Liikë 8

Bëcyeetu bëlë ke vekisyaangë Yeesu

1Kumanoofo, Yeesu wulë ke yendaangë mu mëvulë i mu maalë bwendi ke loongaangë i ke tendulaangë mosuku Mpolu Mboti yi Lwaangu lu Nzaambi. Likuumi bë bwaali li bilaanzi byabë yaandi, 2yimunë mwa mpooko bëcyeetu banë Yeesu kuvuuci mu biluunzi bibi i wusë belusi bibeedo : Maali bëlëteelë Maali li Magëdaalë, wo bëbaasi saambwali li biluunzi bibi. 3Zaanë, n'kasi wu Zuza, likundaalë mu nkoongë bisasi bi Eloodë. Libakëlë bëlëteelë Suzaanë yimunë mpaapë bën'ka, bëlë ke zudyaangë Yeesu i bilaanzi byaandi mu biimë byo baawu bëbakë.

Sasafë yi cimwamunë singeenzë

(Mat 13.1-9; Mak 4.1-9)

4Mu kadë livulë, baatu bëyisë ke Yeesu. Dedë mweekë nkoongë yinenë yiyikukumë, naandi wutubë sasafë ayi : 5« Cimwamunë singeenzë wubasikë i wusë kweendë ku solaandi mu kwe mwamunë singeenzë. Abu kulëmwamunë, mwa mpooko singeenzë sisë bwiilë mu ndaambu nzilë. Baatu kusilyatilë i sinuni kusidoodë. 6Mwa mpooko wun'ka kubwiilë fë yilu mëmanyi. Bunë bikunu bimenë, byaawu kuumë cibilë bikaambu cibodo. 7Mwa mpooko wumesë yivaandi kubwiilë fë meeyi siseendë. Siseendë kumenë fë cimweekë yimunë bikunu biboti i siseendë kubifyetikini. 8Kasi mwa mpooko wun'ka kubwiilë mu n'toto wumboti. Abu bikunu byameni, byaawu kuvaanë mpaapë mëkuundi, wosuku n'ti kubutë nkamë li mëkuundi. » Yeesu wusë be tubooso : « Yuwaano buboti, wosuku wuke yi n'tu, matu mëke yaandi. »

Cibilë-mbici Yeesu kulëtubilaangë mu sisasafë

(Mat 13.10-17; Mak 4.10-12)

9Bilaanzi bi Yeesu bisë n'yufulë suundu yi sasafë be yooyi : 10Naandi wubëvutulilë : « Liveewu ke beeno mu kuzaabë liviindë li Lwaangu lu mëyilu, kasi kuke bën'ka lyalyooli libëveewu mu sisasafë, bwiinji :

“Baawu, kupodi kwaandi kutalilë, kasi bisë m'monë ko,

baawu kupodi kwaandi kuwu, kasi bësë n'zikulë kuwu ko#8.10 Ezy 6.9.” »

Yeesu wazimunë sasafë yi cimwamunë singeenzë

(Mat 13.18-23; Mak 4.13-20)

11« Suundu yi sasafë oyo yaawu ayi : cikunu, mati libuungu li Nzaambi. 12Bëmesë bëke dedë mweekë ndaambu nzilë fanë fëm'bwiilë lungeenzë : baawu bën'kuwu, akasi dyaabu wun'kwisë i kutumunë libuungu mu mitimaawu mu kumaangë baawu kuta lyaanë i bëleembu kuvuukë. 13Bën'ka fwiifu yi n'toto wuwaalë mëmanyi : baawu bën'kuwu libuungu i baawu bëlikwaakë yi liyaanji lyooso. Akasi, baawu bisë m'biikë ko libuungu kumënë singaanzi mu baawu, baawu bën'lengë ta lyaanë fë mwa ntaangu i bën'sundilooso kuvubikë ciminu bunë simpekaadu sin'kwiisë. 14Cikunu cim'bwiilë fë meeyi siseendë fwiifu si baatu bo bën'kuwu libuungu li Nzaambi. Kasi baawu mu nzilë sikwendë bën'vangisi kufyetëmë, mu bimvweemvu, businë i bideenzë bi luziingu i baawu bisë n'vaanë ko mëkuundi mëyelë. 15Cikunu cim'bwiilë mu n'toto mbodo, fwiifu si baatu aba bën'kuwu libuungu i bëliluundë mu n'timë wumboti wubelikilë, wunë wun'kalilë wusulëmë i bën'vaanë mëkuundi. »

Sasafë yi mwiindë

(Mak 4.21-25)

16« Muutu ve wun'tatikë mwiindë, mu kuwufukë kusi cipaanë, kaambofo kusi ciikë. Tiilyoko, bëkuwutuulë fë cicyetukulu bwiinji bo bën'kotë bëmonë cyeseesë#8.16 Mat 5.15; Lik 11.33.. 17Cyosuku ciluundëmë cim'bangukë fë ciyalëlë i cyosuku ciswaamë cin'zabëkënë i cim'monikë fë cyeseesë. 18Mu boobo, kebaanu mu nyuwulu siinu! Cibilë wunë wuke mwa ciimë, wum'bweelë kutambulë cyo cifunë. Kasi, wunë wukaambu cyosuku ciimë, bëkum'botulë keti fwaati kum'balë kubakë. »

Mamë i banë bë nguli bë Yeesu

(Mat 12.46-50; Mak 3.31-35)

19Mamë Yeesu i banë yaandi bë nguli, bisë kun'zakënë, kasi mu cibilë ci nkoongë baatu, baawu bësye podi ko kutuukë fo fabë naandi. 20Bisë kaambë Yeesu mu bikumë abi : « Mamaaku i banë yaaku bë nguli bëke ku ngaandë i bëke yi tesu mu kukumonë. » 21Kasi Yeesu wusë kaambë bakë booso bëba faawu : « Mamaami i banë yaami bë nguli, mati bo bën'kuwu libuungu li Nzaambi i kulisalilë. »

Yeesu wabutikë mpeemu-ngudi

(Mat 8.23-27; Mak 4.35-41)

22Cilumbu cin'viipë, Yeesu wusë makë mu bwaatu yimunë bilaanzi byaandi i wusë bëkaambë ti : « Twe vyoocyaanu ku samu-simu li liyaangë. » Baawu bisë ke yendaangë. 23Ntaangu baawu bëlë ke sambilaangë, Yeesu wusë nuukë. Kuzimbukulabu, mpeemu-ngudi yisë kupukë mu liyaangë. Bwaatu bulë waalë masi, busë kutoonë kusiindë i baawu bisë ba mu kwaatë-bamë. 24Mu lyalyooli, bilaanzi bisë belëmë Yeesu i bisë n'kotulë mu kukaayi : « A N'loonji, N'loonji, beeso twakun'fwa! » Yeesu wusë kotukë, kutundilë mpeemo i mëyo mënenë misë butëmë. N'sikë wunenë wusë ba. 25Fë mbusë, Yeesu wusë kaambë bilaanzi : « Kuni kuke lufyaatu lwiinwe? » Kasi baawu bisë ba yi boomë, i bisë bwa libobo i bisë tubënë baveekë yi baveekë : « Nani kukeeli muutu awu? Naandi wun'tumi mpeemo i masi më liyaangë i byaawu kun'yuwulu#8.25 Twi 65.8; 89.10; 107.23-32.! »

Yeesu wabelusi muutu wuvwaatu ke biluunzi bibi

(Mat 8.28-34; Mak 5.1-20)

26Baawu bisë sabukë liyaangë i bisë ke tuukë ku libweeti li singelaseenu#8.26 Mat 8.28., linë like samu-simu limesë li liyaangë li Ngalilee. 27Ntaangu Yeesu wusë kubasikë mu bwaatu, libakëlë li livulë lisë kun'dyengënë. Naandi wabë wuvwaatu ke biluunzi bibi, faanë yi faanë, naandi wusye be vwaataangë ko binkutu i wusye be kalilaangë ko mu n'zo, kasi fë meeyi mëbuumbë kulëzingilaangë. 28Buni kwamonë Yeesu, naandi kulosukë, kuyilumbikë fë maalu maandi i wusë tubë yi n'viingu wooso : « A Yeesu, Mwaanë Nzaambi-Mpuungu, nje mbi wun'toombë mu miinwe? Nkokolu syaaku, leembu kun'yokulë! » 29Yeesu wusë tumisi ciluunzi cibi mu kubasikë mu naandi. Ciluunzi be cyoocyo cilën'kwamisyaangë mpaapë vyaasi. Bëlën'kaangaangë simpaangë mu myooko i mu maalu mu kun'luungë, kasi naandi wulëcyelaangë syaawu i ciluunzi cibi cilën'nataangë ku lweeku lukaambu baatu. 30Yeesu wusë n'yufulë : « Lizinë lyaaku nanye? » Naandi wusë vutulë : « Lizinë lyaami “Nkoongë”. » Naandi wutubilë katyoobo, cibilë ti biluunzi bimpaapë bibi bikotë mu nyitwaandi. 31Biluunzi beenë bisë bondililë Yeesu wuleembu kubëfilë ku buluunji bu mbaasu.

32Faanë, fabë n'kaangu wunenë wu singulu#8.32 Mak 5.11. wulën'toombaangë bikulya fë yilu moongo. Biluunzi bibi bisë loombë n'swa ke Yeesu mu kukotë mu singulu beenë i naandi wusë kubëvaanë n'swa. 33Mu lyalyooli, biluunzi bibi bisë basikë mu muutu beenë i bisë ke kotë mu singulu. N'kaangu singulu wukukulumukë mu tiinu i wusë ke yifwaangë mu liyaangë : syakë syooso kufwa. 34Bunë biluungë singulu bamoni maambu be moomo kuvangënë, baawu bisë tiinë i bisë ke tyamunaangë saangu mu mëvulë i mu simpakë. 35Baatu bisë basikë mu kumonë maambu mo mëvangënë. Baawu bisë tuukë fanë fabë Yeesu, i bisë monë libakëlë lyo biluunzi bibi bibasikë. Naandi wukalë fë maalu më Yeesu, wabë wuvwaatë binkutu i ciluunzi cyaandi cisikëmë. Baawu bisë ba yi boomë. 36Banë bëmonë maambu makë mooso, bisë zabikini buni muutu beenë kuyabilë wuvwaatu ke biluunzi bibi wusë kubelukë. 37Mu lyalyooli, baatu booso bë Ngelaseenu bisë loombë Yeesu kubotukë fë libweeti lyaawu, cibilë ti baawu bëba yi boomë. Yeesu wusë kumakë mu bwaatu i wusë ke yendaangë. 38Muutu wunë biluunzi bibi bibasikë wuloombë Yeesu mu kukalë yaandi. Kasi Yeesu wusë tubë : 39« Vutukë ku n'zwaaku i we zabikini maambu mooso manë Nzaambi kwavaangë mu njeeyi. » Mu lyaawu, naandi wusë vutukënë i wusë ke zabikinyaangë mu livulë lyooso, manë Yeesu kwavaangë mu naandi.

Mwaanë Zayuusë wu n'cyeetu i n'cyeetu wabë yi lukuumbi lu meengë

(Mat 9.18-26; Mak 5.21-43)

40Ntaangu Yeesu wuvutukënë ku samu-simu liyaangë li Ngalilee, nkoongë yinenë yisë n'tambulë, cibilë ti bakë booso bëlën'viingaangë. 41Muutu mweekë, nkuumbu Zayuusë, wuyisë kuunë. Naandi wabë fumu yi cizutununu. Na kufukumë fë nduunzi yi Yeesu i wusë m'bondililë mu kwiisë ku n'zwaandi, 42cibilë ti wo mwaanë be woowo wu n'cyeetu wabë yaandi, wabë kwaasu ku kuumi mivu wali, naandi wabë fë mëvaambu më lufwa.

Bunë Yeesu kulëkwendë, nkoongë yilë ke n'fyetëkinyaangë mu tweeku tooso. 43Kosuku, munë nkoongë yilëkwendë yaandi, mwabë n'cyeetu mweekë wabë yi lukuumbi lu meengë fë kuumi mivu wali. Naandi wumanë simboongo syaandi syooso ke singaangë-m'buci. Kasi muutu ve wupodi kum'belusi. 44Naandi wusë kubëlëmë Yeesu, i wusë siimbë sosu cinkutu cyaandi. Mo mu ntaangu beenë, lukuumbi lwaandi lu meengë lusë siitë. 45Yeesu wusë kufulë: « Nani wakun'siimbë? » Baatu booso bisë maangë i Pyeelë wusë tubë : « A N'loonji, nkoongë yi baatu yakuzukë i yakufyetikini mu tweeku tooso. » 46Kasi Yeesu wusë tubë : « Muutu wakun'siimbë, cibilë yamonë n'viingu wabasikë mu miinu. » 47Bunë n'cyeetu beenë wusë monë ti bam'bakulë, naandi wusë bongëmë fë maalu më Yeesu yi lutekutu looso. I wusë n'kaambë fë ntwaalë baatu bakë booso, mu mbici naandi kun'simbilë i buni kubelukilë mu ntaangu be yiinë. 48Yeesu wusë n'kaambë : « A mwanaami, ciminu cyaaku cyakuvuuci. We yendi mu n'sikë. »

49Bunë Yeesu kulëtubilë obo, muutu mweekë wufuminë ku n'zo Zayuusë wusë kaambë Zayuusë : « Mwanaaku wafwa, leembu kwaandi kube nyokulë Fumu. » 50Abu Yeesu kwayuwu lyaambu be lyooli, naandi wusë kaambë Zayuusë : « Wubaci boomë ko, ta kwaaku lyaanë, i naandi wum'belukë. » 51Ntaangu yo Yeesu wutukilë ku n'zo, naandi wusye vaanë n'swa ke muutu ko mu kukotë yaandi kanuku tokë Pyeelë, Za, Zaakë i taatë i mamë mwaanë. 52Bakë booso bëlëlilaangë i bëba mu cyuundë mu cibilë ci mwaanë. Tee Yeesu wusë tuba : « Leembwaanu kulilë, naandi wusye fwa ko. Naandi wanuukë. » 53Baawu bisë kun'dyeengë cibilë baawu be zaabë ti, naandi wabë wafwa. 54Kasi Yeesu wusë siimbë mwaanë mu kooko i wusë tubë yi mëngolo mooso : « A mwaanë telëmë! » 55Naandi wusë vulumukë i kutelëmë mo mu ntaangu beenë. Yeesu wusë loombë bën'vaanë bilya 56Libaambë lyaandi lisë bwa libobo, kasi Yeesu wusë bëfuungë mu kuleembu kukaambë ke wosuku muutu linë lyabë livangënë.

Currently Selected:

Liikë 8: NTVIL

Highlight

Copy