1 Pedru 1
1
Umee purangawaa aintarese
1Ixe Pedru, Jesus Kristu umunduwaa, kuekatu penye arama penye uparawakawaita aintaumusaĩwaita apekatu yanesui Puntu kiti, Galasia kiti yuiri, Kapadusia kiti yuiri, Azia kiti yuiri Bitinia kiti yuiri.
2Uparawakawaita penye, kuaye yanepaya Deus uputariwaa yawe kuera, umukaturu penye Espiritu irumu peruyari arama Jesus Kristu, uyusena penye suwi irumu uxari xinga penye arama ipurangasawa, itimaaresesawa yuiri.
3Yamee purangawaa Deus supe kua yaneruixawa Jesus Kristu paya Turusu pirasua umaa yande arama, ape utrukari yanepia pisasuwaa yariku arama kua yasaruwaa upakawaa, upuamu resewara Jesus Kristu umanuwaita pitera sui.
4Yariku arama yuiri kua yariku aramawaa tiwa iyuka, tiwa ikia, tiwa uxirika yuiri, kua umukaturuwaa perunde iwaka kiti.
5Penye Deus umukaturuwaita ikirimbawasawa irumu peruyari resewara ae, senunde kua umukaturuwaa umukamewaa kuri pemaa anyu aramawaa ara upe.
6Ape peyumusuuri periku pukusaware pepurara kutarantu kua uriwaa pepiri.
7Pemee arama purangawaa ixupe, pesikie yuiri pemaa ixupe ipupe kua peruyarisawa perikuwaa puranga piriwaa uru sui aintaumukaturuwaa tata irumu, uri rame kuri kua Jesus Kristu.
8Pegustari ae tiramere pemaa ae, peruyari ae tiramere pemaa ae, asui peyumusuuri turusu irumu kua suuriwaa tiwa yapuderi yambeu nyenga irumu,
9Ape peruyari resewara puranga umukaturu kuri penye.
10Asui kuaita utitikawaita umbeuwaita kuera sese kua ipurangasawa perikuwaa, asui kirimbawa aintausikari aintaukuawa sese kua salvasão.
11Aintauputari kuera aintaukuawa sese kua sangawa yuiri umbeuwaa ainta supe kua Kristu Espiritu uikuwaa aintapia upe, aintautitika rame kuera sese kua Kristu upurarawaa kuri, sese yuiri kua purangawaa urikuwaa kuri.
12Aintaukuawa kuera timaa aintaupuraki ainta supe arama, maa aintaupuraki penye arama kua aintaumbeuwaa penye arama kuaita umbuewaita penye sese kua nyenga purangawaa, irumu kua Espiritu Santu iwaka suiwara; asui kuaita anjuita aintauputari yuiri aintaukuawa mayesawataa kua nyenga.
Yaputari purangawaita yande
13Ape pepukuari puranga pemanduarisawa, pemanduari satambika, pesaru puranga kua ipurangasawa umeewaa kuri penye arama uri rame kuri kua Jesus Kristu.
14Kuaye tainaita uruyariwaita yawe, tepemunya kuaye pepira uputariwaa yawe kuera tipukusaware pekuawa.
15Maa kuaye purangawaa yawe kua usenuiwaa penye, yawete yuiri perikute pesikari puranga penye yawewarawate.
16Nyãse aintaumpinima kuera: "Perikute pesikari purangawaita penye nyãse purangawaa ixe."
17Pekuawa rame pepaya kua umbeuwaa yanerese yaneyaweyawe kuaye yamunyawaa yawe, kua tiwa uparawaka umaa mira, ape perikute pesikie isui peiku pukusawa kua mundu upe.
18Pekuawate uyurawa penye isui kua pekustumi aintauxari penye arama kuaita peramunyaita, timaa ipupe kua uru, prata yuiri ukanyemuwaa,
19Maa uyurawa penye suwi purangawaa irumu, kuaye kurderu purangawaa, ikiaimawaa yawe; Kristu ruwi ae.
20Ara rundere ukuawa sese, maa kuesentuana umuyukuawa ae peresewara.
21Asui ipupe pexari pepia Deus rese, usupiriwaa ae umanuwaita pitera sui, umeete ixupe purangawaa, ape pexari pepia rese pepuderi yuiri pesaru pemaa ae.
Yayugustari arama supiwa
22Pemukaturu pepia puranga peruyari resewara kua nyenga supiwa, kua uxariwaa pegustari supiwa kuaita peanamaita, ape peyugustari supiwa pepia sui.
23Pisasuana penye ipupe kua ikarusu tiwa ukanyemu, timaa irumu kua ukanyemuwaa, irumu kua Deus nyenga upakawaa yawewarawate.
24Nyãse kapĩ yawe panye kuaita mundu puraita, asui panye aintapurangasawa kuaye kapĩ putira yawe. Asui uxirika kua kapĩ, asui uwari iputira,
25Maa tiwa upawa kua yaneruixawa nyenga. Aete kua nyenga purangawaa aintaumbuewaa sese penye.
Currently Selected:
1 Pedru 1: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
