Atu 2
2
Espiritu Santu uwiye
1Asui aintauyumuatiri yepewasu aintapawa yepe ara serawaa Pentekuste.
2Asui kutara tiapu aintausendu iwaka sui kuaye iwitu upeyuwaa yawe asui umuteresemu panye uka aintauwapikawaa upe.
3Asui aintaumaa tata uwiye uiku aintarese aintayaweyawe.
4Asui teresemu muiri ainta Espiritu Santu irumu asui aintauyupiru aintaupurungita amuita nyenga rupi kuaye Espiritu uxariwaa yawe.
Aintaupurungita amuita nyenga rupi
5Aikuete siya judewita supiwa aintapia aintauiku Jeruzalẽ upe uriwaita panye kua mundu sui.
6Asui aintausendu irumu ainta kuaita miraita siyawaita asui aintauyumuatiri, asui aintaakayemu aintausendu nyãse aintausendu aintaupurungita aintanyenga rupi kuaita usenduwaita aintayaweyawe.
7Asui aintaakayemu asui aintaunyee:
—Pemaa maitaa timaa será Galileya suiwaraita kuaita upurungitawaita?
8Maitaa maa yasendu aintaupurungita yanenyenga rupi yaneyaweyawe?
9Partuita, meduita, elamitaita, kuaita yuiri uyukiriariwaita Mezuputania upe, Judeya upe, Kapadusia upe, Puntu upe, Azia upe yuiri,
10Kuaita uriwaita Frijia sui, Panfilia sui yuiri, Egitu sui, Libia sui yuiri kuayentu Sireni sui, panye yuiri kuaita Rumawaraita uriwaita umaa yanepiri.
11Panye judewita kuaita yuiri aintaumbuewaita Kretaita Arabiaita yuiri, mayetaa yasendu aintaupurungita yanenyenga rupi yaneyaweyawe sese kua purangawaa Deus umunyawaa?
12Asui aintaakayemu aintausendu, tiaintaukuawa ainta, asui aintauyupurungita aintapawa:
—Mayesawataa ae?
13Amuita aintaukasuari ainta, aintaumbeu:
—Aintaukau aintauiku.
Pedru umbue ainta
14Maa Pedru upuamu aintairumu kuaita unziwaita, upurungita kirimbawa umbeu ainta supe:
—Penye apigawaita Judeyawaraita penye yuiri peikuwaita Jeruzalẽ upe pexari hapurungita kuiri, pesendu senyenga puranga.
15Nyãse timaa aintaukau kuaita apigawaita kuaye pemanduariwaa yawe, nyãse kuematere.
16Maa kua usasawa kuiri aete nyã umbeuwaa kuera kua utitikawaa Juelu:
17Deus umbeu:
—Anyu aramawaa ara upe kuri hayusena seEspiritu aintarese miraita panye, asuiwana kuri aintautitika kuaita perairaita perayeraita yuiri, asui kuaita kurumiwasuita aintaumaa kuri angaita, asuiwana kuri kuaita tuyuweita aintakerupi kuri ainta.
18Arame kuri hayusena seEspiritu aintarese kuaita upurakiwaita ixe arama apigawaita kunyaita yuiri, asui aintautitika kuri.
19Hamukame kuri aintaumaa tiware aintaumaa iwaka rese, asui hamukame kuri aintaumaa tiware aintaumaa kua mundu upe, aintaumaa kuri tuwi, tata yuiri, tatatinga yuiri,
20Asui pitunawasu kuri kua kurasi, asui uyutrukari kuri tuwi yawe kua yasi senundere kua yaneruixawa ara purangawaa usika kuri.
21Asuiwana kuri umukaturu panye kuaita usenuiwaita yaneruixawa rera rese.
22Penye apigawaita israelitaita, pesendu kua nyenga:
—Jesus Nazare suiwara kua apigawa, Deus uxariwaa pekuawa sese, aintairumu kuaita milagrita tiwaitare pemaa Deus umunyawaita pepiterupi Jesus ukuawasawa irumu, kuaye pekuawawaa yawe.
23Asui kua Jesus, aintauxari rire ae suanyanaita supe, kuaye Deus ukuawawaa yawe kuxima, kuaye uputariwaa yawe kuxima, asui peyuká ae kurusa rese aintaipu irumu kuaita apigawaita puxuwerawaita.
24Maa Deus usupiri ae uyurawa rire ae manusawa ipu sui, nyãse timaa upuderi uxari manusawa umprezu ae.
25Nyãse Davi umbeu sesewara: "Hamaa seruixawa serunde kiti yawewarawate, nyãse uiku seruaki sekatusawa sui tiarama hawari.
26Ape suuri sepia, seapeku uyumusuuri, asui sepira yuiri upitu kuri usaru.
27Nyãse timaa kuri rexari sepia manusawa upe, tiyuiri rexari iyuka ipira kua purangawaa.
28Rexariana hakuawa kua pee upakawaa, remuteresemu sepia suuriwaa irumu seirumu resewarate inde."
29Semuita, hapuderi hambeu satambika sese kua yaneramunya Davi, kuxima umanu ae asui aintaumburi ae iwi kuara kiti, uikure yaneirumu iwi kuara upe ate kuiri.
30Utitikawaa ae ape ukuawa kua Deus umbeuwaa kirimbawa uxari amu ximiariru uwapika itrunu upe.
31Asui umaa ae senundere usasawa, asui umbeu sese kua Jesus usemuwaa manusawa sui, timaa uiku manusawa upe tiyuiri iyuka ipira.
32Deus usupiri manusawa sui kua Jesus, asui panye yande yakuawate sesewara.
33Asui Deus usupiri ae uiku arama ikatusawa upe, asui Deus uxari ixupe kua Espiritu Santu umbeuwaa, asui uyusena ae kuaye pemaawaa yawe pesenduwaa yawe yuiri.
34Nyãse tire Davi usu iwaka kiti, maa umbeu: "SeDeus unyee seruixawa supe: 'Rewapika sekatusawa upe,
35Ate haxari kuri neruanyanaita neipi wirupi.'"
36Ape pexari aintaukuawa supiwa kuaita Israel rimiariruita, Deus uxari arama tuixawa Kristu kua Jesus pepregariwaa uyari kurusa rese.
Aintaubatizari tres mili pesua
37Asui aintausendu irumu kua umbeuwaa sasiyara aintapia, asui aintaupurandu Pedru kuaita amuita apustuluita yuiri:
—Semuita, maataa kuri yamunya?
38Asui Pedru umbeu ainta supe:
—Pemanduari sasiyara pepekadu asui peyubatizari muiri penye, Jesus Kristu rera rese uperduari arama pesui pepekadu, ape periku kuri kua Espiritu Santu kua umbeuwaa.
39Nyãse umbeu penye arama ae, perairaita supe yuiri, ainta supe yuiri kuaita apekatuwaraita panye ainta supe yuiri, kuaita yaneruixawa Deus usenuiwaita.
40Asui siya nyenga irumu umbeu ainta supe, asui kirimbawa usenui ainta, unyee:
—Peyumukaturu aintasui kuaita miraita puxuwerawaita kuiriwaraita.
41Asui kuaita uruyariwaita kua nyenga aintauxari aintaubatizari ainta, asui nyã ara aintauwike aintairumu kuaji tres mili pesua.
Puranga aintauiku kuaita uruyariwaita
42Asui santa aintauiku sese kua nyenga apustuluita umbuewaita, asui aintauyumuatiri aintaumbau pão aintaupurandu Deus irumu yuiri.
43Asui aintaakayemu muiri ainta aintapia upe, asui kuaita apustuluita aintaumunya siya milagri, siya tiwaitare yuiri yamaa.
44Asui yepewasu panye kuaita uruyariwaita asui aintauxari yuiri yepewasu arama aintayara arama.
45Asui aintauvenderi aintakupixawa panye maa aintaurikuwaita yuiri asui aintaumee ainta supe aintayaweyawe sikuyara kuaye watariwaa yawe amuita supe.
46Asui yepewasu aintauyumuatiri templu upe muiri ara, asui aintaumbau pão aintaruka yaweyawe, asui aintaumbau suuriwaa irumu aintapia.
47Asui aintaumee purangawaa Deus supe, asui purangawaa panye miraita umaa ainta. Asui yaneruixawa uxari aintauwike aintairumu muiri kuaita umukaturuwaita.
Currently Selected:
Atu 2: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
