Za 19

1Mu bwaawu, Pilaatë wusë vaanë n'swa bënatë Yeesu i bëm'bulë sikoti. 2Mësodaadi bisë futë ntaatë siseendë i bisë n'vwiikë fë n'tu, baawu bën'vwiikë yivaandi ciyuungë ci beengë#19.2 Mak 15.17.. 3Baawu bëm'belëmë i bën'kaambë : « Bweekë, Fumu Sizwiifë! » Baawu bisë m'bulë simbatë.

4Pilaatë wubasikë vyaasi yin'ka i wukaambë nkoongë baatu : « Yuwaano, yakulun'twalilaanu fë ngaandë, bwiinji luzaabë yisye mbakë libooti ko linë yifwenikini kun'tabulilë lufwa. » 5Yeesu wusë basikë, wuvwaatë ntaatë siseendë i ciyuungë ci beengë. Pilaatë wusë bëkaambë : « Monaanu muutu! » 6Kasi bunë bëkuluutu bë singangë-Nzaambi i mësodaadi bisë m'monë, baawu bëlosukë : « M'baandyaanu fë kuluusu! M'baandyaanu fë kuluusu! » Pilaatë wusë bëtubë : « Yendaanu lwe m'baandyaanu fë kuluusu benuveekë, cibilë miinu yisye monë libooti ko linë yifwenikini kun'tabulilë lufwa. » 7Sizwiifë bisë n'vutulilë : « Beeso tuke yi n'kaakë, i n'kaakë be woowo wun'tubë ti naandi fwenikini kufwa, cibilë watubë ti naandi Mwaanë Nzaambi#19.7 Lev 24.16.. » 8Bunë Pilaatë kwe yuwu mamoomo, naandi wusë ba yi boomë. 9Naandi wusë kotë ku luumbu i wuyufulë Yeesu : « Njeeyi musë simbi? » Kasi Yeesu sye n'vutulilë mbeembu ko. 10Pilaatë wusë n'kaambooso : « Njeeyi sye zoolë kum'putulilë mbeembu kwe? Njeeyi sye zaabë ko ti miinu yike lutumu mu kukubiikë kaambofo mu kukubaandë fë kuluuswe? » 11Yeesu wun'vutulilë : « Njeeyi wukeeli yi lutumu mu miinu kuve, nkanë ko lo Nzaambi wukuvaanë. Mati bwaawu muutu wo wakun'vakulë ke njeeyi, mwiinji liseembu yi njeeyi. »

12Mu ntaangu be syoosyo, Pilaatë wulëtoombaangë luvoto mu kubiikë Yeesu. Kasi Sizwiifë bisë losukooso : « Ningë ti njeeyi wum'biikë muutu be wuuwu, njeeyi wukeeli ndiku n'kwa-lwaangu Sezaalë ko! Wosuku wuyituunvi ti naandi n'tinu, na woowo mbeeni yi n'kwa-lwaangu! » 13Bunë Pilaatë kwe yuwu mamoomë, naandi wusë natë Yeesu ku ngaandë, wukalë fë ciikë ci nzoonzi bën'teelë « Faamë bëtaandë mëmanyi bëvalë » – Bëlukë « Ngalaatë » ku mbeembu Siyebelee. 14Cyaawu cyabë cilumbu citwaminë n'saangu Paakë, fë zoolë yi ntaangu-mbatë#19.14 Mati mu ntaangu mbatë, cilumbu be ciinë, bëlëkokilaangë mu n'zo-Nzaambi, bibulu bibelikulu mu ndiiwu Paakë.. Pilaatë wukaambë Sizwiifë : « Talaanu, n'tinwiinu! » 15Kasi baawu bëlosukë: « N'voondi! N'voondi! M'baandë fë kuluusu! » Pilaatë wusë bëkaambë : « Beeno luzolisi miinu yibaandë n'tinwiinu fë kuluuswe? » Bëkuluutu singangë-Nzaambi bëcikunë: « Beeso tukeeli yi n'tinwiinu wun'ka kuve kanuku wo Sezaalë. » 16Mu lyaawu, Pilaatë wusë kubëvaanë Yeesu bwiinji bëm'baandë fë kuluusu.

Yeesu wabaandu fë kuluusu

(Mat 27.32-44; Mak 15.21-32; Lik 23.26-43)

Baawu bisë natooso Yeesu. 17Naandi wunatë naveekë kuluuswaandi mu kubasikë ku livulë i kweendë ku nkoonzu bëlëteelë: « Cidokusu ci n'tu » — bën'teelë « Ngolëgota » mu mbeembu Siyebelee. 18Mati fa foofë, faawu mësodaadi bëbandilë Yeesu fë kuluusu. Mo mu ntaangu mweekë baawu bëbaandooso baatu bwaali fë kuluusu mu kadi lweeku lu luvaati lu Yeesu i naandi wabë fë meeyi. 19Pilaatë wuvaanë yivaandi n'swa mu kusonikë libayi yi kulibaandë fë kuluusu Yeesu. Bësonikinë lyaawu abu: « Yeesu li Nazaleetë, n'tinu Sizwiifë. » 20Mpaapë Sizwiifë bëtaangë bisonë be byoobyo, cibilë faanë bëtuulë Yeesu fë kuluusu fabë fë belëmë yi livulë, i bisonë byabë mu mbeembu Siyebelee, mbeembu si Loomë i mbeembu singeleekë. 21Bwa boobo, bëkuluutu singangë-Nzaambi bë Sizwiifë bisë kukaambë Pilaatë: « Njeeyi kebë wulëbiikë bisonë be byoobyo “n'tinu Sizwiifë” kasi njeeyi fwenikini kutuulë: “Muutu awu watubë: Miinu n'tinu Sizwiifë”. » 22Pilaatë wusë n'vutulilë : « Manë yasonikë, mëkalilë boobo. »

23Bunë mësodaadi be tuulë Yeesu fë kuluusu, baawu bisë boongë binkutu byaandi i bisë bikabulë mu bikuuku bi na, cimweekë mu kadi lisodaadi. Baawu bisë boongë yivaandi ciyuungë cyaandi cikaambu kuziilu kutoonë ku yilu tee fësi. 24Mësodaadi bisë ke tubësënaangë baveekë i baveekë : « Tuleembwaanu kubeenzë ciyuungë be cyoocyo, kasi tubulaanu njekë mu kuzaabë nani wufwenikini kuboongë cyaawu. » Mati bwaawu, bufwenikini kuvangëninë manë mësonëmë :

« Baawu bëkabësënë binkutu byaami

i baawu bëbulë njekë mu n'vwaatwaami#19.24 Tw 22.19.. »

Mamoomë maawu mësodaadi bëvaangë.

25Belë-belë yi lukuluusu lu Yeesu, fabë mamaandi, mwaanë nguli mamaandi, Maali n'kasi Kolëpaasë i Maali musë bwaalë bu Magëdaalë. 26Yeesu wumonë mamaandi i fë kumë lyaandi, cilaanzi cyo naandi kulëzolaangë. Naandi wusë kaambë mamaandi : « Ama, mwanaaku naandyoowo. » 27Naandi wusë kaambë yivaandi cilaanzi : « Mamaaku naandyaawu. » Munë zoolë beenë, cilaanzi cisë n'natë ku n'zwaandi.

Lufwa lu Yeesu

(Mat 27.45-56; Mak 15.33-41; Lik 23.44-49)

28Kumanë ofo, abu Yeesu kuzaabë ti, buyifanwabu, makë mooso mavangënë, mu kudedikini mo mësonëmë : « Miinu m'pwiilë#19.28 Twi 69.22; Twi 22.16.. » 29Yabë foofo n'kesë wuwaalë viinyi nkakutu. Mësodaadi bisë bwiikë lidedeenvu mu viinyi nkakutu#19.29 Twi 69.22., bisë yikwiikë fë citafi cin'kwiisë i bisë kubelikë mu munu Yeesu. 30Yeesu wunwa viinyi nkakutu, i wusë tubë : « Make mooso mavangënë! » Fa foofë, naandi wubecikë n'tu, i wusë fwa.

Lisodaadi litobulë luvaati lu Yeesu

31Yabë cilumbu ci cin'taanu i sifumu si Sizwiifë bisye zolë ko ti sinvuumbi sikaalë fë kuluusu mu cilumbu ci saba, cibilë cilumbu be cyoocyo ci saba, cyabë cilumbu ci njiinji, baawu bisë loombë ke Pilaatë mu kubokënë maalu më bo bëbaandë fë kuluusu#19.31 bisye zolë ko cilumbu ci saba Det 21.22-23. i mu kubotulë sinvuumbi. 32Fa foofë, mësodaadi bëbokënë maalu, yi wo wun'tetë wutabu bëtuulë fë kuluusu mu ntaangu mweekë yi Yeesu, yivaandi wumwaali. 33Bunë bëtuuci fëke Yeesu, baawu bisë monë ti naandi wabë wafwa, bwaawu bëleembu kum'bokënë maalu. 34Kasi lisodaadi limweekë lin'tobulu luvaati mu lyoongë i meengë i masi mësë basikë mo mu vyaasi mweekë. 35Muutu wunë wulë mu kutubë cimbaanji mu maambu omo, naandi wumonë maawu i cimbaanji cyaandi ci cyelikë. Naandi wuzabisi ti wulë mu kutubë bucyelikë. Naandi wun'tubë cimbaanji bwiinji beeno yiviinu luta maanë#19.35 mo benuviinu luta maanë kaambofo bwiinji lutatëminaanu kuta maanë.. 36Licyelikë, lyalyooli liyisilë bwiinji manë mësonëmë mëvangënë : « Baawu bësë kum'bokënë wosuku n'veesi kuve#19.36 Lub 12.46; Lut 9.12; Twi 34.21.. » 37Mu n'kukë wu meesë wutubooso : « Baawu bësitikë ntalwaawu ke wo bëtobulë luvaati#19.37 Zkl 12.10.. »

Yeesu watuulu mu libuumbë

(Mat 27.57-61; Mak 15.42-47; Lik 23.50-56)

38Kumanë ofo, Zozeefë li Alimaatë#19.38 Mat 27.57., wuloombë ke Pilaatë n'swa mu kunatë nyitu yi Yeesu. – Zozeefë wabë cilaanzi ci Yeesu ku mësweeci cibilë naandi wabë yi boomë bu bëkuluutu bë Sizwiifë. – Pilaatë wusë n'vandikë n'swa. Zozeefë wusë natooso nyitu Yeesu. 39Nikodeemë, muutu wo wuye takënë Yeesu cilumbu cimweekë yi bwiilu, wuyisë yivaandi i wunatë mëkumë-tatu më bizongulu më miilë i aloweesë#19.39 Nikodeemë... mu bwiili: 3.1-2. Aloweesë: maakë më n'ti mëke nfiimbu yinë Sizwiifë bëlëmwamunaangë mu mëlasoolë bëlëziingaangë sinvuumbi ntetë mu kubëziikë.. 40Babë bwaali bëboongë nyitu yi Yeesu i bisë yiziingë, mu biteendë bi linë, bëtuulë mëfutë më n'fiimbu, bo Sizwiifë bën'silaangë mu kuziikë sinvuumbi syaawu. 41Fanë bëbandilë Yeesu fë kuluusu, fabë citumbu ci n'situ, mu citumbu be cyoocyo mwabë libuumbë limoonë linë bëkaambu vyaasi kuzikilë muutu. 42Bo bwabë cilumbu citwaamë saba ci Sizwiifë#19.42 19.31. i libuumbë lyabë libelëmë, bisë ke tuulë nyitu yi Yeesu.

Currently Selected:

Za 19: NTVIL

Highlight

Copy