Liikë 13

Kuvilukë kaambofo kufwa

1Mo mu ntaangu beenë, mwa mpooko baatu bisë kukaambë Yeesu ti, Pilaatë wavangisi kuvoondë basë Ngalilee fanë baawu bëlëvakulilaangë bivakusi byaawu ke Nzaambi. 2Yeesu wubëvutulilë : « Buni beeno lum'balë ti basë Ngalilee aba bëvyokilili kuvaangë mësumu bwaawu bëmaninë kufwa yi basë Ngalilee bën'ka? 3Moniko! Miinu, beeno yin'kaambë. Kasi ningë beeno lusë n'vilukë ko, beeno booso lun'fwa bo buke baawu. 4Likuumi naanë li baatu linë cibaangë ci Silowe cisë byesikë bunë cibulumukë, buni, beeno lum'balë ti baawu bëvyokilili kusumukë yi baatu bën'ka bëlëzingilë ku Yelusaleemë? 5Moniko, miinu, beeno yin'kaambë. Kasi ningë beeno lusë n'vilukë ko, beeno lun'fwa beeno booso bo buke baawu. »

Sasafë yi n'ngeengë wukaambu mëkuundi

6Bwaawu, Yeesu wusë bëteelë sasafë ayi : « Muutu mweekë wabë yi n'ngengë mu solaandi yi viinyi. Naandi wuyisë mu kutoombë mëkuundi, kasi wusye mizakënë ko. 7Naandi wusë kaambooso cisasi ci solë : “Taloobo, kutoonë fë mivu miinu yin'kwisaangë mu kutoombë mëngeengë mu n'ngengë, i miinu yisë mëzakënaangë ko. Oboobo, cyelë waawu! Cibilë-mbici waawu wulë mu kukalilë mu n'toto mu buunë kwaandi?” » 8Kasi cisasi wusë n'vutulilë : « A Fumu, m'biicyoobo mu n'vu be wuuwu. Miinu yim'bweelë kube sikë n'toto fë sinaandi yooso i miinu yin'tuulë mbosi. 9Oboobo, bunimbalë naandi wun'vaanë mëkuundi n'vu wun'kwisë owo. Nkanë, kuwutabulë kwaandi. »

Yeesu wabelusi n'cyeetu wabë n'ngongu wukondëmë cilumbu ci saba

10Cilumbu ci saba, Yeesu wulëloongaangë mu cizutununu. 11N'cyeetu wulëbeelë kutoonë kuumi naanë li mivu wabë faawu, ciluunzi cibi cisë n'vangisi kukondëmë i wusye bakaangë ko likanë mu kutelëmë sililii. 12Bunë Yeesu kwam'moni n'cyeetu beenë, wusë n'telë i wusë n'kaambë : « Njeeyi wabelukë. » 13Naandi wusë n'tendikë myooko, wusë telëmë i wusë dumisi Nzaambi. 14Kasi, n'kuluutu cizutununu wusë nyotëkënë cibilë Yeesu wubelusi muutu cilumbu ci saba. Naandi wusë kaambooso nkoongë baatu : « Bilumbu bi samunu tufwenikini kusalë#13.14 Lub 20.9-10; Det 5.13-14.. Lwe yisyaanu bilumbu be byoobyo mu kutambulë lubelukulu i yaaku ti cilumbu ci saba! » 15Fumu wusë n'vutulilë mu bikumë abi : « Bimpilë-mpiipi lukeeli! Cilumbu ci saba, kadë muutu mu beeno, wun'kutulaangë fë cilikulu ngoombyaandi kaambofo mwaanë buulë mu kun'natë mu kunwa masi, kanuku bwaawu kwe? 16N'cyeetu be woowo, ndaandu cifuumbë ci Abalaamë, wunë Satënë kukaangë fë kuumi naanë li mivu, lisye fwanëkënë ko mu kun'kutulë mu bikonyi byaandi mu cilumbu ci saba? » 17Mputululu Yeesu yisë vangisi simbeenyi syaandi syooso bisë waalë mu sonyi. Kasi nkoongë yooso yi baatu yilëkwangelë mu nyeenzi mu bimaaku byooso bi kwaatë-yekë kulëvaangaangë.

Sasafë yi lungeenzë lu mutalëdë

(Mat 13.31-33; Mak 4.30-32)

18Yeesu wusë tubë : « Mu mbici Lwaangu lu Nzaambi lun'fwanëkënë? Mu mbici miinu yim'podi kuwudedikini? 19Lwaawu fwiifu yi lungeenzë lu mutalëdë lo muutu waboongë i wakunë mu n'totwaandi. Lwaawu lwamenë, i kucitukë n'ti, i sinuni batuungë maanzë maawu mu bitafi byaandi. »

Sasafë yi m'bweeli

(Mat 13.33)

20Yeesu wusë be tubë : « Mbici tum'podi kudedikini yi Lwaangu lu Nzaambye? 21Lwaawu fwiifu yi m'bweeli yinë n'cyeetu wum'boongë i wum'buundë mu cizoongu cinenë ci faliinë, bwaawu, muungë wooso wun'funë. »

Sasafë yi livitu libatëkënë

(Mat 7.13-14; 21—23)

22Yeesu wulë ke tabaangë mu mëvulë i mu maalë bwendi ke loongaangë mu nzilë yikwendilë ku Yelusaleemë. 23Muutu n'viipë wusë n'yufulë : « A Fumu, mwa m'pooku tokë li baatu mba bën'vuukë? » Na kubëcikuninë: 24« Vaangaanu mëngolo, mu kukotilë fë livitu libatëkënë. Cibilë, yilusisimini ti mpaapë bën'kwelikë kukotë, kasi bisë m'podi ko. »

25« Bunë fumu n'zo wum'manë n'telë i wun'zibikë livitu mu sabi, beeno lun'kalilë ku ngaandë i beeno lun'kokumunë fë livitu i kutubë : “A Fumu, tuzibulilë.” Naandi wubëvutulilë : “Miinu yisye zaabë ko nani lukeeli!” 26Oboobo, beeno lukun'kaambë : “Beeso twakwambulë i twanwa yaaku, waloongë mu sinzilë si livulë liitu.” 27Naandi wusë be bëkaambë : “Miinu yisye zaabë ko nani lukeeli. Yakënaanu fëke miinu, beeno booso lun'vaangaangë libi#13.27 Twi 6.9.!” 28Fa fanë fë naani, fa beeno lun'lililë i lun'kwetilë meeno, bunë beeno lum'monë Abalaamë, Isaakë, Zakoobë i mibici yakë yooso ku Lwaangu lu Nzaambi, i beeno lum'bumu ku ngaandë. 29Baatu bën'fuminë ku mëselukulu i ku mësindulu më bwiisi, lu yilu myoongo i liwaandë i baawu bën'kundëmë fë meesë ku Lwaangu lu Nzaambi. 30Bwaawu, bëmesë mu banë beekë fë siitu, bëm'ba fë ntwaalë i banë beekë fë ntwaalë, bëm'ba fë siitu. »

Yeesu ku Yelusaleemë

(Mat 23.37-39)

31Mu ntaangu be yiina, mwa m'pooku Sifalisyaanu bisë belëmë Yeesu yi bisë n'kaambë : « Botukë afa, yendë kun'ka, cibilë Eloodë wun'toombë kukuvoondë. » 32Yeesu wusë bëvutulilë : « Yendaanu lwe kambyaanu m'baku owo : “Miinu yilë mu kukulë biluunzi bibi i yilë mu kubelusi bubwayi i mbasi-menë i fë cilumbu cin'tatu yim'manisi cisalu cyaami.” » 33Kasi bufwenikini miinu kubweelë kulaandë nzilaami bubwayi, mbasi-menë i lëlemënë, cibilë busye fwanëkënë ko m'bici kuvoondu kun'ka kanuku ku Yelusaleemë.

34« Yelusaleemë, a Yelusaleemë, njeeyi wulë mu kuvoondë mibici i wulë mu kuvoondë më mëmanyi banë Nzaambi kun'filaangë! Vyaasi kwa yatiisi kukucikë baanë baaku fë kumë lyaami, dedë mweekë susu wun'kucikaangë baanë baandi ku si mëvafë maandi, kasi beeno lusye lizolë ko! 35Cyelikë, n'zwiinu yin'lekulu. Miinu, beeno yilë mu kaambë : beeno lusë be kum'monë ko tee fanë fën'kwisilë ntaangu yo lun'tubilë : “Nzaambi kwe sakumuni awu wun'kwisilë mu lizinë li Fumu#13.35 n'zwiinu yin'lekulu: Zel 22.5. (Mat 23.26). Nzaambi Fumu: Twi 118.26. !” »

Currently Selected:

Liikë 13: NTVIL

Highlight

Copy