Za 4

Yeesu i n'cyeetu wu libweeti li Samali

1Sifalisyaanu, bëyuwu ti Yeesu wulëbatizyalaangë mpaapë bilaanzi kuvyokilë Za. 2— Licyelikë, Yeesu naveekë sye batizyaalaangë baatu ko, kasi bilaanzi byaandi baawu bëlëbatizyaalaangë. — 3Abu Yeesu kwe yuwu mo bëlëtubaangë, naandi wubotukë ku libweeti li Zudee i wusë vutukënë ku Ngalilee. 4Mu kweendë kwaawu, naandi nkanë wufitë tabilë ku Samali. 5Naandi wusë ke tuukë ku bwaalë bubelëmë yi Samali, bën'telaangë Sikaalë, bubelëmë yi solë yo Zakoobë kuvaanë ke mwanaandi Zozeefë#4.5 Ntn 33.19; Zos 24.32.. 6Faawu, fabë libulu li masi li Zakoobë, Yeesu biitu bin'volë mu mweendo, wusë kukalë mu ndaambu libulu li masi. Zoolë yabë fë ntaangu-mbatë.

7N'cyeetu wu Samali wuyisë mu kutekë masi i Yeesu wusë n'kaambë : « Mpaani masi bwiinji yinwa. » 8– Bilaanzi byaandi bëyendë ku livulë mu kusuumbë ndiiwu. – 9N'cyeetu wu Samali wusë n'vutulilë : « Njeeyi mati Zwiifë! Cibilë-mbici wakun'doombë masi, miinu ti musë Samali? » – Licyelikë, Sizwiifë yimunë basë Samali#4.9 Lik 9.52-53. bëkeeli yi lyukunë ko. – 10Yeesu wukun'vutulilë : « Njeeyi ti zabisi likabu linë Nzaambi kun'vanaangë i nani wakuloombë masi më kunwa, nkanë njeeyi vwiili n'ciinzë kun'loombë maawu i naandi na fwenikini kukuvaanë masi më luziingu#4.10 masi mo mëlë mu kutubë Yeesu : mo mën'vaanaangë luziingu (v.14); 7.37. . » 11N'cyeetu wuvutulë : « A Fumu, njeeyi ti citeku cikeeli ko mu kutekilë, libulu yivaandi ti lidoongë. Buni wufwenikini kubakilë masi më luziingwe? 12Tatiitu Zakoobë wutuvaanë libulu be liili. Naandi wunwa naveekë masi be maama, baanë baandi, yimunë bibulu byaandi yivaandi bënwa maawu. Njeeyi mwiinji bëkuluutu yimunë Zakoobë? » 13Yeesu wusë n'vutulilë : « Wosuku wun'nwa masi be maama, naandi mpwiilë yisë m'maanë ko. 14Akasi wunë wun'nwa masi manë yikun'vaanë, mpwilë yim'maanë: masi manë yikun'vaanë mu m'balukë cizibë ci masi mu luziingu lu sakë yi sakë#4.14 Ezy 12.3; Zel 2.13; 17.13. . » 15N'cyeetu wusë n'kaambë : « A Fumu, mpaani masi be moomo, bwiinji mpwilë yimaanë mu kuleembu miinu kube kutekaangë masi fa faafë. »

16Yeesu wukun'kaambë: « Yendë, ye teelë n'nunyaaku i wuvutukë akuuku. » 17N'cyeetu wuvutulë : « Miinu yikeeli yi n'nuni ko. » Yeesu wun'kaambë : « Njeeyi watubë licyelikë ti wukeeli yi n'nuni ko. 18Cibilë njeeyi wabakaangë bëbakëlë bëtaanu, libakëlë like yaaku bubwayi likeeli lyaaku kuve. Njeeyi watubë licyelikë. » 19N'cyeetu wusë tubë : « A Fumu, miinu yamonë ti njeeyi m'bici wukeeli. 20Sinkaakë siitu bëlësambililaangë Nzaambi fë moongo be wuuwu, kasi beeno Sizwiifë lwakun'tubaangë ti mu kusambililë Nzaambi, bufwenikini kwendaangë ku Yelusaleemë#4.20 Sizwiifë bëkulë basë Samali mu cinguuku cyaawu, cibilë ocyo baawu bëtuungë n'zwaawu yi Nzaambi fë moongo Ngaliziimë, lyabë libelëmë yi bwaalë bëlëteelë ntamë Siseemë. Ku Yelusaleemë: Twi 122.1-4.. » 21Yeesu wun'vutulilë : « A n'cyeetu nyuwulu, ntaangu yin'fwaanë yo beeno lun'kaambu kusambilë Taatë fë moongo be wuuwu, kaambofo ku Yelusaleemë. 22Beeno basë Samali lun'sambilaangë wo lube kaambu kuzaabë, akasi beeso Sizwiifë tun'sambilaangë wo tube zaabë, cibilë luvukulu lun'fuminaangë ke Sizwiifë#4.22 Ezy 2.3; Lom 9.3-4.. 23Kasi zoolë yilë mu kwiisë i yaawu yivaandi yafwaanë, yo banë bën'kuundaangë Taatë mu ciluunzi i mu cyelikë, cibilë baawu obo, ba Taatë kun'toombaangë. 24Nzaambi Ciluunzi i banë bëkun'kuundë bëfwenikini kun'kundë mu ciluunzi i mu cyelikë. » 25N'cyeetu wusë n'kaambë : « Miinu yizabisi ti Mësiya — bën'telaangë Kliistu — wulë mu kwiisë. Ntaangu kun'kwisilë, naandi wutukaambë makë mooso. » 26Yeesu wuvutulë : « Mi wuuwu, miinu yilë mu kutubë yaaku. »

27Ntaangu be syoosi, bilaanzi byaandi bisë vutukënë i baawu bisë tulumukë mu kum'monë kutubënë yi n'cyeetu. Kasi wun'velë ve mu baawu wun'yufulë : « Njeeyi mbici wun'toombë mu naandi » kaambofo : « Cibilë-mbici wulë mu kutubënë yaandi? » 28Bwaawu n'cyeetu kubikë cidoyi cyaandi i wuvutukënë ku livulë, mu kukaambë baatu : 29« Yisaanu lumonë, muutu wakun'kaambë makë mooso mo yivaangë. Naandi wukeeli Kliistu kwe? » 30Baawu bëbasikë ku livulë i bëyisë ke Yeesu.

31Ntaangu be syoosyo bilaanzi bëlëbondilë Yeesu mu kulya : « A Fumu, lya ko! » 32Kasi naandi wusë bëkaambë : « Ndiiwaami beeno lusye yizaabë ko. » 33Bilaanzi biyufësënooso baveekë yi baveekë : « Wun'viipë wan'twalilë bilya? » 34Yeesu wutubë : « Ndiiwaami mati mu kuvaangë n'vwiilu yi wo wukun'filë i mu kumanisi cisalu cinë wukum'paanë. 35Beeno lun'tubaangë : “Yin'kaambu ngoondi na mu kutuukë mu ntaangu kudokunë.” Kasi miinu yilukaambë : talaanu buboti sisolë, bikunu byakweelë i byafwaanë mu kudokunë! 36Wunë wun'dokunaangë na wum'bakaangë ndobu i naandi wun'kucikaangë mëkuundi mu luziingu lukalilë, bwiinji, wo wun'kunaangë i wo wun'dokunaangë bëtoondë cintwaali. 37Mu cibilë licyelikë ke cinganë cin'tubë ti : “Wun'viipë wun'kunaangë i wumesë na wun'dokunaangë.” 38Miinu yilufilë mu kudokunë mu solë lukaambu kusalë baatu bën'ka bësalë i beeno lwakun'vatëminë bisalu byaawu. »

39Mpaapë basë Samali bë livulë be liili bëta maanë mu Yeesu mu cibilë ci maambu mëtubë n'cyeetu : « Naandi wakun'kaambë mamooso manë yavaangë. » 40Mati bwaawu, basë Samali bëyisë kun'zakënë, bën'loombë mu kukalë yaawu i Yeesu wukalë faawu bilumbu byooli. 41Baawu bisë kube funooso mu kuta maanë mu cibilë ci manë kulë tubaangë naveekë. 42Baawu bisë kaambë n'cyeetu : « Buyifanwabu yaaku ti mu mo watukaambë ma twacikuninë kuve, kasi beeso twakuwu yi besuveekë, twacikunë cibeeni ti naandi N'vuuci buloongo. »

Yeesu wabelusi mwaanë n'kwa-lwaangu

43Abu kwavyoosi bilumbu byooli faawu, Yeesu wubiikë bwaalë be boobo wuyendë ku libweeti li Ngalilee. 44Naandi wuyitubilë naveekë ti : « M'bici bisë kun'tuunvyaangë mu syaandi kuve#4.44 Mat 13.57; Mak 6.4; Lik 4.24..» 45Bunë kwe tuuci ku Ngalilee, baatu bën'tambulë buboti, cibilë baveekë bëmonë manë kuvaangë ku livulë li Yelusaleemë mu ntaangu n'saangu wu Paakë#4.45 2.23..

46Naandi wusë vutukë ku Kana ku Ngalilee, kwaawu kubalulilë masi mu viinyi. Ku livulë li Kapelënawuumë, kwabë n'kwa-lwaangu wu n'tinu#4.46 kubalulë masi mu viinyi: 2.1-11. n'kwa-lwaangu wu n'tinu: wun'leesi muutu wulë mu kusalilë n'tinu Eloodë Atipaasë. wabë yi mwaanë wulëbeelaangë. 47Bunë kwayuwu ti Yeesu wuyisë ku libweeti li Zudee ku Ngalilee, naandi wuyendë ke Yeesu, i wun'loombë mu kuvuuci mwanaandi wabë mu mpasi lufwa. 48Yeesu wusë n'kaambë : « Beeno kaambu kumonë biliimbu i bimaaku, beeno kuta ve maanë. » 49N'kwa-lwaangu wusë n'vutulilë : « A Fumu, yisë ke miinu mu kumaangë mwaanë kufwa. » 50Yeesu wun'kaambë : « Vutukënë, ku bwaalë bwaaku, mwanaanku ke moonyi. » Muutu beenë wuta lyaanë mu manë Yeesu wulën'kaambaangë i wusë ke yendaangë. 51Faanë kulë vutukënë, biseelu byaandi bisë n'dyengënë, bën'twalilë saangu: « Mwanaaku ke moonyi! » 52Naandi wubëyufulë zoolë mbici kube mweenë cin'kati, i baawu kun'vutulilë : « Yabë zoolë yin'tetë yi mbukulu bwiisi, libaawu lisë manë. » 53Tataandi wusë tebukë moonyi ti mu zoolë be yooyo yaawu Yeesu kun'kambilë : « Mwanaaku ke moonyi ». Mu bwaawu naandi i n'zwaandi yakë yooso bëteelë maanë mu Yeesu#4.53 Mëv 11.14; 16.14-15,31.. 54Cyaawu aci ciliimbu ci cimaaku cimwaali cyo Yeesu wuvaangë bunë kufuminë ku libweeti li Zudee ku Ngalilee#4.54 2.11..

Currently Selected:

Za 4: NTVIL

Highlight

Copy