Génesis 44
44
Benjamí ya wajurupʉ José sihniri wahware bocaha
1Ã yoa José to wʉhʉ cohtarirore õ sehe yoa dutiha:
—Ahrina ya wajupe trigo ti naa bihoro puro tinare posabasaga. Tuhsʉ, cãina ti wapamari niñeru cʉ̃hʉre tí wajuihta trigo bui duhu sãaga. 2Ti bahʉro Benjamí ya wajuru sehere yʉ ya sihniri wahware, comaa plata mehne ti yoari wahware, to wapamari niñeru cjiri mehneta cʉ̃noi posaga —ni, yoa dutiha.
To ã yoa dutichʉ tʉhoro, to wʉhʉ cohtariro sehe to nino seheta yoaha.
3Ã yoa pa dacho sʉ̃ mʉja tachʉ waro, José to wahmisʉmare coha siti, ti burroa mehne warocaha. 4Tí macare yoaro ti wahaerasinichʉta, José sehe to wʉhʉ cohtarirore õ sehe yoa dutiha:
—Tinare nʉnʉ ti wahcãga. Nʉnʉ ti wahcã, mʉ sʉcʉ, tinare õ sehe niga: “¿Dohseana tana yʉ pʉhtoro to noano yoapachʉta, tirore mʉsa sehe ñano yoari? To sihniri wahware yaca tari jire mʉsa. 5Tí wahwa to sihniri wahwa jia tire. Tuhsʉ, tí wahwa mehneta baharopʉ wahahti cʉ̃hʉre masiyua tire tiro. ¡Ñabiaro yoari jira mʉsa!” niga tinare —ni warocaha José.
6To ã yoa dutichʉ tʉhoro, tiro wʉhʉ cohtariro sehe tinare nʉnʉ ti wahcãha. Nʉnʉ ti wahcã, mʉ sʉro, José to ni dutiro seheta niha tinare. 7To ã nichʉ tʉhoa, tina sehe tirore õ sehe ni yʉhtiha:
—¿Dohse jiro baro sãre ã nijari mʉhʉ? ¡Tó sehe yoaina jieraja sã! 8Ñʉjʉta. Canaãpʉ majare tju sʉ, sã wajupʉ sã wapamari niñerure bocana, wiana tahi sã. ¿Ã yoaina jipanahta, mʉ pʉhtoro platare, to urure yacaboari sã? 9Wiho mejeta mʉ nia potocã jichʉ, noa mʉ pʉhtoro to sihniri wahware yacariro yariajaro. Ã yoa sã dʉhsaina mʉ pʉhtorore dahra cohtahtina tjuanahtja —ni yʉhtiha.
10Ti ã ni yʉhtichʉ tʉhoro, tiro wʉhʉ cohtariro sehe tinare õ sehe ni yʉhtiha:
—Mʉsa nino seheta yoachʉ, noana. Wiho mejeta tiare yacariro dihta yʉhʉre dahra cohtahtiro jijaro. Mʉsa paina dʉhsaina sehe buhiri marieina tjuanahca —ni yʉhtiha.
11To ã nichʉ tʉhoa, tina sehe ño duaro mehne ti ya wajure na boro, pjãha. 12Ti pjã tuhsʉchʉ, tiro wʉhʉ cohtariro sehe ti wajure wa macaha. Masa wahmino ya wajurupʉ wa maca dʉca wahcã, dʉhsariro ya wajurupʉ wa maca batoha. Ã yoaro, to pʉhtoro sihniri wahware Benjamí ya wajurupʉ bocaha. 13To ã bocachʉ ñʉa, to wahmisʉma sehe tuaro cahya, ti suhtire tʉhrẽha. Baharo ti wajure ti burroa buipʉ na payo, tí macapʉta majare tjuaa wahaha tjoa.
14Judá, to bahana mehne José ya wʉhʉpʉ ti majare tju sʉchʉ, tiro sehe jisiniha. To cahai sʉ, na tuhcua caha sʉha tjoa, pʉ ti wʉhdʉa wapari yahpa pihachʉpʉ. 15Ti ã yoaro watoi, José sehe tinare õ sehe ni sinitu ñʉha:
—¿Dohse yoana tana ã yoari mʉsa? Wiho jiriro jieraja yʉhʉ. “Mari ã yoachʉ, tiro noano masiriro jiro, mari yacarire masiboca” ni, ¿tʉhotuaerari mʉsa? —ni sinitu ñʉha.
16To ã ni sinitu ñʉchʉ tʉhoro, Judá sehe tirore õ sehe ni yʉhtiha:
—¿Dohse ni mʉhʉre yʉhtibocari sã? ¿Dohse yoa “Buhiri maeraja. Tó sehe yoaerahi sã” ni, mʉhʉre ñobocari? Panopʉ sã ñano yoa, nʉoa tihi. Tí buhiri Cohamacʉ sãre buhiri dahrero nica. Ã jina ã yʉhdʉca sã. Mipʉre sã jipihtina mʉ sihniri wahware yacariro mehneta mʉhʉre dahra cohtaina tjuanahtja —ni yʉhtiha.
17To ã nichʉ tʉhoro, José sehe õ sehe niha:
—Jierara. Yʉ ya wahware yacariro dihta yʉhʉre dahra cohtahtiro jijaro. Mʉsa paina ã jica nino marieno mʉsa pʉcʉ cahapʉ tjuaa wahaga. Ne cʉ̃iro mʉsare caribosi —niha tinare.
“Yʉ bahʉ Benjamí to wahmisʉma mehne tjuaajaro” ni, sinibasaha Judá
18To ã nichʉ tʉhoro, Judá sehe José cahai waha, õ sehe ni siniha tirore:
—Yʉhʉ mʉhʉre sinija, pʉhtoro. Yʉhʉre tʉho curega mʉhʉ. Masija. Mʉhʉ cʉ̃hʉ faraõ dutiro yoaro seheta dutiriro jira. Ã jicʉ cua pisaro mehne mʉhʉre ñʉja yʉhʉ. Mʉ ã pʉhtoro choro jicʉ, yʉhʉre wajã duacʉ, wajã masina. Yʉhʉre mʉ wajã duachʉ, pairo mʉ bui dutiriro yʉhʉre dʉcataboriro mariahca. Wiho mejeta pja ñʉga yʉhʉre. Yʉhʉ mehne suai tjiga. 19-20Mʉhʉta sãre sinitu ñʉhre. “¿Pʉcʉ tiina jijari mʉsa? ¿Ã yoa pairo mʉsa bahʉ ji namojari?” ni, mʉ sinitu ñʉchʉ, sã sehe yʉhtihi. “Ãja. Pʉcʉ tija. Mipʉre bʉcʉro waro jira tiro. Tuhsʉ, cʉ̃iro wahmʉno jira sã bahʉ. Sã pʉcʉ bʉcʉro quiro to jichʉpʉ, masa bajuare tiro” ni, yʉhtihi sã mʉhʉre. Ã yoa õ sehe ni yahu namohi: “Sã bahʉ pocoro sehe sã pʉcʉ mehne pʉaro pohna timare. To wahmino yariaa wahare. To bahʉro cʉ̃irota jia tihre mipʉre. Ã jiro sã pʉcʉ sehe tirore tuaro cahĩa tihre” ni, yahuhi. 21Sã ã nichʉ tʉhocʉ, mʉhʉ sehe, “Mʉsa bahʉre yʉhʉre na tabasaga. Yʉhʉ tirore masi duaca” nihre mʉhʉ. 22Mʉ ã ni, na ta dutichʉ, sã sehe õ sehe nimahi: “Sã bahʉ sã pʉcʉre cʉ̃irota cohã ta masierara. To cohã tachʉ, sã pʉcʉ sehe cahya yariaa wahaboca” nimahi sã mʉhʉre. 23Sã ã nipachʉta, mʉhʉ sehe sãre tʉho duaerahre. Ã jicʉ õ sehe nihre: “Mʉsa bahʉre na taerana, ne pari turi ñʉ namosi mʉsa yʉhʉre” nihre mʉhʉ.
24‘Ã yoa sã jiropʉ tju sʉna, sã pʉcʉre jipihtia mʉ niare yahuhi sã, pʉhtoro. 25Baharo sãre chʉa pihtichʉ ñʉno, sã pʉcʉ, “Mahaa nuchʉ namona wahaga tjoa” nihre sãre. 26Wiho mejeta sã sehe, “Sã bahʉre sã mehne mʉ warocaerachʉ, waha masieraja sã. Tó macariro pʉhtoro sãre õ sehe nihre, ‘Mʉsa bahʉre na taerana, ne yʉhʉre ñʉ namosi’ nihre” ni, yʉhtihi sã pʉcʉre. 27Sã ã ni yʉhtichʉ, sã pʉcʉ sehe õ sehe nihre sãre: “Mʉsa masina. Yʉ namo Raque pʉaro pohna tibasare yʉhʉre. 28Cʉ̃iro waha, ãta butia wahari jire. To ã wahari baharo, pari turi ne ñʉ namoeraja. ‘Pa tehe nino wahiquiro suariro bahca wajãno niboa tirore’ ni, masija yʉhʉ. 29Mipʉre to bahʉrore mʉsa naachʉ, tiro cʉ̃hʉre ñano wahaboca. To soro wahachʉ, yʉhʉ sehe cahya yariaa wahaihca. Yʉ yariari buhiri mʉsa sehe buhiri tinahca” nihre sãre sã pʉcʉ.
30-31‘Ahriro Benjamí sã pʉcʉ tuaro to cahĩriro jira. Ã jiro sã bahʉ sã mehne to tjuaa sʉerachʉna, sã pʉcʉ tirore ñʉeraro, cahya yariaa wahaboca. Sã pʉcʉ to yariaro mehne sã sehe tí buhiri pjíro buhiri tinahca. 32“Tiropʉ ã wahari” nicʉ, yʉhʉ sehe õpʉ sã tahto pano, õ sehe nihi tirore: “Yʉhʉ mʉ macʉre ñʉ wihboihtja. Tirore naa, na majare tjua taihtja. Na majare tjua taerai pinihta, mʉhʉ mehne buhiri tia wahaihca yʉhʉ, yʉ catiro mʉ sʉro” nihi tirore. 33Ã jicʉ yʉhʉ mʉhʉre ã ni sinija, pʉhtoro: “Yʉhʉ sehe yʉ bahʉ cohtotaro mʉhʉre dahra cohtahtiro cjihto tjuaihtja. Ã yoa yʉ bahʉ sehe to wahmisʉma mehne tjuaajaro” ni, sinija yʉhʉ mʉhʉre. 34Tirore mʉ waroca tjuaaerachʉ, yʉhʉ cʉ̃hʉ ne tjuaasi. To tjuaa sʉerachʉ ñʉno, yʉ pʉcʉ to cahya yariachʉ, ñʉ duaeraca yʉhʉ —ni siniha Judá Josére.
Currently Selected:
Génesis 44: GVC
Highlight
Share
Copy
Want to have your highlights saved across all your devices? Sign up or sign in
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO
