Mateo 18

O ji̧ri̧ u̧i̧ ba chiaji̧ri̧ pio ji̧ri̧ chjiari ni̧bärëremȩde Jechu judi

Marco 9:33-37; Uruca 9:46-48

1Ado pio jiro japamitërä, Jechu ja̧ jadü pio judiro̧ järëreji̧ri̧diro̧jo̧ȩ Jechu pio ju̧i̧. Ado yo̧a̧diro̧jo̧ȩ:

⁠—⁠Danȩ, chjadëri̧ yo̧ibe ⁠—⁠yo̧a̧diro̧jo̧ȩ⁠—⁠. Ütërë yo̧a̧ chja̧oerä cjo̧ro̧ji̧ri̧ pio judiro̧ orë, 'jabechji̧ o ji̧ri̧iä ji̧dë u̧i̧ ba chia jirodiro̧da' quëna̧ jo̧rȩtarea̧rȩ, jabo tjamo̧ri̧ dabadërea̧rȩ. Chjadëri̧ yo̧ibe. ¿Chjia tjamo̧dirȩ ji̧dë u̧i̧ ba chiaji̧ri̧ judiro̧? ⁠—⁠yo̧a̧diro̧jo̧ȩ.

2Ado Jechu judi pio ju̧i̧ ta̧rëa̧ oaiä, pio jȩaiäpȩ jana̧tä ëna̧diäa̧dejȩ pumȩ boi̧chji̧ ju̧i̧. Ado jibëa̧ jadü ja̧ chjarerä cjia tänȩrëremȩdejȩ. 3Ado ja̧dëa ji̧ yo̧a̧dejȩrȩ:

⁠—⁠Tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, pio jiro boi̧chji̧mi̧ dari̧ jo̧rȩtatäreji̧ri̧nȩrȩ. Mȩnȩro̧ ano̧ mire jo̧rȩtadërä judi, mȩnȩro̧ pio yodë boi̧chji̧ üdë jo̧rȩtami̧ dari̧ jo̧rȩtadërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpanȩrȩ. 4Jabo eami̧ pumȩ judi pio yodë boi̧chji̧mi̧ dari̧ jo̧rȩtarä judi, eami̧ pumȩ üdë, ‘Aja̧, bo maquëda, o ji̧ri̧iä ji̧dë u̧i̧ ba chiadëquëda, jabechji̧ ba chiadëmȩquëda’ quëna̧rä judi, jabechji̧ o ji̧ri̧iä ji̧dë u̧i̧ ba chiapade Ütërë yo̧a̧ chja̧oeräpȩ ju̧ri̧. 5Danȩrȩ, eami̧ pumȩ üdë pio cüdëmi̧ dari̧ japarä judi, pio yoa pumȩ boi̧chji̧ oa cjäri̧ri̧ cjiamȩrȩ jearä judi, ba chiadëmȩmi̧ damȩ pio ju̧i̧ cjäri̧ri̧ cjiamȩrȩ jearä judi, jabechji̧ pio coabo cjäri̧ri̧ cjia dami̧ dari̧ jeadique ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Chjai̧dë pio ju̧i̧ chjuari̧ jiadapea̧de

Marco 9:42-48; Uruca 17:1-2

6Ado Jechu judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü pio ji̧ri̧, jibëa̧ dëbëräpȩ cjiamȩ boi̧chji̧ pio ju̧i̧ chjiari.

⁠—⁠Jabo danȩrȩ, eami̧ pumȩ judi pio yoa boi̧chji̧mi̧ damȩ pio ju̧i̧ chjai̧dëri̧ japa tänȩrä judi, jabechji̧ Ütë tjamo̧ pio judi tänȩa̧ oa uapai̧ da tjamo̧ri̧ bape chjaoa̧ oa cjiapade ⁠—⁠yo̧a̧dejȩrȩ⁠—⁠. Jabechji̧ ji̧dë u̧i̧ chjadëtäremȩde judi ui ana̧räpȩ aeno̧a̧ oa cjiarä judi, eami̧ pumȩ ju̧i̧, ba chiadëmȩmi̧ da pio ju̧i̧ chjai̧dë oa japa tänȩpea̧ pio ju̧i̧iä. Tjamo̧ davä. Judi ta̧dë chacha tjamo̧ra̧ jibëa̧ gürü juro chjuari̧ yura̧ ëte ui ana̧räpȩ ju̧ri̧ aeno̧a̧ oa cjiarä judi, cjücjürü tjamo̧räpȩ chjaodëri̧ jemu̧i̧ ja̧bopea̧ oa aenoa̧ oa cjiarä judi, jabechji̧ ji̧dë u̧i̧ chjadëtäremȩde. Jabechji̧ Ütë tjamo̧ judi ji̧dë u̧i̧ ana̧ri̧ bape chjaochea oa, ji̧dë u̧i̧ chjadëtäremȩde. 7Jabechji̧ puë ji̧ra̧ tjamo̧mi̧ daräpȩ cjo̧ro̧dirȩ pumȩ judiro̧. Ado pio ju̧i̧iä judiro̧ pio yoa chirirä cjo̧ro̧a̧ nö̧ta, dëdë, oëra̧diäpai̧ dadirȩ. Pumȩ pio judiro̧ tänȩa̧ oaiä, oëra̧diäpai̧ dadirȩ. Jabo danȩrȩ, o ji̧ri̧ chjai̧dëri̧ japa tänȩji̧ri̧ pio judiro̧, jabechji̧ a̧dë chjäte uapai̧ dari̧ bape chjaoa̧ oa cjiapadirȩ. 8Ado pio ju̧i̧iä pio yoa ma̧ȩbo a̧de yo̧requededibe mȩnȩro̧ chjai̧dë pio ju̧i̧ chjuari̧ jiadapea̧ oa, chjai̧dë pio ju̧i̧ aeno̧mi̧ dari̧ japapea̧ oa ⁠—⁠yo̧a̧dejȩrȩ⁠—⁠. Jabechji̧ na̧e chiatä earequededibe dibëa̧ icjarari ja̧ pio ju̧i̧ chjiari. Jabechji̧ dibëa̧ ichi üdë ji̧dë ma oëra̧diärä judi, dibëa̧ ichi üdë ji̧dë ma chjai̧dëri̧ japarä judi, jabechji̧ tuti gu̧në aeno̧mi̧ dari̧ a̧eno̧chji̧jo̧ȩ. Ado dibëa̧ ta üdë ji̧dë ma oëra̧diärä judi, dibëa̧ ta üdë ji̧dë ma chjai̧dëri̧ japarä judi, jabechji̧ tuti gu̧në aeno̧mi̧ dari̧ a̧eno̧chji̧jo̧ȩ. Jabechji̧ ji̧dë u̧i̧ chjadëde a̧dëräpȩ go̧düdäräpea̧ üdë. Tjamo̧ davä. Ichi cotoji̧ri̧rȩ a̧dëräpȩ go̧düdäräpea̧ üdë, ji̧dë u̧i̧ chjadëde yo̧a̧ri̧ ichi oa chiaji̧ri̧rȩ cjo̧dë tja ana̧räpȩ aeno̧pea̧ pio ju̧i̧iä. Jabechji̧ ta cotoji̧ri̧rȩ a̧dëräpȩ go̧düdäräpea̧ üdë, ji̧dë u̧i̧ chjadëde cjo̧dë tja ana̧räpȩ aeno̧pea̧ pio ju̧i̧iä. 9Ado dibëa̧ dacho üdë ji̧dë ma oëra̧diärä judi, dibëa̧ dacho üdë ji̧dë ma chjai̧dëri̧ japarä judi, jabechji̧ mu̧i̧ coë ëte aeno̧mi̧ dari̧ aeno̧chji̧jo̧ȩ. Jabechji̧ dacho cotoji̧ri̧rȩ a̧dëräpȩ go̧düdäräpea̧ üdë, jabechji̧ ji̧dë u̧i̧ chjadëde dacho cotodëji̧ri̧rȩ cjo̧dë tja ana̧räpȩ aeno̧pea̧ pio ju̧i̧iä ⁠—⁠yo̧mȩrȩ ni̧bä chjaorëremȩdejȩrȩ Jechu judi.

10-11Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Danȩrȩ, na̧e chia tjamo̧chji̧vä ado ja̧di, mȩnȩro̧ eami̧ boi̧chji̧mi̧ damȩ pio ju̧i̧ badë dachea oa ⁠—⁠yo̧a̧dejȩrȩ⁠—⁠. Tjamo̧ davä. Ba chiadëmȩmi̧ damȩ pio ju̧i̧ badë dachea oa, pea quëna̧mȩpea̧ pio ju̧i̧ badë dachea oa, jabechji̧ na̧e chia tjamo̧chji̧vä. Jabechji̧ chjadëri̧ jida̧ oa cjiadirȩ. Jabechji̧ Ütë tjamo̧ pio judi tänȩa̧ oaiä, a̧dëriji̧ri̧ mu̧i̧tjoi̧ ba chia tjamo̧ pio judiro̧ chjadëri̧ jidadiro̧jo̧ȩ ba chiadëmȩmi̧ damȩ pio ju̧i̧. Ado danȩrȩ, ca̧ Ama̧i̧ pio judi pio jiro ja̧beparea̧ ba chia oa jibëa̧ mu̧i̧tjoi̧ pio ji̧ri̧iäpȩmo̧ yürüa̧ oaiä, ado pio jiro mu̧i̧tjoi̧ judiro̧ ca̧ Ama̧i̧ pio ju̧i̧ nö̧ta ji̧dë ma ëba cjiarea̧ da oaiä ¿yö̧ta dari̧ jo̧rȩtaji̧ri̧rȩ datäreji̧ri̧rea̧rȩ ba chiadëmȩmi̧ damȩ pio ju̧i̧? Yö̧ta dari̧dë, jabechji̧ badë dadë matäreji̧ri̧rea̧ro̧jȩrȩ, jabo ba chia tjamo̧ datäreji̧ri̧rea̧ro̧jo̧ȩ ji̧dëri̧ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Dabadëpea̧mȩ oveja pio ju̧i̧ chjiari ni̧bärëremȩdejȩrȩ Jechu judi na̧rȩrea̧ ma̧ȩmi̧ dara̧, Ütë tjamo̧ judi pumȩ ji̧ri̧ ea tjamo̧pea̧ pio ju̧i̧ chjiari

Uruca 15:3-5

12Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ ni̧bä chjaorëremȩde oveja jidamȩ pio ju̧i̧ chjiari:

⁠—⁠Danȩrȩ, oveja jidamȩ judi oveja ji̧ra̧ oa goarä judi, 100 oveja oa goarä judi, jabo cja̧rȩmȩrȩ dabadëpea̧ oa cjiarä judi, ¿tjana̧ japapade? ⁠—⁠iëno̧ë ta̧rëa̧dejȩrȩ⁠—⁠. Tjana̧ japadëpade, jabechji̧ na̧ȩ jäpadejȩ. Pio ju̧i̧iämȩrȩ jabechji̧, dabadepadëa̧ oveja pio ji̧ri̧, ya̧mi̧ yuroro a̧rȩmȩ chiriräpȩ juraji̧ri̧ pio ji̧ri̧ a̧dë jo̧rȩtamȩmi̧ dari̧ a̧dë jäpadejȩrȩ dabadëpea̧mȩ pio ju̧i̧ dadäräpea̧ oa. 13Ado dabadëpea̧mȩ oveja pio ju̧i̧ dadäräa̧rä, jabechji̧ a̧dë chjäte ma̧ chiadëri̧ cjiamȩrȩ dapadejȩ. Dabadëpea̧ oa cjiadëreji̧ri̧ oveja pio ji̧ri̧iä, dëdë, ma̧ chiadëri̧ cjiade, jabo danȩrȩ, ji̧dë u̧i̧ ma̧ chiadëri̧ cjiapade jënȩ dadäräa̧ pio ju̧i̧iä. 14Ado peaja̧dimi̧ dari̧ jo̧rȩtade ca̧ Ama̧i̧ judi, a̧dëräpȩ cjiamȩ Ama̧i̧ pio judi ⁠—⁠yo̧a̧dejȩrȩ⁠—⁠. Jabechji̧ eami̧ boi̧chji̧mi̧ damȩ pio judi, ba chiadëmȩmi̧ damȩ pio judi cja̧rȩmȩrȩ ji̧dë ma dabadëpea̧ oa cjiami̧ dari̧ cjiatä ea tjamo̧dëdejȩ, jabo chjadëri̧ dadäräa̧ oa cjiami̧ dari̧ cjiatä ea tjamo̧dejȩ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jëdano̧pea̧de ibëa̧ omȩ pio ju̧i̧ nö̧ta ori̧ bagari̧ ëba cjiarea̧mi̧ dari̧

15Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ ni̧bärëremȩdejȩrȩ jibëa̧ jadü ji̧ri̧:

⁠—⁠Danȩrȩ, Ütë tjamo̧ ja̧ joja pio judi ado cja̧rȩmo̧ quëna̧mȩ pio ju̧i̧iäpȩmo̧ chjai̧dëri̧ japarä judi, jabechji̧ pio jȩaiäpȩmo̧ chjai̧dëri̧ japamȩ pio ju̧i̧ goëde jätäremȩdejȩ irä ni̧bä chjaopea̧ oa, ori̧ bagari̧ ni̧bä chjaopea̧ oa ⁠—⁠yo̧a̧dejȩrȩ⁠—⁠. Jabechji̧ o ji̧ri̧iäpȩmo̧ yo̧dëtäremȩdejȩrȩ, jabo jabechji̧ pio jȩaiäpȩmo̧ chjai̧dëri̧ japea̧mȩ pio ju̧i̧mo̧i̧ yo̧täremȩdejȩ. Jabechji̧ jibëa̧ma̧i̧ jätäremȩde pio judiro̧mo̧rȩ ni̧bä chjaopea̧ oa. Ado ja̧dëa ji̧ jabechji̧, pio jȩaiäpȩmo̧ chjai̧dëri̧ japea̧ pio ju̧i̧ chjiari chjadëri̧ ni̧bä chjaotäremȩdejȩ. Aja̧, ori̧ bagari̧ ëba chapea̧ oa ni̧bä chjaotäremȩdejȩ. Ado chjai̧dëri̧ japamȩ judi ta̧rë ja̧borä judi, chjadëri̧ jëdano̧rä judi, jabechji̧ chjadëri̧ jëdano̧a̧ oa cjiapadirȩ. Tjamo̧ davä. Ji̧mo̧ tai̧rea̧mi̧ dari̧, cjatäcjie jo̧rȩtarea̧mi̧ dari̧, ma̧ chjupi̧ cjiari̧ jo̧rȩtarea̧mi̧ dari̧ jëdano̧a̧ oa cjiapadirȩ ⁠—⁠yo̧a̧dejȩrȩ⁠—⁠. 16Jabo chjai̧dëri̧ japamȩ judi jibëa̧ omȩ oa ta̧rë ja̧bodërä judi, jabechji̧ ji̧dë duri oa ado chjereno̧ goëde jätäremȩdejȩ. Jabo jibëa̧ma̧i̧ järërea̧ ji̧, jabechji̧ jadü chiarë jätäremȩde. Aja̧, ado cja̧rȩmo̧ quëna̧mȩ oa, cja̧rȩmȩ oa, jabo yo̧a̧ri̧ oa ëba jätäremȩdejȩrȩ, pio jënȩ jo̧rȩta̧mi̧. Jabechji̧ chjadëri̧ ütarë ta̧rë chapea̧ oa ëba jätäremȩdejȩrȩ. Aja̧ judiro̧ irä ta̧rëpea̧ oa, ‘Aja̧, ja̧di ta̧rëri̧ ni̧bä chjaoa̧diro̧da, ja̧di ta̧rëri̧ japea̧diro̧da’ quëna̧ jo̧rȩtaji̧ri̧rȩ ütarë ta̧rë chapea̧ oa ëba jätäremȩdejȩrȩ. 17Jabo ado chjereno̧ jäa̧räbo jiadarä judi, jibëa̧ omȩ oa jabë ta̧rë ja̧bodërä judi, jabechji̧ a̧doparea̧räpȩ ju̧ri̧ jätäremȩde irä ni̧bä chjaopea̧ oa a̧dopaji̧ri̧ pio ji̧ri̧, ütëborë irä ta̧rërea̧mi̧ dari̧. Jabechji̧ pio ji̧ri̧ ja̧ dachoro ni̧bätäremȩdejȩ ado chjereno̧, judi pio jȩaiäpȩmo̧ chjai̧dëri̧ japea̧ pio ju̧i̧ chjiari. Ado jabë ta̧rë ja̧bodërä judi, jabo ji̧dë ma jiadarä judi, jabechji̧ Ütë tjamo̧ pio ju̧i̧ quëna̧dëmȩmi̧ da oa ano̧ mire datäreji̧ri̧diro̧jo̧ȩ a̧dopaji̧ri̧ judiro̧. Aja̧, pio jibë nö̧ta ëba a̧dopadëmȩ oa ano̧ mire datäreji̧ri̧diro̧jo̧ȩ, ori̧ bagari̧ ëba charea̧mi̧dëmȩ oa ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧ jëdano̧pea̧ pio ju̧i̧ chjiari.

18Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Tjamo̧i̧ cjiari̧ yo̧requededibe ca̧ jadü ⁠—⁠yo̧a̧dejȩrȩ⁠—⁠. Aja̧, ca̧ ja̧beparea̧ oa tjamo̧ ja̧bepaji̧ri̧ pio ji̧ri̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ eami̧ oa pio yoa chirirä china̧chjaparȩrä judi, quëna̧ji̧ri̧ pio judiro̧ pio yoa chirirä eami̧ oa japachea oa china̧chjaparȩrä judi, peaja̧di china̧chjaparȩa̧ oa cjiapade Ütë tjamo̧ pio ju̧i̧iä, a̧dëräpȩ cjiamȩ pio ju̧i̧iä. Jabo mȩnȩro̧ pio yoa chirirä eami̧ oa china̧chjaparȩdërä judi, quëna̧ji̧ri̧ pio judiro̧ eami̧ oa chjadëri̧ japatä eaji̧ri̧rȩ china̧chjaparȩdërä judi, peaja̧di china̧chjaparȩdëa̧ oa cjiadiäpade Ütë tjamo̧ pio ju̧i̧iä, a̧dëräpȩ cjiamȩ Ütë pio ju̧i̧iä ⁠—⁠yo̧mȩrȩ ni̧bä chjaorëremȩdejȩrȩ Jechu judi.

19Ado pio yoa ma̧ȩbo a̧de yo̧requededibe ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ yo̧a̧ri̧ maearë cja̧rȩmȩ chji̧ chiami̧ dari̧ jo̧rȩtaji̧ri̧rȩ Ama̧i̧ pio ju̧i̧iä goë cjo̧dërä judi, ca̧ Ama̧i̧ pio ju̧i̧iä cja̧rȩmȩ jo̧rȩtarea̧ chiaji̧ri̧rȩ goë cjo̧dërä judi, jabechji̧ a̧dëräpȩ cjiamȩ Ama̧i̧ pio judi japapade, pio mȩnȩro̧ cjo̧dëa̧mi̧. 20Jabechji̧ mȩnȩro̧ yo̧a̧ri̧ maearë ca̧ pumȩ tara a̧doparä judi, mȩnȩro̧ tjarari̧ maearë ca̧ quȩrä a̧doparä judi, jabechji̧ dibëa̧ chjarerä cjiaparequede ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jibëa̧ jadü pio ju̧i̧ duridëparȩmi̧ dari̧ japadëri̧ cjiamȩ pio ju̧i̧ chjari ni̧bärëremȩdejȩrȩ Jechu judi

21Ja̧dëa ji̧ Pedro judi Jechu ja̧ queri̧räpȩ jämȩrȩ, ja̧di ta̧rëri̧ yo̧mȩrȩ iëno̧ë ta̧rërëremȩdejȩ:

⁠—⁠Danȩ ca̧ Ano̧mȩ, ¿napai̧ co duridëparȩmi̧ dari̧ jo̧rȩtapea̧de ca̧ omȩ pio ju̧i̧iäpȩmo̧? ⁠—⁠iëno̧ë ta̧rëa̧dejȩ⁠—⁠. Judi pio coaiäpȩmo̧ co ji̧ra̧ri̧ chjai̧dëri̧ japarä judi, judi coaiäpȩmo̧ ji̧dë ma chjai̧dëri̧ japarä judi, ¿napai̧ co duridëparȩmi̧ dari̧ japapea̧de? Ado judi cja̧ȩta̧ra̧ ichiri yo̧a̧ri̧ co pio coaiäpȩmo̧ chjai̧dëri̧ japarä judi, jabechji̧ ¿yö̧ta dari̧ japapea̧de? Chjadëri̧ ütarë yo̧ibe ⁠—⁠iëno̧ë ta̧rëa̧dejȩ.

22Ado Jechu judi dëbë yo̧mȩrȩ yo̧a̧dejȩ:

⁠—⁠Na̧pai̧dë, jabechji̧ ji̧dë ma chjai̧dëri̧ japarä judi, ji̧dë ma duridëparȩmi̧ dari̧ japapea̧de ⁠—⁠yo̧a̧dejȩ⁠—⁠. Cja̧ȩta̧ra̧ ichiri yo̧a̧ri̧mo̧i̧ coi̧ ma duridëparȩmi̧ dari̧ jo̧rȩtadëpea̧de, jabo ji̧dë ma japapea̧de. Jabechji̧ ütararea̧mi̧dëri̧ japapea̧de. Judi mȩa ji̧dë ma chjai̧dëri̧ japarä judi, jabechji̧ ji̧dë ma duridëparȩmi̧ dari̧ jo̧rȩtapea̧de ⁠—⁠yo̧a̧dejȩ⁠—⁠. 23Ado pio ju̧i̧iä na̧rȩrea̧ ma̧ȩmi̧ da oa ni̧bä chjaotämi̧ cjiarequededibe ütëbo oa Ütërë yo̧a̧ chja̧oerä cjo̧ro̧pea̧ pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, cjo̧ro̧rëremȩde chiri ütë cjo̧ro̧mȩ pio judi. Ado jibëa̧ mu̧i̧tjoi̧ judiro̧, tjamo̧ ja̧bepaji̧ri̧ mu̧i̧tjoi̧ pio judiro̧ pio jȩaiäpȩmo̧ ji̧dë ma ba cjiadiächea oa, jabechji̧ irä ni̧bä chjaotämi̧ cjiarëremȩdejȩrȩ pio ji̧ri̧iä ba eapea̧ oa. Jabechji̧ judiro̧ bacjia̧ pio ju̧i̧ chjiari dabadëchea oa, pio jȩaiäpȩmo̧ chjadëri̧ ba ano̧däräpea̧ oa, jabechji̧ irä ütarë ni̧bä chjaotämi̧ cjiarëremȩdejȩrȩ. 24Ado pio ju̧i̧iä a̧dopea̧dejȩrȩ. Jabechji̧ jënȩ chamȩ ja̧ dëbëräpȩ ano̧ mire cjiadärä tänȩrëremȩdejȩrȩ pio jȩaiä irä ta̧rëpea̧ oa. Ado cja̧rȩmo̧ judi tjamo̧ri̧ bacjiarëremȩde chëre ji̧ra̧ tjamo̧ oa, a̧dë chjäte ji̧ra̧ tjamo̧ oa. Ütararea̧mi̧dëri̧ bacjiarëremȩdejȩ millones ji̧ra̧ oa. 25Jabo cjäri̧ made, ba ano̧rea̧mi̧dërëremȩde. Ado pio ju̧i̧iä jibëa̧ ütë judi yo̧a̧dejȩ:

"Danȩ, mȩnȩ pio coaiäpȩmo̧ chjadëri̧ ba ano̧rea̧mi̧dë tara, jabechji̧ gatë tänȩparequedemȩ mȩnȩ mu̧i̧tjoi̧ mape bagarea̧mi̧ dari̧" yo̧a̧dejȩ. "Jabechji̧ gatëa̧ mu̧i̧tjoi̧rȩ cjo̧ro̧pea̧ oa, chëre boarea̧mi̧dëri̧ bucho ana̧ ja̧bepapea̧ oa gatë tänȩparequedemȩ" yo̧a̧dejȩ. "Ado peaja̧dimi̧ dari̧ japaparequedejȩrȩ na̧ iei̧ pio ji̧bo, na̧ bori̧ pio ji̧ri̧bo. Ado mȩnȩ goa̧ pio ju̧i̧ chjö̧na̧i̧därä oa gatë tänȩpareconȩ chëre pio ju̧i̧ mitëpea̧ oa. Jabechji̧ mȩnȩro̧ pio coaiäpȩmo̧ chjadëri̧ ba ano̧däräpea̧ oa, ja̧di dari̧ japaparequede" yo̧a̧dejȩ chiri ütë cjo̧ro̧mȩ judi.

26Jabo mu̧i̧tjoi̧ judi uapa tjamo̧mȩrȩ jibëa̧ ütë ja̧ yaboi̧räpȩ ju̧ri̧ ju chatura̧ cjiadärärëremȩde. Ado yo̧a̧dejȩ:

"Jabo danȩ ütë, cjäri̧ri̧ cjia dacoe" dëbë yo̧a̧dejȩ. "Ma̧ chjua dacoe. Chjö̧na̧i̧ oa ba ano̧parequedemȩ jaerira̧. Jabo jabechji̧ mu̧i̧tjoi̧ mape bagarea̧mi̧ dari̧ gatë tänȩdëibe. Cjäri̧ri̧ cjia daibe" yo̧a̧dejȩ.

27Ado chiri ütë cjo̧ro̧mȩ judi pio ju̧i̧ ta̧rëa̧ oaiä, jabechji̧ cjäri̧ri̧ cjiamȩrȩ darëremȩdejȩ. Ado pio ju̧i̧iä duridëparȩrëremȩdejȩ judi bacjia̧ chjö̧na̧i̧ oa. Jabechji̧ bacjiadiädëri̧ duridëparȩrëremȩdejȩ chjö̧na̧i̧därä oa.

28Ado ja̧dëa ji̧ pio jiro mu̧i̧tjoi̧ üdë, jabechji̧ ütararea̧mi̧dëri̧ bacjiarërea̧ ji̧, bacjiadëmȩrȩ go̧düa̧de chiri ütë cjo̧ro̧mȩ ja̧ bëri pio judiri. Eami̧ oa bacjiadëmȩrȩ baärëremȩde bücjüchjai̧mi̧ darë, cjatäcjie jo̧rȩtamȩrȩ. Jabechji̧ a̧dë chjäte chachami̧ dari̧ cjiarërea̧ ji̧, bücjüchjami̧ dari̧ baärëremȩde. Jabo cjäri̧ made, judi baäa̧rä, pio jȩa nö̧ta ja̧bepamȩ mu̧i̧tjoi̧ pio ju̧i̧ dëbëdiäa̧dejȩ, pio jȩaiäpȩmo̧ bacjiamȩ pio ju̧i̧, cja̧rȩmȩ chëre maea oa bacjiamȩ ju̧i̧. Ado ërecjiapea̧mȩrȩ chjuari̧ mitërëremȩdejȩ jibëa̧ gürü ju oa. Ado to̧bari̧ yo̧a̧dejȩ:

"Ba anocoe mȩnȩ coa bacjia̧ pio ju̧i̧" yo̧a̧dejȩ.

29Jabo jȩa nö̧ta ja̧bepamȩ pio judi jabë ba ano̧rea̧ goadëa̧ oaiä, jabechji̧ ja̧di ta̧rëri̧ yo̧tarëremȩdejȩ ju chatura̧ cjiadäräa̧mȩrȩ:

"Danȩ ca̧ jadü, cjäri̧ri̧ cjia dacoe" yo̧a̧dejȩ. "Ma̧ chjua dacoe. Jabechji̧ ba ano̧däräparequedemȩ jabo jabërequede. Jëreeadëcoe. Ji̧dë duri oa daemȩrenȩ. Jabechji̧ cjäri̧ri̧ cjia dacoe" yo̧a̧dejȩ.

30Jabo pio jȩa nö̧ta ja̧bepamȩ pio judi ta̧rë ja̧botärea̧ ji̧, cjäri̧ madejȩ, ta̧rë ja̧bodëa̧dejȩ. Jabechji̧ chjadëri̧ ta̧rë ja̧botärea̧ ji̧, chiri ütë cjo̧ro̧mȩ pio judi ta̧rë ja̧boa̧mi̧ ta̧rë ja̧botärea̧ ji̧, ta̧rë ja̧bodëa̧dejȩ. Jabechji̧ pio ju̧i̧ chjuari̧ mitëmȩrȩ chjaodëri̧ ëba järëremȩdejȩ chaärea̧ bëräpȩ. Ado pio ju̧ri̧pȩ tutia̧ oa cjia tänȩrëremȩdejȩ, judi chjö̧na̧i̧ oa ba ano̧däräa̧rä yuro.

31Jabo pio ju̧i̧ nö̧ta ja̧bepaji̧ri̧ mu̧i̧tjoi̧ pio judiro̧ orë judi chjai̧dëri̧ japea̧ pio ju̧i̧ daea̧ oaiä, jibëa̧ jadü pio ju̧i̧ ma̧i̧ dari̧ japea̧ pio ju̧i̧ daea̧ oaiä, gito ana̧ri̧ jo̧rȩtaji̧ri̧pea̧dirȩ. Ado chjaodëri̧ goëdepea̧diro̧jo̧ȩ chiri ütë cjo̧ro̧mȩ pio ju̧i̧iäpȩmo̧ irä ni̧bä chjaopea̧ oa. Ado judiro̧ daea̧ chjö̧na̧i̧ oa ni̧bä chjaorëreji̧ri̧diro̧jo̧ȩ. 32Ado ja̧dëa ji̧ chiri ütë cjo̧ro̧mȩ pio judi pio ju̧i̧ ta̧rëa̧ oaiä, chjaodëri̧ ma̧ȩ chjadürëremȩdejȩ jibëa̧ mu̧i̧tjoi̧ pio ju̧i̧, pio jȩaiäpȩmo̧ ana̧ri̧ ba cjiarëremȩ pio ju̧i̧, jibëa̧ jadü oa chjai̧dëri̧ japea̧mȩ pio ju̧i̧. Ado ja̧di ta̧rëri̧ yo̧mȩrȩ yo̧rëremȩdejȩ:

"Danȩ, mu̧i̧tjoi̧ chjadëdërenȩ" yo̧a̧dejȩ. "Danȩ, mȩnȩ coa bacjiadiäa̧ chjö̧na̧i̧ oa duridëparȩa̧requedemȩ. Jabechji̧ mȩnȩ coa cjäri̧ri̧ cjia datä eamȩrȩ cjo̧dë chjaoa̧ oaiä, jabechji̧ duridëparȩa̧reconȩ ba cjiadiädëri̧. 33Jabo cjäri̧ marenȩ" yo̧a̧dejȩ, "Ja̧di dari̧ japadëa̧renȩ na̧ jadü oa. Pio cüdë japea̧mi̧ dari̧ japatärea̧ ji̧, japadëa̧renȩ. Pio ju̧i̧ cjäri̧ri̧ cjiamȩrȩ datärea̧ ji̧, cjäri̧ marenȩ, ja̧di dari̧ dadëa̧renȩjo̧ȩ na̧ jadü oa" yo̧a̧dejȩ.

34Ado chiri ütë cjo̧ro̧mȩ judi ërecjia tjamo̧pe bagamȩrȩ chaäa̧ oa cjiatä yo̧rëremȩde. Jabechji̧ chaärea̧ bëräpȩ tjamo̧ ja̧bepaji̧ri̧ pio ji̧ri̧iäpȩmo̧ yürürëremȩdejȩrȩ, judi chaäa̧ oa cjiapea̧ oa. Jabechji̧ judi chjö̧na̧i̧därä oa ba ano̧a̧rä yuro, tutia̧ oa cjiatä yo̧rëremȩdejȩrȩ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi duridëparȩpea̧ pio ju̧i̧ chjiari.

35Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

⁠—⁠Danȩrȩ ca̧ jadü, peaja̧dimi̧ dari̧ japapai̧ dadidibe ca̧ Ama̧i̧ judi ⁠—⁠yo̧a̧dejȩrȩ. Tjamo̧ davä. Mȩnȩro̧ dibëa̧ pumȩ pio ji̧ri̧ chjadëri̧ duridëparȩmi̧ dari̧ japadërä judi, peaja̧dimi̧ dari̧ japapai̧ dadidibe. Ado pio ju̧i̧iä yo̧requededibe. Jabechji̧ eami̧ pumȩ üdë pio dibëiäpȩmo̧ chjai̧dëri̧ japarä judi, jabechji̧ chjadëri̧ duridëparȩmi̧ dari̧ japachji̧vä. A̧dë jo̧rȩtachji̧vä. Ya maeara̧ japadëchji̧vä, jabo dibëa̧ chji̧ra̧ tjamo̧ri̧ duridëparȩmi̧ dari̧ japachji̧jȩrȩ ⁠—⁠yo̧mȩrȩ yo̧rëremȩdejȩrȩ Jechu judi.

Currently Selected:

Mateo 18: Pume

Highlight

Copy