Atu 7
7
Estevão umbeuwaa ainta supe
1Asui kua saserdutita ruixawa upurandu ae unyee:
—Maitaa yawe será?
2Asui Estevão usuaxara ae:
—Pesendu ixe arama penye semuita penye sepayaita yuiri, kua Deus purangawa usu umaa yaneramunya Abraão ipiri uiku ramere Mezuputania upe senundere usu uiku Arã kiti.
3Asui umbeu ixupe:
—Resu neiwi sui neruka puraita sui yuiri yepe iwi kiti hamukamewaa kuri remaa.
4Asui usu aintaiwi sui kuaita Kaldewita usu uiku Arã kiti. Asui umanu rire ipaya Deus urasu ae uiku arama kua iwi upe peiku aramawaa kuiri.
5Maa timaa Deus uxari ixupe iyara iwi nẽ kuaira maa umbeu ixupe uxari arama kuri ae, asui uxari kuri taira supe asui ximiariruita supe tipukusaware uriku taira.
6Asui Deus umbeu ixupe ximiariruita kuri aintauiku amu iwi kiti asui aintaumprezu kuri ainta aintauxari kuri aintaupurara kuatrusentu akayu.
7Asui Deus umbeu:
—Ixe kuri hambeu ainta supe aintapekadu kuaita uxariwaita aintaupurara, asuiwana kuri haxari aintausemu aintasui aintauri arama aintaumee benditu ixe arama ike.
8Asui uxari ainta supe kua aintaumunyawaa sirkunsizão, asui Izaki usemu umaa ara asui uitu ara rire Abraão usirkunsidari ae, asui Izaki raira kua Jaku, asui Jaku rairaita kuaita yaneramunyaita duziwaita.
9Asui kuaita yaneramunyaita aintaumuasi kua Juze, asui aintauvenderi ae ainta supe kuaita Egituwaraita, maa Deus uiku irumu.
10Asui umukaturu ae panye upurarawaa sui, asui uxari puranga kua Egitu ruixawa (Farao) umaa ixupe, asui kua aintaruixawa uxari aintaguvernaduru panye kuaita miraita panye aintaruixawa ruka upe yuiri.
11Asui yumãsi upisika ainta panye Egitu upe panye Kanaã upe, asui aintaupurara turusu, asui yaneramunyaita tiaintauwasemu aintaumbauwaa arama.
12Asui Jaku usendu rame aikue trigu Egitu upe uyupiru umundu yaneramunyaita akiti.
13Asui mukuĩsawa aintausu Egitu kiti Juze uyumuyukuawa simutara imuita supe, asui Juze uxari Farao ukunyeseri suka puraita.
14Asui Juze umundu ainta aintausu arama aintausenui ipaya ipiri, panye yuiri imuita, setenta sinku aintasiyasawa.
15Asui Jaku usu Egitu kiti, asui umanu ae akiti, panye yaneramunyaita yuiri.
16Asui aintaurasu aintapira aintaumburi ainta semiteriu kiti Sikẽ upe kua Abraão upiripanawaa prata upe aintairumu kuaita Emuru rairaita Sikẽ kiti.
Muize urasu ainta Egitu sui
17Asui Estevão umbeu yuiri:
—Kuayentuana sangawa kua Deus umbeuwaa Abraão supe, aintaumukiriari siya aintaraira Egitu upe.
18Asui yepe aintaruixawa uiku Egitu upe tiwa ukunyeseri Juze.
19Asui puxi umpurarakari yanemirasawa asui umundu yaneramunyaita aintaumburi kuaita aintarairaita unaseriwaita pisasua tiarama sikue ainta.
20Asui nyã tempute unaseri umaa ara kua Muize asui puranga Deus umaa ixupe. Asui musapiri yasi aintaumukiriari ae ipaya ruka upe.
21Asui aintaumuyukuawa irumu ae uwasemu ae kua Farao rayera asui umukiriari ae imembira arama.
22Asui umbue ae Egituita ukuawasawa rese panye, asui kirimbawa ae inyenga irumu umunyawaita irumu yuiri.
23Asui urikuana kuarenta akayu umanduari ipia upe usu arama umaa imuita ipiri kuaita israelitaita.
24Asui umaa amu umunya puxuwera amu supe, asui uajudari ae kua upurarawaa, asui uyuka kua Egitu suiwara.
25Muize umanduari imuita aintaukuawa Deus uputari uyurawa ainta ipu irumu maa tiaintaukuawa.
26Asui wirande kiti usu umaa aintapiri asui umaa mukuĩ apigawaita aintaumaramunya asui umbeu:
—Penye apigawaita marantaa pemunya puxi nemu irumu pawate?
27Asui kua umunyawaa puxi imu supe umunyana ae umbeu ixupe:
—Awataa uxari tuixawa inde rembeu arama yanerese?
28Maitaa reputari reyuká ixe kuaye reyukáwaa yawe kua Egitu suiwara kuese?
29Asui usendu irumu kua inyenga Muize uyawawa usu uiku amu iwi kiti serawaa Midiã. Akiti unaseri umaa ara mukuĩ tairaita.
30Asui kuarenta akayu rire uri yepe anju miraitiwa piterupi sendiwaa kampu upe iwitera ruaki serawaa Sinai.
31Asui Muize umaa irumu ae iakayemu umaa asui umusuaki umaa arama asui usendu yaneruixawa Deus inyenga:
32—Ixete neramunyaita Deus, ixete Abraão Deus, Izaki Deus yuiri, Jaku Deus yuiri, asui Muize uriri usikie, asui timaa upuderi umaa akiti.
33Asui yaneruixawa Deus umbeu ixupe:
—Reyuka neipi sui nesapatu, nyãse purangawaa kua iwi reikuwaa upe.
34Hamaawana semiraita aintaupurara Egitu upe, hasendu aintaujemeri aintaupurara resewara hawiyeana hayurawa arama ainta. Reyuiriana kuiri hamundu arama inde Egitu kiti.
35Asui kua Muize aintaumburiwaa aintaumbeuwaa ixupe:
—Awataa uxari tuixawa arama inde rembeu arama yanerese? Deus umundu ae tuixawa yawe uyurawasara yawe yuiri ipu irumu kua anju umaawaa ipiri miraitiwa piterupi.
36Asui urasu ainta umunya rire milagrita tiwaitare yuiri yamaa Egitu upe parana turusuwaa Pirangawaa upe yuiri, kampu upe yuiri kuarenta akayu.
Aintausikari idulu Deus sui
37Asui kua Muize umbeu ainta supe kuaita israelitaita:
—Deus kuri usupiri penye arama yepe utitikawaa kuaye seyawe pepitera sui.
38Aete kua Muize uikuwaa aintapiterupi kuaita uyumuatiriwaita kampu upe, uiku suaki kua anju upurungitawaa ixupe iwitera rese serawaa Sinai, aintaruakite kuaita yaneramunyaita, asui uxari ixupe inyenga upakawaa uxari arama yande arama ae.
39Asui kuaita yaneramunyaita tiaintauputari aintauruyari ae, maa aintaumburi ae asui aintapia upe aintauyuiri Egitu kiti.
40Aintaumbeu Arão supe:
—Remunya yande arama yanedeus usu arama yanerunde kiti, nyãse tiyakuawa maye usasawa kua Muize urasuwaa yande Egitu sui.
41Asui nyã ara aintaumunya vaka membira, asui aintauxari idulu supe aintayaraita, asui aintauyumusuuri sesewara kua aintaumunyawaa aintaipu irumu.
42Maa Deus uyereu aintasui asui uxari aintaumanduari arama kuaita puxuwerawaita uikuwaita iwaka rese kuaye aintaumpinimawaa yawe aintapapera upe kuaita utitikawaita: "Penye israelitaita, maitaa pexari ixe arama perimbawa peyukáwaita pexariwaita yuiri ixe arama peiku pukusawa kampu upe kuarenta akayu.
43Asui pesupiri Muluki supe pemuatiriwaa rendawa pesupiri yuiri estrela aintadeus Renfã supe, pemunya kuaita idulu pemee arama ainta supe purangawaa, ape haxari kuri aintaurasu penye Babilunia runde kiti piri."
Santawaa aintapia
44Kuaita yaneramunyaita aintauriku aintauyumuatiri aramawaa kampu upe aintaukuawa aramawaa Deus rese, kuaye kua umbeuwaa Muize supe umundu umunya arama ae kuaye umaawaa yawe.
45Asui yaneramunyaita aintaurasu kua aintauyumuatiriwaa Juzue irumu aintaumburi irumu kuaita miraita aintarendawa sui kuaita Deus umburiwaita yaneramunyaita runde kiti, yawe uiku ate Davi tempu.
46Asui Davi uwasemu purangawaa Deus irumu asui upurandu ae uxari arama umunya uiku aramawaa kua Jaku Deus supe.
47Asui Salumão umunya ixupe kua uka.
48Maa kua puranga piriwaa panye sui timaa uiku uka upe aintaumunyawaa aintaipu irumu, kuaye umbeuwaa yawe kua utitikawaa:
49"Iwaka aete setrunu, kua mundu aete seipi banku, Yaneruixawa umbeu, mayewataa uka pepuderi pemunya ixe arama, mametaa hapituwaa rendawa?
50Maitaa tihamunya panye maa seipu irumu?"
51Penye miraita santawaa pekurukawa, uyumusikindawa yuiri pepia, uyumusikindawa yuiri peapisa, yawewarawate pemuruanyana kua Espiritu santu, pemunya kuaye peramunyaita umunyawaa yawe.
52Awataa aintasuiwara kuaita utitikawaita timaa peramunyaita umuruanyana? Asui aintauyuká kuaita utitikawaita umbeuwaita uri arama kua purangawaa senundere uri, asui penye kuiri pexari ae suanyanaita supe asui peyuká ae.
53Maa penye periku kua inyenga anju uxariwaa penye arama maa timaa peruyari ae.
Aintauyuká Estevão
54Asui aintausendu irumu kua inyenga aintaipiaiwa aintapia upe, asui aintausuu aintaranya ixupe aintaipiaiwasawa irumu.
55Maa Estevão teresemu ae Espiritu Santu irumu umaa iwaka kiti umaa Deus purangasawa asui umaa Jesus uiku Deus katusawa sui.
56Asui umbeu:
—Hamaa iwaka uyupirari asui kua unaseriwaa umaa kua ara upuamu Deus katusawa sui.
57Asui aintausasemu kirimbawa asui aintaumusikindawaa aintaapisa aintaipu irumu, asui yepewasu aintauyana suaxara muiri ainta.
58Asui aintausiki ae tetama sui asui aintauyuká ae ita irumu, asui kuaita umaawaita ae aintauxari aintapupekawa ipi ruaki yepe kurumiwasu serawaa Saulu.
59Asui aintauyuká Estevão ita irumu upurandu irumu Deus, umbeu:
—Inde seruixawa Jesus resuanti seespiritu kuiri.
60Asui uwari uyurinipia asui usasemu kirimbawa:
—Seruixawa terexari kua puxuwerawa uiku aintarese. Asui umbeu rire kua inyenga umanu.
Currently Selected:
Atu 7: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
