Génesis 35
35
Ahri quiti Jacobo namono Raque to yariari quiti jira
16Baharo tina Jacobo cʉ̃hʉ Betel to ni wamoari cuhture yʉhdʉ wahcãa wahaha. Yʉhdʉ wahcãa, pʉ Efarata wama tiri macare ti sʉboro mahano dʉhsachʉ waro, to namono Raque sehe niji wahcõ dʉcaha. To niji wahcõ dʉcari baharore nijinocã sehe ne cjero mehne dijaeraha. Ã jiro ticoro sehe purĩno mehne yoari pja wapʉ tiha. 17Yoari pja wapʉ ti, to tuaa pihti yʉhdʉari baharopʉ nijinocãre cjʉaro taro niha jʉna. Ã jiro to ca dʉcariro bui tuaro caro niha ticoro. To tuaro cachʉ ñʉno, ticorore ñʉ cohtaricoro sehe õ sehe nimaha ticorore:
—Cʉ̃no pjaga mʉhʉ. Pairo mʉ macʉcã mʉnocãre cjʉaco nina mʉhʉ —nimaha.
18To ã nipachʉta, ticoro sehe cʉ̃no pjaeraha jʉna. Yariaropʉ niha. To yariahto panocã õ sehe niha ticoro:
—Ahriro yʉ macʉcã Benoni wama tijaro —niha.
à ni tuhsʉ, tirocãre cjʉa tuhsʉrota, yariaa wahaha Raque. To yariari baharo, ticoro cjiro manʉno sehe õ sehe niha:
—Ahriro yʉ macʉcã Benoni wama tiero tjijaro. Benjamí wama tijaro —ni wamoaha tirocãre. (“Benoni” nino, “yʉhʉre ñano wapʉ tichʉ yoariro” nino nica hebreo masa ya dʉsero mehne. “Benjamí” nino sehe “yʉhʉre noano yoadohoriro” nino nica)
19Ã waha, Raque cjiro yariaa tiha. To yariari baharo, Jacobo sehe to namono pjacʉ cjirore ti waharucuri maha, Efaratapʉ wahari maha dʉhtʉ cahaita ya cohãnocaa tiha. Tí maca Efaratare mipʉ macaina sehe “Belẽ” ni, pisuca. 20Baharo Jacobo sehe to namono pjacʉ cjirore ya tuhsʉ, cʉ̃ria tãcare na wahcã, to masa copa cjiro buipʉ na wahcõ dapoa tiha. Te mipʉ cʉ̃hʉre tia tãca cjiro ducusinica.
21Ã yoa tiro Israe sehe to namono cjirore ya tuhsʉ, wahaa wahaha jʉna. Yoaro waha, sʉropʉ jiha cʉ̃ wʉhʉ, mʉari wʉhʉ. Tí wʉhʉ sehe tó macaina ti wahiquinare ñʉ wihboa, ti ñʉ siteroca bororucuri wʉhʉ jia tiha. Tí wʉhʉre mahano yʉhdʉ wahcãnoi Israe cʉ̃hʉ sehe ti ya wʉhʉseri cjihtire tʉã dapo, tói jisinia tiha. 22Tói ti jichʉ, to macʉno Rubẽ sehe to pʉcʉro namono Bila mehne wʉana tia tiha. To ã yoarire to pʉcʉro Israe sehe tʉho bocanocaha. Ã tʉho bocaro, to macʉno mehne tuaro suaa tiha tiro.
Ahri quiti Jacobo pohna ti masa bajuari quiti jira
à yoa Jacobo pohna mʉa jipihtina doce waro jia tiha. 23Lía mehne to pohna tiina seis waro jia tiha. Ticoro mehne wahma to pohna ti mʉhtariro Rubẽ wama tiriro jia tiha. To baharore õpeina ticoro mehne pohna ti namoha tiro. Simeõre, Levíre, Judáre, Isacare, ã jichʉ Sabulõre pohna ti namoa tiha.
24Ã yoa pacoro to namono Raque mehne sehere pʉaro pohna tiha tjoa. Ticoro mehne to pohna ti mʉhtariro sehe José wama tiriro jia tiha. To doca macariro sehe Benjamí wama tiriro jia tiha.
25Ã yoa pacoro to namono mehne sehere pʉaro pohna tiha tjoa. Ticoro mehne to pohna ti mʉhtariro sehe Dã wama tiriro jia tiha. To doca macariro sehe Neftali wama tiriro jia tiha. Tina pocoro Bila wama tiricoro jia tiha. Ticoro Bila sehe Raque to cahamacono jia tiha.
26Ã yoa pacoro to namono mehne sehere pʉaro pohna tiha tjoa. Ticoro mehne to pohna ti mʉhtariro sehe Gade wama tiriro jia tiha. To doca macariro sehe Asé wama tiriro jia tiha. Tina pocoro Silpa wama tiricoro jia tiha. Ticoro Silpa sehe Lía to cahamacono jia tiha.
à yoa tina Jacobo pohna mʉa sehe once waro Padã Arã yahpapʉ masa bajuaina jia tiha. Benjamí cʉ̃irota Canaã yahpapʉ masa bajuariro jia tiha.
Ahri quiti Isaa to yariari quiti jira
27Baharo Jacobo waharucuro niha tjoa. To pʉcʉro Isaa cahapʉ waharo niha. Tí pjapʉre Isaa sehe Jacobo ñʉchʉno Abrahã cjiro to jiro cjiropʉ jia tiha. Abrahã cjiro to jiri pjapʉre tó sehe cʉ̃ nʉcʉ, Maré wama tiriro cjiro ya nʉcʉcã jia tiha. Ã yoa Isaa to jiri pjapʉ sehere tí nʉcʉcã cjiroihta Maré wama tiri maca jia tiha jʉna. Tí maca sehe Quiriate Arba wama tiri maca cahacãi jia tiha. Tí maca Quiriate Arbare mipʉ macaina sehe “Hebrõ” ni, pisuca. 28-29Ã yoa tiro Isaa sehe payʉ cʉhmari catia tiha. To catisinino puro noano jia tiha tiro. Ã yoa ciento ochenta cʉhmari cjʉaro waro, yariaa wahaa tiha jʉna. To yariachʉ ñʉa, to pohna Esaú, ã jichʉ Jacobo cʉ̃hʉ sehe to pjacʉ cjirore tʉ̃tipʉ duhu cũ, cohãa tiha.
Currently Selected:
Génesis 35: GVC
Highlight
Share
Copy
Want to have your highlights saved across all your devices? Sign up or sign in
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO
