Mateo 25

Jechu judi Ütërë yo̧a̧ chja̧oeräpȩ cjo̧ro̧pea̧ pio ju̧i̧ chjiari ni̧bärëremȩde na̧rȩrea̧ ma̧ȩmi̧ dara̧ ivi pëi̧ chja pio ji̧ri̧ chjiari

1Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ ni̧bä chjaorëremȩdejȩrȩ jibëa̧ jadü ji̧ri̧, pumȩ judiro̧ Ütërë yo̧a̧ chja̧oeräpȩ yu̧a̧pea̧ pio ju̧i̧ chjiari:

⁠—⁠Danȩrȩ ca̧ jadü, ado cja̧rȩmo̧ na̧rȩrea̧ ma̧ȩmi̧ da oa ni̧bä chjaotämi̧ cjiarequededibe pumȩrȩ Ütërë yo̧a̧ chja̧oerä yu̧a̧pea̧ pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, pumȩ üi̧ judi jibëa̧ iei̧ pio ji̧ ëbapea̧ ji̧ querediä tjamo̧rëremȩde. Ado pio ju̧i̧iä pumȩ judiro̧ bubarë a̧dopaepea̧dirȩ airi̧ cjia airi̧ cjia juraji̧ri̧rȩ a̧dopapea̧ oa. Jabechji̧ pumȩ üi̧ pio ju̧i̧ jidataji̧ri̧rȩ a̧dopë cjia marëreji̧ri̧dirȩ, pumȩ üi̧ pio ju̧i̧ go̧düdäräpea̧ ji̧ jidataji̧ri̧rȩ. Ado ivi pëi̧ chja pio jini̧ro̧, jabë oari chiadëji̧ri̧ pio jini̧ro̧, ichi chjö̧na̧i̧ ivirë peaja̧di jëdano̧rëreji̧ri̧ni̧rȩ jäpea̧ ji̧, iei̧ ëbapamȩ pio ju̧i̧ jidatapea̧ oa. Ado gȩnȩpe jäa̧ oaiä, jabechji̧ jibëa̧ tataparea̧ pio ju̧i̧bo mitë ëte järëreji̧ri̧ni̧rȩ. 2-3Jabo cjäri̧ mani̧rȩ, pio jiro ivi pëi̧ chja pio jini̧ro̧ cja̧rȩichimo̧rȩ jabomo̧ uëmo̧ uëmo̧ jo̧rȩtami̧ dari̧ jo̧rȩtarëreji̧ri̧ni̧rȩ. Chjadëri̧ ütarë jo̧rȩtadë marëreji̧ri̧ni̧rȩ. Ado pio ju̧i̧iä jibëa̧ tataparea̧ pio ju̧i̧ mitëa̧rä, a̧de chö̧ra̧rea̧bo mitëtärea̧ ji̧, a̧dë jo̧rȩtarëreji̧ri̧ni̧ro̧jo̧ȩ. Ado pio ju̧i̧iä mö̧na̧ji̧ri̧rȩ järëreji̧ri̧ni̧rȩ. Jabo ja̧didërëreji̧ri̧ni̧rȩ jibëa̧ jadü jini̧ro̧. Jabechji̧ urëdi oa jo̧rȩtarëreji̧ri̧ni̧rȩ. Chjadëri̧ ütarë jo̧rȩtarea̧ chiarëreji̧ri̧ni̧rȩ. 4Ado pio ju̧i̧iä jibëa̧ tataparea̧ pio ju̧i̧ mitëa̧rä, jabechji̧ chö̧ra̧rea̧bo mitëa̧ni̧rȩ. Jabechji̧ ji̧dë duri oa chjadëri̧ a̧de chö̧ra̧pea̧ oa, mitërëreji̧ri̧ni̧rȩ. 5Ado ja̧dëa ji̧ japamitë chjätä ëte, jabechji̧ chjadëri̧ go̧düdärärëreji̧ri̧ni̧rȩ ivi pëi̧ chja jini̧ro̧ a̧doparea̧ bëräpȩ, ëbapayi̧ pio ji̧ ja̧ bëräpȩ. Jabo iei̧ ëbapamȩ pio judi jo̧ȩra̧pe ma̧na̧na̧ra̧dëa̧de, jabo japamitë ana̧diäa̧de. Ado pio ju̧i̧iä, jabechji̧ chjaodëri̧ mo̧a̧ji̧ri̧pea̧ maeani̧rȩ ivi pëi̧ chja pio jini̧ro̧. 6Jabo ja̧dëa ji̧ gȩnȩ tjomo̧ro, cja̧rȩmȩ üdë to̧bari̧ ëna̧diämȩrȩ ëna̧diäa̧de. “Iei̧ ëbapamȩ pio judi ma̧na̧diibe” ëna̧diäa̧. “Jabechji̧ a̧dopaera̧chji̧vä pio ju̧i̧ chjadëri̧ jeapea̧ oa” ëna̧diäa̧. 7Ado pio ju̧i̧ ta̧rëa̧ oaiä chjaodëri̧ cjitëno̧a̧ni̧rȩ ivi pëi̧ chja pio jini̧ro̧. Ado jibëa̧ tataparea̧ pio ju̧i̧ ütarë da ëte, chjadëri̧ jëdano̧a̧ni̧ro̧jo̧ȩ. 8Ado uëmo̧ uëmo̧ jo̧rȩtaji̧ri̧ ivi pio jini̧ro̧ yo̧a̧ni̧ro̧jȩrȩ jibëa̧ jadü pio ji̧ri̧iäpȩmo̧, chjadëri̧ jo̧rȩtaji̧ri̧ pio ji̧ri̧iäpȩmo̧: "Danȩro̧, jabëtari̧mi̧ oa yürüchji̧ibë mȩnȩro̧ a̧de chö̧ra̧rea̧ yo̧ pio ju̧i̧. Jabechji̧ ibëa̧remȩ üdë goarijäa̧diibë. Yürüchji̧ibë" yo̧a̧ni̧ro̧jȩrȩ. 9Jabo chjadëri̧ jo̧rȩtaji̧ri̧ ivi pëi̧ chja pio jini̧ro̧ dëbë yo̧a̧ni̧ro̧jȩrȩ: "Cjäri̧ ma, a̧ro̧rȩ pio dibë yürürä judi, nö̧tadëpadiibë. Jabechji̧ gatë tänȩrea̧ bëräpȩ jäeno̧chji̧je dibëa̧ pio ju̧i̧ gatëno̧pea̧ oa" yo̧a̧ni̧ro̧jȩrȩ. 10Ado pio ju̧i̧ ta̧rëa̧ oaiä, gatepea̧ni̧rȩ pio jiro ivi jini̧ro̧. Jabo cjäri̧ mani̧rȩ, jini̧ro̧ gatepea̧ jäa̧ cjararä, go̧düdärärëremȩde iei̧ ëbapamȩ judi. Ado pio ju̧i̧ jidatarejiri̧ pio judiro̧ ütëborë ëba yu̧a̧rëreji̧ri̧diro̧jo̧ȩ a̧doparea̧ jo̧ tjoräpȩmo̧, airi̧ cjia airi̧ cjia a̧doparea̧ jo̧ tjoräpȩmo̧. Ado ivi pëi̧ chja cja̧rȩichimo̧rȩ peaja̧di ëba yu̧a̧rëreji̧ri̧ni̧ro̧jo̧ȩ. Ado ütëborë yu̧a̧däräa̧rä, chjuari̧ tuti cararëreji̧ri̧diro̧jo̧ȩ joë ya pio ju̧i̧. 11Jabo ji̧dë duri oa go̧düdärärëreji̧ri̧ni̧rȩ yo̧ gatëreji̧ri̧ ivi pio jini̧ro̧. Ado joë yaräpȩ jäji̧ri̧rȩ, ja̧di ta̧rëri̧ ëna̧diätea̧ni̧ro̧jo̧ȩ: "Danȩ Ano̧mȩ, areië yürüibe joë ya oa. Yu̧a̧parea̧rȩ" yo̧ji̧ri̧rȩ yo̧tea̧ni̧ro̧jo̧ȩ. 12Jabo Ano̧mȩ judi dëbë yo̧a̧dejȩrȩ: "Cjäri̧ maquëdibë, tjamo̧ri̧ dabadëquëdibë. ‘Aja̧, pio jini̧ro̧ni̧ro̧da’ quëna̧ dabadëquëdibë. Pio ju̧i̧iä joë ya oa areiërea̧mi̧dëdi ⁠—⁠yo̧mȩrȩ yo̧rëremȩdejȩrȩ. 13Ado danȩrȩ, peaja̧dimi̧ dari̧ ma̧na̧parequede cüdë ca̧ jadü. Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Na̧e chia tjamo̧chji̧vä. 'Jabechji̧ pio jiro doro ma̧na̧pa jirodiibëda, ja̧dirä ma̧na̧pa jirodiibëda’ quëna̧ dabadë marenȩro̧coe. Pio ju̧i̧iä jabechji̧, na̧e chiachji̧vä ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ütërë yo̧a̧ chja̧oeräpȩ chjadëri̧ ja̧bepapea̧ pio ju̧i̧ chjiari ni̧bärëremȩde Jechu judi na̧rȩrea̧ ma̧ȩmi̧ dara̧ tjaoëti̧ chia ja̧beparea̧ pio ju̧i̧ chjiari

Uruca 19:11-27

14Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ ni̧bärëremȩdejȩrȩ jibëa̧ jadü pio ji̧ri̧, ya̧mi̧räpȩji̧ri̧ oa:

⁠—⁠Danȩrȩ ca̧ jadü, pio jiro japamitërä pumȩ judiro̧ Ütërë yo̧a̧ chja̧oeräpȩ yu̧a̧padirȩ, tjaoëti̧ chia ja̧beparea̧ oa chiaji̧ri̧rȩ. Ado pio ju̧i̧iä na̧rȩrea̧ ma̧ȩmi̧ dara̧ ni̧bä chjaoparequededibe pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, cjo̧ro̧rëremȩde bë ana̧mȩ judi. Ado jachi tjamo̧ oa baäbea yaboi̧, jabechji̧ ma̧ȩ chjadüa̧djȩrȩ jibëa̧ mu̧i̧tjoi̧ ji̧ri̧ pio jȩaiäpȩ jana̧tä. Jabechji̧ jënȩ decjia nö̧ta jibëa̧ pio ju̧i̧ chjadëri̧ ja̧bepapea̧ oa, yürüchärëremȩdejȩrȩ jibëa̧ chëre oa. Tjamo̧ davä. Jibëa̧ chërera̧ pio ju̧ri̧ra̧ ja̧bepapea̧ oa, chëre üdë ji̧dë u̧i̧ ji̧ra̧pe järi̧ ja̧bepapea̧ oa, yürüchärëremȩdejȩrȩ jibëa̧ mu̧i̧tjoi̧ pio ji̧ri̧. 15Ado pio jȩaiäpȩ a̧dopea̧rä, cja̧rȩmȩ mu̧i̧tjoi̧ pio ju̧i̧ yürüa̧dejȩ orora̧ japea̧ oa cjiamȩ chëre oa, cja̧rȩichimo̧ joë oa, ji̧ra̧ tjamo̧ oa. Ado cja̧rȩmo̧ mu̧i̧tjoi̧ pio ju̧i̧ peaja̧di yürüa̧dejȩ. Peaja̧di orora̧ japea̧ oa cjiamȩ chëre oa yürüa̧dejȩ yo̧a̧ri̧ joë oa. Ado cjiadiäa̧mȩ mu̧i̧tjoi̧ pio ju̧i̧bo yürüa̧dejȩ orora̧ japea̧ oa cjiamȩ chëre oa, cja̧rȩmȩ joë oa. Aja̧, ja̧di dari̧ ütarë jo̧rȩtamȩrȩ yürüchärëremȩdejȩrȩ jibëa̧ mu̧i̧tjoi̧ pio ji̧ri̧. Jabechji̧ pio ji̧ri̧ chjiari tjamo̧ri̧ dabamȩrȩ ütara̧mi̧ yürüchärëremȩdejȩrȩ. ‘Aja̧, ja̧di dari̧ ja̧beparea̧ chiadiro̧da, ja̧di dari̧ ütarë jo̧rȩtarea̧ chiadiro̧da, ado ji̧dë u̧i̧ dabamȩ pio ju̧i̧iäpȩmo̧ ji̧dë u̧i̧ ji̧ra̧ oa yürüpacuni̧da, ado tocoi̧mi̧ dabamȩ pio ju̧i̧iäpȩmo̧ chëre ji̧ra̧dë oa yürüpacuni̧da, jabechji̧ judiro̧ dabapea̧mi̧ yürüpaquiji̧ri̧da’ quëna̧ jo̧rȩtamȩrȩ ütara̧mi̧ yürüchärëremȩdejȩrȩ. Ado pio ji̧ri̧iäpȩmo̧ yürüchäa̧ duri oa, jabechji̧ go̧dürëremȩde jachi oa jäpea̧ oa ⁠—⁠yo̧a̧dejȩrȩ Jechu judi.

16⁠—⁠Ja̧dëa ji̧ chëre oa, cja̧rȩichimo̧ joë oa mitëa̧mȩ mu̧i̧tjoi̧ pio judi, orora̧ japea̧ oa cjiamȩ chëre oa mitëa̧mȩ pio judi, jabechji̧ järi tjamo̧rëremȩde tarupapea̧ ji̧. Jabechji̧ chjaodëri̧ tarupea̧de pio jȩaiäpȩmo̧ yürüa̧ chërera̧ pio ju̧ri̧ra̧ chjadëri̧ ja̧bepapea̧ ji̧. Jabechji̧ pio jiro chërera̧ chjadëri̧ ütarë jo̧rȩta̧mi̧ gatërëremȩde ji̧ra̧ tjamo̧ oa. Jabo japamitë chjätä ëte ütara̧ doro, jabechji̧ ado chjereno̧ gatë tänȩchä marëremȩdejȩ jënȩ gatëa̧ pio ju̧i̧. Jabechji̧ chëre ji̧ra̧ tjamo̧ oa boamȩrȩ gatë tänȩchärëremȩdejȩ. Ja̧di ma ja̧di ma japarëremȩde chëre ji̧ra̧ tjamo̧ oa boarea̧mi̧ dari̧. Ado japamitë chjätä ëte, judi cja̧rȩichimo̧ joë maea oa goarërea̧ ji̧, jabechji̧ ichi chjö̧na̧i̧ joë oa goamȩpea̧de chëre oa. Jabechji̧ judi chjadëri̧ ja̧bepea̧ oaiä ji̧dë u̧i̧ ji̧ra̧ oa goamȩpea̧de, ichi chjö̧na̧i̧ joë oa, orora̧ japea̧ oa cjiamȩ chëre oa chiamȩ joë oa. 17Ado yo̧a̧ri̧ joë oa mitërëremȩ mu̧i̧tjoi̧ pio judi peaja̧dimi̧ dari̧ ja̧beparëremȩde. Ado japamitë chjätä ëte, judi yo̧a̧ri̧ joë maea oa goarërea̧ ji̧, jabechji̧ ji̧dë u̧i̧ ji̧ra̧ri̧ goarëremȩde. Jabechji̧ jadüchiami̧ joë goamȩpea̧de. 18Jabo cja̧rȩmȩ joë maea oa mitërëremȩ mu̧i̧tjoi̧ pio judi chjadëri̧ ja̧bepatärea̧ ji̧, cjäri̧ made, puëräpȩ ju̧ri̧ goadi na̧ra̧rëremȩdejȩ jibëa̧ chëre oa, ano̧mȩ judi pio jȩaiäpȩmo̧ yürüa̧ chëre pio ju̧i̧ ⁠—⁠yo̧a̧dejȩrȩ.

19⁠—⁠Ado japamitë ana̧ tjamo̧ chjätä ëte, bë ana̧mȩ pio judi ado chjereno̧ ma̧na̧rëremȩde. Ado ja̧dëa ji̧ yo̧ chjadüa̧dejȩrȩ jibëa̧ mu̧i̧tjoi̧ pio ji̧ri̧ pio jȩaiäpȩ jana̧tä. Jabechji̧ pio ji̧ri̧iä ta̧rëpea̧ oa, jënȩ ji̧ri̧iäpȩmo̧ yürüa̧ chëre pio ju̧i̧ chjiari chjadëri̧ ta̧rëpea̧ oa, judiro̧ ja̧bepea̧ pio ju̧i̧ chjadëri̧ ta̧rëpea̧ oa ëna̧diärëremȩdejȩrȩ. 20Ado chëre oa, cja̧rȩichimo̧ joë oa mitërëremȩ pio judi, orora̧ japea̧ oa cjiamȩ chëre oa mitëa̧mȩ mu̧i̧tjoi̧ pio judi bë ana̧mȩ pio ju̧i̧ ja̧ dëbëräpȩ cjiadäräa̧mȩrȩ yo̧rëremȩdejȩ: "Danȩ Ano̧mȩ, pio mȩnȩ coa yürürërea̧ chërera̧ pio ju̧ri̧ra̧ ja̧beparëremȩrequede mȩnȩ decjia nö̧ta" yo̧a̧dejȩ. "Ado cja̧rȩichimo̧ joë marërea̧ ji̧, jabechji̧ 10 joëpe bagade yaba̧ cüdë ja̧bepea̧ oaiä" yo̧a̧dejȩ. "Jabechji̧ cüdë cja̧rȩichimo̧ joë oa pio mȩaiä mitërërea̧ ji̧, jabechji̧ ichi chjö̧na̧i̧ joë oa yürürequedemȩ yaba̧, ji̧dë u̧i̧ ji̧ra̧ oa" yo̧a̧dejȩ. 21Ado jibëa̧ ano̧mȩ pio judi dëbë yo̧mȩrȩ yo̧rëremȩdejȩ: "Jabechji̧ chjadëri̧ japë yürürëremȩrenȩque" yo̧a̧dejȩ. "Aja̧, mu̧i̧tjoi̧ chjadë tjamo̧renȩ. Jabechji̧ cüdë mȩa yo̧a̧mi̧ chjadëri̧ ja̧bepe yürüa̧renȩque. Jabechji̧ cüdë mȩa jabëtari̧mi̧ oa yürüa̧ra̧ pio ju̧ri̧ra̧ chjadëri̧ ja̧beparemȩrenȩ. Ado pio ju̧i̧iä jabechji̧, ja̧beparea̧ ana̧ tjamo̧ oa yürüparequedemȩ yaba̧, ji̧dë u̧i̧ ba chia tjamo̧ oa. Jabechji̧ yu̧a̧vä pio coaiäpȩ. Coa nö̧ta a̧dë chjäte ma chiadëri̧ cjiari̧ jo̧rȩtatä earequedemȩ" yo̧a̧dejȩ. 22Ado ja̧dëa ji̧ chëre oa, yo̧a̧ri̧ joë oa mitërëremȩ mu̧i̧tjoi̧ pio judi ano̧ mire cjiadärärëremȩde bë ano̧mȩ pio ju̧i̧ ja̧ dëbëräpȩ. Ado ja̧di ta̧rëri̧ yo̧rëremȩdejȩ: "Danȩ Ano̧mȩ, yo̧a̧ri̧ joë oa, orora̧ japea̧ oa cjiamȩ chëre chiamȩ joë oa yürüa̧renȩque ja̧bepapea̧ oa" yo̧a̧dejȩ. "Ado mȩnȩ yürürërea̧ chërera̧ pio ju̧ri̧ra̧ ja̧beparëremȩrequede ji̧dë u̧i̧ ji̧ra̧pe bagarea̧mi̧ dari̧" yo̧a̧dejȩ. "Jabechji̧ yo̧a̧ri̧ joë marërea̧ ji̧, jadüchiami̧ chëre chiamȩ joëpea̧de, ji̧dë u̧i̧ ji̧ra̧ oa" yo̧a̧dejȩ. 23Ado bë ano̧mȩ judi pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧dejȩ: "Aja̧, chjadëri̧ japë yürüa̧renȩque" yo̧a̧dejȩ. "Mu̧i̧tjoi̧ chjadë tjamo̧renȩ. Cüdë mȩa yo̧a̧mi̧ chjadëri̧ japea̧renȩ. Ado cüdë mȩa jabëtari̧mi̧ oa yürüa̧ra̧ pio ju̧ri̧ra̧ chjadëri̧ ja̧beparërea̧ oaiä, jabechji̧ ja̧beparea̧ ana̧ tjamo̧ oa yürüparequedemȩ yaba̧ ji̧dë u̧i̧ ba chia tjamo̧ oa. Jabechji̧ yu̧a̧vä pio coaiäpȩ. Aja̧, pio coa nö̧ta a̧dë chjäte ma chiadëri̧ cjiari̧ jo̧rȩtatä earequedemȩ" yo̧a̧dejȩ. 24Ado ja̧dëa ji̧ cja̧rȩmȩ joë maea oa mitërëremȩ mu̧i̧tjoi̧ pio judi bë ano̧mȩ pio ju̧i̧ ja̧ dëbëräpȩ ano̧ mire cjiadärärëremȩde. Ado ja̧di ta̧rëri̧ yo̧a̧dejȩ: "Danȩ ca̧ ano̧mȩ, pio mȩa chjiari dabarequede" yo̧a̧dejȩ. "Jabechji̧ oëra̧ ja̧bepamȩ pio ju̧i̧ cjäri̧ri̧ cjia dadëmȩrenȩjo̧ȩ. Ado järi tjamo̧mȩrȩ chjaocjiami̧ dari̧ japadëmȩrenȩ. Jabechji̧ mȩnȩ ponȩdëa̧ tjadori pio judiri jurarea̧ oa mitëmi̧ dari̧ japamȩrȩnȩ ji̧dëri̧. Ado mȩnȩ ja̧bepadëa̧ chiriri pio judiri chëre boarea̧ dami̧ dari̧ japamȩrenȩ peaja̧di. 25Ado pio ju̧i̧iä uapa tjamo̧rëremȩrequedemȩ" yo̧a̧dejȩ. "Jabechji̧ menȩ coa yürüa̧ chëre üdë aeno̧a̧ oa cjiami̧ dari̧ cjiachea oa, badëri̧ cjiami̧ dari̧ cjiachea oa, jabechji̧ uaparëremȩrequede. Ado pio ju̧i̧iä daburo goadi na̧ra̧reconȩ mȩnȩ coa yürüa̧ chëre pio ju̧i̧ cüdë ana̧ri̧ bape chjaoa̧ oa cjiachea oa. Jabo pio yidimȩ mȩnȩ pio coa̧ yürüa̧ chëre pio ju̧i̧. Ado chjereno̧ mitëvä na̧ea̧ pio ju̧i̧" yo̧mȩrȩ ma̧ȩ goaedëra̧ yo̧a̧dejȩ. 26Jabo jibëa̧ ano̧mȩ pio judi dëbë yo̧a̧dejȩ: "Cjäri̧ marenȩ, mu̧i̧tjoi̧ chjadëdërenȩ. Chumi̧dëri̧ cjia tjamo̧renȩ" yo̧a̧dejȩ. "Danȩ, mȩnȩ pio coa chjiari chjadëri̧ dabarä judi, 'Aja̧, jibëa̧dë pio ju̧i̧bo mitëmȩdida, ado judi ja̧bepadëa̧ tjadori pio judiribo mitëmȩdida' quëna̧ jo̧rȩtarä judi, ¿tjana̧ ju̧i̧iä chjadëri̧ ja̧bepadëa̧renȩ ca̧ chërera̧ pio ju̧ri̧ra̧? 27Danȩ, ca̧ chërera̧ ja̧bepadëri̧ cjiarä judi, jabechji̧ eopea̧täremȩrenȩjȩrȩ chëre boearea̧ bëräpȩ ja̧bepaji̧ri̧ pio ji̧ri̧iäpȩmo̧. Jabechji̧ pio judiro̧ ano̧ mire ja̧bepea̧täreji̧ri̧diro̧jo̧ȩ. Ado pio judiro̧ ca̧ chërera̧ ja̧bepea̧ oaiä ji̧dë u̧i̧ ji̧ra̧pe baga̧täremȩde, eopea̧ ba oaiä. Jabo cjäri̧ marenȩ" yo̧a̧dejȩ "eami̧ oa japadëa̧renȩ. Cüdë ma̧na̧rä ji̧dë u̧i̧ ji̧ra̧ oa mitëtärea̧ ji̧, cjäri̧ marenȩque, chjadëri̧ japadëa̧renȩque" yo̧a̧dejȩ. 28Ado ja̧dëa ji̧ ano̧mȩ pio judi jibëa̧ mu̧i̧tjo̧i̧ chjadëdë pio ju̧i̧ ni̧bä chjaoa̧ duri oa, ano̧ mire ni̧bärëremȩdejȩrȩ ado cja̧rȩmo̧ mu̧i̧tjoi̧ pio ji̧ri̧iäpȩmo̧: "Danȩrȩ" yo̧a̧dejȩrȩ, "jabechji̧ cüdë pio yoa yürüa̧ joë pio ju̧i̧ mitëno̧chji̧jo̧ȩ. Ado ano̧ mire yürüchji̧jo̧ȩ ado cja̧rȩmo̧ pio ju̧i̧iäpȩmo̧, ichi chjö̧na̧i̧ joë oa goamȩ pio ju̧i̧iäpȩmo̧" yo̧a̧dejȩrȩ. 29Jabechji̧ eami̧ pumȩ judi pio jȩaiäpȩmo̧ yürüa̧ra̧ pio ju̧ri̧ra̧ chjadëri̧ ja̧beparä judi, pio jȩaiäpȩmo̧ yürüa̧mȩ pio ju̧i̧ ja̧ oa coëma cjiari̧ japarä judi, jabechji̧ ji̧dë u̧i̧ ji̧ra̧ri̧ mitërea̧ dapade. Jabo eami̧ pumȩ judi pio jȩaiäpȩmo̧ yürüa̧ra̧ pio ju̧ri̧ra̧ chjadëri̧ ja̧bepadërä judi, pio jȩaiäpȩmo̧ yürüa̧mȩ pio ju̧i̧ ja̧ oa coëma cjiari̧ japadërä judi, jabechji̧ judi goatärea̧ pio ju̧i̧ ado chjereno̧ mitëa̧ oa cjiapade ado cja̧rȩmo̧ pio ju̧i̧iäpȩmo̧ ano̧ mire yürüpea̧ oa. Tjamo̧ davä. Judi jabëtari̧mi̧ maea oa goaräbo, jabechji̧ mitëa̧ oa cjiapade ado cja̧rȩmo̧ pio ju̧i̧iäpȩmo̧ ano̧ mire yürüpea̧ oa" yo̧mȩrȩ yo̧rëremȩdejȩrȩ jibëa̧ mu̧i̧tjoi̧ pio ji̧ri̧iäpȩmo̧, ji̧ra̧ri̧ goamȩ pio ju̧i̧ ano̧ mire yürüpaji̧ri̧ pio ji̧ri̧iäpȩmo̧. 30Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ pio jiro mu̧i̧tjoi̧ pio ji̧ri̧iäpȩmo̧: "Ado yaba̧ jabechji̧, pio yoa pumȩ oa, mu̧i̧tjoi̧ chjadëdë oa, jabechji̧ aeno̧chji̧jo̧ȩ a̧dë chjäte bagönȩ maearäpȩmo̧. Aja̧, a̧dë chjäte ejaro cjiarea̧räpȩ ju̧ri̧, a a ma cjiarea̧räpȩ ju̧ri̧ aeno̧chji̧jo̧ȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧. Aja̧, tjaoëti̧ chia ja̧beparea̧ra̧ pio ju̧ri̧ra̧ chjadëri̧ ja̧bepapea̧ pio ju̧i̧ chjiari ni̧bä chjaorëremȩdejȩrȩ Ütërë yo̧a̧ chja̧oeräpȩ ju̧ri̧ ja̧bepapea̧ pio ju̧i̧ chjiari.

Cjiadiäa̧ japamitërä yo̧a̧ri̧ bubape bagari̧ tutipadejȩrȩ pumȩ ütëbodärä oa Jechu judi

31Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ jibëa̧ jadü pio ji̧ri̧iäpȩmo̧ cjiadiäa̧ japamitë pio ju̧i̧ chjiari, pumȩ ji̧ri̧ ütarami̧ dari̧ japapea̧ pio ju̧i̧ chjiari:

⁠—⁠Danȩrȩ, Pumȩrȩ Ara̧ Tjamo̧ pio judirequede cüdë ⁠—⁠yo̧a̧dejȩrȩ⁠—⁠. Ado pio cüdë birë ma̧na̧rä, a̧dëräpȩ cjiaji̧ri̧ mu̧i̧tjoi̧ pio judiro̧ ütëbodärärë pio coa nö̧ta birë ma̧na̧rä, jabechji̧ a̧dë chjäte ba chiaräpȩ chaparequede, a̧dë chjäte tarari̧ cjiamȩräpȩ. Tjamo̧ davä. Ca̧ charea̧ ba chia tjamo̧räpȩ chaparequede cüdë birë ma̧na̧rä. 32Ado pio judirä, ca̧ dëbëräpȩ ju̧ri̧ a̧dopea̧ oa cjiapadirȩ chiriräpȩti̧ oa cjo̧ro̧ji̧ri̧ pio judiro̧. Ado cja̧rȩmo̧ ma̧ȩ oa, ado cja̧rȩmo̧ ma̧ȩ oa ni̧bäji̧ri̧ pio judiro̧ ütëbodärärë ca̧ dëbëräpȩ a̧dopea̧ oa cjiapadirȩ. Ado oveja jidamȩ pio judi japami̧ dari̧ yo̧a̧ri̧ bubape bagami̧ dari̧ tutiparequedejȩrȩ. Jabechji̧ jibëa̧ bubarä tutia̧ oa cjia tänȩparequedejȩrȩ ovejami̧ da pio ji̧ri̧. Ado cja̧rȩmo̧ bubarä tutia̧ oa cjia tänȩparequedejȩrȩ chivomi̧ da pio ji̧ri̧. 33Jabechji̧ oveja bubami̧ daji̧ri̧ pio ji̧ri̧ ca̧ mu̧i̧ chjuari pio judiri tutia̧ oa cjia tänȩparequedejȩrȩ. Ado chivomi̧ da pio ji̧ri̧ ca̧ mu̧i̧ chjuari cja̧ȩta̧ra̧ pënȩräpȩmo̧ tutia̧ oa cjia tänȩparequedejȩrȩ. 34Ja̧dëa ji̧ pio cüdë, chiri Ütë cjo̧ro̧mȩ pio judimȩrȩ, yo̧parequedejȩrȩ ca̧ mu̧i̧ chjuari tutia̧ oa cjiaji̧ri̧ pio ji̧ri̧iäpȩmo̧: "Jabechji̧ ma̧na̧chji̧vä pio coaiäpȩ" yo̧parequedejȩrȩ. "Aja̧, ca̧ Ama̧i̧ judi chjadëri̧ japea̧ oa cjiaji̧ri̧ pio mȩnȩro̧ ma̧na̧chji̧vä. Jabechji̧ pio yi cjiadiächji̧vä pio coa nö̧ta. Jabechji̧ cüdë yo̧a̧ chja̧oerä cjo̧ro̧panȩrȩ. Pio ju̧i̧iä ma̧na̧chji̧vä pio coaiäpȩ. Jabechji̧ dabu üdë jabë pareapadëa̧rä jëdano̧a̧ oa cjiarëremȩde mȩnȩro̧ ca̧ chja̧oerä cjo̧ro̧pea̧ üdë. Jabechji̧ dibëa̧ pio ju̧i̧ mitera̧chji̧vä. Yu̧a̧chji̧vä. 35Jabechji̧ mitëpanȩrȩ pio coa a̧doa̧ tara. Tjamo̧ davä, pio mȩnȩro̧nȩrȩ coa a̧dorëreji̧ri̧ judiro̧. Jabechji̧ cjäri̧ri̧ cjia daji̧ri̧rȩ chjadëri̧ a̧dorëreji̧ri̧renȩro̧coe. Jabechji̧ cüdë ta̧mȩcho̧ ja̧bomȩ oa, chjadëri̧ yürürëreji̧ri̧renȩro̧coe jurarea̧ oa. Ado cüdë ui ja̧boa̧mȩ oa, chjadëri̧ jara tänȩrëreji̧ri̧renȩro̧coe. Ado cüdë jachiri jana̧rërea̧ ji̧, jabechji̧ chjadëri̧ jearëreji̧ri̧renȩro̧coe, pio coa cjäri̧ri̧ cjia daji̧ri̧rȩ. 36Ado chjibomi̧ dadë oa ina̧rëremȩ oa, chjadëri̧ yürürëreji̧ri̧renȩro̧coe chjibo pio ju̧i̧. Ado cüdë gito ja̧borëremȩ oa, chjadëri̧ goë daera̧rëreji̧ri̧renȩro̧coe ori̧ bagari̧ ëba chapea̧ oa. Ado cüdë chaärea̧ bëräpȩ chaäa̧ oa cjia̧mȩ oa, peaja̧di chjadëri̧ goë daera̧rëreji̧ri̧renȩro̧coe." Aja̧, ja̧di ta̧rëri̧ yo̧parequedejȩrȩ, judiro̧ pio coa cjäri̧ri̧ cjia daji̧ri̧rȩ a̧doa̧ tara. 37Jabo jabechji̧parȩa̧ oa cjiaji̧ri̧ pio judiro̧ pio ju̧i̧ ta̧rëa̧ oaiä, Ütë tjamo̧ ja̧ chjaoërä pea yu̧a̧reji̧ri̧ pio judiro̧ pio ju̧i̧ ta̧rëa̧ oaiä, jabechji̧ chjadëri̧ dabadëpadirȩ. Ado pio ju̧i̧iä ja̧di ta̧rëri̧ dëbë yo̧padiro̧coe: "Jabo danȩ Ano̧mȩ, chjadëri̧ yo̧ibe. ¿Naparä daea̧rea̧ro̧mȩ ta̧mȩcho̧ ja̧boremȩ oa? ¿Naparä yürüa̧rea̧ro̧mȩ jurarea̧ oa? ¿Naparä jara tänȩa̧rea̧ro̧mȩ? Pio ju̧i̧ tjamo̧ri̧ dabadërea̧rȩ Ano̧mȩ. Chjadëri̧ yo̧ibe. 38Ado danȩ, ¿naparä dareji̧ri̧rearo̧mȩ jachiri jana̧mȩ oa? ¿Naparä cjäri̧ri̧ cjia daji̧ri̧rȩ jea̧rea̧ro̧mȩ? Ado danȩ, ¿naparä daea̧rea̧ro̧mȩ chjibo cjäri̧ ja̧bomȩ oa? Tjamo̧ri̧ dabadërea̧rȩ. ¿Naparä yürüa̧rea̧ro̧mȩ chjibo oa? 39Ado ¿naparä daea̧rea̧ro̧mȩ gito ja̧boremȩ oa? Ado mȩnȩ chaärea̧ bëräpȩ tutia̧ oa cjia̧rä, ¿naparä goëdepea̧rea̧ro̧mȩ? Chjadëri̧ yo̧ibe" yo̧ji̧ri̧rȩ iëno̧ë ta̧rëpadiro̧coe. 40Ado judiro̧ coa ja̧di ta̧rëri̧ iëno̧ iëno̧ cjiarä, jabechji̧ ja̧di ta̧rëri̧ dëbë yo̧parequedejȩrȩ, chiri Ütë cjo̧ro̧mȩ pio judi: "Naparädë, danȩrȩ, tjamo̧i̧ cjiari̧ yo̧requededibe. Jabechji̧ mȩnȩro̧ ca̧ oti̧ pio ji̧ri̧iäpȩmo̧ ja̧di dari̧ japea̧ oaiä, mȩnȩro̧ eami̧ti̧ ba chiadëmȩmi̧ dari̧ cjo̧ro̧mȩ pio ju̧i̧ cjäri̧ri̧ cjiaji̧ri̧rȩ japea̧ oaiä, jabechji̧ pio coaiäpȩmo̧ japami̧ dari̧ japarëreji̧ri̧renȩro̧coe. Pio ji̧ri̧iäpȩmo̧ ja̧di dari̧ japea̧ oaiä, jabechji̧ pio coaiäpȩmo̧ cjäri̧ri̧ cjia dami̧ dari̧ japea̧renȩro̧coe" dëbë yo̧parequedejȩrȩ. 41Ado ja̧dëa ji̧ yo̧parequedejȩrȩ ca̧ mu̧i̧ chjuari cja̧ȩta̧ra̧ pënȩräpȩmo̧ tutia̧ oa cjiaji̧ri̧ oa, chivomi̧ da pio ji̧ri̧. Ado ja̧di ta̧rëri̧ yo̧parequedejȩrȩ: "A̧dë baächji̧coe. Ado Ütë tjamo̧ ja̧ ërecjia̧ üdë acji cjatätädidibe" yo̧parequedejȩrȩ. "Jabechji̧ aeno̧a̧ oa cjiachji̧vä cjo̧dë tja ana̧räpȩ ju̧ri̧. Ichiae pio ju̧i̧ ja̧ oa jëdano̧rërea̧ cjo̧dë tja ana̧räpȩ pio ju̧ri̧, yaröca pio ji̧ri̧ ja̧ oa jëdano̧rërea̧ cjo̧dë tja ana̧räpȩ pio ju̧ri̧, aeno̧a̧ oa cjiachji̧vä" yo̧parequedejȩrȩ. 42"Jabechji̧ ta̧mȩcho̧ ja̧bomȩrȩ cjo̧ro̧rëremȩrequede, jabo mȩnȩro̧ jurarea̧ra̧ a̧dotärea̧ ju̧i̧, a̧dodëa̧renȩro̧coe. Ui ja̧borëremȩrequede jabo cjäri̧ marenȩro̧coe, ui oa chjadëri̧ yürütärea̧ ji̧, yürüdëa̧renȩro̧coe. Jara tänȩdëa̧renȩro̧coe. 43Ado mȩnȩro̧ coa daea̧räbo, jachiri jana̧rëremȩ oa daea̧räbo, jabechji̧ chjadëri̧ jeatärea̧ ji̧, chjadëri̧ jeadëa̧renȩro̧coe. Ado mȩnȩro̧ coa chjibora̧ a̧dotärea̧ ji̧, cjäri̧ ja̧bomȩ pio ju̧i̧ a̧dotärea̧ ji̧, a̧dodëa̧renȩro̧coe. Ado cüdë gito ja̧boremȩ oa goëde jätärea̧ ji̧, jabechji̧ goëde jädëa̧renȩro̧coe. Ado chaärea̧ bëräpȩ chaäa̧ oa cjiamȩ oa peaja̧di goëde jädëa̧renȩro̧coe. Pio ju̧i̧iä jabechji̧, a̧dë baächji̧coe" yo̧parequedejȩrȩ. 44Jabo cüdë ji̧ri̧iäpȩmo̧ ja̧di ta̧rëri̧ yo̧a̧ oaiä, peaja̧di dëbë yo̧tapadiro̧coe. Ana̧ri̧ jo̧rȩtaji̧ri̧rȩ ja̧di ta̧rëri̧ dëbë yo̧tapadiro̧coe, bücjüri̧ cjia tjamo̧ji̧ri̧rȩ: "Jabo danȩ Ano̧mȩ, chjadëri̧ yo̧ibe" yo̧padiro̧coe. "¿Naparä daea̧rea̧ro̧mȩ ta̧mȩcho̧ ja̧boremȩ oa? ¿Naparä daea̧rea̧ro̧mȩ ui ja̧boremȩ oa? Pio ju̧i̧ chjadëri̧ yo̧ibe. Ado ¿naparä daea̧rea̧ro̧mȩ jachiri jana̧mȩ oa? ¿Naparä daea̧rea̧ro̧mȩ chjibo cjäri̧ ja̧bomȩ oa? Ado Ano̧mȩ, ¿naparä daea̧rea̧ro̧mȩ gito ja̧boremȩ oa? Chjadëri̧ yo̧ibe. Tjamo̧ri̧ dabadërea̧rȩ pio mȩa chjiari. Ado danȩ Ano̧mȩ, ¿naparä daea̧rea̧ro̧mȩ chaärea̧ bëräpȩ ju̧ri̧? ¿Naparä daea̧rea̧ro̧mȩ mȩa a̧dodëji̧ri̧rȩ? Chjadëri̧ yo̧ibe. Jabechji̧ tjamo̧ri̧ dabadërea̧rȩ" yo̧ji̧ri̧rȩ dëbë yo̧padiro̧coe. 45Ado ja̧dëa ji̧ ja̧di ta̧rëri̧ dëbë yo̧parequedejȩrȩ: "Jabechji̧ mȩnȩro̧ pio coadi ja̧ji̧ri̧ pio ji̧ri̧ chjadëri̧ a̧dodëa̧ oaiä, peaja̧di a̧dodëa̧renȩro̧coe. Aja̧, mȩnȩro̧ eami̧ti̧ pumȩ oa, ba chiadëmȩmi̧ dari̧ cjo̧ro̧mȩ pio ju̧i̧ a̧dotärea̧ ji̧ a̧dodëa̧ oaiä, mȩnȩro̧ eami̧ti̧ quëna̧mȩ pio ju̧i̧, ba chiadëmȩmi̧ dari̧ quëna̧mȩ pio ju̧i̧ a̧dodëa̧ oaiä, jabechji̧ a̧dodëa̧renȩro̧coe" yo̧mȩrȩ dëbë yo̧parequedejȩrȩ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi yo̧a̧ri̧ bubape bagari̧ tutipea̧ pio ju̧i̧ chjiari.

46Ja̧dëa ji̧ cjiadiärea̧ ma̧ȩ pio ju̧i̧ a̧de ni̧bä chjaorëremȩdejȩrȩ:

⁠—⁠Danȩrȩ ca̧ jadü, pio jiro pumȩ judiro̧, coa a̧dodëji̧ri̧mi̧ dari̧ japareji̧ri̧ pio judiro̧, jabechji̧ baäpadirȩ bucho ana̧ bape chjaoa̧ oa cjiapea̧ oa. Jabo jabechji̧parȩa̧ oa cjiaji̧ri̧ pumȩ pio judiro̧ baäpadirȩ bucho ana̧ cjo̧ro̧pea̧ oa ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, ya̧mi̧räpȩ chaji̧ri̧ oa.

Currently Selected:

Mateo 25: Pume

Highlight

Copy