Juão 12
12
Maria uyusena sakuenawaa Jesus rese
1Asui seis ara paskua rundere Jesus usika Betania kiti Lazaru uikuwaa akiti kua usupiriwaa manusawa sui.
2Asui aintaumunya aintaumbau aramawaa Jesus irumu, Marta uajudari ainta maa Lazaru uwapika aintapiterupi meza ruaki Jesus irumu.
3Asui Maria upisika meiu litru sakuenawaa serawaa nardu sipiwasuwaa ae, asui uyusena ae Jesus ipi rese, asui umutikanga ipi iawa irumu, asui aintaupuderi aintausetuna kua sakuenawaa panye uka upe.
4Maa kua Juda Iskariute yepe aintasuiwara kuaita umbuewaita kua uentregari aramawaa Jesus suanyanaita supe, unyee:
5—Marantaa tiyavenderi kua sakuenawaa trezentu dinyeru sikuyara asui yamee arama kua dinyeru pirasuawaita supe arama?
6Yawe unyee tiresewara umanduari pirasuawaita nyãse mundawasu resewara ae, aete usaruwaa aintadinyeru asui uyuka ixupe arama panye aintauxariwaa usaru.
7Asui Jesus unyee:
—Pexari kua kunya, yawe umunya ixe arama senundere aintaumburi ixe iwi kuara kiti,
8Nyãse perumuarate kuaita pirasuawaita yawewarawate, maa ixe timaa perumuara ixe yawewarawate.
Aintauputari aintauyuká Lazaru yuiri
9Asui aintausendu irumu apete Jesus kuaita judewita aintauri siya ipiri, maa tisesewara anyu aintauri maa aintauputari yuiri aintaumaa Lazaru kua usupiriwaa manusawa sui.
10Maa kuaita saserdutita ruixawaita aintauputari yuiri aintauyuká Lazaru.
11Nyãse sesewara siya judewita aintauxari ainta aintauxari arama aintapia Jesus rese.
Suuri uwike Jeruzalẽ kiti
12Asui wirande kiti kuaita miraita siyawaita uriwaita aintaumaa festa kiti aintausendu Jesus uri Jeruzalẽ kiti.
13Asui aintaumunuka kaa asui aintausu suaxara, asui aintausasemu kirimbawa aintaunyee:
—Uzana, purangawaa kua uriwaa yaneruixawa rera rese, kua Israelitaita ruixawa.
14Asui Jesus uwasemu yepe jumentu miri asui uwapika sese maye aintaumpinimawaa yawe kuxima,
15Teresikie inde sião rayera, remaa uriana kua neruixawa uwapika jumentu miri rese.
16Asui umbuewaita tiaintaukuawa mayesawataa ae, maa uyuiri rire iwaka kiti kua Jesus asui aintaumanduari kua aintaumpinimawaa kuxima sese maitaa yuiri aintaumunya ixupe panye.
17Asui aintaumbeu sese panye kuaita siyawaita umaawaita usenui irumu Lazaru iwi kuara sui usupiri ae manusawa sui.
18Sesewara kuaita siyawaita aintausu suaxara nyãse aintausendu sesewara umunya kua milagri.
19Asui kuaita farizewita aintauyupurungita, aintaunyee:
—Pemaa, timaa nungara yapuderi yamunya ixupe nyãse panye kuaita miraita aintausu sakakuera.
20Ape aikue yepeyepe greguita aintapiterupi kuaita usuwaita festa kiti aintaumee arama purangawaa.
21Asui aintausu Filipe ipiri kua Betisaida Galileya suiwara, aintaunyee ixupe arama:
—Yaneanama, yaputari yamaa Jesus.
22Asui Filipe umbeu Andre supe, asui Andre usu Filipe irumu aintaumbeu arama Jesus supe arama.
23Asui Jesus usuaxara ainta, unyee:
—Usikana sangawa aintaumee arama ixupe arama purangawaa turusu kua unaseriwaa umaa kua mundu.
24Supiwa hambeu penye arama:
—Tirame umanu kua awati karusu uwariwaa iwi upe uiku yepenyu, maa umanu rame uriku kuri siyapiri iya.
25Awa ugustari sikuesawa ukanyemu kuri isui sikuesawa, maa awa tiugustari sikuesawa kua mundu upe uwasemu kuri sikuesawa mundu tiwa upawa kiti.
26Awa upuraki ixe arama urikute usu serakakuera uiku arama kuri haikuwaa upe kua upurakiwaa ixe arama, asui sepaya urespetari kuri ae.
27Kuiri sasiyara sepia, asui maitaa kuri hambeu? Maitaa hambeu, inde sepaya remukaturu ixe isui kua ura? Timaa hambeu yawe, maa hayuiri hapurara arama.
28Inde sepaya, kuiri rexari purangawaa nerera resewara. Asui aintausendu yepe nyenga iwaka sui unyee:
—Haxariana purangawaa serera resewara asui haxari yuiri mukuĩsawa purangawaa serera resewara.
29Asui kuaita miraita apewaraita aintausendu rire kua nyenga, aintaunyee:
—Tiapuana truvão. Asui amuita unyee:
—Yepe anju upurungita irumu.
30Asui Jesus umbeu ainta supe:
—Umbaa uri seresewara kua inyenga maa uri peresewara.
31Kuiri usikana sangawa umbeu arama aintapekadu rese kuaita mundu puraita, kuiri umburi kuri kua mundu ruixawa.
32Asui aintausupiri irumu kuri ixe iwi sui haxari kuri aintauri sepiri muiri ainta.
33Yawe unyee uxari arama aintaukuawa mayetaa kuri umanu.
34Asui kuaita miraita siyawaita aintaunyee ixupe:
—Yasendu Muize umbeu yawewarawate kuri uiku kua Kristu, asui marantaa rembeu kuiri urikute uxari aintausupiri kua unaseriwaa umaa kua mundu? Awataa kua unaseriwaa umaa kua mundu?
35Asui Jesus unyee ainta supe:
—Kua turi uiku kutarantuana peirumu, pewata aikue pukusaware turi yawaite pitunawasu upisika penye, kua uwatawaa pitunawasuwaa upe tiukuawa maa kititaa usu.
36Pexari pepia sese kua turi aikue pukusaware ae tairaita arama kuri penye. Asui umbeu rire kua nyenga usuana aintasui, asui uyumimi aintasui.
Judewita tiuruyari Deus nyenga
37Umunya pukusawa siya milagri aintaumaa arama maa tiaintauxari aintapia sese.
38Yawe aintaumunya; aintaumunya arama umbeuwaa yawe kua utitikawaa Izaia, yawe unyee:
—Seruixawa awataa uruyari kua yambeuwaa? Awa supetaa umukame aintaumaa yaneruixawa iyuwa kirimbawawaa?
39Sesewara tiaintaupuderi aintauxari aintapia sese nyãse Izaia umbeu mukuĩsawa.
40Uxari sesaima ainta, uxari santawaa aintapia tiarama aintaumaa aintaresa irumu tiarama aintaukuawa aintapia upe yawaite aintauyereu sekiti hamukaturu arama ainta.
41Yawe unyee kua Izaia nyãse umaa ukuawasawa asui umbeu sesewara.
42Maa siya aintasuiwara kuaita serakuenawaita aintauxari aintapia sese, maa tiaintaumbeu aintaresewara farizewita resewara yawaite aintaumburi ainta sinaguga sui.
43Nyãse aintaugustari piri apigawaita umeewaa ainta supe arama purangawaa isui kua purangawaa Deus umeewaa ainta supe arama.
Jesus umbue ainta
44Asui Jesus usasemu unyee:
—Awa uxari ipia serese tiuxari ipia serese maa uxari ipia sese kua umunduwaa ixe.
45Asui awa umaa ixe umaa yuiri kua umunduwaa ixe.
46Hayuiri kua mundu kiti maye kua turi yawe tiarama aintauiku pitunawasuwaa upe panye kuaita uxariwaita aintapia serese.
47Awa usendu kua senyenga tirame uruyari ae tikuri hambeu puxi sese, nyãse tihayuiri hambeu arama puxi aintarese kuaita mundu puraita, maa hayuiri hamukaturu arama ainta.
48Urikute yepe umbeuwaa sese kua tiwa ureseberi ixe kua tiwa usuanti hambeuwaa, kua hambeuwaa umbeu kuri sesewara anyu aramawaa ara upe.
49Nyãse tiserimutara hapurungita maa sepaya kua umunduwaa ixe umundu ixe mayetaa hapurungita arama senyenga yuiri.
50Hakuawate mundu nunkawaa upawa kua umunduwaa. Ape kua hambeuwaa hambeute ae kuaye sepaya umunduwaa yawe hambeu arama.
Currently Selected:
Juão 12: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
