ngaandë, baawu bisë filë ciluumbi mu kun'telë. 32Nkoongë baatu yiyabë fë likumë lyaandi yisë n'kaambë : « Mamaaku i banë yaaku bë nguli i banë yaaku bëcyeetu baawu obo ku ngaandë. Baawu bën'vwa n'ciinzë mu njeeyi. » 33Naandi kubëvutulilë : « Mamaami nanye i banë yaami bë nguli bë nanye? » 34Kwe zungini ntalu mu banë babë foofë, na kutubë : « Mamaami naandyaawu, banë yaami bë nguli baawaaba. 35Licyelikë, wosuku wun'vaangë n'vwiilu Nzaambi, naandyoowo na mwanaami nguli, mwanaami n'cyeetu i mamaami. »

Currently Selected:

Malëkë 3: NTVIL

Highlight

Copy