Mateo 26
26
Pio jȩaiäpȩmo̧ ja̧bo tänȩtämi̧ cjiaji̧ri̧ pio ji̧ri̧ chjiari ni̧bärëremȩde Jechu judi
Marco 14:1-2; Uruca 22:1-2; Juan 11:45-53
1Jechu judi jibëa̧ jadü pio ji̧ri̧iäpȩmo̧ ma̧ȩ go̧a̧ti̧ tjamo̧ oa ni̧bä chjaoa̧ duri oa, ano̧ mire jo̧rȩtamȩrȩ ja̧di ta̧rëri̧ yo̧rëremȩdejȩrȩ:
2—Danȩrȩ, dabanȩrȩ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ a̧dopapea̧ ji̧ querediä tjamo̧diibe —yo̧a̧dejȩrȩ—. Jabechji̧ pio jiro do üdë ma̧na̧diibe yo̧a̧ri̧ domo̧ chjätä ëte. Ado pio jiro japamitërä, cüdë, Pumȩrȩ Ara̧ Tjamo̧ pio judi, jabechji̧ yürüa̧ oa cjiaparequede toro cji̧de ja̧bo tänȩtämi̧ cjiaji̧ri̧ pio ji̧ri̧iäpȩmo̧ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧ jënȩ ja̧bopea̧ pio ju̧i̧ chjiari.
3Ado Jechu judi jibëa̧ jadü pio ji̧ri̧ ni̧bä chjaoa̧ nö̧ta, tjamo̧ goë tuti ja̧bepaji̧ri̧ pio judiro̧ a̧doparëreji̧ri̧dirȩ judio ütëti̧ pio ji̧ri̧ nö̧ta. Tjamo̧ goë tuti ja̧bepamȩ pio ju̧i̧ ja̧ bëräpȩ ju̧ri̧, Caipa quȩmȩ pio ju̧i̧ ja̧ bëräpȩ ju̧ri̧, a̧dopea̧ oa cjiarëreji̧ri̧dirȩ. 4Ado ni̧bä chjaorëreji̧ri̧dirȩ Jechu pio ju̧i̧ goadi na̧e tai̧pea̧ oa, pio ju̧i̧ mitëpea̧ oa, pio ju̧i̧ ja̧bo tänȩpea̧ oa. 5Jabo yo̧a̧dirȩ:
—Cjäri̧ madiibe, uëmo̧ a̧dë chjätärea̧ do pio ju̧i̧ jo̧rȩtapea̧ japamitërä#26:5 Go̧dürea̧ Ma̧ȩ 12:1-14 mitërea̧mi̧dëde —yo̧a̧dirȩ—. Pumȩ judiro̧ juraji̧ri̧rȩ a̧doparea̧ doro mitëdëpea̧de jabo jabechji̧, ji̧dë duri oa goadi mitëparea̧ro̧jo̧ȩ, pumȩ judiro̧ cjarari̧ cjiape jächea oa —yo̧ji̧ri̧rȩ yo̧rëreji̧ri̧dirȩ Jechu pio ju̧i̧ ja̧bo tänȩtämi̧ cjiarëreji̧ri̧ pio judiro̧.
Iei̧ jini̧ arë cjarärëreyi̧nȩjȩ goaeri̧ pjȩa̧mȩ joarea̧ oa Jechu ja̧ tjübërä
Marco 14:3-9; Juan 12:1-8
6Ado Jechu judi järëremȩde Betania quȩmȩ bë ma̧ri̧räpȩ, Chimo̧ quȩmȩ pio ju̧i̧ ja̧ bëräpȩ. Ado Chimo̧ pio judi ma̧i̧ da co chiarërea̧ ji̧, jibëa̧ irä ma̧i̧ da co chiarërea̧ ji̧, jabechji̧ chjapea̧ oa cjiamȩrȩ cjo̧ro̧rëremȩde. Aja̧, pio ju̧i̧ ja̧ bëräpȩ järëremȩde Jechu judi. 7Ja̧dëa̧ ji̧ go̧düna̧ra̧rëreyi̧nȩ cja̧rȩmȩrȩ, iei̧ pio jini̧, ui goaeri̧ pjȩa̧mȩ joarea̧ ba chia tjamo̧ oa goayi̧rȩ. Joë ba chia tjamo̧ro goarëreyi̧nȩjȩ joarea̧ oa, ta̧dëra̧ japea̧ oa cjiamȩ joërä. Pio jiro joarea̧ oa arë cjareno̧a̧nȩjȩ Jechu ja̧ tjübërä. 8Jabo Jechu ja̧ jadü pio judiro̧ iei̧ pio jini̧ japea̧ pio ju̧i̧ daea̧ oaiä, ërecjiapea̧dirȩ. Ado ja̧di ta̧rëri̧ yo̧ji̧ri̧pea̧dirȩ jibëa̧ dëbëti̧ra̧ chia pio ji̧ chjiari:
—¿Jabo tjana̧pea̧ ji̧ ja̧di dari̧ japea̧nȩ? —iëno̧ë ta̧rëa̧dirȩ—. Ja̧di dari̧ japea̧ oaiä, badëri̧ cjiadiäa̧de goaeri̧ pjȩa̧mȩ joarea̧ ba chia tjamo̧remȩ üdë. ¿Tjana̧pea̧ ji̧ badëri̧ aeno̧a̧nȩjȩ? 9Jabechji̧ gatë tänȩa̧täreyi̧nȩjȩ chëre ji̧ra̧ tjamo̧ oa mitëpea̧ oa. Ado pio jiro chëre oa chjarapë yürüa̧täreyi̧nȩjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Jabo cjäri̧ manȩ, badëri̧ arë cjareno̧a̧nȩjȩ —ya̧mi̧ dari̧ yo̧rëreji̧ri̧dirȩ pio ji̧ chjiari.
10Jabo Jechu judi tuti yo̧mȩrȩ yo̧a̧dejȩrȩ:
—¿Tjana̧pea̧ ji̧ goae tarari̧ ya̧mi̧ ta̧rëri̧ ni̧bänȩrȩ iei̧ pio ji̧ chjiari? —iëno̧ë ta̧rëa̧dejȩrȩ—. Jabo cjiachji̧jȩ. Cjapiri̧ cjiachji̧vä. Jabechji̧ chjadëri̧ japea̧ni̧que —yo̧a̧dejȩrȩ—. 11Danȩrȩ, ji̧dë ma ëba cjo̧ro̧padiro̧dibe chjö̧na̧i̧ti̧ oa cjäri̧ ja̧boji̧ri̧ pio judiro̧. Ado mȩnȩro̧ eami̧ doro pio jiro cjäri̧ ja̧boji̧ri̧ pio ji̧ri̧iäpȩmo̧ a̧dorea̧ tararä judi, jabechji̧ a̧dopai̧ darenȩro̧jȩrȩ chjaodëri̧. Jabo ja̧didërequede cüdë. Dibëa̧ chjarerä ji̧dë ma cjo̧ro̧dëparequede. 12Jabo pio jiro iei̧ jini̧ jabë dibëa̧ chjarerä cjo̧ro̧mȩ oa, chjadëri̧ japea̧ni̧que jënȩ nö̧tarä yuro. Jabechji̧ ca̧ icjara üdë ta̧dë cjararä ju̧ri̧ chjadëri̧ idë a̧ra̧ oa cjiabëmi̧, jabërä chjadëri̧ jëdano̧mi̧ dari̧ arë cjaräa̧ni̧que pio jiro ui goaeri̧ pjȩa̧mȩ joarea̧ oa. Jabechji̧ ibëa̧ pumȩ judiro̧ ja̧boa̧mȩ ja̧ icjara oa japea̧mi̧ chjadëri̧ japea̧ni̧que. 13Ado tjamo̧ri̧ yo̧requededibe ca̧ jadü —yo̧a̧dejȩrȩ—. Ma̧ȩ chjadëi̧ üdë chiriräpȩti̧ oa a̧ra̧ano̧a̧ oa cjiarä, jabechji̧ pio jini̧ coa chjiari chjadëri̧ japea̧ pio ju̧i̧ chjiari ta̧rë mapadirȩ pumȩ judiro̧ oëra̧ti̧ oa cjo̧ro̧ji̧ri̧ pio judiro̧, pio ji̧iäpȩmo̧ chjadëri̧ jo̧rȩtapea̧ oa —yo̧mȩrȩ tuti yo̧rëremȩdejȩrȩ jibëa̧ jadü ji̧ri̧ Jechu judi.
Juda Iscariote judi järirëremȩde Jechu pio ju̧i̧ chjai̧dëri̧ japapea̧ ji̧
Marco 14:10-11; Uruca 22:3-6
14Jechu judi jibëa̧ jadü pio ji̧ri̧ mitërërea̧ ji̧, 12 oari oa mitërërea̧ ji̧, Juda Iscariote pio ju̧i̧bo mitërëremȩdejȩ. Ado pio judi goëdepea̧dejȩrȩ tjamo̧ goë tuti ja̧bepaji̧ri̧ pio ji̧ri̧, Jechu pio ju̧i̧ goadi gatë tänȩpea̧ ju̧i̧ chjiari ni̧bä chjaopea̧ oa. 15‘Aja̧, ni̧bä chjaopaquiji̧ri̧da, Jechu pio ju̧i̧ mitërea̧mi̧ dari̧ yürüpaquiji̧ri̧da’ quëna̧ jo̧rȩtamȩrȩ ni̧bä chjaoepea̧dejȩrȩ, judiro̧ Jechu pio ju̧i̧ mitërea̧ dapea̧ oa. Ado Juda Iscariote judi pio ji̧ri̧iäpȩ go̧düdäräa̧rä, ja̧di ta̧rëri̧ iëno̧ë ta̧rëmȩrȩ yo̧rëremȩdejȩrȩ:
—Danȩrȩ, cüdë dibë Jechu pio ju̧i̧ yürürä judi, mȩnȩro̧ Jechu pio ju̧i̧ mitërea̧mi̧ dari̧ yürürä judi, ¿na̧pai̧ oa ba ano̧parenȩro̧coe? —iëno̧ë ta̧rëa̧dejȩrȩ.
Ado chjaodëri̧ ba ano̧a̧diro̧jo̧ȩ 30 chëre oa, paratara̧ japea̧ oa cjiamȩ chëre oa. 16Ado pio judiri yurori Juda Iscariote judi järi tjamo̧pea̧de Jechu pio ju̧i̧ yürüpea̧ oa pio ji̧ri̧iäpȩmo̧.
Jechu ja̧ jadü pio judiro̧ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ a̧dopapea̧ oa jëdano̧rëreji̧ri̧rdirȩ, Jechu pio ju̧i̧ nö̧ta jurapea̧ oa
Marco 14:12-21; Uruca 22:7-13
17Pjuru chiadëmȩ chja̧pe maea oa jurarea̧ do chjätäpea̧ do üdë pea tarupea̧ domȩ ju̧i̧iä#26:17 Go̧dürea̧ Ma̧ȩ 12:15-20 Jabechji̧ uëmo̧ a̧dë chjätärea̧ do nö̧ta, pjuru chiadëmȩ chja̧pe maea oa juradirȩ Icharai judiri ja̧ji̧ri̧ judiro̧., Jechu ja̧ jadü pio judiro̧ iëno̧ë ta̧rëa̧diro̧jo̧ȩ:
—Mȩnȩ jurapea̧ oa, ¿tjana̧räpȩ jëdanȩ yürütä earenȩibe a̧ro̧rȩ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ jurapea̧ oa? —iëno̧ë ta̧rëa̧diro̧jo̧ȩ.
18Ado Jechu judi dëbë yo̧a̧dejȩrȩ:
—Jabechji̧ jächji̧vä bë ma̧ri̧räpȩ —yo̧a̧dejȩrȩ—. Ado cüdë dibë yo̧a̧ pumȩ pio ju̧i̧ darä, jabechji̧ yo̧chji̧jo̧ȩ: “Danȩ, A̧ra̧ano̧mȩ pio judi ja̧di ta̧rëri̧ iëno̧ë ta̧rëtä eadiibe pio mȩaiäpȩmo̧" yo̧eji̧ri̧renȩro̧jo̧ȩ. “Aja̧, Ütë tjamo̧ pio judi ütarë jo̧rȩtarërea̧ üdë ma̧na̧pea̧ ji̧ querediä tjamo̧dique” yo̧mȩrȩ ma̧ȩ chjadüa̧dimȩ, yo̧eji̧ri̧renȩro̧jo̧ȩ. “Ado jabechji̧ uëmo̧ a̧dë chjätärea̧ do pio ju̧i̧ jo̧rȩtamȩrȩ a̧dopatämi̧ cjiarequede na̧ bëräpȩ ju̧ri̧, ca̧ jadü pio ji̧ri̧ nö̧ta” yo̧mȩrȩ ma̧ȩ chjadüa̧dimȩ A̧ra̧ano̧mȩ judi, yo̧eji̧ri̧renȩro̧jo̧ȩ. Aja̧ ca̧ jadü, mȩnȩro̧ pio jiro pumȩ pio ju̧i̧ darä, ja̧di ta̧rëri̧ yo̧eji̧ri̧renȩro̧jo̧ȩ. Jächji̧vä —yo̧a̧dejȩrȩ Jechu judi.
19Ado Jechu judi yo̧a̧mi̧ järëreji̧ri̧dirȩ jibëa̧ jadü judiro̧ chjadëri̧ japapea̧ oa. Aja̧, jëdano̧rëreji̧ri̧diro̧jo̧ȩ jurarea̧ oa, judiro̧ uëmo̧ a̧dë chjätärea̧ do pio ju̧i̧ chjadëri̧ jo̧rȩtaji̧ri̧rȩ jurapea̧ oa.
20Ado gȩnȩpea̧rä Jechu judi mechjaräpȩ charëremȩde jibëa̧ jadü pio ji̧ri̧ nö̧ta, 12 pumȩ pio ji̧ri̧ nö̧ta. 21Ado judiro̧ jurë cha̧ nö̧ta, Jechu judi yo̧a̧dejȩrȩ:
—Tjamo̧ri̧ yo̧requededibe ca̧ jadü —yo̧a̧dejȩrȩ—. Danȩrȩ, mȩnȩro̧ cja̧rȩmȩrȩ, pio coa nö̧ta juramȩ pio judi chjai̧dëri̧ japapadique, pio coa eadëji̧ri̧ pio judiro̧ mitërea̧mi̧ dari̧, pio coa mitërea̧mi̧ dari̧ —yo̧a̧dejȩrȩ.
22Ado judiro̧ pio ju̧i̧ ta̧rëa̧ oaiä, gito ana̧ri̧ jo̧rȩtaji̧ri̧pea̧dirȩ. Ado ütëborë ano̧ mire yo̧ji̧ri̧rȩ iëno̧ iëno̧ ta̧rërëreji̧ri̧diro̧jo̧ȩ:
—Ano̧mȩ, ¿mȩa chjiari chjai̧dëri̧ japapamȩ pio judidërequede cüdë? —iëno̧ë ta̧rëa̧diro̧jo̧ȩ.
23Ado Jechu judi dëbë yo̧a̧dejȩrȩ:
—Danȩrȩ, pio coa nö̧ta chja̧pe oa tachjarä chudamȩ pio judide coaiäpȩmo̧ chjai̧dëri̧ japapamȩ judi —yo̧a̧dejȩrȩ—. Tjamo̧ davä. Coa eadëji̧ri̧ pio ji̧ri̧iäpȩmo̧ yürüpamȩ pio judide. 24Danȩrȩ, Pumȩrȩ Ara̧ Tjamo̧ pio judirequede. Ado dëdë, pio coa ja̧bo tänȩpadiro̧coe. Ütë tjamo̧ pio ju̧i̧ ja̧ ma̧ȩ üdë go̧ȩpea̧ oa cjiarërea̧mi̧ ja̧bo tänȩpadiro̧coe. Jabo go̧ȩpea̧ oa cjiaräbo, jabechji̧ coa goadi gatë tänȩpamȩ pio judi a̧dë chjäte uapai̧ dari̧ bape chjaoa̧ cjiapade, Pumȩrȩ Ara̧ Tjamo̧ pio ju̧i̧iäpȩmo̧ chjai̧dëri̧ japamȩ judi. Jabechji̧ ji̧dë u̧i̧ chjadëtäremȩde jibëa̧ ai̧ pio jini̧ aradëa̧rä judi —yo̧a̧dejȩrȩ Jechu judi
25Ja̧dëa ji̧ Juda Iscariote pio judi, ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpamȩ pio judi iëno̧ë ta̧rëa̧dejȩ Jechu ju̧i̧:
—Ano̧mȩ, ¿pio cüdëdërequede? —iëno̧ë ta̧rëa̧dejȩ.
Ado Jechu judi dëbë yo̧a̧dejȩ:
—Dëdë, pio judirenȩ —dëbë yo̧a̧dejȩ.
Jënȩ ja̧boa̧ pio ju̧i̧ chjiari jo̧rȩtapea̧ oa jabërä ni̧bärëremȩdejȩrȩ jibëa̧ jadü ji̧ri̧, jibëa̧ goe pio ju̧i̧ chjiari ji̧dë ma jo̧rȩtapea̧ oa
Marco 14:22-26; Uruca 22:14-20; Cori̧tio Ma̧ȩ 1 11:23-25
26Judiro̧ jura̧ nö̧ta, Jechu judi chja̧pe oa mitërëremȩdejȩ. Ado Ütë tjamo̧ pio ju̧i̧iäpȩmo̧ ni̧bämȩrȩ yo̧a̧dejȩ: "Ama̧i̧, chjadëri̧ japea̧renȩibe chja̧pe oa yürüa̧ oaiä." Ado ja̧di ta̧rëri̧ ni̧bä ëte, mu̧i̧ quirë yürürëremȩdejȩrȩ jibëa̧ jadü ji̧ri̧. Ado yo̧a̧dejȩrȩ:
—Pio yoa mitëchji̧vä ca̧ icjarami̧ da oa —yo̧a̧dejȩrȩ.
27Ado ja̧di dari̧ japa ëte, mitëa̧dejȩ uva ui chiamȩ ae jararea̧ oa. Ado jibëa̧ Ama̧i̧ pio ju̧i̧iäpȩmo̧ chjacjiamȩri̧ ni̧bä ëte, ëba goë yüre jararëremȩdejȩrȩ. Ado yo̧a̧dejȩrȩ:
—Pio yoa jarachji̧vä mȩnȩro̧ ütëborë —yo̧a̧dejȩrȩ—. 28Jabechji̧ pio jiro uva ui üdë ca̧ goemi̧ dade. Ado cüdë ja̧boa̧rä, jabechji̧ gu̧roa̧ oa cjiapade pumȩ no̧i̧dë tjamo̧ ja̧ oa. Ado ca̧ goe üdë, jabechji̧ chjadëri̧ na̧rȩpadidibe Ütërë yo̧ë cji̧därërea̧ ma̧ȩ peaja̧ pio ju̧i̧ chjiari. ‘Aja̧, Ütërë yo̧ë cji̧därërea̧mi̧ pumȩ no̧i̧dë tjamo̧rȩ duridëparȩa̧ oa cjiapadiro̧da, Jechu ja̧ goe pio oaiä duridëparȩa̧ oa cjiapadiro̧da’ quëna̧rea̧mi̧ dari̧ na̧rȩpadidibe ca̧ goe üdë. Pio ju̧i̧iä yo̧requededibe —yo̧a̧dejȩrȩ—. Jarachji̧vä. 29Ado pio cüdëborë jararequede pio dibë nö̧ta, jabo pio judiri jaradëparequede uva ui oa. Jabo dëdë, japamitë ana̧ tjamo̧ chjätä ëte, cjiadiärea̧ japamitërä ado chjereno̧ jaraparequede uva ui pio ju̧i̧. Aja̧, Ütërë ütara̧ doro ado chjereno̧ jaraparequede pio dibë nö̧ta, ca̧ Ama̧i̧rȩ yo̧a̧ chja̧oeräpȩ cjo̧ro̧rea̧ darä —yo̧mȩrȩ yo̧rëremȩdejȩrȩ jibëa̧ jadü ji̧ri̧ Jechu judi.
30Ja̧dëa ji̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ go̧a̧rëreji̧ri̧diro̧jo̧ȩ. Ado go̧a̧ duri oa, go̧dürëreji̧ri̧dirȩ Orivo quȩmȩ ya̧mi̧räpȩ jäpea̧ oa.
Pedro judi ma̧ȩ chjádë yürüpea̧ pio ju̧i̧ chjiari jabërä yo̧rëremȩdejȩ Jechu judi
Marco 14:27-31; Uruca 22:31-34; Juan 13:36-38
31Ado järea̧ no̧ro tai̧ji̧ri̧rȩ ja̧di ta̧rëri̧ yo̧rëremȩdejȩrȩ Jechu judi jibëa̧ jadü pio ji̧ri̧iäpȩmo̧:
—Pio yaba̧ gȩnȩrä, mȩnȩro̧ ütëborë a̧dë baäparenȩro̧coe —yo̧a̧dejȩrȩ—. A̧dë bagureno̧parenȩro̧coe. Peaja̧dimi̧ ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë —yo̧a̧dejȩrȩ—. Ta̧rëchji̧vä Ütë tjamo̧ judi yo̧rërea̧ pio ju̧i̧:
“Pio cüdë tänȩa̧ oa, ja̧bo tänȩpadiro̧jo̧ȩ jidamȩ pio ju̧i̧, ovejami̧ da pio ji̧ri̧ jidamȩ pio ju̧i̧. Ado pio ju̧i̧iä oëra̧ti̧ oa chjuchjupechäpadirȩ ovejami̧ da pio judiro̧ chjö̧na̧i̧rȩ.”
Aja̧, ja̧di ta̧rëri̧ yo̧rëremȩde Ütë tjamo̧ judi jabërä pio coa chjiari —yo̧a̧dejȩrȩ Jechu judi—. 32Jabo danȩrȩ, cüdë ado chjereno̧ bëdüa̧rä, dibëa̧ yaboi̧ jäparequede Garirearäpȩ —yo̧a̧dejȩrȩ—. Tjamo̧ davä. Ado pio ju̧ri̧pȩ dëbëdiäparenȩro̧coe —yo̧a̧dejȩrȩ.
33Jabo Pedro judi to̧bari̧ dëbë yo̧a̧dejȩ:
—Jabo cjäri̧ marequede —yo̧a̧dejȩ—. A̧dë bagureno̧dëparequedemȩ. O judiro̧ ütëborë mȩa a̧dë bagura̧räbo, jabechji̧ pio mȩa nö̧ta ëba cjiadiäparequedemȩ —yo̧a̧dejȩ.
34Jabo Jechu judi dëbë yo̧a̧dejȩ:
—Danȩ Pedro, tjamo̧i̧ cjiari̧ yo̧requedemȩ —yo̧a̧dejȩ—. Pio yaba̧ gȩnȩrä ocararo üi̧rȩ jabë eadëa̧rä, tjarari̧ co ma̧ȩ chjádë yürüparenȩ pio coa chjiari —yo̧a̧dejȩ—. Pio coa dabadëcji̧ quëna̧ ni̧bämȩrȩ ma̧ȩ chjádë yürüparenȩ. “Aja̧, Jechu pio ju̧i̧ tjamo̧ri̧ dabadëreconȩ” yo̧parenȩ —yo̧a̧dejȩ.
35Jabo Pedro judi dëbë yo̧a̧dejȩ:
—Cjäri̧ marequede —yo̧a̧dejȩ—. Ja̧di dari̧ yo̧dëtäremȩrequede. Pio mȩadi ja̧bo tänȩa̧räbo, jabechji̧ mȩa dabadëcji̧ quëna̧ yo̧dëtäremȩrequedejȩrȩ —yo̧mȩrȩ yo̧a̧dejȩ Pedro judi.
Ado Jechu ja̧ jadü pio judiro̧ peaja̧di ta̧rëri̧ yo̧rëreji̧ri̧diro̧jo̧ȩ.
Jechu judi ana̧ri̧ jo̧rȩtamȩrȩ ni̧bärëremȩdejȩ jibëa̧ Ama̧i̧ ju̧i̧ Gechema̧ni̧ quȩmȩräpȩ
Marco 14:32-42; Uruca 22:39-46
36Ja̧dëa ji̧ Jechu judi ëba järëremȩdejȩrȩ jibëa̧ jadü ji̧ri̧ Gechema̧ni̧ quȩmȩräpȩ. Ado yo̧a̧dejȩrȩ:
—Pio yi chachji̧vä cüdë idëpȩ jäa̧ nö̧ta, cüdë ca̧ Ama̧i̧ pio ju̧i̧ ni̧bäpea̧ oa —yo̧a̧dejȩrȩ.
37Ado pio jȩa nö̧ta ëba jäpea̧ oa, tjarari̧ oa yabërëremȩdejȩrȩ. Pedro ju̧i̧, ado Chebedeo quȩmȩ pio ju̧i̧ ja̧ u̧ri̧ yo̧a̧ri̧ oa yabëa̧dejȩrȩ Juan pio ju̧i̧, ado Santiago pio ju̧i̧bo. Ado ji̧dë u̧i̧ jachi chja oa ëba järëremȩdejȩrȩ. Ado Jechu judi a̧dë chjäte gitori̧ jo̧rȩtamȩpea̧de. Chji̧ chachami̧ dari̧ jo̧rȩtamȩpea̧de. 38Ja̧dëa ji̧ yo̧a̧dejȩrȩ tjarari̧ oa:
—Acji cjaeämi̧ dari̧ boadique gitori̧ jo̧rȩta̧ pio judi —yo̧a̧dejȩrȩ—. Ca̧ tjo üdë ja̧bopami̧ tarari̧ jo̧rȩtarequede. Pio yi cjiadiächji̧vä. Pio cüdëmi̧ dari̧ na̧e chiachji̧vä —yo̧mȩrȩ yo̧a̧dejȩrȩ.
39Ado Jechu judi ji̧dë u̧i̧ jachi chja oa jämȩrȩ toboe china̧därärëremȩde daburäpȩ. Ado jibëa̧ Ama̧i̧ pio ju̧i̧iä cjo̧dëmȩrȩ cjo̧dëmȩpea̧de pio jȩa chjiari tuti japatä, jënȩ a̧dë chjäte ana̧ri̧ tarachea oa. Aja̧, ja̧di ta̧rëri̧ yo̧mȩrȩ ni̧bärëremȩdejȩ: "Ama̧i̧, ca̧ Ama̧i̧, a̧docoe. A̧dë chjäte jauëchjamȩrenȩ. Tuti japavä pio coa chjiari, cüdë a̧dë chjäte ma̧i̧ dari̧ tarachea oa. Jabo cüdë jo̧rȩta̧mi̧ japadëvä, jabo pio mȩnȩ ütarë jo̧rȩta̧mi̧ japavä Ama̧i̧." Aja̧, ja̧di ta̧rëri̧ yo̧mȩrȩ ni̧bärëremȩdejȩ jibëa̧ Ama̧i̧ ju̧i̧ Jechu judi.
40Ado ja̧di ta̧rëri̧ ni̧bä ëte, jäeno̧a̧dejȩrȩ jibëa̧ jadü pio ji̧ri̧iäpȩ, tjarari̧ oa. Mo̧a̧ cjiaji̧ri̧ oa darëremȩdejȩrȩ. Ado Pedro pio ju̧i̧ na̧rȩno̧ ëte, yo̧a̧dejȩ:
—Chia chia, chjaodëri̧ mo̧a̧mȩpea̧renȩ Chimo̧ —yo̧a̧dejȩ—. ¿Cja̧rȩmȩ ora maea oa na̧e chiarea̧ dadëa̧nȩ? 41Jabechji̧ mo̧ë bëdüa̧ji̧ri̧mi̧ dari̧ jo̧rȩtachji̧vä. Ütë tjamo̧ pio ju̧i̧ ni̧bächji̧jo̧ȩ mȩnȩro̧ oëra̧diächea oa, chjai̧dë üdë dibë boadärämi̧ dari̧ japachea oa. Jabechji̧ coëma cjiari̧ cjo̧ro̧tämi̧ cjianȩrȩ dibëa̧ tjoro. Aja̧, dibëa̧ tjo üdë ju chiami̧ dari̧ cjiade jabo dibëa̧ icjara üdë, cjäri̧ made, ju chiami̧ dari̧ cjiadëde ja̧di dari̧ cjo̧ro̧pea̧ ji̧ —yo̧a̧dejȩ.
42Ado ja̧di ta̧rëri̧ yo̧ ëte, ado a̧dë järëremȩdejȩrȩ Jechu judi jibëa̧ Ama̧i̧ pio ju̧i̧ ni̧bäpea̧ oa. Jënȩ ni̧bäa̧rea̧mi̧ ni̧bäa̧dejȩ ado chjereno̧, ja̧di ta̧rëri̧ yo̧mȩrȩ: "Aja̧ Ama̧i̧, tuti japavä pio coa chjiari cüdë a̧dë chjäte ma̧i̧ dari̧ tarachea oa. Jabo japarea̧ decjiarä judi, jabechji̧de coaiä. Jabechji̧ cüdë jo̧rȩta̧mi̧ japadëvä, jabo pio mȩnȩ ütarë jo̧rȩta̧mi̧ japavä Ama̧i̧." Aja̧, ja̧di ta̧rëri̧ ni̧bärëremȩdejȩ jibëa̧ Ama̧i̧ ju̧i̧. 43Ado japamitë chjätä ëte, Jechu judi jibëa̧ jadü pio ji̧ri̧iäpȩ ado chjereno̧ cuchupë jäeno̧a̧ ji̧, ado mo̧a̧ cjiaji̧ri̧ oa dadäräa̧dejȩrȩ. Judiro̧ mo̧a̧tämi̧ cjia̧ üdë boadäräa̧ oaiä na̧e chiarea̧ dadëa̧dirȩ. 44Ado pio ju̧i̧iä ado chjereno̧ jäeno̧a̧de Jechu judi jibëa̧ Ama̧i̧ ju̧i̧ ni̧bäpea̧ oa. Yo̧a̧ri̧ co ni̧bäremȩrȩ ado chjereno̧ järëremȩde ni̧bäpea̧ oa, jënȩ yo̧a̧rea̧ ma̧ȩra̧ ado ni̧bämȩrȩ. 45Ado ni̧bä ëte, ado chjereno̧ goëdepea̧dejȩrȩ jibëa̧ jadü ji̧ri̧. Ado mo̧a̧ cjiaji̧ri̧ oa dadäräa̧dejȩrȩ. Ado yo̧a̧dejȩrȩ:
—¿Ji̧dë ma mo̧a̧tämi̧ cjianȩrȩ mȩnȩro̧? ¿Ji̧dë ma järätä järätä mo̧a̧nȩrȩ mȩnȩro̧? Jabechji̧de yaba̧ —yo̧a̧dejȩrȩ—. Danȩrȩ, coa chjai̧dëri̧ japaji̧ri̧ pio judiro̧ acji jana̧diro̧coe. Jabechji̧ cja̧rȩmȩrȩ yürüpadique coa chjai̧dëri̧ japaji̧ri̧ pio ji̧ri̧iäpȩmo̧ —yo̧a̧dejȩrȩ—. Tjamo̧ davä. Chjaodëri̧ acji jana̧padiro̧coe. Pumȩrȩ Ara̧ Tjamo̧ pio ju̧i̧ acji jana̧padiro̧coe pio coa mitëpea̧ oa. Pio jiro japamitë üdë ma̧na̧diibe yaba̧. 46Cjitëchji̧vä. Jätärȩ —yo̧a̧dejȩrȩ—. Danȩrȩ, coa mitëtä yürümȩ pio judi acji jana̧diibe. Pio ju̧i̧ dëbëdiäpea̧ oa jätärȩ —yo̧mȩrȩ yo̧rëremȩdejȩrȩ jibëa̧ jadü ji̧ri̧ Jechu judi.
Acji mitërëreji̧ri̧diro̧jo̧ȩ Jechu ju̧i̧
Marco 14:43-50; Uruca 22:47-53; Juan 18:1-11
47Ado Jechu judi jibëa̧ jadü pio ji̧ri̧ nö̧ta jabë ni̧bä chjaodärädëa̧rä, chjaodëri̧ acji jana̧rëremȩdejȩ Juda judi, Jechu ja̧ jadü cja̧rȩmȩrȩ. Jabechji̧ Jechu judi jibëa̧ jadü pio ji̧ri̧ pearä mitërërea̧ ji̧, 12 pumȩ ji̧ri̧ mitërëremȩdejȩrȩ, Juda pio ju̧i̧bo. Ado pio judi acji jana̧dejȩ Jechu ju̧i̧. Ado pio ju̧i̧ nö̧ta jana̧reji̧ri̧ pio judiro̧ ji̧ra̧ tjamo̧rëreji̧ri̧dirȩ. Araji̧ri̧rȩ acji jana̧rëreji̧ri̧diro̧jo̧ȩ. Tjapënȩ jujuai̧ oa, dëbëribo jo̧dë chiamȩ tjapënȩ oa araji̧ri̧rȩ, gu̧na̧rea̧ tobo araji̧ri̧rȩ acji jana̧rëreji̧ri̧diro̧jo̧ȩ. Tjamo̧ yo̧ji̧ri̧ pio judiro̧ chjadüa̧ oa acji jana̧diro̧jo̧ȩ. Ado tjamo̧ goë tuti ja̧bepaji̧ri̧ pio judiro̧borë, ado judio ütëti̧ pio judiro̧borë chjadüa̧ oa acji jana̧diro̧jo̧ȩ. 48Ado acji jäpaji̧ri̧ pio judiro̧ dabadëchea oa, jabechji̧ jabërä ma̧ȩ yürürëremȩdejȩrȩ Juda pio judi. Aja̧, Jechu pio ju̧i̧iäpȩmo̧ chjai̧dëri̧ japamȩ pio judi jabërä ma̧ȩ yürüa̧dejȩrȩ, ja̧di ta̧rëri̧ yo̧mȩrȩ: "Danȩrȩ, na̧rȩrea̧mi̧ dari̧ yürüparequededibe” yo̧a̧dejȩrȩ. “Jabechji̧ cüdë ya i̧bua̧ pio ju̧i̧ mitë ëte, ëba ma̧na̧pea̧de" yo̧mȩrȩ yo̧rëremȩdejȩrȩ jabërä. 49Ado pio ju̧i̧iä Juda judi chjaodëri̧ jäeno̧rëremȩdejȩ Jechu pio ju̧i̧iäpȩ. Ado yo̧a̧dejȩ:
—Jearea̧ yürürequedemȩ Ano̧mȩ.
Ado ja̧di ta̧rëri̧ yo̧ ëte, ya i̧bua̧dejȩ chamachoro. 50Ado Jechu judi dëbë yo̧a̧dejȩ:
—Danȩ omȩ, ¿tjana̧ japera̧pea̧renȩ mȩnȩ? Goë jaevä. Mȩnȩ jo̧rȩta̧mi̧ japëno̧vä —yo̧a̧dejȩ.
Ado ja̧dëa ji̧ Jechu pio ju̧i̧ chjaodëri̧ acji jana̧ ëte chjuari̧ mitërëreji̧ri̧diro̧jo̧ȩ. Judio ütëti̧ pio ji̧ri̧iäpȩ ëba baäpea̧ oa mitërëreji̧ri̧diro̧jo̧ȩ.
51Jabo Jechu pio ju̧i̧ nö̧ta ëba cjiarëremȩ üdë cja̧rȩmȩrȩ chjaodëri̧ mu̧i̧ coëno̧a̧dejȩ jibëa̧ coana̧rea̧ go̧a̧ti̧ oa, dëbëribo jo̧dë chiamȩ coana̧rea̧ pio ju̧i̧. Ado goae tarari̧ tuti gu̧na̧mȩrȩ tuti guna̧rëremȩdejȩ pumȩ ja̧ ta̧ra̧ oa. Tjamo̧ davä. Goë tuti ja̧bepamȩ pio ju̧i̧ ja̧ mu̧i̧tjoi̧ ja̧ ta̧ra̧ oa tuti gu̧neno̧a̧dejȩ ta̧ra̧ cotope bagari̧.
52Jabo Jechu judi tuti yo̧a̧dejȩ:
—Ado chjereno̧ go̧iojo̧ȩ na̧ coana̧rea̧ oa joërä —yo̧a̧dejȩ—. Jabechji̧ dëbëribo jo̧dë chiamȩ coana̧rea̧ra̧ pio ju̧ri̧ra̧ goe chiari̧ ja̧bo tänȩji̧ri̧ pio judiro̧, peaja̧di coana̧rea̧ra̧ pio ju̧ri̧ra̧ guë ja̧bo tänȩa̧ oa cjiapai̧ dadirȩ. Jabechji̧ ado chjereno̧ go̧iovä —yo̧a̧dejȩ—. 53Ado danȩ, ¿ca̧ Ama̧i̧ pio ju̧i̧ chjiari dabadënȩ? —iëno̧ë ta̧rëa̧dejȩ—. Jabechji̧ cüdë pio ju̧i̧iä goë cjo̧dërä judi, coa a̧dotä eamȩrȩ goë cjo̧dërä judi, jabechji̧ chjaodëri̧ chjadütäremȩdique mu̧i̧tjoi̧ ji̧ra̧ tjamo̧ oa, 72 mil mu̧i̧tjoi̧ ji̧ra̧ oa. Tjamo̧ davä. Cüdë pio ju̧i̧iä goë cjo̧dërä judi, a̧dëräpȩ cjiaji̧ri̧ mu̧i̧tjoi̧ pio ji̧ri̧ chjaodëri̧ tuti chjadütäremȩdique pio coa chjadëri̧ jidapea̧ oa. 54Jabo danȩ, cüdë goë cjo̧dërä judi, pumȩ judiro̧ pio coaiäpȩmo̧ eami̧ oa japachea oa goë cjo̧dërä judi, cjäri̧ made, pio coa chjiari go̧ȩpea̧ oa cjiarërea̧ ma̧ȩ üdë tjamo̧i̧ cjiari̧ cjiadiädëtäremȩde. Tjamo̧ davä. Cüdë ca̧ Ama̧i̧ pio ju̧i̧iä tuti japatä goë cjo̧dërä judi, jabechji̧ Ütë tjamo̧ judi pio coa chjiari jabërä go̧ȩpa tänȩrërea̧ ma̧ȩ pio judi tjamo̧i̧ cjiari̧ cjiadiädëtäremȩde. Ado pio ju̧i̧iä goë cjo̧dëdëpareconȩ jabechji̧ —yo̧mȩrȩ yo̧rëremȩdejȩ acji jana̧ji̧ri̧ pio ji̧ri̧ ja̧bo tänȩrea̧ järitamȩ pio ju̧i̧iäpȩmo̧.
55Ja̧dëa ji̧ Jechu judi pumȩ buba oa, pio jȩa acji jana̧ji̧ri̧ pio ji̧ri̧ iëno̧ë ta̧rëa̧dejȩrȩ:
—¿Chjiarequede cüdë? —iëno̧ë ta̧rëa̧dejȩrȩ—. ¿Garümȩ uapai̧ da tjamo̧ pio judirequede? ¿Tjana̧ ju̧i̧iä ma̧i̧ da chjai̧dë oa japamȩmi̧ da oa acji jana̧renȩro̧coe? —iëno̧ë ta̧rëa̧dejȩrȩ—. ¿Tjana̧ ju̧i̧iä dëbëribo jo̧dë chiamȩ tjapënȩ jujuai̧ oa araji̧ri̧rȩ acji jana̧renȩro̧coe, gu̧na̧rea̧ tobo? ‘Pumȩ uapai̧ da tjamo̧dida’ quëna̧ jo̧rȩtaji̧ri̧rȩ jana̧nȩrȩ? —iëno̧ë ta̧rëa̧dejȩrȩ—. Danȩrȩ, doti̧mi̧ a̧ra̧ano̧ chjaorëremȩrequede Ütë tjamo̧ ja̧ bëräpȩ ju̧ri̧. ¿Tjana̧ ju̧i̧iä mitëdëa̧renȩro̧coe pio ju̧ri̧pȩ a̧ra̧ano̧ chamȩ oa? 56Jabo cjäri̧ marenȩro̧coe —yo̧a̧dejȩrȩ—. Pio ju̧ri̧pȩ a̧ra̧ano̧mȩ oa mitërea̧ dadëa̧renȩro̧coe. Jabechji̧ jabërä go̧ȩpea̧ oa cjiarërea̧ ma̧ȩ üdë tjamo̧i̧ cjiari̧ cjiadiäpea̧ oa, jabechji̧ pio ju̧ri̧pȩ a̧ra̧ano̧ chamȩ oa mitërea̧ dadëa̧renȩro̧coe. Tjamo̧ davä. Ütërë ea jana̧ chjadüa̧ oa ni̧bäji̧ri̧ pio judiro̧ jabërä pio coa chjiari go̧ȩparërea̧ ma̧ȩ üdë tjamo̧i̧ cjiari̧ cjiadiäpea̧ oa, jabechji̧ pio ju̧ri̧pȩ a̧ra̧ano̧mȩ oa mitërea̧ dadëa̧renȩro̧coe —yo̧mȩrȩ ni̧bä chjaorëremȩdejȩrȩ acji jana̧ji̧ri̧ pumȩ buba oa.
Ado judirä Jechu ja̧ jadü pio judiro̧ ütëbodärärë a̧dë bagurëno̧rëreji̧ri̧diro̧jo̧ȩ.
Ëba järëreji̧ri̧diro̧jo̧ȩ Jechu ju̧i̧ ütëti̧rȩ cjo̧ro̧mȩräpȩ pio ju̧i̧ ütarapea̧ oa
Marco 14:53-64; Uruca 22:63-71; Juan 18:19-24
57Ja̧dëa ji̧ Jechu pio ju̧i̧ mitë ëte, ëba järëreji̧ri̧diro̧jo̧ȩ tjamo̧ goë tuti ja̧bepamȩ pio ju̧i̧iäpȩ, Caipa quȩmȩ pio ju̧i̧iäpȩ. Jabechji̧ pio ju̧ri̧pȩ a̧dopea̧ oa cjiarëreji̧ri̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado judio ütëti̧ pio judiro̧borë. Aja̧, ja̧dira̧ ëba järëreji̧ri̧diro̧jo̧ȩ Jechu pio ju̧i̧. 58Jabo Pedro judi, duriräpȩ cjiamȩrȩ jaerira̧ jachi chja cjiari̧ cho̧rë järëremȩdejȩrȩ tjamo̧ goë tuti ja̧bepamȩ pio ju̧i̧ ja̧ bëräpȩ yuro. Ado bë yuro oa tutia̧ oa cjiarëremȩde tutirea̧ uë tjamo̧ra̧. Ado Pedro judi tutirea̧ yari pio judiri yu̧ë chjätämȩrȩ järëremȩde joë ya jidaji̧ri̧ mu̧i̧tjoi̧ pio ji̧ri̧ nö̧ta ëba chapea̧ oa. Jabechji̧ ‘¿tjana̧ japapadiro̧ju̧i̧da, Jechu pio ju̧i̧ ¿tjana̧ oa japapadiro̧ju̧i̧da?’ quëna̧ jo̧rȩtamȩrȩ jida charëremȩde.
59Ado tjamo̧ goë tuti ja̧bepaji̧ri̧ pio judiro̧, ado tjamo̧ ütarë yo̧ji̧ri̧ judio pio judiro̧ ütëborë järi tjamo̧rëreji̧ri̧dirȩ Jechu pio ju̧i̧ ja̧bo tänȩpea̧ ji̧. Ado pio ju̧i̧iä Jechu ju̧i̧iäpȩmo̧ tjamo̧ri̧ aechide yo̧pamȩ pio ju̧i̧ datämi̧ cjia tjamo̧rëreji̧ri̧diro̧jo̧ȩ. Tjamo̧ davä. Jechu pio ju̧i̧ chjiari ma̧ȩ chjádë yürüpea̧ oa, pio ju̧i̧iäpȩmo̧ aechide yo̧pea̧ oa datämi̧ cjiarëreji̧ri̧diro̧jo̧ȩ eami̧ pumȩ oa. 60Ado pumȩ judiro̧ no̧i̧dërë, dëdë, ma̧ȩ chjádë yürüji̧ri̧rȩ aechide ni̧bärëreji̧ri̧diro̧jo̧ȩ. Jabo cjäri̧ madirȩ, yo̧a̧ri̧ yami̧ dari̧ ni̧bäa̧ oaiä, cja̧rȩmȩ jo̧rȩtarea̧ maea oa jo̧rȩtadëa̧ oaiä, jabechji̧ nö̧tadërëreji̧ri̧dirȩ#26:60 Judio judiro̧ yo̧a̧ri̧ pumȩ pio ji̧ri̧iä ta̧rëa̧rämo̧ ja̧bo tänȩrea̧ darëreji̧ri̧diro̧jo̧ȩ chjai̧dëri̧ japamȩ pio ju̧i̧. Tjamo̧ davä. Tjamo̧ ütaraji̧ri̧ pio judiro̧ yo̧a̧ri̧ pumȩ pio ji̧ri̧iä ta̧rëa̧rämo̧i̧, irä daea̧ji̧ri̧ pio ji̧ri̧iä ta̧rëa̧rämo̧ ja̧bo tänȩrea̧ darëreji̧ri̧diro̧jo̧ȩ chjai̧dëri̧ japamȩ pio ju̧i̧. Jabechji̧ ja̧di ta̧rëri̧ go̧ȩparëremȩde Moicherea̧ pio judi.. Ado pio ju̧i̧iä ta̧rë ja̧borea̧ dadëa̧diro̧jȩrȩ tjamo̧ ütaraji̧ri̧ judiro̧. Jabo ja̧dëa ji̧ japamitë chjätä ëte, oari judiro̧ yo̧a̧ri̧rȩ cjiadärärëreji̧ri̧dirȩ tjamo̧ ütaraji̧ri̧ pio ji̧ri̧ ja̧ dëbëräpȩ. 61Ado ja̧di ta̧rëri̧ yo̧ji̧ri̧rȩ yo̧rëreji̧ri̧dirȩ:
—Danȩrȩ, Jechu judi Ütë tjamo̧ pio ju̧i̧ ja̧ bë pio ju̧i̧ chjiari ni̧bäa̧mȩ oa irä ta̧rëa̧rea̧ro̧jo̧ȩ —yo̧a̧diro̧jȩrȩ—. Aja̧, ja̧di ta̧rëri̧ yo̧a̧mȩ oa ta̧rëa̧rea̧ro̧jo̧ȩ: “Aja̧, Ütë tjamo̧ ja̧ bë pio ju̧i̧ iëchäpai̧ dareconȩ” yo̧mȩ oa irä ta̧rëa̧rea̧ro̧jo̧ȩ —yo̧a̧dirȩ—. “Ado ja̧dëa ji̧ tjarari̧ do chjätë ëte, ado chjereno̧ cji̧däa̧ oa cjia tänȩpai̧ dareconȩ.” Aja̧, ja̧di ta̧rëri̧ yo̧mȩ oa irä ta̧rëa̧rea̧ro̧jo̧ȩ —yo̧ji̧ri̧rȩ yo̧rëreji̧ri̧dirȩ Jechu pio ju̧i̧ chjiari, cja̧rȩmȩ yami̧ dari̧ ni̧bäji̧ri̧rȩ.
62Ja̧dëa ji̧ tjamo̧ goë tuti ja̧bepamȩ pio judi ütëbo ja̧ dëbëräpȩ cjitëmȩrȩ iëno̧ë ta̧rërëremȩdejȩ Jechu ju̧i̧:
—¿Yö̧ta dari̧ dëbë yo̧panȩ mȩnȩ? —iëno̧ë ta̧rëa̧dejȩ—. Danȩ, ta̧rëa̧nȩ judiro̧ pio mȩa chjiari aechide yo̧a̧ pio ju̧i̧ chjiari, mȩnȩ chjai̧dëri̧ ni̧bäa̧ pio ju̧i̧ chjiari. ¿Yö̧ta dari̧ yo̧panȩ? Pio mȩaiäpȩmo̧ aechide ni̧bäa̧ji̧ri̧ pio ji̧ri̧iäpȩmo̧ ¿ba dëbë yo̧dëpanȩ? —iëno̧ë ta̧rëtea̧dejȩ Jechu ju̧i̧.
63Jabo Jechu judi cjapi maearë cjiadiärëremȩde. Dëbë yo̧dërëremȩdejȩ. Ado tjamo̧ goë tuti ja̧bepamȩ pio judi ado chjereno̧ iëno̧ë ta̧rëa̧dejȩ:
—Danȩ, chjadëri̧ yo̧coe —yo̧a̧dejȩ—. Ja̧bodëmȩ Ütë pio ju̧i̧ ja̧ quȩrä yo̧tä eamȩrȩ yo̧tarequedemȩ. Yo̧ibe. ¿Chjia tjamo̧renȩ mȩnȩ? ¿Ütërë mitëa̧ Chjätä Tänȩmȩ pio judidënȩ? ¿Ütë tjamo̧ pio ju̧i̧ ja̧ Joja pio judidënȩ? Chjadëri̧ dëbë yo̧coe yo̧tarequedemȩ —yo̧mȩrȩ yo̧a̧dejȩ.
64Ado ja̧dëa ji̧ Jechu judi dëbë yo̧a̧dejȩ:
—Dëdë, pio judirequede —yo̧a̧dejȩ—. Jabo yo̧requedeme ji̧dëri̧. Jabechji̧ japamitë chjätä ëte, a̧dë chjäte ba chia tjamo̧räpȩ chamȩ oa daparenȩro̧coe Pumȩrȩ Ara̧ Tjamo̧ pio ju̧i̧, a̧dëräpȩmȩ oa —yo̧a̧dejȩ—. Tjamo̧ davä. A̧dë chjäte jauëchjamȩ Ütë pio ju̧i̧ ja̧ mu̧i̧ chjuari chamȩ oa daparenȩro̧coe. Ado a̧dëri pio judiri go̧a̧ra̧ ërä ado ma̧na̧mȩ oa, daparenȩro̧coe peaja̧di —yo̧mȩrȩ dëbë yo̧rëremȩdejȩ.
65Ado tjamo̧ goë tuti ja̧bepamȩ judi pio jiro ma̧ȩ oa ta̧rëa̧ oaiä, chjaodëri̧ mu̧i̧ quirarëremȩdejȩ jibëa̧ chjibo oa, ana̧ tjamo̧ri̧ jo̧rȩtamȩrȩ. Ado yo̧a̧dejȩrȩ tjamo̧ yo̧ji̧ri̧ pio ji̧ri̧iäpȩmo̧:
—Danȩrȩ, ja̧di ta̧rëri̧ ni̧bämȩ oa irä ta̧rë marenȩro̧jo̧ȩ. A̧dë chjäte chai̧dëri̧ ni̧bämȩde Ütë tjamo̧ pio ju̧i̧iäpȩmo̧ —yo̧a̧dejȩrȩ jibëa̧ pumȩ pio ji̧ri̧iäpȩmo̧—. Jabechji̧ Ütë tjamo̧ pio ju̧i̧ nö̧tamȩmi̧ dari̧ ni̧bäa̧de, Ütë tjamo̧ pio ju̧i̧iäpȩmo̧ chjai̧dëri̧ japamȩrȩ. Ado pio ju̧i̧iä jabechji̧de yaba̧ —yo̧a̧dejȩrȩ—. ‘Ado judiri ado cja̧rȩmo̧ pumȩ pio ju̧i̧iä a̧de ta̧rëpea̧ chia jiroa̧ro̧da’ quëna̧rea̧mi̧dëde. Jabechji̧ judi irä yo̧a̧ pio ju̧i̧ nö̧tadäräri̧ ta̧rërea̧ro̧jo̧ȩ yaba̧. 66Ado pio ju̧i̧iä iëno̧ë ta̧rërequededibe. ¿Yö̧ta dari̧ jo̧rȩtanȩrȩ mȩnȩro̧ pio ju̧i̧ chjiari?
Ado judiro̧ dëbë yo̧a̧diro̧jo̧ȩ:
—Yö̧ta dari̧dë, jabechji̧ ja̧bopea̧ maeade. Ja̧borea̧ pio ju̧i̧mo̧i̧ nö̧tade —dëbë yo̧rëreji̧ri̧diro̧jo̧ȩ.
67Ja̧dëa ji̧ o judiro̧ chjaodëri̧ tarupeno̧rëreji̧ri̧dirȩ Jechu ja̧ dachoro a̧ra̧ a̧ra̧ pju̧i̧no̧pea̧ ji̧. Ado goae tarari̧ ano̧ mire cjae cjae guarëreji̧ri̧diro̧jo̧ȩ peaja̧di. Ado o judiro̧ ma̧i̧ dari̧ bide cjaeä chjaorëreji̧ri̧diro̧jo̧ȩ. 68Ado chjaocjiaji̧ri̧rȩ ja̧di ta̧rëri̧ yo̧rëreji̧ri̧diro̧jo̧ȩ:
—Danȩ, pio mȩnȩ Ütërë mitëa̧ Chjätä Tänȩmȩ pio judi tjamo̧rä judi, jabechji̧ chjadëri̧ yo̧ibe —yo̧a̧diro̧jo̧ȩ—. ¿Chjiade mȩa goae tarari̧ gu̧na̧mȩ judi? Mȩa cjae cjae gua̧mȩ judi, ¿chjiade? —iëno̧ë ta̧rëa̧diro̧jo̧ȩ—. Chjadëri̧ yo̧ibe. Jabechji̧ Ütë tjamo̧ judi pio mȩaiäpȩmo̧ dabarea̧ yürüa̧ra̧ pio ju̧ri̧ra̧ chjadëri̧ dëbë yo̧ibe —yo̧ chjaorëreji̧ri̧diro̧jo̧ȩ.
Aja̧, ja̧di ta̧rëri̧ yo̧ji̧ri̧rȩ conȩdarëreji̧ri̧diro̧jo̧ȩ Jechu pio ju̧i̧.
Pedro judi ma̧ȩ chjádë yürürëremȩde Jechu pio ju̧i̧ chjiari
Marco 14:66-72; Uruca 22:54-62; Juan 18:15-18, 25-27
69Ado Pedro judi jo̧ dairäpȩ tutia̧rä, charëremȩde. Jabo iei̧ pio jini̧, mu̧i̧tjoi̧ iei̧ cja̧rȩmȩrȩ pio ju̧i̧iäpȩ go̧düdärärëreyi̧nȩ. Ado ja̧di ta̧rëri̧ yo̧yi̧rȩ iëno̧ë ta̧rëa̧nȩjȩ:
—Danȩ, pio mȩnȩborë ëba cjiaremȩrenȩjo̧ȩ Jechu pio ju̧i̧ nö̧ta, Garirearimȩ pio ju̧i̧ nö̧ta —yo̧a̧nȩjȩ.
70Jabo Pedro judi pumȩ no̧i̧dë ja̧ dëbëräpȩ chamȩrȩ dëbë yo̧a̧dejȩ:
—Cjäri̧ maquë. Mȩnȩ coa yo̧a̧ pio ju̧i̧ tjamo̧ri̧ dabadëcuni̧. Pio ju̧i̧ nö̧ta ëba cjiadëremȩcuni̧ —ma̧ȩ chjádë yo̧mȩrȩ dëbë yo̧a̧dejȩ.
71Ja̧dëa ji̧ Pedro judi tutirea̧ joë yaräpȩmo̧ jäa̧ ji̧, ado cja̧rȩmo̧ iei̧ mu̧i̧tjoi̧ pio jini̧borë darëreyi̧nȩjȩ. Ado pio ju̧i̧ dayi̧rȩ yo̧a̧nȩjȩrȩ pio ji̧ ja̧ yuroro dae cjiaji̧ri̧ pio ji̧ri̧iäpȩmo̧:
—Danȩrȩ, pio yodëje Jechu pio ju̧i̧ nö̧ta ëba cjiaremȩdejȩ —yo̧a̧nȩjȩrȩ—. Tjamo̧ davä. Nachare bë ma̧ri̧rimȩ pio ju̧i̧ nö̧ta, Jechu pio ju̧i̧ nö̧ta ëba cjiaremȩdejȩ —yo̧a̧nȩjȩrȩ.
72Jabo Pedro judi Jechu pio ju̧i̧ chjiari ado ma̧ȩ chjádë yürümȩrȩ ja̧di ta̧rëri̧ dëbë yo̧a̧dejȩ, quȩ ba chiara̧ a̧de yo̧mȩrȩ:
—Cjäri̧ macuni̧ —yo̧a̧dejȩ—. Pio jiro üi̧ pio ju̧i̧ tjamo̧ri̧ dabadëcuni̧.
73Ja̧dëa ji̧ japamitë boi̧chji̧ chjätä ëte, pio ju̧ri̧pȩ dae cjiaji̧ri̧ pio judiro̧ järëreji̧ri̧diro̧jo̧ȩ Pedro ju̧i̧. Ado yo̧a̧diro̧jo̧ȩ:
—Tjamo̧ davä. Pio mȩnȩborë tjamo̧ri̧ ëba cjiaremȩrenȩjo̧ȩ Jechu pio ju̧i̧ —yo̧a̧diro̧jo̧ȩ—. Jabechji̧ Garirea quȩmȩ chiririmȩ pio judi ni̧bämȩmi̧ ta̧rëri̧ ni̧bämȩrenȩ. Jabechji̧ pio ju̧i̧ ja̧ jadürenȩ —yo̧a̧diro̧jo̧ȩ.
74Jabo Pedro judi pio ju̧i̧ ta̧rëa̧ oaiä, dëbë yo̧rëremȩdejȩrȩ:
—Jaboti̧ri̧ yo̧renȩque. Tjamo̧ri̧ dabadëreconȩ. 'Jabechji̧ pio judidida' quëna̧ dabadë marequede —yo̧a̧dejȩrȩ—. Jabechji̧ Ütë tjamo̧ ja̧ quȩ ba chiara̧ pio ju̧ri̧ra̧ a̧de yo̧mȩrȩ yo̧requededibe. Ado danȩrȩ, cüdë dibë ma̧ȩ chjádë yürürä judi, chja ja̧di bape chjaotädique Ütë tjamo̧ judi. Jabechji̧ pio jiro üi̧ oa tjamo̧ri̧ dabadëreconȩ —ma̧ȩ chjádë yürümȩrȩ yo̧rëremȩdejȩrȩ Pedro judi Jechu pio ju̧i̧ chjiari.
Ado chjaodëri̧ eamȩpea̧de ocararo üi̧ üdë.
75Ado pio ju̧i̧ ta̧rëa̧ oaiä, chjaodëri̧ jo̧rȩtamȩpea̧de Pedro judi Jechurë pio jȩaiäpȩmo̧ jabërä yo̧a̧rea̧ pio ju̧i̧. “Aja̧, ocararo üi̧ üdë eabea yaboi̧, tjarari̧ co ma̧ȩ chjádë oa yürüparenȩ pio coa chjiari” yo̧mȩ ma̧ȩ pio ju̧i̧ chjaodëri̧ jo̧rȩtamȩpea̧de. Ado pio ju̧i̧iä chjaodëri̧ go̧dürëremȩde dairäpȩmo̧ a̧dë chjäte ëcarami̧ dari̧ jo̧rȩtamȩrȩ. Ado to̧bari̧ ejaro cjiamȩpea̧de, cjatäcjiarea̧ dadëmȩrȩ.
Currently Selected:
Mateo 26: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
