Mateo 27

Judio judiro̧ yürürëreji̧ri̧diro̧jo̧ȩ Pirato pio ju̧i̧iäpȩmo̧, Jechu pio ju̧i̧

Marco 15:1-2; Uruca 23:1-2; Juan 18:28-38

1Peadai̧ tjamo̧ro judio tjamo̧ yo̧ji̧ri̧ pio judiro̧ ütëborë jëreea tjamo̧ji̧ri̧rȩ a̧dopeno̧rëreji̧ri̧dirȩ Jechu pio ju̧i̧ ja̧bo tänȩpea̧ pio ju̧i̧ chjiari ni̧bä chjaopea̧ oa. Jabechji̧ tjamo̧ goë tuti ja̧bepaji̧ri̧ pio judiro̧, judio ütëti̧ pio judiro̧borë ütëborë a̧dopeno̧rëreji̧ri̧dirȩ Jechu pio ju̧i̧ chjiari ni̧bä chjaopea̧ oa. 2Ado a̧dopeno̧ ëte, Jechu pio ju̧i̧ tabü ëte, jabechji̧ ëba järëreji̧ri̧diro̧jo̧ȩ Pirato pio ju̧i̧iäpȩ, domano̧ tjamo̧ cjo̧ro̧mȩ pio ju̧i̧iäpȩ.

Juda Iscariote judi ja̧borëremȩde

Japarea̧ Ma̧ȩ 1:18-19

3Juda judi, Jechu pio ju̧i̧iäpȩmo̧ chjai̧dëri̧ japamȩ pio judi ana̧ri̧ jo̧rȩtamȩpea̧de. Jabechji̧ Jechu pio ju̧i̧ daea̧ oaiä, ja̧bo tänȩa̧ oa cjiapamȩ pio ju̧i̧ daea̧ oaiä, ana̧ri̧ jo̧rȩtamȩpea̧de. Ado jënȩ chjai̧dëri̧ japea̧ pio ju̧i̧ chjiari ano̧ mire jo̧rȩta oaiä, ado chjereno̧ a̧depea̧dejȩ chëre oa tjamo̧ goë tuti ja̧bepaji̧ri̧ pio ji̧ri̧iäpȩ, judio ütëti̧ pio ji̧ri̧iäpȩ. Aja̧, 30 chëre oa a̧depea̧dejȩrȩ. Ado ji̧ri̧iäpȩ go̧düdäräa̧mȩrȩ ja̧di ta̧rëri̧ yo̧rëremȩdejȩrȩ:

4⁠—⁠Danȩrȩ, chjai̧dëri̧ japea̧requede ⁠—⁠yo̧a̧dejȩrȩ⁠—⁠. Cja̧rȩmȩ co chjai̧dëri̧ japadëmȩ pio ju̧i̧iäpȩmo̧ chjai̧dëri̧ japea̧reconȩ. Pio ju̧i̧ eadëji̧ri̧ pio ji̧ri̧iäpȩmo̧ yürüa̧reconȩ, chjai̧dëri̧ japamȩrȩ. Ado yaba̧ pio ju̧i̧ ja̧bo tänȩpadiro̧jo̧ȩ ⁠—⁠yo̧a̧dejȩrȩ.

Jabo dëbë yo̧a̧diro̧jo̧ȩ judio ütëti̧ judiro̧:

⁠—⁠Jabo jabechji̧de pio ibëiä ⁠—⁠yo̧a̧diro̧jo̧ȩ⁠—⁠. Pio ju̧i̧ ta̧rëa̧ ju̧i̧iä bücjüri̧ cjiadë marea̧rȩ. Jabechji̧ na̧ea̧ ma̧na̧ri̧ jo̧rȩtamȩrȩ chjai̧dëri̧ japea̧renȩ ⁠—⁠yo̧a̧diro̧jo̧ȩ.

5Ado pio ju̧i̧ ta̧rëmȩrȩ, Juda judi chëre oa Ütë tjamo̧ ja̧ bë tjoräpȩmo̧ goae tarari̧ quibë aea̧dejȩ. Ado ja̧di dari̧ japa ëte go̧dürëremȩde. Ado bäre yurarea̧ ca̧i̧ra̧ cjae mu̧i̧ ja̧borëremȩde, jibëa̧ ma̧na̧ri̧ jo̧rȩtamȩrȩ, jibëa̧ ma̧na̧ri̧ japamȩrȩ.

6Jabo Juda judi quibë aea̧ chëre oa daea̧rä, tjamo̧ goë tuti ja̧bepaji̧ri̧ pio judiro̧ a̧doparëreji̧ri̧diro̧jo̧ȩ. Ado yo̧a̧dirȩ:

⁠—⁠Danȩrȩ, pio yoa chëre üdë yürüa̧ oa cjiarëremȩde cja̧rȩmȩ pumȩ pio ju̧i̧ ja̧bo tänȩpea̧ pio ju̧i̧ chjiari ⁠—⁠yo̧a̧dirȩ⁠—⁠. Ado pio ju̧i̧iä a̧de cö̧a̧dëpea̧de. Ütë tjamo̧ ja̧ bërä chëre boearea̧ jo̧ tjoräpȩ ju̧ri̧ a̧de cö̧a̧dëpea̧de. Jabechji̧ a̧ro̧rȩ daba tara, tüdüa̧mi̧ darä cjo̧ro̧pea̧ ma̧ȩ pio ju̧i̧ daba tara, ‘jabechji̧ pumȩ oa ja̧bo tänȩpea̧ oa yürürërea̧ chëre üdë chëre boearea̧ jo̧ tjoräpȩ ju̧ri̧ a̧de cö̧a̧dëpea̧dida’ quëna̧ daba tara, jabechji̧ a̧de cö̧a̧dëparea̧ro̧jo̧ȩ ⁠—⁠yo̧ji̧ri̧rȩ yo̧rëreji̧ri̧dirȩ jibëa̧ dibëti̧ra̧ chia Juda judi ado chjereno̧ yürüa̧ chëre pio ju̧i̧ chjiari.

7Ado pio ju̧i̧iä chëre pio ju̧i̧ chjiari ni̧bä chjao ëte, ‘Aja̧, chiri oa gatëtäreji̧ri̧a̧ro̧da’ quëna̧ jo̧rȩtaji̧ri̧rȩ gatërëreji̧ri̧dirȩ pumȩ pio ju̧i̧iä, dabu yocodë oa ja̧bepamȩ pio ju̧i̧iä. Jabechji̧ judiodë pio ji̧ri̧ na̧ra̧rea̧ chiri oa goapea̧ oa, gatërëreji̧ri̧diro̧jo̧ȩ judio ütëti̧ judiro̧. 8Ado pumȩ ju̧i̧ ja̧bo tänȩrea̧ chërera̧ pio ju̧ri̧ra̧ gatëa̧ oa cjiarërea̧ oaiä, jabechji̧ “goe chiamȩ chiri” yo̧mȩ quȩra̧ quȩpea̧ oa cjiarëremȩde. Ado peaja̧di quȩmȩde pio yaba̧mȩ yoaiä cjo̧ro̧ji̧ri̧ pio ji̧ri̧iä. 9Ado pio jiro chiri oa gatëa̧ oaiä, jabechji̧ tjamo̧i̧ cjiari̧ cjiadiärëremȩde ma̧ȩ üdë, Jeremia pio judi jabërä go̧ȩparërea̧ ma̧ȩ üdë. Jabechji̧ Ütërë ea jana̧ chjadüa̧ oa ni̧bämȩrȩ ja̧di ta̧rëri̧ ni̧bärëremȩde pio jiro chiri pio ju̧i̧ chjiari jabërä:

“Jabechji̧ mitërëreji̧ri̧diro̧jo̧ȩ chëre oa, parata quȩmȩ chjipararira̧ japea̧ oa cjiamȩ chëre oa. Aja̧, 30 chëre oa mitërëreji̧ri̧diro̧jo̧ȩ. Jabechji̧ Icharai pio judiri ja̧ji̧ri̧ judiro̧ orë ütarë jo̧rȩta̧ oaiä, ‘Aja̧, ja̧di badida, pio jiro pumȩ üi̧ üdë ja̧di badida’ quëna̧ jo̧rȩta̧ oaiä, jabechji̧ ja̧di ji̧ra̧ oa yürürëreji̧ri̧dirȩ pio ju̧i̧ ja̧ ba oa. 10Ado pio jiro chërera̧ pio ju̧ri̧ra̧ gatërëreji̧ri̧dirȩ chiri oa dabu yocodë oa ja̧bepamȩ pio ju̧i̧iä. Jabechji̧ Ano̧mȩ pio judi tänȩa̧ oa, gatërëreji̧ri̧diro̧jo̧ȩ."

Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä chiri oa gatëpea̧ pio ju̧i̧ chjiari.

Pirato judi iëno̧ iëno̧ cjiarëremȩdejȩ Jechu ju̧i̧

Marco 15:2-5; Uruca 23:3-5; Juan 18:29-38

11Ado Jechu judi, jabechji̧ Pirato pio ju̧i̧ ja̧ dëbëräpȩ dae cjiarëremȩde, chiri tjamo̧ cjo̧ro̧mȩ pio ju̧i̧ ja̧ dëbëräpȩ. Ado domano tjamo̧ cjo̧ro̧mȩ pio judi iëno̧ë ta̧rëa̧dejȩ:

⁠—⁠¿Judio pio ji̧ri̧ ja̧ ütëdënȩ?

Ado Jechu judi dëbë yo̧a̧dejȩ:

⁠—⁠Dëdë, mȩnȩ coa chjiari yo̧a̧ pio judirequede ⁠—⁠dëbë yo̧a̧dejȩ.

12Aja̧, ja̧di ta̧rëri̧ dëbë yo̧rëremȩdejȩ Pirato pio ju̧i̧iäpȩmo̧ Jechu judi. Jabo tjamo̧ goë tuti ja̧bepaji̧ri̧ pio judiro̧ Jechu ju̧i̧iäpȩmo̧ ana̧ri̧ aechide yo̧a̧rä, jabechji̧ cjapi maearë cjiadiärëremȩde, pio ji̧ri̧iäpȩmo̧ dëbë yo̧dëmȩrȩ. 13Ado pio ju̧i̧iä Pirato judi iëno̧ë ta̧rëa̧dejȩ:

⁠—⁠Danȩ, ¿ta̧rëdënȩ? Judiro̧ pio mȩaiäpȩmo̧ ana̧ri̧ aechide yo̧a̧ pio ju̧i̧ ¿ta̧rëdënȩ? ⁠—⁠iëno̧ë ta̧rëtea̧dejȩ.

14Jabo Jechu judi cjapi maearë cjiadiärëremȩde, domano tjamo̧ cjo̧ro̧mȩ pio ju̧i̧iäpȩmo̧ eami̧ oa yo̧dëmȩrȩ. Jabechji̧ pio jȩaiäpȩmo̧ aechide yo̧ji̧ri̧ pio judiro̧ ma̧ȩ ji̧ra̧ oa ni̧bäa̧räbo, jabechji̧ eami̧ oa yo̧dëa̧dejȩ Pirato ju̧i̧iäpȩmo̧. Ado pio ju̧i̧iä chiri tjamo̧ cjo̧ro̧mȩ pio judi ana̧ tjamo̧ri̧ jo̧rȩtamȩpea̧de, dacho bëremi̧ cjiami̧ dari̧.

Jechu pio ju̧i̧ toräpȩ cji̧dätä yo̧rëremȩde Pirato judi jibëa̧ guadia pio ji̧ri̧iäpȩmo̧

Marco 15:6-15; Uruca 23:13-25; Juan 18:39–19:16

15Ado judio judiro̧ uipamȩ nö̧ta, uëmo̧ a̧dë chjätärea̧ do pio ju̧i̧ jo̧rȩtapea̧ oa, a̧dope chjaorëreji̧ri̧dirȩ judio judiro̧ do chjätäpea̧ do pio ju̧i̧. Ado pio jiro japamitërä uipamȩ nö̧ta, Pirato pio judi cja̧rȩmȩ pumȩ oa go̧dü tänȩriärëremȩdejȩ chaärea̧ jo̧räpȩ cjo̧ro̧rëremȩ pio ju̧i̧. Jabechji̧ judio judiro̧ pio jȩaiä cjo̧dëa̧mi̧ go̧dü tänȩriärëremȩdejȩ cja̧rȩmȩ oa uipamȩ nö̧ta. 16Ado pio jiro japamitërä, Baraba quȩmȩ pio judi chaäa̧ oa cjo̧ro̧rëremȩde. Domano pio ji̧ri̧ dëbëpe chjaorërea̧ ba oaiä, domano pio ji̧ri̧ ja̧bo tänȩriä cjo̧ro̧a̧ ba oaiä, jabechji̧ chaäa̧ oa cjo̧ro̧rëremȩde. Ado ütëbodärärë daba marëreji̧ri̧dirȩ Baraba pio ju̧i̧ chjiari. 17Ado pumȩ bubarë Pirato pio ju̧i̧ ja̧ bëräpȩ a̧dopea̧rä, jabechji̧ iëno̧ë ta̧rërëremȩdejȩrȩ ja̧di ta̧rëri̧ yo̧mȩrȩ:

⁠—⁠Danȩrȩ, pio yide Jechu judi ⁠—⁠yo̧a̧dejȩrȩ⁠—⁠. Ado danȩrȩ, o judiro̧, “Aja̧, Ütërë mitëa̧ Chjätä Tänȩmȩ pio judide” yo̧dirȩ pio ju̧i̧ chjiari. Jabo yo̧chji̧coe yaba̧. ¿Chjia oa jarë ëte go̧dü tänȩtä earenȩro̧coe? ¿Jabo Baraba pio ju̧i̧, jabo Jechu pio ju̧i̧? Yo̧chji̧coe ⁠—⁠yo̧a̧dejȩrȩ.

18Aja̧, ja̧di ta̧rëri̧ yo̧mȩrȩ iëno̧ë ta̧rërëremȩdejȩrȩ Pirato judi. Jabechji̧ tjamo̧ri̧ dabarëremȩde judio ja̧ ütëti̧ pio ji̧ri̧ chjiari. ‘Jabechji̧ Jechu pio ju̧i̧iäpȩmo̧ ërecjia tjamo̧ tara mitëa̧diro̧ju̧i̧da, jabechji̧ jabomo̧ quëbaji̧ri̧rȩ aechide ni̧bädiro̧ju̧i̧da’ quëna̧ dabarëremȩde pio ji̧ri̧ chjiari.

19Ado Pirato judi charëremȩde ütarë ta̧rë charea̧räpȩ ju̧ri̧, pumȩ pio ji̧ri̧ ta̧rë ëte ütarapea̧räpȩ ju̧ri̧. Ado ju̧ri̧pȩ cha̧ nö̧ta, jibëa̧ iei̧ pio ji̧iä ta̧rërëremȩde Jechu pio ju̧i̧ chjiari. Jabechji̧ pumȩ pio ju̧i̧iä go̧ȩpe chjadürëreyi̧nȩjȩ. “Jabechji̧ eami̧ oa japadëjo̧ȩ pio jiro üi̧ oa, jabo jabechji̧ chjaodëri̧ baä tänȩjo̧ȩ” yo̧mȩ maȩ pio ju̧i̧ go̧ȩpe chjadürëreyi̧nȩjȩ. “Aja̧, pio jiro üi̧ üdë chjai̧dë oa japadëmȩde, jabo coëma cjiari̧ cjo̧ro̧mȩde. Jabechji̧ pio ju̧i̧ chjiari uapai̧ da tjamo̧ri̧ canȩjä mo̧a̧reyi̧requede pio yaba̧ domȩ oa. Ado pio ju̧i̧iä yo̧tarequedemȩ ca̧ üi̧. Jabechji̧ baä tänȩjo̧ȩ” yo̧mȩ ma̧ȩ pio ju̧i̧ go̧ȩpe chjadürëreyi̧nȩ Pirato ja̧ iei̧ jini̧ jibëa̧ üi̧ pio ju̧i̧iäpȩmo̧, Jechu pio ju̧i̧ chjiari.

20Ado Pirato judi pumȩ ji̧ri̧ iëno̧ë ta̧rëa̧ ji̧, "A̧ja̧, chjia oa jarë ëte go̧dü tänȩtä earenȩro̧coe" yo̧a̧ ji̧, jabechji̧ judio ütëti̧ judiro̧ ado tjamo̧ goë tuti ja̧bepaji̧ri̧ pio judiro̧borë ana̧ri̧ ni̧bä chjaoji̧ri̧pea̧diro̧jȩrȩ pumȩ ji̧ri̧ Baraba pio ju̧i̧mo̧i̧ mitëtä, jabo Jechu pio ju̧i̧ ja̧bo tänȩtä. Aja̧, ja̧di ta̧rëri̧ dëbë yo̧tä yo̧tarëreji̧ri̧diro̧jȩrȩ pumȩ ji̧ri̧ Pirato pio ju̧i̧iäpȩmo̧.

21Ado chiri tjamo̧ yo̧mȩ judi pumȩ ji̧ri̧ iëno̧ë ta̧rëremȩrȩ, ado chjereno̧ iëno̧ë ta̧rërëremȩdejȩrȩ ja̧di ta̧rëri̧ yo̧mȩrȩ:

⁠—⁠¿Chjia oa jarë ëte, go̧dü tänȩtä earenȩro̧coe?

Ado dëbë yo̧a̧diro̧jo̧ȩ pumȩ bubarë:

⁠—⁠Chjia oadë, jabechji̧ Baraba pio ju̧i̧mo̧i̧ jarë ëte, go̧dü tänȩtä earea̧ro̧mȩ.

22Ja̧dëa ji̧ Pirato judi iëno̧ë ta̧rëa̧dejȩrȩ Jechu pio ju̧i̧ chjiari.

⁠—⁠¿Jabo tjana̧ japatäremȩreconȩ ado ja̧di Jechu pio ju̧i̧? Danȩrȩ, o judiro̧ “Ütërë mitëa̧ Chjätä Tänȩmȩ pio judide” yo̧ madirȩ pio ju̧i̧ chjiari. Ado pio ju̧i̧iä iëno̧ë ta̧rërequededibe. ¿Tjana̧ japatäremȩreconȩ ju̧i̧? ⁠—⁠iëno̧ë ta̧rëa̧dejȩrȩ.

Ado judiro̧ ütëborë goae tarari̧ ëna̧diäji̧ri̧rȩ ja̧di ta̧rëri̧ dëbë yo̧a̧diro̧jo̧ȩ:

⁠—⁠Tjana̧ japatäremȩdë, jabechji̧ toro cji̧de ja̧bo tänȩjo̧ȩ ⁠—⁠yo̧ji̧ri̧rȩ dëbë yo̧a̧diro̧jo̧ȩ.

23Jabo Pirato judi cjiadiädëmȩrȩ ado iëno̧ë ta̧rëa̧dejȩrȩ:

⁠—⁠Jabo yo̧chji̧coe ⁠—⁠yo̧a̧dejȩrȩ⁠—⁠. ¿Tjana̧ ju̧i̧iä ja̧bo tänȩpea̧de? ¿Tjana̧ chjai̧dë oa japea̧de pio yodëje? ⁠—⁠yo̧mȩrȩ iëno̧ë ta̧rëtea̧dejȩrȩ.

Jabo cjäri̧ madirȩ, cjarari̧ cjiape bagami̧ dari̧ cjiaji̧ri̧rȩ ji̧dë u̧i̧ to̧bari̧ ëna̧diäji̧ri̧rȩ yo̧ chjaorëreji̧ri̧diro̧jo̧ȩ:

⁠—⁠Jabechji̧ toro cji̧däa̧ oa cjiatäde ⁠—⁠yo̧a̧dirȩ.

24Ado Pirato judi pumȩ buba oa daea̧ oaiä, a̧dë chjäte cjarari̧ cjiape bagami̧ dari̧ cjiaji̧ri̧ oa daea̧ oaiä, ‘Jabo cjäri̧ maquëda, japarea̧mi̧dëquëda, ta̧rë ja̧bodëpadiro̧coada, pio ji̧ri̧ dëbëpe chjaorea̧mi̧dëquëda’ quëna̧ jo̧rȩtamȩrȩ ui oa goa jana̧tä yo̧rëremȩdejȩ jibëa̧ mu̧i̧tjoi̧ pio ju̧i̧. Ado ja̧dëa ji̧ pumȩ buba ja̧ dëbëräpȩ cjiamȩrȩ joarëremȩde jibëa̧ ichi oa, pumȩ pio ji̧ri̧iäpȩmo̧ chjadëri̧ na̧rȩpea̧ oa. Ado joamȩrȩ ja̧di ta̧rëri̧ yo̧rëremȩdejȩrȩ:

⁠—⁠Danȩrȩ, mȩnȩro̧ dabadëchea oa, jabechji̧ na̧rȩrequededibe ⁠—⁠yo̧a̧dejȩrȩ⁠—⁠. Jabechji̧ mȩnȩro̧ jo̧rȩtami̧ jo̧rȩtadërequede Jechu pio ju̧i̧ chjiari. ‘Toro cji̧de ja̧bo tänȩpea̧dida’ quëna̧ jo̧rȩtadëreconȩ. Ado pio ju̧i̧iä dibë na̧rȩmȩrȩ ca̧ ichi oa joarequede, pio ju̧i̧ ja̧ goe decjiape bagarea̧mi̧ dari̧. Jabechji̧ ju̧i̧ ja̧ goe üdë dibëa̧ ichirä cjiadiämi̧ dari̧ cjiadiä maeade ⁠—⁠yo̧a̧dejȩrȩ⁠—⁠. Jabechji̧ pio mȩnȩro̧ tjamo̧nȩrȩ pio ju̧i̧ ja̧bo tänȩji̧ri̧ judiro̧, pio cüdëdë ⁠—⁠yo̧mȩrȩ yo̧rëremȩdejȩrȩ.

25Ado pumȩ judiro̧ ütëbodärärë ëna̧diä ëna̧diä dëbë yo̧a̧diro̧jo̧ȩ:

⁠—⁠Jabechji̧de pio ibëiä ⁠—⁠yo̧a̧diro̧jo̧ȩ⁠—⁠. Jabechji̧ pio ju̧i̧ ja̧ goe üdë ibëa̧ ichirä cjiadiämi̧ dari̧ cjiadiätäde, ibëa̧ bori̧ ja̧ ichiräbo. Jabechji̧de ibëiä ⁠—⁠dëbë yo̧rëreji̧ri̧diro̧jo̧ȩ.

26Ado ja̧dëa ji̧ Pirato judi jarë ëte, go̧dü tänȩrëremȩdejȩ Baraba pio ju̧i̧, chaärea̧ bëräpȩ cjo̧ro̧rëremȩ pio ju̧i̧. Jabo Jechu pio ju̧i̧iäpȩmo̧ goae tarari̧ bide cjaeä tänȩrëremȩdejȩrȩ guadia pio ji̧ri̧. Jabechji̧ i jujua go̧a̧ti̧ra̧ pio ju̧ri̧ra̧ ji̧ra̧ri̧ co bide cjaeärëreji̧ri̧diro̧jo̧ȩ putu ju go̧a̧ oa. Ado ja̧dëa ji̧ Jechu pio ju̧i̧ bide cjaeäa̧ duri oa, yürürëremȩdejȩrȩ Pirato judi guadia pio ji̧ri̧iäpȩmo̧, Jechu pio ju̧i̧ toro cji̧de ja̧bo tänȩpea̧ oa.

Guadia judiro̧ airi̧ cjia airi̧ cjia chjaocjiarëreji̧ri̧diro̧jo̧ȩ Jechu ju̧i̧

Marco 15:16-20; Juan 19:2-3

27Ja̧dëa ji̧ chiri tjamo̧ cjo̧ro̧mȩ pio ju̧i̧ ja̧ guadia judiro̧ orë ëba yu̧a̧rëreji̧ri̧diro̧jo̧ȩ Jechu ju̧i̧. Pirato pio ju̧i̧ ja̧ bëräpȩ ëba yu̧a̧rëreji̧ri̧diro̧jo̧ȩ. Ado pio jibë nö̧ta ja̧bepaji̧ri̧ guadia pio ji̧ri̧bo a̧dopa tänȩrëreji̧ri̧diro̧jȩrȩ Jechu pio ju̧i̧ ja̧ dëbëräpȩ. 28Ja̧dëa ji̧ jibëa̧ chjibo oa, dai oa ina̧rea̧ chjibo pio ju̧i̧ baë cjüëano̧a̧diro̧jo̧ȩ. Ado ano̧ mire ina̧ tänȩno̧a̧diro̧jo̧ȩ ina̧rea̧ coëcoëara̧, ütërë ina̧rea̧mi̧ dara̧. 29Ado ja̧dëa̧ ji̧ o̧ chiamȩ to ca̧i̧mi̧ dara̧ pio ju̧ri̧ra̧ jëdano̧ ëte, yua tänȩa̧diro̧jo̧ȩ. Aja̧, domano ütërë yuami̧ dari̧ cjiapea̧ oa, jabechji̧ yua tänȩrëreji̧ri̧diro̧jo̧ȩ. Ado peaja̧di yürüa̧diro̧jo̧ȩ to oa, jibëa̧ ichirä arapea̧ oa, mu̧i̧ chjuari ja̧ ichiri arapea̧ oa. Jabechji̧ ütërë cjiami̧ dari̧ cjiapea̧ oa, jibëa̧ to oa, orora̧ japea̧ oa cjiamȩ to oa arami̧ dari̧ arapea̧ oa, yürüa̧diro̧jo̧ȩ. Ado ja̧dëa ji̧ Jechu ja̧ dëbëräpȩ ju chatura̧ ano̧ mire cjiadäräji̧ri̧rȩ goaeri̧ chjaocjiaji̧ri̧rȩ ba chia dacji̧ quëna̧ japarëreji̧ri̧diro̧jo̧ȩ ütëmi̧ da oa, ja̧di ta̧rëri̧ yo̧ji̧ri̧rȩ:

⁠—⁠Aja̧, bucho ana̧ cjo̧ro̧täde judio ja̧ ütë üdë ⁠—⁠yo̧ji̧ri̧rȩ chjaocjiarëreji̧ri̧diro̧jo̧ȩ.

30Ado a̧ra̧ a̧ra̧ pju̧i̧no̧a̧diro̧jo̧ȩ peaja̧di. Ado ja̧dëa ji̧ judiro̧ Jechu pio judi ararërea̧ tora̧ pio ju̧ri̧ra̧ ji̧ra̧ri̧ co goae tarari̧ gu̧na̧diro̧jo̧ȩ tjübë oa. 31Ado pio ju̧i̧ airi̧ cjia airi̧ cjia chjaocjia̧ duri oa, cjüëano̧a̧diro̧jo̧ȩ ina̧rea̧ coëcoëa oa, jibëa̧ chjibo oa ado chjereno̧ ano̧ mire ina̧ tänȩpea̧ oa. Ado ja̧dëa̧ ji̧ yabo ëba baärëreji̧ri̧diro̧jo̧ȩ toro cji̧de ja̧bo tänȩpea̧ oa.

Toro cji̧därëreji̧ri̧diro̧jo̧ȩ Jechu ju̧i̧

Marco 15:21-32; Uruca 23:26-43; Juan 19:17-27

32Ado judiro̧ toro cji̧de ja̧bo tänȩrea̧räpȩ jäji̧ri̧rȩ dëbëdiärëreji̧ri̧diro̧jo̧ȩ Chimo̧ quȩmȩ pio ju̧i̧, Chirenȩ quȩmȩ chiririmȩ pio ju̧i̧. Ado guadia judiro̧ pio ju̧i̧ ano̧ mire ara jä tänȩa̧diro̧jo̧ȩ to oa, Jechu ju̧i̧ cji̧däpea̧ to pio ju̧i̧. Jiadarea̧ decjiari̧ tänȩa̧diro̧jo̧ȩ. 33Ado ji̧dë u̧i̧ jachi oa jäji̧ri̧rȩ ëba järëreji̧ri̧diro̧jo̧ȩ Jechu ju̧i̧, Gogota quȩmȩräpȩ yuro. Ado “Gogota” yo̧rea̧ üdë, "tjübë ju" yo̧rea̧de. Pio ju̧ri̧pȩ ëba jäa̧diro̧jo̧ȩ. 34Ado ju̧ri̧pȩ go̧düdäräa̧mȩ oa, vino̧ quȩmȩ ërü oa yürütarëreji̧ri̧diro̧jo̧ȩ Jechu ju̧i̧, ëcarara̧ mirea̧ oa cjiamȩ jararea̧ oa. Jënȩ toro a̧dë chjäte gitoi̧ dari̧ tarachea oa, jabechji̧ yürütarëreji̧ri̧diro̧jo̧ȩ. Jabo Jechu judi jarë tara̧rä, jaradëa̧dejȩ. 35Ja̧dëa ji̧ toro cji̧därëreji̧ri̧diro̧jo̧ȩ. Chjiparari̧ra̧ pio ju̧ri̧ra̧ cjacjarë cjae gu̧na̧rëreji̧ri̧diro̧jo̧ȩ toro. Ado ja̧dëa ji̧ uëräpȩmo̧ cjiari̧ cjitë tänȩa̧diro̧jo̧ȩ. Ado ja̧di dari̧ japa ëte, guadia pio judiro̧ quȩ chiamȩ ta̧dëra̧ pio ju̧ri̧ra̧ chjaocjiaji̧ri̧pea̧dirȩ Jechu pio ju̧i̧ ja̧ chjiboremȩ oa chjarepë mitëpea̧ oa. 36Aja̧, guadia pio judiro̧ Jechu ju̧i̧ toro cji̧dä ëte, jabechji̧ chadärärëreji̧ri̧dirȩ Jechu pio ju̧i̧ chjadëri̧ jidapea̧ oa. 37Ado Jechu ja̧ tjübë uërä ju̧ri̧, to pjatë oa cjae gu̧na̧ oa cjiarëremȩde, ma̧ȩ chiamȩ to pjatë üdë. Jabechji̧ Jechu judi chjai̧dëri̧ japea̧bea pio ju̧i̧ chjiari go̧ȩpea̧ oa cjiarëremȩde to uërä ju̧ri̧. Ado ja̧di ta̧rëri̧ go̧ȩpea̧ oa cjiarëremȩde. "Aja̧, pio yodëjȩ Jechu quȩmȩ üdë 'judio pio ji̧ri̧ ja̧ Ütërequede' yo̧remȩde" yo̧mȩ ma̧ȩ pio judi toro cji̧däa̧ oa cjiarëremȩde Jechu ja̧ tjübë uërä ju̧ri̧ to pjatërä. 38Ado Jechu pio ju̧i̧ toro cji̧därërea̧ ji̧, peaja̧di yo̧a̧ri oa toro cji̧därëreji̧ri̧diro̧jȩrȩ garüji̧ri̧ pio ji̧ri̧. Cja̧rȩmȩ oa cji̧däa̧diro̧jo̧ȩ Jechu pio ju̧i̧ ja̧ cja̧ȩta̧ra̧räpȩmo̧. Ado cja̧rȩmo̧ oa cji̧däa̧diro̧jo̧ȩ cja̧ȩta̧ra̧ pënȩräpȩmo̧. Pio ji̧ri̧ ja̧ tjoro cji̧däa̧ oa cjiarëremȩde Jechu judi.

39Ado pumȩ judiro̧ toro cji̧däa̧ pio ju̧i̧ dae chjätärërea̧ ji̧, airi̧ cjiarëreji̧ri̧dirȩ, jibëa̧ tjübë oa pacho cürëji̧ri̧rȩ. 40Ado goae tarari̧ ëna̧diäji̧ri̧rȩ ja̧di ta̧rëri̧ ya̧e chjaorëreji̧ri̧diro̧jo̧ȩ Jechu pio ju̧i̧iäpȩmo̧:

⁠—⁠Chia chia, pio judirenȩ ⁠—⁠yo̧a̧diro̧jo̧ȩ⁠—⁠. "Aja̧, Ütë tjamo̧ ja̧ bë oa ado chjereno̧ cji̧däpai̧ darequede" yo̧remȩ pio judirenȩ. "Aja̧, iëchädärä ëte, ado chjereno̧ cji̧däpai̧ darequede tjarari̧ domo̧ chjätä ëte" yo̧remȩ pio judirenȩ. Jabo cjäri̧ marenȩ ⁠—⁠yo̧a̧diro̧jo̧ȩ⁠—⁠. Japarea̧mi̧dërenȩ. Ado mȩnȩ yo̧a̧ ji̧, “Aja̧, Ütë tjamo̧ pio ju̧i̧ ja̧ Jojarequede” yo̧remȩrenȩ peaja̧di. Goë jaevä ado ja̧di. Mȩnȩ pio ju̧i̧ ja̧ Joja tjamo̧rä judi, mȩnȩ Ütë tjamo̧ pio ju̧i̧ ja̧ Joja tjamo̧rä judi, jabechji̧ na̧ea̧ ma̧na̧ri̧ japamȩrȩ biravä tori pio judiri ⁠—⁠yo̧ji̧ri̧rȩ ya̧e chjaorëreji̧ri̧diro̧jo̧ȩ Jechu pio ju̧i̧.

41Peaja̧di ta̧rëri̧ ya̧rëreji̧ri̧diro̧jo̧ȩ tjamo̧ goë tuti ja̧bepaji̧ri̧ pio judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧borë, judio ja̧ ütëti̧ pio judiro̧borë. Jabechji̧ dae dae airi̧ cjia ya̧e chjaorëreji̧ri̧diro̧jo̧ȩ, pio ju̧i̧ badë badë daji̧ri̧rȩ. Ado jibëa̧ dëbëti̧ra̧ chia ni̧bäji̧ri̧rȩ ja̧di ta̧rëri̧ aechide ni̧bärëreji̧ri̧dirȩ, Jechu pio ju̧i̧iäpȩmo̧ ya̧ji̧ri̧rȩ:

42⁠—⁠Cjäri̧ made, o ji̧ri̧ chjadëri̧ chjätärea̧ yürürëremȩdejȩrȩ, jabo jibëa̧ ma̧na̧ri̧ japea̧ ju̧i̧iä chjätärea̧mi̧dëde ⁠—⁠yo̧a̧dirȩ⁠—⁠. Danȩrȩ, Icharai pio judiri ja̧ji̧ri̧ ja̧ Ütërä judi, pio ji̧ri̧ ja̧ Ütë tjamo̧rä judi, jabechji̧ jibëa̧ ma̧na̧ri̧ japea̧ oaiä tori pio judiri biratäremȩde ⁠—⁠yo̧a̧dirȩ⁠—⁠. Ado judi tori pio judiri tjamo̧ri̧ birarä judi, jabechji̧ quëna̧täreji̧ri̧rea̧ro̧jo̧ȩ ⁠—⁠yo̧ji̧ri̧rȩ ya̧e chjaorëreji̧ri̧dirȩ⁠—⁠. 43Jabo danȩrȩ, Ütë tjamo̧ pio ju̧i̧ quëna̧dejȩ. Ado pio ju̧i̧ uëri, “Aja̧, Ütë tjamo̧ pio ju̧i̧ ja̧ Jojarequede” yo̧rëremȩde. Ado pio ju̧i̧iä Ütë tjamo̧ judi pio ju̧i̧ tjamo̧ri̧ chjätärea̧ yürütämi̧ cjiarä judi, chja jabechji̧ chjätärea̧ yürütäremȩdejȩ ⁠—⁠yo̧ji̧ri̧rȩ ya̧mi̧ dari̧ yo̧rëreji̧ri̧dirȩ judio ütëti̧ judiro̧ jibëa̧ dëbëti̧ra̧ chia Jechu pio ju̧i̧ chjiari.

44Ado Jechu pio ju̧i̧ nö̧ta toro cji̧däa̧ oa cjiaji̧ri̧ pio judiro̧ peaja̧di ta̧rëri̧ ya̧e chjaorëreji̧ri̧diro̧jo̧ȩ ma̧ȩ goaedëti̧ra̧.

Jechu judi ja̧borëremȩde

Marco 15:33-41; Uruca 23:44-49; Juan 19:28-30

45Ado dorë tjomo̧ro chjadëri̧ da mirerërea̧ ji̧, chjaodëri̧ bagönȩ mape bagurarëremȩde chiri nö̧tai̧ oa, da mirerea̧mi̧dëpe bagari̧. Aja̧, bagönȩ mape bagarëremȩde chiri nö̧tai̧ oa do üdë chjiaräpȩmo̧diäa̧rä yuro, a la 3pea̧rä yuro. 46Ado dorë chjiaräpȩmo̧diäa̧rä, a las 3rä, Jechu judi goae tarari̧ ëna̧diärëremȩde, jënȩ ni̧bärea̧ ma̧ȩra̧ pio ju̧ri̧ra̧:

⁠—⁠Eroi, Eroi, ¿dema chabatani? ⁠—⁠yo̧mȩrȩ ëna̧diärëremȩde.

Ado pio jiro ma̧ȩ oa yo̧a̧ üdë: "Ca̧ Ütë, ca̧ Ütë, ¿tjana̧ ju̧i̧iä a̧dë jachipadäräa̧renȩque?" yo̧rea̧ ma̧ȩde.

47Ado o judiro̧ pio ju̧i̧ ta̧rëa̧rä, Jechu ja̧ queri̧räpȩ dae cjiaji̧ri̧ pio judiro̧ ta̧rëa̧rä, ja̧di ta̧rëri̧ yo̧rëreji̧ri̧dirȩ:

⁠—⁠Danȩrȩ, Eria quȩmȩrea̧ pio ju̧i̧ jo̧rȩtamȩrȩ ëna̧diäta jirodejȩ ⁠—⁠yo̧a̧dirȩ.

48Ado cja̧rȩmȩ pumȩrȩ bagureno̧a̧de ui yu̧i̧mȩ cjodocjodoa oa mitëno̧pea̧ oa. Ado bino quȩmȩ ërü cho̧ro̧cho̧ro̧a oa chudarëremȩdejȩ. Ado ja̧dëa ji̧ toro yura ëte, Jechu ja̧ yaräpȩmo̧ goë yürütea̧dejȩ jarapea̧ oa, jabo jaradëa̧de. 49Jabo o judiro̧ yo̧a̧diro̧jȩrȩ:

⁠—⁠Jabë jëreeadëchji̧vä ⁠—⁠yo̧a̧diro̧jȩrȩ⁠—⁠. Jabechji̧ Eria quȩmȩrea̧ pio judi jana̧pai̧ da jirodejȩ Jechu pio ju̧i̧ a̧dopea̧ oa. Jabechji̧ tori pio judiri bira tänȩpea̧ oa jana̧pai̧ dajirodejȩ. Jëreeadëji̧ri̧rȩ jidatatäro̧jo̧ȩ ⁠—⁠yo̧rëreji̧ri̧dirȩ o judiro̧.

50Ja̧dëa ji̧ Jechu judi goae tarari̧ ëna̧diä ëte, jabechji̧ ja̧borëremȩde jibëa̧ tjo oa baä tänȩa̧mȩrȩ.

51Ado chjaodëri̧ mu̧i̧ quira̧ oa cjiarëremȩde tuti märärea̧ üdë Ütë tjamo̧ pio judi tänȩa̧ oa. Tjamo̧ davä. Ütë tjamo̧ ja̧ bëräpȩ ju̧ri̧, a̧dë chjäte china̧chja jo̧ tjo oa tuti märärea̧ chjibo coto pio judi, jabechji̧ chjaodëri̧ mu̧i̧ quira̧ oa cjiadiäa̧de. Aja̧, uëri pio judiri ëteräpȩmo̧ mu̧i̧ quira̧ oa cjiadiärëremȩde yo̧a̧ri̧ pënȩpe järi̧. Ado Jechu judi ja̧boa̧ oaiä, ma̧i̧ dari̧ jö̧nö̧jö̧nö̧a maeari̧ cjiadiärëremȩde chiri üdë, ta̧dë bori̧dërë yo̧a̧ri̧ pënȩ mape bagarea̧mi̧ dari̧. 52Ado ta̧dë cjara üdë chjuari̧ tutia̧ oa cjiarërea̧ ji̧, chjaodëri̧ areia̧ oa cjiadiärëremȩde. Tjamo̧ davä. Pumȩ ja̧ icjararemȩ üdë idë a̧ra̧rea̧räpȩ üdë, jabechji̧ chjaodëri̧ areia̧ oa cjiadiärëremȩde. Ado ja̧boa̧rëreji̧ri̧ pio judiro̧, Ütë tjamo̧ ja̧ pumȩ pio judiro̧ bëdüa̧ oa cjiarëreji̧ri̧dirȩ no̧i̧dërë. 53Ado ji̧dë duri oa, Jechu judi bedüa̧ duri oa, pio jiro ja̧boa̧rëreji̧ri̧ pio judiro̧ järëreji̧ri̧dirȩ Jerucharȩräpȩ juri̧. Ado na̧rȩji̧ri̧rȩ järëreji̧ri̧dirȩ pumȩ no̧i̧dërë pio jibëiäpȩmo̧ darea̧mi̧ dari̧.

54Ado domano tjamo̧ ja̧bepamȩ guadia judi, jibëa̧ jadüborë Jechu pio ju̧i̧ jida cjiarërea̧ ji̧, jabechji̧ chiri oa ma̧i̧ dari̧ jö̧nö̧jö̧nö̧a maeari̧ cjiamȩ oa darëreji̧ri̧diro̧jo̧ȩ. Bagönȩ mapea̧rä peaja̧di darëreji̧ri̧diro̧jo̧ȩ. Chjö̧na̧i̧ oa daea̧diro̧jo̧ȩ. Ado a̧dë chjäte uapape bagaji̧ri̧rȩ ja̧di ta̧rëri̧ yo̧rëreji̧ri̧dirȩ:

⁠—⁠Pio yodëje, jabechji̧ Ütë tjamo̧ pio ju̧i̧ ja̧ Joja tjamo̧remȩde ⁠—⁠yo̧a̧dirȩ.

55Ado ivi jini̧ro̧ no̧i̧dërë jachi chjaräpȩ dae cjiaji̧ri̧rȩ dae cjiarëreji̧ri̧ni̧ro̧jo̧ȩ Jechu pio ju̧i̧, toräpȩ cjiamȩ ju̧i̧. Jabechji̧ Jechu judi Garirea̧ quȩmȩ chiriräpȩ a̧ra̧ano̧riä tai̧a̧ duri oa, pio jiro ivi jini̧ro̧ cho̧rë jana̧rëreji̧ri̧ni̧ro̧jo̧ȩ pio jiro chiriri pio judiri, Jechu pio ju̧i̧ chjadëri̧ a̧dopea̧ oa. 56Ado pio ji̧ri̧ nö̧ta cjiarëreyi̧nȩ Maria Madarena quȩyi̧ pio jini̧. Ado Santiago pio ju̧i̧ ja̧ jojini̧borë cjiarëreyi̧nȩ, Joche pio ju̧i̧ ja̧ jojini̧ pio jini̧. Ado Chebedeo ja̧ iei̧ pio jini̧borë cjiarëreyi̧nȩ, Santiago pio ju̧i̧, ado Juan pio ju̧i̧ arayi̧ pio jini̧. Aja̧, ji̧ra̧rëreji̧ri̧ni̧rȩ ivi jini̧ro̧ jachidëräpȩ dae cjiarëreji̧ri̧ jini̧ro̧.

Ta̧dë cjararä idë a̧ra̧rëreji̧ri̧diro̧jo̧ȩ Jechu ja̧ icjara oa

Marco 15:42-47; Uruca 23:50-56; Juan 19:38-42

57Ado do üdë birapea̧ querediärä, Jechu pio ju̧i̧iä dabapea̧mȩ judi, chëre ji̧ra̧ri̧ goamȩ pio judi go̧düdärärëremȩde Arimatea quȩmȩ bë ma̧ri̧ri pio judiri. Joche quȩmȩrëremȩde. 58Pio judi goë depea̧dejȩ Pirato ju̧i̧ Jechu ja̧ icjara pio ju̧i̧ cjo̧dëpea̧ oa, chjadëri̧ idë a̧ra̧pea̧ oa. Ado Pirato pio judi yo̧a̧ oaiä, jabechji̧ Jechu ja̧ icjara oa mitërea̧ yürürëreji̧ri̧diro̧jo̧ȩ Joche pio ju̧i̧iäpȩmo̧. 59Ado Joche judi Jechurë toro cji̧däa̧räpȩ go̧düdäräa̧rä, tori pio judiri bira tänȩrëremȩdejȩ. Ado bira tänȩ ëte, joë purirëremȩdejȩ jibëa̧ icjara oa chjibo coto peaja̧ra̧, chjibo coto chjadëra̧. 60Ado ja̧di dari̧ japa ëte, ta̧dë cjararä ju̧ri̧ idë a̧ra̧rëremȩdejȩ. Jabechji̧ Joche pio judi tänȩa̧ oa, cjarea̧ oa cjiarëremȩde ta̧dë cjara üdë. Ado pio jiro ta̧dë cjararä, jibëa̧rä, cja̧rȩmȩ icjara oa idë a̧ra̧dërërea̧räpȩ ju̧ri̧ idë a̧ra̧rëremȩdejȩ Jechu ja̧ icjara oa. Ado Jechu ja̧ icjararemȩ pio ju̧i̧ ta̧dë cjararä ju̧ri̧ idë a̧ra̧ ëte, ta̧dë ana̧ tjamo̧ra̧ pio ju̧ri̧ra̧ chjadëri̧ tuti cararëremȩdejȩ joë ya oa, eami̧rȩ yu̧a̧rea̧mi̧dëri̧. Ado ja̧di dari̧ japa ëte, baärëremȩde. 61Ado Maria Madarena pio jini̧, ado cja̧rȩmo̧ Maria pio jini̧borë dae charëreji̧ri̧ni̧rȩ ta̧dë cjara dëbëräpȩ ju̧ri̧.

Guadia judiro̧ ta̧dë cjara oa jida cjiarëreji̧ri̧diro̧jo̧ȩ

62Ado ja̧dëa ji̧ dopea̧rä jëdano̧rea̧ do üdë pea chjätäa̧rä, järätä chjaparea̧ do üdë pea tarupea̧rä, tjamo̧ goë tuti ja̧bepaji̧ri̧ pio judiro̧, ado pjaricheo pio judiro̧borë a̧doparëreji̧ri̧dirȩ Pirato pio ju̧i̧ ja̧ dëbëräpȩ. 63Ado ja̧di ta̧rëri̧ yo̧rëreji̧ri̧diro̧jo̧ȩ Jechu pio ju̧i̧ chjiari:

⁠—⁠Da̧nȩ ütë, pea ja̧boa̧mȩ judi, ma̧ȩ chjádë yürümȩrea̧ pio judi, jabë cjo̧ro̧rä judirä, “A̧ja̧, tjarari̧ do chjätä ëte, ja̧boa̧remȩrȩ ado chjereno̧ bëdüparequede” yo̧mȩrȩ yo̧rëremȩde ⁠—⁠yo̧a̧diro̧jo̧ȩ⁠—⁠. Pio ju̧i̧ tjamo̧ri̧ jo̧rȩtarea̧rȩ. 64Ja̧di tara chjadë tjamo̧täremȩde mȩnȩ ta̧dë cjara pio ju̧i̧ chjadëri̧ jida tänȩpea̧ ji̧ ⁠—⁠yo̧a̧diro̧jo̧ȩ⁠—⁠. Jabechji̧ tjarari̧ do nö̧ta chjadëri̧ jida tänȩtäremȩrenȩjȩrȩ na̧ guadia pio ji̧ri̧. Jabechji̧ pio ju̧i̧rea̧ ja̧ jadü pio judiro̧ icjararemȩ oa baë goa baächea oa, pumȩ judiro̧ ütëborë Jechu pio ju̧i̧ chjiari oëra̧ jo̧rȩtachea oa, ‘Aja̧, icjara decjiadida, ta̧dë cjara üdë bë madida, jabechji̧ bëdüa̧ oa cjia jirodida yaba̧’ quëna̧ jo̧rȩtachea oa, jabechji̧ chjadëri̧ jida tänȩtäremȩrenȩjȩrȩ na̧ guadia pio ji̧ri̧. Jabechji̧ judiro̧ icjararemȩ pio ju̧i̧ baë goa baärä judi, ado ta̧dë cjara üdë cjara ma cjiarä judi, cjäri̧ madiibe, ‘tjamo̧ri̧ büdüa̧ oa cjiadida yaba̧’ quëna̧ jo̧rȩtaji̧ri̧pe bagapai̧ dadirȩ pumȩ judiro̧ ütëbodärärë. Ado chia chia, pumȩ judiro̧ ‘Jechu judi bëdüa̧dida’ quëna̧ji̧ri̧pe baga̧rä judi, chjadëdë tjamo̧täremȩde. Jabechji̧ Jechu judi pearä yo̧rërea̧ ma̧ȩ pio ju̧i̧iä ji̧dë u̧i̧ chjadëdëtäremȩde. Danȩ, judi pearä yo̧rërea̧ ji̧, “Aja̧, Ütërë mitëa̧ Chjätä Tänȩmȩ pio judirequede” yo̧rëremȩde. Jabo ji̧dë u̧i̧ chjadëdëtäremȩde jabo. Tjamo̧ davä. Pumȩ judiro̧ ütëborë quëna̧ji̧ri̧pe baga̧rä judi, ‘Aja̧, Jechu judi bëdüa̧ oa cjiadida yaba̧’ quëna̧ jo̧rȩtaji̧ri̧pe baga̧rä judi, ä, ji̧dë u̧i̧ chjadëdëtäremȩde. Jabechji̧ pearä yo̧rërea̧ ma̧ȩ chjádë pio ju̧i̧iä ji̧dë u̧i̧ chjadëdëtäremȩde duri oa baämȩ ma̧ȩ chjádë üdë ⁠—⁠yo̧ji̧ri̧rȩ ni̧bä chjaorëreji̧ri̧diro̧jo̧ȩ Pirato ju̧i̧ pjaricheo pio judiro̧.

65Pio ju̧i̧ ta̧rëa̧ oaiä, ja̧di ta̧rëri̧ dëbë yo̧rëremȩdejȩrȩ Pirato judi:

⁠—⁠Danȩrȩ, pio yi dae cjiaji̧ri̧ guadia pio ji̧ri̧ ëba jäjȩrȩ ⁠—⁠yo̧a̧dejȩrȩ⁠—⁠. Jechu pio ju̧i̧rea̧ ja̧ icjararemȩ pio ju̧i̧ chiamȩ ta̧dë cjara pio ju̧i̧ chjadëri̧ jidapea̧ oa, ëba jäjȩrȩ, eami̧ pumȩrȩ pio ju̧i̧rea̧ ja̧ icjara oa baë goa baärea̧mi̧dëri̧ ⁠—⁠yo̧a̧dejȩrȩ.

66Ado pio ju̧i̧iä guadia pio ji̧ri̧ ëba järëreji̧ri̧diro̧jȩrȩ ta̧dë cjararäpȩ ju̧ri̧. Ado judio tjamo̧ yo̧ji̧ri̧ pio judiro̧ tänȩa̧ oa, jabechji̧ ta̧dë cjara pio ju̧i̧ jidarëreji̧ri̧diro̧jo̧ȩ. Ado ju̧i̧ uëri go̧ȩ oa cji̧därëreji̧ri̧diro̧jo̧ȩ ta̧dërä, tuti cararea̧ ta̧dërä. Aja̧, ja̧di dari̧ japarëreji̧ri̧dirȩ, eami̧ üdë areia̧rä judi, 'Aja̧, areia̧diro̧da’ quëna̧ dapea̧ oa.

Currently Selected:

Mateo 27: Pume

Highlight

Copy