Matye 7
7
Nufundisyaanu ko bëmesë
(Lik 6.37-38,41-42)
1« Nufundisyaanu ko bëmesë, mu kumaangë bëlufundisi. 2Cibilë Nzaambi wulufundisi bo lun'fundisyaangë bën'ka. Bëluzongilë mu cizongulu cinë lubëzongililaangë. 3Cibilë-mbici njeeyi wulë mu kumonë lukuunzë mu lyeesu li mwanaaku nguli i kasi wun'kaambu kumonë likuunzi like mu lyeesu lyaakwe? 4Kaambofo, buni wum'podi kukaambë mwanaaku nguli : “Biikë miinu yibotulë lukuunzë luke mu lyeesu lyaaku”, kosuku njeeyi ke yi likuunzi mu lyeesu lyaaku? 5Cimpilë-mpiipi, botuloobo ntetë likuunzi like mu lyeesu lyaaku! Fa foofë, faawu wum'mweenë buboti buni bu kubotulilë lukuunzë luke mu lyeesu li mwanaaku nguli.
6Luvanyaanu ko cinë cike ci saantu ke simbwa, mu kumaangë naandi kulubalukulë i kulubeenzaanu. Nubumyaanu ko misaangiinu ke singulu, mu kumaangë syaawu kusilyatilë. »
Loombaanu, toombaanu i dodumunaanu fë livitu
(Lik 11.9-13)
7« Loombaanu i beeno lun'tambulë. Toombaanu i beeno lum'bakë. Dodumunaanu i bëluzibulilë. 8Cibilë wosuku wun'loombë wum'bakë, wunë wun'toombë wum'monë, i bën'zibulilë wunë wun'dodumunë. 9Muutu mbici mu nkoongiinu wun'vaanë limanyi ke mwanaandi wukun'liindë limpa? 10Kaambofo kun'vaanë nyookë ningë bëloombë mbisi? 11Lembuko beeno ludiifë, luzabisi kuvaanë biimë biboti ke baanë biinu. Kwisilë buni, Tatiinu wuke ku mëyilu wun'kaambu kuvaninë biimë biboti ke banë bëkun'loombë! »
12« Cyosuku lun'vwa n'ciinzë ti baatu bëvangilë mu beeno : bo bumweekë vaangaanu mu baawu. Mati bwa boobo bun'tubilë n'kaakë Moyiizë i mibici#7.12 Lom 13.8-10.. »
Livitu libatëkënë
(Lik 13.24)
13« Kotilaanu fë livitu libatëkënë, cibilë livitu liyangililë i nzilë yike buungwaa bilunatë ku lufwa. I mpaapë bën'vyokilë mwaawu. 14Kasi livitu lin'natë ku luziingu libatëkënë i nzilë yikwendilë kwaawu yitudë. Mwa m'poku kwaandi wum'podi kumëbakulë. »
Mibici lupuutu
(Lik 6.43-44)
15« Kebaanu mu mibici lupuutu. Baawu bën'kwisilë ke beeno mu mpwatulu mëmemë, kasi mu kati kwaawu mikoomo. 16Beeno lubëzabilë mu mëvaangë maawu. Bë kusë n'velilaangë ko mëkuundi më viinyi mu siseendë, keti mëngengë mu n'ti siseendë. 17Wosuku n'ti wumboti, wum'butaangë mëkuundi mëboti, kasi, n'ti wu m'bi wum'butaangë mëkuundi mëbi. 18N'ti wumboti kupodi ve kubutë mëkuundi mëbi i n'ti wu m'bi kubutë ve mëkuundi mëboti. 19Wosuku n'ti wun'kaambu kubutë mëkuundi mëboti wun'tyelu i wun'laku ku mbaasu. 20Oboobo, beeno lun'zabilë mibici lupuutu mu mëvaangë maawu. »
Kutubë i kuvaangë
(Lik 13.25-27)
21« Yaaku ti bakë booso bën'tubaangë : “Fumu, Fumu”, bën'kotë ku Lwaangu lu mëyilu, kasi banë bën'vaangë n'vwiilu wu Tataami wuke ku mëyilu. 22Mu cilumbu ci Lufundusu, mpaapë bëkun'kaambë : “A Fumu, a Fumu! Mati mu lizinë lyaaku mwaawu twabikulilë. Mati mu lizinë lyaaku twakulilë biluunzi bibi. Mati mu lizinë lyaaku mwaawu twavangilë mpaapë bimakë!” 23Bwaawu yibëkaambë : “Yisye luzaabë ko. Yakënaanu cinaanu yi miinu, beeno bivadë-mbi#7.23 Twi 6.9.!” »
Sinzo siwali
(Lik 6.47-49)
24« Mu lyaawu, wosuku wun'kuwu mëbuungu maami i wumësalilë, wum'ba dedë mweekë mungë mëlyeelë wutuungë n'zwaandi fë yilu limanyi li ngooto. 25N'vulë yanokë, miilë yawaalë, mpeemo yabwiilë mu n'zo be yooyo, kasi yaawu yisye bulumukë ko, cibilë simbaandu syabë situngulu fë limanyi li ngooto. 26Wosuku wun'kuwu mëbuungu maami i wun'kaambu kumësalilë, naandyoowo, cila-lawu citungilë n'zwaandi fë cisenginini. 27N'vulë yanokë, miilë yawaalë, mpeemo yabwiilë mu n'zo beenë i yaawu yabulumukë : yakë yooso yisë vongumukë. »
Lutumu lu Yeesu
28Yeesu bunë kwamani kuvaanë mëloonji omo, bakë booso bisë bwa libobo mu ntekwaandi yikulongilë. 29Cibilë naandi sye ba ko bukë miloonjyaawu n'kaakë, kasi wulëbëloongaangë yimunë lutumu.
Currently Selected:
Matye 7: NTVIL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.