Juão 11
11
Lazaru upuamu manusawa sui
1Asui imãsi yepe apigawa serawaa Lazaru uikuwaa Betania upe aintarendawa upe kua Maria iamu Marta yuiri.
2Kua Maria uyusenawaa kuera sakuenawaa yaneruixawa rese asui umutikanga ipi iawa irumu, ikiwira kua Lazaru imãsiwaa.
3Asui sendiraita aintaumundu kuekatu Jesus supe, aintaunyee:
—Yaneruixawa, imãsi uiku kua regustariwaa.
4Asui Jesus usendu irumu kua kuekatu unyee:
—Timaa imãsi uyuká ae, maa imãsi aintaumbeu arama kuri purangawaa kua Deus, aintaumbeu arama yuiri purangawaa kua Deus raira resewara.
5Jesus ugustari Marta iamu Maria yuiri Lazaru yuiri.
6Asui usendu rire imãsi uikure mukuĩ ara akiti.
7Asui arire umbeu umbuewaita supe:
—Yasu mukuĩsawa Judeya kiti.
8Asui umbuewaita unyee ixupe:
—Inde rembuewaa, kuaita judewita kuirintu aintauyuká putari inde ita irumu, asui kuiri maitaa reputari reyuiri aintapiri?
9Asui Jesus usuaxara ainta, unyee:
—Maitaa tiserá uriku duzi ura kua yepe ara? Yawata rame ara rame tikuri yawari nyãse yamaa kua turi ara ramewara.
10Maa yawata rame pituna rame yawari nyãse tiyariku turi.
11Yawe upurungita, asui unyee ainta supe:
—Yanerumuara Lazaru ukiri maa harikute hasu hambaka ae.
12Asui kuaita umbuewaita aintaunyee ixupe:
—Yaneruixawa, ukiri rame uiku purangate kuri ae.
13Upurungita Lazaru manusawa rese, maa aintaumanduari umbeu ukiri upitu.
14Asui Jesus unyee ainta supe satambika:
—Umanuana Lazaru.
15Asui suuri sepia peresewara tiresewara haiku irumu pepuderi arama pexari pepia, yasu yamaa ipiri.
16Asui kua Tume aintauserukawaa Didimu unyee ainta supe arama kuaita sumuaraita:
—Yasuana yamanu arama irumu yande yuiri.
17Jesus usika irumu akiti aintauxari ukuawa Lazaru urikuana kuatru ara aintaumburi rire ae iwi kuara kiti.
18Betania uiku kuayentu Jeruzalẽ sui, anyunte tres kilumetru iapekatusawa.
19Siya aintasuiwara kuaita judewita aintauri Marta Maria ipiri aintauwajudari arama ainta aintakiwira resewara.
20Asui Marta ukuawa irumu Jesus uri asui usu suaxara, maa Maria uikure uka kiti.
21Asui Marta unyee Jesus supe:
—Seruixawa, aikue ramete maa inde yaneirumu timaa umanu sekiwira.
22Maa hakuawate maantu repurandu Deus irumu Deus uxari inde arama ae.
23Asui Jesus unyee ixupe:
—Nekiwira upuamu kuri manusawa sui.
24Asui Marta unyee ixupe:
—Hakuawate upuamu kuri manusawa sui aintaupuamu irumu kuri panye anyu aramawaa ara upe.
25Asui Jesus usuaxara ae:
—Ixete kua hampuamusara ainta manusawa sui, ixete kua uxari aramawaa aintaupaka, awa uxari ipia serese upakate kuri ae yawewarawate umanu pukusawa ae.
26Asui panye kuaita upakawaita uxariwaita ipia serese tikuri aintaumanu yawewarawate. Maitaa reruyari kua nyenga?
27Asui unyee:
—Ẽẽ seruixawa, haruyari Kristu inde Deus raira inde kua uriwaa kua mundu kiti.
28Asui umbeu rire kua inyenga usu isui usenui iamu Maria unyee ixupe:
—Kua umbuewaa yande usikana usenui inde.
29Asui usendu irumu ae upuamu kutara asui usu ipiri.
30Nyãse tire Jesus uwike aintarendawa upe maa anyunte uiku mame Marta usuantiwaa ae.
31Asui kuaita judewita uikuwaita uka upe Maria irumu aintawajudari arama ae aintaumaa irumu upuamu kutara usemu ukara kiti asui aintausu sakakuera nyãse aintaumanduari usu iwi kuara kiti uyaxiu arama.
32Asui Maria usika Jesus uikuwaa ape asui umaa irumu ae upuri uwari iwi kiti ipi ruaki unyee ixupe:
—Seruixawa, reiku rame maa yaneirumu timaa umanu sekiwira.
33Asui Jesus umaa irumu uyaxiu aintauyaxiu yuiri kuaita sumuaraita asui sasiyara ipia turusu.
34Asui upurandu ainta, unyee:
—Mametaa peyutima ae? Aintaunyee ixupe:
—Yaneruixawa, reyuiri remaa.
35Asui Jesus uyaxiu.
36Asui kuaita judewita aintaunyee:
—Pemaa maye ugustari ae.
37Maa amuita aintaunyee:
—Maitaa tiserá upuderi umukaturu ae tiarama umanu kua upirariwaa sesaimawaa kuera resa?
38Asui sasiyara Jesus ipia turusu mukuĩsawa asui usu iwi kuara kiti aintaupikuĩwaa kiti aintaumusikindawaa ita turusuwaa irumu kua iwi kuara rukena.
39Asui Jesus unyee:
—Pemburi isui ita. Asui Marta kua umanuwaa rendira unyee:
—Seruixawa, inemana ae urikuana kuatru ara.
40Asui Jesus unyee ixupe arama:
—Maitaa tiserá hambeu inde arama reruyari rame remaa kuri Deus ukuawasawa purangawaa?
41Asui aintauyuka isui kua ita, asui Jesus umaa iwate kiti unyee:
—Inde sepaya hamee inde arama purangawaa nyãse resenduana ixe arama.
42Hakuawate resendu ixe arama yawewarawate, maa yawe hanyee aintaresewara kuaita miraita uikuwaita seruaki aintaukuawa arama remunduwaa ixe.
43Asui umbeuwaa rire ae usasemu kirimbawa, unyee:
—Inde Lazaru resemu asui.
44Asui kua umanuwaa kuera usemu aintaupupekaware ipi ipu yuiri panu irumu suwa yuiri aintausikindawa lensu irumu. Asui Jesus unyee:
—Peyurawa ae pexari usu.
45Ape siya kuaita judewita uriwaita umaa Maria ipiri aintaumaa Jesus umunyawaa asui aintauxari aintapia sese.
46Maa yepeyepe aintausu farizewita piri aintaumbeu arama ainta supe arama maitaa Jesus umunyawaa.
Aintausikari aintauyuká Jesus
47Asui kuaita saserdutita ruixawaita farizewita yuiri aintaumuatiri panye kuaita serakuenawaita aintaunyee:
—Maataa kuri yamunya nyãse kua apigawa umunya siya milagri?
48Yaxari rame maa ae aintauxari kuri aintapia sese panye, asui aintauri kuri kuaita rumanuita aintaumukanyemu kuri yaneretama panye yanemiraita yuiri.
49Maa yepe aintasuiwara serawaa Kaifa saserdutita ruixawa ae nyã akayu upe, unyee ainta supe:
—Timaa nungara pekuawa,
50Tipekuawa urikute umanu yepe aintasuiwara kuaita miraita tiarama kuri aintaukanyemu panye kuaita miraita.
51Tisimutara unyee ainta supe arama ae, maa saserdutita ruixawa ae nyã akayu upe utitika umanu arama Jesus aintaresewara panye miraita.
52Tiaintaresewara anyu kuaita miraita maa umuatiri arama kuri yepenyu arama kuri panye kuaita Deus tainaita uyusaĩwaita.
53Asui nyã ara rire aintauputari aintauyuká ae.
54Ape timaa Jesus uwata yuiri uyukuawasawa upe aintapitera rupi kuaita judewita, maa usu amu kiti kuayentu kampu sui yepe tetama serawaa Efraim, asui uiku aintairumu akiti kuaita umbuewaita.
55Kuayentuana kuaita judewita festa serawaa paskua, ape siya miraita usu Jeruzalẽ kiti paskua rundere aintauyumukaturu arama.
56Asui aintausikari Jesus asui aintauyupurungita templu upe, aintaunyee:
—Maitaa pekuawa? Uri será kuri kua kiti umaa arama festa?
57Ape kuaita saserdutita ruixawaita farizewita yuiri aintaunyee, ainta supe kuaita miraita; sã yepe ukuawa mametaa ae aintaumbeu arama ainta supe aintaumprezu arama ae.
Currently Selected:
Juão 11: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
