Mateo 24
24
Jechu judi ni̧bärëremȩde cjiadiäa̧ japamitë pio ju̧i̧ chjiari
Marco 13:1-13; Uruca 21:5-19
1Ado Jechu judi Ütë tjamo̧ ja̧ bëri pio judiri go̧dü ëte, jibëa̧ jadü pio judiro̧ dëbëdiärëreji̧ri̧diro̧jo̧ȩ. Ado Ütë tjamo̧ ja̧ bë yurori pio judiri cjiamȩ bë ji̧ra̧ oa na̧rȩtämi̧ cjiarëreji̧ri̧diro̧jo̧ȩ. 2Jabo Jechu judi yo̧a̧dejȩrȩ:
—Danȩrȩ, pio yoa bë chjö̧na̧i̧ oa darenȩro̧jo̧ȩ yaba̧, jabo tjamo̧i̧ cjiari̧ yo̧requededibe —yo̧a̧dejȩrȩ—. Jabechji̧ iëchäa̧ oa cjiapade. Cja̧rȩmȩ ta̧dë üdë jibëa̧ jadüremȩrä charea̧mi̧dëri̧ cjia mapade. Jabechji̧ daburäpȩmo̧ aeno̧a̧ cjiapade ütëborë —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi Ütë tjamo̧ ja̧ bë pio ju̧i̧ chjiari.
3Ado japamitë chjätä ëte, Jechu judi buarëremȩde Orivo quȩmȩ ya̧mi̧räpȩ ju̧ri̧. Ado jibëa̧ jadü judiro̧, jibëa̧ma̧i̧ jäji̧ri̧rȩ järëreji̧ri̧diro̧jo̧ȩ ya̧mi̧räpȩ buë chamȩ oa pio ju̧i̧ nö̧ta ni̧bä chjaopea̧ oa, jibëa̧ma̧i̧ ni̧bä chjaopea̧ oa. Ado ja̧di ta̧rëri̧ yo̧rëreji̧ri̧diro̧jo̧ȩ:
—Danȩ, chjadëri̧ yo̧ibe Ütë tjamo̧ ja̧ bë pio ju̧i̧ chjiari, mȩnȩ pea̧ yo̧a̧ pio ju̧i̧ chjiari —yo̧a̧diro̧jo̧ȩ—. ¿Naparä iëchäa̧ oa cjiapade? Ado mȩnȩ ado ma̧na̧pea̧ querediä tjamo̧ro, ¿tjana̧ na̧rȩrea̧ oa daparea̧rȩ? Cjiadiäa̧ japamitë üdë ma̧na̧rä, ¿tjana̧ na̧rȩrea̧ oa yürüparenȩibe? Chjadëri̧ yo̧ibe a̧ro̧rȩ chjadëri̧ ütarë jo̧rȩtapea̧ oa —yo̧a̧diro̧jo̧ȩ.
4Ado Jechu judi dëbë yo̧a̧dejȩrȩ:
—Danȩrȩ, na̧e chia tjamo̧chji̧vä eami̧ pumȩ üdë pio dibë u̧i̧pachea oa —yo̧a̧dejȩrȩ—. 5Jabechji̧ no̧i̧dë tjamo̧rȩ go̧düdäräpadirȩ pio cüdëmi̧ darë. “Aja̧, Ütërë mitëa̧ Chjätä Tänȩmȩ pio judirequede” yo̧ji̧ri̧rȩ yo̧padirȩ. Jabo na̧e chiachji̧vä ca̧ jadü —yo̧a̧dejȩrȩ—. Pumȩ no̧i̧dë tjamo̧rȩ u̧i̧pea̧ oa cjiapadirȩ pio ji̧ri̧iä. Ado pio ju̧i̧ä yo̧requedediibe ca jadü, na̧e chjiachji̧vä. ‘Jabechji̧ pio judi tjamo̧dida’ quëna̧ dadëchji̧jȩrȩ. 6Ado danȩrȩ, pio judirä japamitë chjätä ëte, peaja̧di ta̧rëpanȩrȩ. Tjamo̧ davä. Babui̧ra̧ goë goë ta̧rë chjaopanȩrȩ acji go̧düdäräpaji̧ri̧ pio ji̧ri̧ chjiari, dibëa̧ chiri queri̧räpȩ acji go̧düdäräpaji̧ri̧ pio ji̧ri̧ chjiari. Ado jachi tjamo̧ a̧rȩmȩ chiriräpȩ ju̧ri̧ acji go̧düdäräpaji̧ri̧ pio ji̧ri̧ chjiaribo ji̧dë ma goë goë ta̧rë chjaopanȩrȩ. Tjamo̧ davä. Jibëa̧ dëbëti̧ra̧ chia acji tai̧ chjaoji̧ri̧ pio ji̧ri̧ chjiari babui̧ra̧ goë goë ta̧rëpanȩrȩ. Jabo danȩrȩ ca̧ jadü, ja̧di ta̧rëri̧ goë ta̧rëa̧räbo, ana̧ri̧ jo̧rȩtadëchji̧vä. Jabechji̧ uaparea̧ üdë boadärächedidibe dibëa̧ chji̧ oa. Jabechji̧ ja̧di dari̧ japapadirȩ. Jabo judiro̧ ja̧di dari̧ acji tai̧ chjaoräbo, jabë pjärämȩde cjiadiäa̧ japamitë üdë. Jabë ma̧na̧na̧ra̧dëa̧de. Jabë tarupadëa̧de. 7Jabechji̧ cja̧rȩmȩ chiriräpȩ cjo̧ro̧ji̧ri̧ pio judiro̧ acji jäpadiro̧jȩrȩ ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧iäpȩmo̧. Ado chiri ütë ja̧ chja̧oeräpȩ cjo̧ro̧ji̧ri̧ pio judiro̧, jabechji̧ acji jäpadiro̧jȩrȩ ado cja̧rȩmo̧ chiri ütë ja̧ chja̧oerä cjo̧ro̧ji̧ri̧ pio ji̧ri̧iäpȩmo̧. Ja̧di ma ja̧di ma jape chjaopadirȩ. Ado judirä, chiri üdë jurarea̧ oa chjadëri̧ yürürërea̧ ji̧, jabechji̧ jurarea̧ yürüdëpe bagapade. Ado ta̧mȩcho̧ ja̧bo tjamo̧ji̧ri̧rȩ cjo̧ro̧padirȩ pumȩ judiro̧. Ado ma̧i̧ dari̧ jö̧nö̧jö̧no̧a mari̧ cjiapade chiri üdë. Tjamo̧ davä. Oëra̧ti̧ oa a̧rȩmȩ chiri üdë, jabechji̧ a̧dë chjäte ma̧i̧ dari̧ jö̧nö̧jö̧no̧a mari̧ cjiapade ja̧di dari̧ cjiadërea̧ ji̧. 8Ado chiri üdë ja̧di dari̧ cjiarä, jabechji̧ boi̧chji̧ pio ju̧i̧ arapayi̧mi̧ dari̧ cjiapade. Danȩrȩ, iei̧ jini̧ arapea̧ ji̧ querediärä, jabechji̧ jaerira̧ tarupadejȩ gito üdë. Peaja̧dimi̧ dari̧ cjiapade chiri üdë. Jaerira̧ tarupapade a̧dë chjäte ma̧i̧ dari̧ japapea̧ ji̧.
9Ja̧dëa ji̧ chjuari̧ mitëa̧ oa cjiapanȩrȩ conȩda oa cjiapea̧ oa, ja̧bo tänȩa̧ oa cjiapea̧ oa —yo̧a̧dejȩrȩ Jechu judi—. Jabechji̧ judirä cjo̧ro̧paji̧ri̧ pio judiro̧ goëdëri̧ cjia tjamo̧ji̧ri̧rȩ dapadiro̧dibe mȩnȩro̧ pio coaiäpȩmo̧ quëna̧ji̧ri̧pea̧ tara, mȩnȩro̧ pio coa cho̧rë ma̧na̧mi̧ dari̧ quëna̧ji̧ri̧pea̧ tara. Jabechji̧ chiriräpȩti̧ oa cjo̧ro̧ji̧ri̧ pio judiro̧ ea tjamo̧dëpadiro̧dibe. 10Ado ja̧dëa̧ ji̧ pumȩ judiro̧ ma̧i̧ dari̧ conȩda oa cjia̧ oaiä, pumȩ no̧i̧dërë putu jura̧ a̧dë chami̧ dari̧ a̧dë jo̧rȩtapadiro̧coe, pio coa quëna̧dëpe bagari̧. Ado ja̧di jo̧rȩtaji̧ri̧pe baga̧ oaiä, jabechji̧ goëdëri̧ cjiaji̧ri̧rȩ dapadiro̧jȩrȩ jibëa̧ jadü pio ji̧ri̧. Ado jibëa̧ pumȩ pio ji̧ri̧ chjadëri̧ a̧dotärea̧ ji̧, pio ji̧ri̧ eadëji̧ri̧ pio ji̧ri̧iäpȩmo̧ yürüpadiro̧jȩrȩ. 11Ado judirä, oëra̧ a̧ra̧ano̧ji̧ri̧ pio judiro̧ no̧i̧dërë acji go̧düdärä chjaopadirȩ. Tjamo̧ davä. Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧ go̧düdärä chjaopadirȩ no̧i̧dërë. Ado pumȩ bubarë u̧i̧pea̧ oa cjiapadirȩ pio ji̧ri̧iä. Judiro̧ chjuari̧ jiadatärea̧ ji̧, jabechji̧ ta̧rë ja̧bopadiro̧jȩrȩ. 12Ado judirä, chjai̧dë üdë chiriräpȩti̧ oa a̧dë chjäte goëje ji̧ra̧ tjamo̧pe bagapade. Ado pio ju̧i̧iä earea̧ üdë, jabechji̧ goarijäa̧ oa cjiapade. Tjamo̧ davä. Pumȩ judiro̧ jibëa̧ jadü pio ji̧ri̧ chjadëri̧ earërea̧ ji̧, jibëa̧ pumȩ pio ji̧ri̧ chjadëri̧ earërea̧ ji̧, ea tjamo̧dëpe bagapadiro̧jȩrȩ. 13Jabo pio coaiäpȩmo̧ ji̧dë ma quëna̧ji̧ri̧ pio judiro̧, jabechji̧ chjadëri̧ chjätärea̧ dapadirȩ. Tjamo̧ davä. Ca̧ ma̧ȩrä ji̧dë ma cjo̧ro̧ji̧ri̧ pio judiro̧, jabechji̧ chjadëri̧ chjätärea̧ dapadirȩ. 14Ado cjiadiärea̧ japamitë üdë ma̧na̧na̧ra̧bea yaboi̧, jabechji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ chjadëi̧ üdë a̧ra̧ano̧a̧ oa cjiapea̧ chiade chiriräpȩti̧ oa cjo̧ro̧ji̧ri̧ pio ji̧ri̧, pumȩ ütëbodärärë ta̧rërea̧mi̧ dari̧. Tjamo̧ davä. Ütërë yo̧a̧ chja̧oeräpȩ cjo̧ro̧pea̧ pio ju̧i̧ chjiari ma̧ȩ chjadëi̧ üdë oëra̧ti̧ oa a̧ra̧ano̧a̧ oa cjiarämo̧ ma̧na̧na̧ra̧padiibe cjiadiärea̧ japamitë üdë —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧, Orivo quȩmȩ ya̧mi̧räpȩji̧ri̧ oa.
Jechu judi ni̧bärëremȩdejȩrȩ Jerucharȩräpȩ acji jana̧paji̧ri̧ pio ji̧ri̧ chjiari
Marco 13:14-23; Uruca 21:20-24
15Ado Jechu judi cjiadiäa̧ japamitë üdë ma̧na̧na̧ra̧pea̧ pio ju̧i̧ chjiari ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü pio ji̧ri̧iäpȩmo̧:
—Danȩrȩ ca̧ jadü, pio jiro japamitërä, tjamo̧i̧ cjiari̧ cjiadiäpade ma̧ȩ üdë —yo̧a̧dejȩrȩ—. Tjamo̧ davä. Da̧de quȩmȩrea̧ pio judi go̧ȩparërea̧ ma̧ȩ üdë tjamo̧i̧ cjiari̧ cjiadiäpade pio jiro japamitërä. Tjamo̧ davä. Ütërë ea jana̧ chjadüa̧ oa ni̧bämȩ pio judi no̧mȩ tjamo̧ri ja̧ go̧ȩparërea̧ ma̧ȩ üdë, tjamo̧i̧ cjiari̧ cjiadiäpade. Ado pio jiro ma̧ȩ pio ju̧i̧ chjiari na̧e chia tjamo̧pe bagatäreji̧ri̧nȩrȩ ca̧ jadü —yo̧a̧dejȩrȩ—. Danȩrȩ, cja̧rȩmȩrȩ, a̧dë chjäte chjadëdë pumȩ pio judi cjiapade a̧dë chjäte china̧chja jo̧ tjoräpȩ ju̧ri̧. Jabechji̧ Ütë tjamo̧ ja̧ bë oa chjadëdëparȩmȩ pio judide. Ütë tjamo̧ pio ju̧i̧iä a̧dë chjäte goaedëti̧ pio judide. Ado mȩnȩro̧ pio jiro pumȩ chjadëdë tjamo̧ oa darä, a̧dë chjäte china̧chja jo̧ tjoräpȩ cjiarea̧mi̧dëmȩ oa darä, jabechji̧ na̧e chia tjamo̧pe bagatäreji̧ri̧nȩrȩ —yo̧a̧dejȩrȩ—. 16Ja̧dëa ji̧ pio ju̧i̧ darä, jabechji̧ Judea quȩmȩ chiriräpȩji̧ri̧ pio judiro̧ goae tarari̧ bagureno̧täreji̧ri̧dirȩ ya̧mi̧räpȩmo̧. 17Ado eami̧ pumȩ üdë a̧dë chjäte chjai̧dë pumȩ pio ju̧i̧ chjiari goë ta̧rërä judi, jibëa̧ jo̧ dairäpȩ cjiamȩrȩ goë ta̧rërä judi, jabechji̧ jibëa̧ jo̧ tjoräpȩmo̧ yu̧a̧dëtäremȩde. Ado jibëa̧ goë oa mitëno̧pea̧ oa peaja̧di yu̧a̧dëtäremȩde, jabo jabechji̧ goae tarari̧ baguramȩrȩ bagureno̧täremȩde ya̧mi̧räpȩmo̧. 18Ado eami̧ pumȩ üdë jibëa̧ tjadori pio judiri ta̧rërä judi, jabechji̧ jibëa̧ bëräpȩmo̧ chjibo oa mitëno̧pea̧ oa jäcjiëno̧dë matäremȩde. Tjamo̧ davä. Jibëa̧ bëräpȩmo̧ jäcjiëno̧dë matäremȩde jabo jabechji̧, goae tarari̧ bagureno̧täremȩde ya̧mi̧räpȩmo̧. 19Ado judirä, goae tjamo̧dëpadejȩrȩ davä bo maiji̧ri̧ pio ji̧ri̧iä. Ado bori̧ ji̧ri̧ chuchu yürüji̧ri̧ pio ji̧ri̧iäbo goae tjamo̧dëpadejȩrȩ. Jini̧ro̧ bori̧ ji̧ri̧ ëba tara, bo mai tara, jabechji̧ goae tjamo̧dëpadejȩrȩ jachi oa bagurapea̧ ji̧. 20Ado pio ju̧i̧iä jabërä goë cjo̧dë matäreji̧ri̧nȩrȩ Ütë tjamo̧ pio ju̧i̧iä. Tjamo̧ davä. Mȩnȩro̧ ji̧dë duri oa uiparä bagureno̧chea oa, mȩnȩro̧ järätä chjaparea̧ doro bagurëno̧chea oa, jabechji̧ jabërä goë cjo̧dëtäreji̧ri̧renȩro̧jo̧ȩ. 21Jabechji̧ pio jiro japamitërä a̧dë chjäte chjai̧dë oa chjätäpadirȩ pumȩ judiro̧. Jabechji̧ judiro̧ cja̧rȩmȩ co ja̧di da oa chjätädërërea̧ ji̧, a̧dë chjäte chjai̧dë oa chjätäpadirȩ —yo̧a̧dejȩrȩ—. Tjamo̧ davä. Ütë tjamo̧ judi dabu oa pearä pareapea̧ pio judiri yurori cja̧rȩmȩ co ja̧di da oa chjätädërërea̧ ji̧, ja̧di da oa chjätäpadirȩ pumȩ taradai̧ tarari̧. Jabo ja̧di dari̧ chjätäa̧ duri oa ja̧di dari̧ chjätädëpadirȩ ado chjereno̧. 22Ado pumȩ judiro̧ ütëbodärärë pio jiro japamitërä goarijächea oa, jabechji̧ jabërä tuti japapade Ütë tjamo̧ judi, pio jiro japamitë üdë japamitëdiächea oa. Jabechji̧ judi ja̧di dari̧ tuti japadërä judi, yuropea̧ oa cjia matäreji̧ri̧dirȩ pumȩ judiro̧, cja̧rȩmȩrȩ cjiarea̧mi̧dëri̧. Ado pio ju̧i̧iä tuti japapade. Jabechji̧ jënȩ mitëa̧ pumȩ pio judiro̧ ji̧dë ma chjai̧dë oa chjätächea oa, jabechji̧ pio ji̧ri̧iä chjadëri̧ tuti japapade —yo̧mȩrȩ ni̧bä chjaorëremȩdejȩrȩ Jechu judi.
23Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Ado pio jiro japamitërä eami̧ pumȩ üdë yo̧rä judi, Chjätä Tänȩmȩ pio ju̧i̧ chjiari yo̧rä judi, tjamo̧rämi̧ cjiadëchji̧jo̧ȩ —yo̧a̧dejȩrȩ—. Jabechji̧ judiro̧ yo̧rä judi, “Danȩrȩ, pio yidiibe Ütërë mitëa̧ Chjätä Tänȩmȩ pio judi” yo̧rä judi, jabechji̧ quëna̧dëchji̧jo̧ȩ. Ado cja̧rȩmo̧ pumȩ üdë yo̧rä judi, “Aja̧, pio ju̧ri̧pȩde. Ütërë mitëa̧ Chjätä Tänȩmȩ judi pio ju̧ri̧pȩde” yo̧rä judi, jabechji̧ na̧e chiachji̧vä. Tjamo̧rämi̧ cjiadëchji̧vä. 24Jabechji̧ pio jiro japamitërä u̧i̧paji̧ri̧ pio judiro̧ no̧i̧dërë go̧düdäräpadirȩ. Jabechji̧ Ütërë mitëa̧ Chjätä Tänȩji̧ri̧cji̧ quëna̧ japaji̧ri̧ pio judiro̧, ado Ütërë ea jana̧ chjadüa̧ oa ni̧bäji̧ri̧cji̧ quëna̧ ni̧bäji̧ri̧ pio judiro̧borë go̧düdäräpadirȩ. Ado dami̧ti̧ jauëchja cjiari̧ na̧rȩrea̧ oa na̧rȩ chjaopadirȩ. Japarea̧mi̧dë pio ju̧i̧ jape chjaoji̧ri̧ oa dae chjaopadiro̧jȩrȩ, pumȩ pio ji̧ri̧ goae tarari̧ u̧i̧pe chjaoji̧ri̧ oa. Ado Ütërë mitëa̧ pumȩ pio ji̧ri̧bo u̧i̧patapadiro̧jȩrȩ pio judiro̧borë jibë ta̧rë ja̧bopea̧ oa. Jabo Ütërë mitëa̧ pumȩpea̧ pio ju̧i̧iä, jabechji̧ u̧i̧parea̧ dadëpadiro̧jȩrȩ. 25Aja̧ ca̧ pumȩ, ja̧di ta̧rëri̧ ni̧bä chjaorequededibe. Mȩnȩro̧ dabadëchea oa, jabechji̧ jabërä uapai̧ ta̧rëri̧ yo̧ë cji̧därequededibe. Ado a̧dë jo̧rȩtadëchji̧vä cüdë dibë yo̧a̧ pio ju̧i̧ —yo̧a̧dejȩrȩ Jechu judi.
26—Ado pio ju̧i̧iä yo̧requededibe —yo̧a̧dejȩrȩ—. Pumȩ judiro̧ pio jiro japamitërä yo̧rä judi, “Danȩrȩ, Ütërë mitëa̧ Chjätä Tänȩmȩ pio judi chiri maearäpȩde. Jaeibe. Goëdetäro̧jo̧ȩ” yo̧a̧ oa ta̧rërä judi, jabechji̧ jädëchji̧vä. Ado cja̧rȩmo̧ üdë yo̧rä judi, “Danȩrȩ, pio yide Ütërë mitëa̧ Chjätä Tänȩmȩ judi. Jo̧ tjoräpȩ goadimi̧ dari̧ cjiade. Jaeibe. Goëdetäro̧jo̧ȩ” yo̧a̧ oa ta̧rërä judi, jabechji̧ tjamo̧rämi̧ cjiadëchji̧vä. 27Jabechji̧ ca̧ jadü, cüdë ado ma̧na̧rä, goadimi̧ dari̧ ma̧na̧dëparequede. Jabechji̧ oëra̧ti̧ oa bërepe chjaomȩmi̧ dari̧, ütëbodärärë darea̧mi̧ dari̧ ma̧na̧parequede. Jabechji̧ dorë cjitëmȩri pio judiri dorë biramȩräpȩmo̧ bërepe chjaomȩde. Ado peaja̧dimi̧ dari̧ ma̧na̧parequede Pumȩrȩ Ara̧ Tjamo̧ pio judi, chjadë maeari̧, ütëbodärärë darea̧mi̧ dari̧. Pio ju̧i̧ä yo̧requededibe. Jabechji̧ eami̧rȩ yo̧rä judi, “Aja̧, pio ju̧ri̧pȩde Pumȩ Ara Tjamo̧ pio judi" jabechji̧ tjamo̧rämi̧ cjiadëchji̧jo̧ȩ. 28Danȩrȩ ca̧ jadü, eami̧ pumȩ judiro̧, mo̧cjë üdë no̧i̧dërë paero paero biramȩ oa darä, chjaodëri̧ dabanȩrȩ. ‘Aja̧ ja̧boa̧mȩ üdë pio ju̧ri̧pȩ a̧rȩ jirodida, icjararemȩ üdë a̧rȩ jirodida’ quëna̧ daba maeanȩrȩ. Ado peaja̧dimi̧ dari̧ dabarea̧ dapanȩrȩ cjiadiärea̧ japamitërä. Jabechji̧ pumȩ judiro̧ na̧rȩrea̧ darä, cüdë dibë ni̧bä chjaoa̧ na̧rȩrea̧ pio ju̧i̧ darä, peaja̧di dabarea̧ dapadirȩ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧.
Jechu judi ni̧bärëremȩdejȩrȩ jënȩ ado chjereno̧ ma̧na̧pea̧ pio ju̧i̧ chjiari
Marco 13:24-27; Uruca 21:25-28
29Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ jibëa̧ jadü pio ji̧ri̧, ya̧mi̧räpȩji̧ri̧ oa.
—Ado pumȩ judiro̧ a̧dë chjäte chjai̧dë oa chjätä ëte, do üdë chjadëri̧ tatarërea̧ ji̧, tatadëpade jabo bagönȩ mapadeje —yo̧a̧dejȩrȩ—. Ado gupënȩ üdë chjadëri̧ tatarërea̧ ji̧, peaja̧di tatadëpade. Ado büë üdë, jabechji̧ a̧dëri pio judiri cjatäpade. Ado a̧dë i chjö̧na̧i̧ oa jö̧nö̧jö̧nö̧a ma cjiari̧ cjia tänȩpadejȩ Ütë tjamo̧ judi. Ado pio ju̧i̧iä a̧dëräpȩ baramȩ üdë jibëa̧ no̧romo̧ chjadëri̧ baärërea̧ ji̧, oëra̧ti̧ baäri̧ cjiapade, pearä cjiarërea̧mi̧dëri̧. 30Ado ja̧dëa ji̧ cüdë ma̧na̧pea̧ pio ju̧i̧ chjiari na̧rȩrea̧ üdë na̧rȩa̧ oa cjiapade a̧dë iräpȩ ju̧ri̧. Ado ma̧na̧parequede cüdë, Pumȩrȩ Ara̧ Tjamo̧ pio judi. Jabechji̧ uë tjamo̧ri pio judiri biramȩ oa dapadiro̧coe Pumȩrȩ Ara̧ Tjamo̧ pio ju̧i̧. Ma̧i̧ da tatari̧ cjiamȩ oa, go̧a̧ra̧ ërä birë ma̧na̧mȩ oa dapadiro̧coe a̧dë chjäte jauëchjamȩ oa. Ado chiriräpȩti̧ oa cjo̧ro̧ji̧ri̧ pumȩ pio judiro̧ pio coa da̧rä, ana̧ri̧ ejarü cjiapadirȩ uapa tjamo̧ji̧ri̧rȩ. Tjamo̧ davä. Ado cja̧rȩmo̧ ma̧ȩ oa, ado cja̧rȩmo̧ ma̧ȩ oa ni̧bäji̧ri̧ pio judiro̧, coa eadëji̧ri̧ pio judiro̧ uapa tjamo̧ji̧ri̧rȩ dapadiro̧coe. 31Ado ja̧dëa ji̧ chjadüparequedejȩrȩ a̧dëriji̧ri̧ mu̧i̧tjoi̧ pio ji̧ri̧ chiri cotoi̧räpȩ yuro. Tjamo̧ davä. Ma̧i̧ dari̧ ea cjiari̧ pjurarea̧ra̧ pio ju̧ri̧ra̧ chjadüparequedejȩrȩ oëra̧ti̧ oa jäpea̧ oa. Jabechji̧ chjiaräpȩmo̧ jäpea̧ oa, taruräpȩmo̧ jäpea̧ oa, cjae ta̧ra̧ pënȩräpȩmo̧ jäpea̧ oa, ado dëbëräpȩmo̧ jäpea̧ oa chjadüparequedejȩrȩ a̧dë chjäte jachiti̧ oa, cja̧rȩmȩ chirirë cjiadiärea̧mi̧dëri̧. Jabechji̧ chiriräpȩti̧ oa jätä eamȩrȩ chjadüparequedejȩrȩ Ütërë mitëa̧ pumȩ ütëbodärä oa a̧dopa tänȩpea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi, jënȩ ado chjereno̧ ma̧na̧pea̧ pio ju̧i̧ chjiari.
Igera to pio ju̧i̧iä chjadëri̧ dabapapea̧de
Marco 13:28-31; Uruca 21:29-33
32Ja̧dëa ji̧ ji̧dë u̧i̧ ni̧bämȩrȩ ni̧bä chjaorëremȩdejȩrȩ Jechu judi, jibëa̧ jadü pio ji̧ri̧, igera to pio ju̧i̧ chjiari. Ja̧di ta̧rëri̧ yo̧mȩrȩ yo̧rëremȩdejȩrȩ:
—Danȩrȩ ca̧ jadü, ütarë dachji̧vä igera to pio ju̧i̧ —yo̧a̧dejȩrȩ—. Jabechji̧ to a̧ pio oaiä tu ji̧ra̧ri̧ chiape jäde to pjö̧da üdë buiurea̧mi̧ dari̧. Jabechji̧ tjo go̧düa̧rä, to pjö̧da chiapea̧rä, 'jabechji̧ jono̧pea̧ ji̧ querediä tjamo̧diibëda’ quëna̧ daba darenȩro̧jo̧ȩ.#24:32 Danȩrȩ, Icharaitarë cjo̧ro̧mȩ chiriräpȩ üdë ado cja̧rȩmo̧ chiride. Jachi tjamo̧ a̧rȩde. Ado pio ju̧i̧iä pio ju̧ri̧pȩ cjo̧ro̧mȩ to üdë tjaoëpai̧ dari̧ japamȩde. Pio yoa chirirä cjo̧ro̧mȩ to üdë japami̧ dari̧ japadëmȩde. Ado pio ju̧i̧iä uipea̧rä, pio ju̧ri̧pȩ chjöchjapea̧rä, jabechji̧ gu̧ro maeade pjö̧da üdë. Jabo ja̧dëa ji̧ jono̧pea̧ ji̧ querediäa̧rä, chiri üdë chjöchjaremȩrȩ cjüëtüpea̧rä, jabechji̧ tjo go̧düde. To pjö̧da chiape jäde. "Ado pio ju̧i̧iä jabechji̧ tjo go̧düa̧rä, to pjö̧da chiapea̧rä, 'jabechji̧ jo̧no̧pea̧ ji̧ querediä tjamo̧diibëda’ quëna̧ ütarë darenȩro̧jo̧ȩ" yo̧de ma̧ȩ üdë. 33Ado peaja̧dimi̧ dari̧ ütarë datäreji̧ri̧nȩrȩ cüdë dibë yo̧a̧ pio ju̧i̧ chjiari —yo̧a̧dejȩrȩ. Danȩrȩ, cüdë dibë ni̧bä chjaoa̧ pio ju̧i̧ da̧rä, cüdë dibë ni̧bä chjaoa̧ üdë ma̧na̧rä, jabechji̧ daba dapanȩrȩ. ‘Aja̧, Jechu judi ado ma̧na̧pea̧ ji̧ querediä tjamo̧dida yaba̧’ quëna̧ jo̧rȩtaji̧ri̧rȩ ütarë daba dapanȩrȩ. 34Ado pio ju̧i̧iä tjamo̧i̧ cjiari̧ yo̧requededibe —yo̧a̧dejȩrȩ—. Danȩrȩ, cüdë dibë pea ni̧bä chjaoa̧ pio judi chjö̧na̧i̧rȩ tjamo̧i̧padäräa̧ oa cjiapade. Ado cjiadiäa̧ japami̧tërä irä dapaji̧ri̧ judiro̧, cüdë yo̧a̧ chjö̧na̧i̧ oa irä dapaji̧ri̧ pio judiro̧ orë jabë ja̧bodëa̧rä tjamo̧i̧padäräa̧ oa cjiapade. Tjamo̧ri̧ yo̧requededibe. 35Jabechji̧ teracabari̧ ni̧bädërequededibe —yo̧a̧dejȩrȩ—. Danȩrȩ, a̧dë üdë goarijäpade. Ado dabu üdë peaja̧di yuropapade. Jabechji̧ bucho ana̧dëmȩ tara, yuropapade. Jabo cüdë dibë ni̧bä chjaoa̧ ma̧ȩ üdë goarijädëpade. Jabechji̧ bucho ana̧mȩ ma̧ȩ tara, yuropadëpade. Jabechji̧ tjamo̧i̧ cjiari̧ cjiadiä maearë cjiadiäpade, oëra̧ cjiarea̧ decjiari̧ —yo̧mȩrȩ ni̧bä chjaorëremȩdejȩrȩ Jechu judi.
Jechu judi ütara̧ doro ado ma̧na̧pade, a̧ro̧rȩ daba quëna̧dërä
Marco 13:32-37; Uruca 17:26-30
36Ado Jechu judi jibëa̧ jadü pio ji̧ri̧ ji̧dë u̧i̧ ni̧bä chjaomȩrȩ ja̧di ta̧rëri̧ ni̧bä chjaorëremȩdejȩrȩ, jënȩ ado ma̧na̧pea̧ pio ju̧i̧ chjiari:
—Jabo danȩrȩ ca̧ jadü, tjamo̧ri̧ dabadë marea̧rȩ —yo̧a̧dejȩrȩ—. Cüdë ado chjereno̧ ma̧na̧pea̧ pio ju̧i̧ chjiari tjamo̧ri̧ dabadë marea̧rȩ. ‘Aja̧, pio jiro doro ma̧na̧pa jirodida, do üdë jirä ma̧na̧pa jirodida’ quëna̧rea̧mi̧dëde. Jabechji̧ pumȩ judiro̧ dabadë madirȩ. Ado a̧dëräpȩ cjiaji̧ri̧ mu̧i̧tjoi̧ pio judiro̧borë dabadë madirȩ. Ado pio cüdëborë dabadërequede ca̧ jadü. Tjamo̧ davä. Pio cüdë, Ja tjamo̧mȩborë, jabechji̧ dabadërequede, jabo Ama̧i̧ tjamo̧ pio judimo̧rȩ dabade —yo̧a̧dejȩrȩ—. 37Danȩrȩ, Noe pio ju̧i̧ nö̧ta cjo̧ro̧rëreji̧ri̧ pio judiro̧ na̧e chia jo̧rȩtadëji̧ri̧rȩ cjo̧ro̧rërea̧mi̧ cjo̧ro̧padirȩ pumȩ judiro̧, cüdë ado ma̧na̧rä. Tjamo̧ davä. Pumȩrȩ Ara̧ Tjamo̧ pio judi ado ma̧na̧rä, ‘Aja̧, pio ibëiäpȩmo̧ bape chjaorea̧ üdë ma̧na̧diibëda’ quëna̧dëpadirȩ pumȩ judiro̧. Jabechji̧ Noe pio ju̧i̧ nö̧ta cjo̧ro̧rëreji̧ri̧ pio judiro̧ quëna̧rërea̧mi̧ quëna̧padirȩ. 38Jabechji̧ ui ana̧ üdë jabë ma̧na̧dëa̧rä, ‘uapai̧ da tjamo̧ üdë acji ma̧na̧padiibëda’ quëna̧dëji̧ri̧rȩ cjo̧ro̧rëreji̧ri̧dirȩ pumȩ judiro̧. Ado judiro̧ na̧e chiadëji̧ri̧rȩ cjo̧ro̧a̧ oaiä, jabechji̧ jënȩro̧ pearäri ja̧ cjo̧ro̧ cjiarërea̧mi̧ cjo̧ro̧ baä marëreji̧ri̧dirȩ. Jabechji̧ judiro̧ pearä jurarërea̧mi̧ juraji̧ri̧rȩ cjo̧ro̧rëreji̧ri̧dirȩ. Judiro̧ pearä jararërea̧mi̧ jaraji̧ri̧rȩ cjo̧ro̧rëreji̧ri̧dirȩ. Ado oari judiro̧ jibëa̧ iei̧ ji̧ ëbarërea̧mi̧, ëba marëreji̧ri̧dirȩ. Ado judiro̧ jibëa̧ u̧ri̧ pio ji̧ri̧ ëbapea̧ oa yürürërea̧mi̧ yürürëreji̧ri̧dirȩ peaja̧di. Ja̧di ma ja̧di ma cjo̧ro̧ baä marëreji̧ri̧dirȩ pumȩ judiro̧, Noe pio judi chara ana̧rä yu̧a̧rä yuro. 39'Jabechji̧ ui ana̧ üdë acji ma̧na̧padiibëda, ma̧i̧ da uapai̧ da üdë acji ma̧na̧padiibëda’ quëna̧dëji̧ri̧ oa jemu̧i̧ ja̧bo tänȩ marëremȩdejȩrȩ ui ana̧ üdë, judiro̧ daba quëna̧dëa̧rä. Ado peaja̧dimi̧ dari̧ acji ma̧na̧parequedejȩrȩ pumȩ ji̧ri̧ —yo̧a̧dejȩrȩ Jechu judi—. Tjamo̧ davä. Pumȩ judiro̧ quëna̧ dabadëji̧ri̧ oa, ‘Aja̧, ma̧na̧padiibëda’ quëna̧ dabadëji̧ri̧ oa acji ma̧na̧parequedejȩrȩ Pumȩrȩ Ara̧ Tjamo̧ pio judi. 40Jabechji̧ pio jiro doro, yo̧a̧ri̧ pumȩ judiro̧ jibëa̧ tjadoro ja̧bepea̧mi̧ nö̧ta, jabechji̧ cja̧rȩmȩ üdë chjaodëri̧ mitëa̧ oa cjiapade. Ado cja̧rȩmo̧ üdë a̧dë cjiadiäpadejȩ. 41Ado pio jiro doro yo̧a̧ri̧ ivi jini̧ro̧ jurarea̧ oa ji̧mo̧ jade cha nö̧ta, cja̧rȩmȩrȩ chjaodëri̧ mitëa̧ oa cjiapanȩ. Ado cja̧rȩmo̧rȩ a̧dë cjiadiäpanȩ. 42Ado pio ju̧i̧iä yo̧requededibe ca̧ pumȩ. Na̧e chia tjamo̧chji̧vä. ‘Jabechji̧ Ano̧mȩ judi pio jiro doro ma̧na̧pa jirodiibëda’ quëna̧rea̧mi̧dë tara, jabechji̧ na̧e chiaji̧ri̧rȩ cjo̧ro̧chji̧vä —yo̧a̧dejȩrȩ.
43Ado jënȩ ado chjereno̧ ma̧na̧pea̧ pio ju̧i̧ chjiari ji̧dë u̧i̧ yo̧mȩrȩ ado cja̧rȩmo̧ na̧rȩrea̧ ma̧ȩmi̧ dara̧ yo̧rëremȩdejȩrȩ.
—Danȩrȩ, cüdë ado chjereno̧ ma̧na̧rea̧ do pio ju̧i̧ chjiari dabarea̧mi̧dëde. Ado peaja̧dide garümȩ pio ju̧i̧ chjiari. Danȩrȩ, bë ana̧mȩ judi garümȩ ju̧i̧ chjiari tjamo̧ri̧ daba̧rä judi, 'Aja̧, pio jiro japami̧tërä acji jana̧padicoada' quëna̧ daba̧rä judi, jabechji̧ mo̧a̧dëa̧täremȩde, jabo na̧e chia tjamo̧mȩrȩ jida̧täremȩde. ‘Aja̧, gȩnȩ tjomo̧ro acji jana̧padicoada’ quëna̧ dabarä judi, chjadëri̧ jëdano̧a̧ oa cjia̧täremȩde garümȩ judi jibëa̧ bërä acji yu̧a̧rea̧ dachea oa, judi baë mitërea̧ dachea oa. Jabo dabadëa̧de. 44Ado peaja̧di dabarea̧mi̧dëde pio coa chjiari. Ja̧di tara ji̧dë ma na̧e chiapea̧ chianȩrȩ cüdë ma̧na̧pea̧ ji̧. Jabechji̧ mȩnȩro̧ daba quëna̧dërä ma̧na̧parequede Pumȩrȩ Ara̧ Tjamo̧ pio judi —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.
Bë ana̧mȩ ja̧ mu̧i̧tjoi̧ pio ju̧i̧ chjiari na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi, jënȩ ado chjereno̧ ma̧na̧pea̧ pio ju̧i̧ chjiari
Uruca 12:41-48
45Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ yo̧rëremȩdejȩrȩ jibëa̧ jadü ji̧ri̧:
—Danȩrȩ, Ano̧mȩ tjamo̧ ja̧ mu̧i̧tjoi̧mi̧ dari̧ cjo̧ro̧täreji̧ri̧nȩrȩ pio ju̧i̧ ja̧ ma̧ȩ oa ta̧rëdiäji̧ri̧rȩ —yo̧a̧dejȩrȩ—. Danȩrȩ, bë ana̧mȩ judi jibëa̧ bë oa a̧dë baäbea yaboi̧, japamitë ana̧ri̧ tai̧pea̧ oa baäbea yaboi̧, jabechji̧ tjamo̧ ja̧bepamȩ mu̧i̧tjoi̧ chjadë oa mitëtämi̧ cjiarä judi, ¿chjia oa mitëpade? Chjia oadë, jabechji̧ jënȩ yo̧a̧mi̧ chjadëri̧ ta̧rëdiämȩ pio ju̧i̧ mitëpadejȩ. Urëdi tjamo̧ oa jo̧rȩtamȩ pio ju̧i̧ mitëpadejȩ, chjadëri̧ ütara̧mi̧ ja̧bepapamȩ pio ju̧i̧. Jabechji̧ pio jȩa nö̧ta ëba ja̧bepaji̧ri̧ pio ji̧ri̧ doti̧mi̧ chjadëri̧ ëba jurapamȩ pio ju̧i̧, jurarea̧ pio ju̧i̧ ütara̧mi̧ yürüpamȩ pio ju̧i̧ mitëpadejȩ. 46Ado bë ana̧mȩ pio judi ma̧na̧rä, jibëa̧ mu̧i̧tjoi̧ pio ju̧i̧ chjadëri̧ ta̧rëdiämȩ pio ju̧i̧ darä, jënȩ yo̧a̧mi̧ ta̧rëdiämȩ pio ju̧i̧ darä, jabechji̧ ma̧ chiadëri̧ cjiamȩrȩ dapadejȩ. 47Ado tjamo̧i̧ cjiari̧ yo̧requededibe ca̧ jadü —yo̧a̧dejȩrȩ—. Danȩrȩ, pio jiro mu̧i̧tjoi̧ judi chjadëri̧ ja̧bepamȩ tara, bë ano̧mȩ pio judi yo̧a̧mi̧ chjadëri̧ japamȩ tara, jabechji̧ jibëa̧ bë tjamo̧ pio ju̧i̧ chjadëri̧ jida tänȩpadejȩ chjö̧na̧i̧ oa. 48-49Jabo mu̧i̧tjoi̧ chjadëdë üdë ja̧di dari̧ ja̧bepadëmȩde. Jabechji̧ oëra̧ jo̧rȩtamȩde. ‘Aja̧, bë ana̧mȩ judi jabëdida, ma̧na̧na̧ra̧pea̧ ji̧ querediädë jirodida’ quëna̧ jo̧rȩtamȩrȩ chumi̧dëri̧ cjiade. Jabechji̧ bë ana̧mȩ pio judi yo̧a̧mi̧ japatärea̧ ji̧, japadëmȩde. Jabechji̧ jibëa̧ jabeparea̧ pio ju̧i̧ chjadëri̧ ja̧bepatärea̧ ji̧, pio jȩa nö̧ta ja̧bepaji̧ri̧ mu̧i̧tjoi̧ pio ji̧ri̧ chjadëri̧ ëba ja̧bepatärea̧ ji̧, cjäri̧ ma̧dejȩrȩ, bide cjaeädejȩrȩ. Ado ju̧i̧ uëri ërü goaraji̧ri̧ pio ji̧ri̧ nö̧ta a̧dë chjäte jara chjaode. Ado popë chiquimi̧ tarari̧ jurade ji̧dëri̧, a̧dë chjäte ji̧ra̧ oa juramȩrȩ. 50Jabo cjäri̧ made. Judi daba quëna̧dërä, chjaodëri̧ ma̧na̧pade bë ana̧mȩ judi. Tjamo̧ davä. Judi daba quëna̧dëa̧ doro chjaodëri̧ ma̧na̧pade. 51Ado judi ma̧na̧rä, jibëa̧ mu̧i̧tjoi̧ chjadëdë pio ju̧i̧, cjäri̧ madejȩ, a̧dë chjäte goae tarari̧ bape chjaopadejȩ uapai̧ da tjamo̧ri̧. Ado aeno̧padejȩ quëna̧dëji̧ri̧ pio judiro̧ tutia̧ oa cjiamȩräpȩ. Jabechji̧ Ütë tjamo̧ pio ju̧i̧iäpȩmo̧ quëna̧cji̧ quëna̧ japaji̧ri̧ pio ji̧ri̧ nö̧ta tutia̧ oa cjiapea̧ oa, aeno̧padejȩ. Ado ju̧ri̧pȩ a̧dë chjäte ejaro cjiaji̧ri̧rȩ a a ma cjiapadirȩ, a̧dë chjäte gito oa taraji̧ri̧rȩ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, jënȩ ado chjereno̧ ma̧na̧pea̧ pio ju̧i̧ chjiari.
Currently Selected:
Mateo 24: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
