1 Kurintuwaraita 11
11
Maitaa kunyaita Kurintuwaraita
1Pemunya kuaye hamunyawaa yawe nyãse hamunya kuaye Kristu umunyawaa yawe.
2Semuita, hambeu peresewara purangawaa nyãse pemanduari ixe yawewarawate, nyãse pemunya kuaye hambuewaa yawe penye.
3Maa haputari pekuawa arama apigawaita akanga kua Kristu, asui kunyaita akanga aintamena, asui Kristu akanga Deus.
4Umunya tenyuntu iakanga supe kua apigawa uyumimi iakanga upurandu rame Deus irumu utitika irumu Deus nyenga yuiri.
5Maa kunya tirame uyumimi iakanga upurandu irumu Deus utitika yuiri, umunya tenyuntu iakanga supe aintayawe kuaita aintaumunuka aintaawa aintasui panye.
6Tirame uyumimi iakanga veu irumu, puranga umunuka isui iawa. Utiĩ rame kua kunya umunuka iawa pexari uyumimi iakanga veu irumu.
7Timaa apigawaita uyumimi iakanga nyãse Deus yawe ainta, Deus purangasawa ainta maa apigawa purangasawa kuaita kunyaita.
8Nyãse timaa Deus umunya apigawa kunya suiwara, maa umunya kunya apigawa suiwara.
9Nyãse yuiri timaa Deus umunya apigawa kunya resewara, maa umunya kunya apigawa resewara
10Ape aintauyumimi arama aintaakanga kuaita kunyaita aintaresewara kuaita anjuita umaawaita ainta supe.
11Ape timaa apigawa uiku kunya sui yawete yuiri kunya tiuiku apigawa sui nyãse yaneruixawa rese yepewasu ainta.
12Kuxima Deus umunya kunya apigawa sui, asui apigawaita usemu umaa kua ara kunyaita sui, maa Deus suiwara kua panye maa.
13Penyete pembeu yasendu, maitaa puranga aintaupurandu Deus kuaita kunyaita tirame aintauyumimi aintaakanga?
14Tiserá pekuawasawa uxari pekuawa umutenyuntuwara kua apigawa urikuwaa iawa ipukuwaa.
15Maa kua kunya suuri umaa iawa ipukuwaa nyãse Deus uxari ixupe arama iawa ipupekawa yawe.
16Amu umanduari rame apekatu yanesui tiyapuderi yaxari umunya apekatu isui kua yamunyawaa, tiyuiri Deus ingreja uxari aintaumunya apekatu yamunyawaa sui.
Santa Seya rese
17Asui tihambeu purangawaa peresewara sesewara kua hambeuwaa kuiri, nyãse peyumuatiri irumu timaa pemunya puranga maa pemunya puxuwerawa.
18Pemunya puxuwerawa peyumuatiri irumu, hasendu peresewara timaa yepewasu pemanduari, asui supiwa kua hasenduwaa.
19Aintaukuawa supiwa aintaumanduarisawa kuaita yepeyepe perumuaraita, nyãse tiyepewasu aintaumanduarisawa kuaita yepeyepe pesuiwaraita.
20Peyumuatiri irumu timaa pembau supiwa kua yaneruixawa Seya,
21Peyumuatiri irumu pembau amuita sui anyunte, yepeyepe upurara yumãsi, yepeyepe aintaukau uiku.
22Maitaa penye? Maitaa tipepuderi pembau peruka upe? Marantaa pemutenyuntu kua Deus ingreja? Maitaa peputari pemutiĩ arama kuaita tiwaita uriku timbiu? Maitaa kuri hambeu penye arama? Maitaa hambeu puranga penye arama sesewara kua pemunyawaa? Timaa kuri hambeu puranga penye arama.
23Kua hambeuwaa penye arama aete kua Yaneruixawa umbeu ixe arama. Nyã pituna aintaumprezu runde ae, Yaneruixawa upisika yepe pão;
24Uabensuari rire kua pão umpena ae, unyee: "Aete sepira kua, ukanyemu kuri peresewara, pembau ae pemanduari arama ixe."
25Aintaumbau rire Jesus upisika yepe kupu, unyee: "Kua kupu aete nyenga pisasua seruwi upe, pemunya kuaye pemanduari arama ixe mairame peu ae."
26Yawewarawate kuri irumu kua pão kupu yuiri pemukame aintaumaa mayetaa umanu kua peruixawa ate mairame uri yuiri.
27Umbau rame yaneruixawa pão, uu rame ikupu sui yuiri kua tiwa uputari uxari ipekadu uriku ipuxuwerasawa sese nyãse umutenyuntu kua yaneruixawa ipira suwi yuiri.
28Ape pexari aintaumanduari aintapia upe aintayaweyawe kuaita miraita aintaumbau arama kua pão aintauu arama kua kupu sui yuiri.
29Umbau rame, uu rame yuiri kua tiwa ukuawa mayesawataa ipira aintaumunya ixupe puxi kua umbauwaa uuwaa yuiri.
30Ape sesewara pitua siya pesuiwara, aintauriku mãsi yuiri ainta; sesewara umanu pesuiwara yepeyepe.
31Yambeu rame yanepekadu yandepawate tikuri Deus umbeu yanepekadu rese.
32Yaneruixawa uxari yapurara yanepekadu resewara tiarama yakanyemu isui aintairumu panye kuaita mundu puraita.
33Ape semuita, peyumuatiri irumu kuri pembau arama, perikute pesaru aintauri kuaita perumuaraita.
34Pexari umbau suka upe kua sasi ixupe yumãsi yawaite pemunya penye arama puxi peyumuatiri irumu. Hambeu kuri penye maa xinga haputari hambeu penye arama hasu irumu hamaa pepiri.
Currently Selected:
1 Kurintuwaraita 11: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
