Mateo 17

Jechu judi na̧rȩrëremȩdejȩrȩ jibëa̧ jauëchja oa

Marco 9:2-13; Uruca 9:28-36

1Ado cja̧ȩta̧ra̧ ichiri cja̧rȩmȩ do chjätä ëte, Jechu judi ëba buarëremȩdejȩrȩ jibëa̧ jadü pio ji̧ri̧, tjarari̧ oa. Ya̧mi̧ uë tjamo̧räpȩ ëba buarëremȩdejȩrȩ jibëa̧ma̧i̧ cjiapea̧ oa. Pedro pio ju̧i̧, Santiago pio ju̧i̧, ado Santiago pio ju̧i̧di ja̧mȩ pio ju̧i̧bo ëba buarëremȩde Juan pio ju̧i̧. Aja̧, pio jiro pumȩ ji̧ri̧ ëba buarëremȩdejȩrȩ. 2Ado ya̧mi̧ uëräpȩ go̧düdäräa̧ duri oa, Jechu judi tjaoëpai̧ da tjamo̧pe bagarëremȩde. Jabechji̧ a̧dë chjäte tatari̧ cjiamȩpea̧de jibëa̧ chamacho üdë, dorë tatami̧ dari̧. Ado jibëa̧ chjibo üdë ma̧i̧ dari̧ a̧dë chjäte bërëbërëai̧pe baga̧de, tatape bagami̧ dari̧. 3Ado pio ju̧i̧ ja̧ yuroro chjaodëri̧ idëpea̧dirȩ yo̧a̧ri̧ pumȩ judiro̧. Aja̧, Eria pio judi, ado Moiche pio judiborë ëba cjiarëreji̧ri̧diro̧jo̧ȩ. Ado Jechu pio ju̧i̧ nö̧ta ni̧bä chjaoa̧diro̧jo̧ȩ.

4Ado Pedro judi pio ju̧i̧ daea̧ oaiä chjaodëri̧ yo̧eno̧a̧dejȩ Jechu ju̧i̧:

⁠—⁠Ano̧mȩ, chjadë tjamo̧de a̧ro̧rȩ pio yi tara ⁠—⁠yo̧a̧dejȩ⁠—⁠. Danȩ, pio mȩaiä jabechji̧rä judi, jabechji̧ tjarari̧ jo̧ bori̧ oa cji̧deno̧täreji̧ri̧rea̧rȩ. Pio na̧ea̧ oa, Moiche ja̧ oa, ado Eria ja̧ oa peaja̧di ⁠—⁠yo̧a̧dejȩ.

5Jabo Pedro judi jabë ni̧bäa̧rä, a̧dë chjäte tatari̧ cjiamȩ go̧a̧ra̧ ë üdë birana̧ra̧rëremȩdejȩrȩ ji̧ri̧ ja̧ uëräpȩ. Ado go̧a̧ra̧ ë tjori pio judiri ni̧bämȩ oa ta̧rëa̧diro̧jo̧ȩ. Ja̧di ta̧rëri̧ ni̧bämȩ oa ta̧rëa̧diro̧jo̧ȩ: "Pio yodëje ca̧ Jadiquȩ. Goae tjamo̧diquȩ. Ado pio ju̧i̧iä jabechji̧, ta̧rë ja̧bochji̧jo̧ȩ." 6Aja̧, ja̧di ta̧rëri̧ ni̧bämȩ oa ta̧rëa̧diro̧jo̧ȩ. Ado pio ju̧i̧ ta̧rëa̧ oaiä, chjaodëri̧ cjateno̧a̧dirȩ daburäpȩmo̧. Ado a̧dë chjäte uapaji̧ri̧rȩ toboe china̧däräa̧dirȩ. 7Jabo Jechu judi ga̧re tarera̧pea̧dejȩrȩ. Ado yo̧a̧dejȩrȩ:

⁠—⁠Cjitëno̧chji̧vä. Uapadëchji̧vä.

8Ado judiro̧ uëräpȩmo̧ gatë daea̧rä, Jechu pio ju̧i̧mo̧i̧ daea̧diro̧jo̧ȩ.

9Ado ji̧dë duri oa judiro̧ ya̧mi̧ uëri pio judiri bira̧rä, ja̧di ta̧rëri̧ yo̧rëremȩdejȩrȩ Jechu judi:

⁠—⁠Danȩrȩ, mȩnȩro̧ pio yabo daea̧ pio ju̧i̧ chjiari o ji̧ri̧iäpȩmo̧ yo̧dëpea̧de ⁠—⁠yo̧a̧dejȩrȩ⁠—⁠. Jabechji̧ jabërä yo̧dëpea̧de jabo cüdë ja̧boa̧remȩrȩ bëdüa̧rämo̧ yo̧pea̧de. Tjamo̧ davä. Pumȩrȩ Ara̧ Tjamo̧ pio judi ja̧boa̧remȩrȩ bëdüa̧rämo̧ yo̧pea̧de ⁠—⁠yo̧a̧dejȩrȩ.

10Ja̧dëa ji̧ Jechu ja̧ jadü judiro̧ ja̧di ta̧rëri̧ iëno̧ë ta̧rëa̧diro̧jo̧ȩ:

⁠—⁠Danȩ ibëa̧ Ano̧mȩ, pea daea̧rea̧ro̧jo̧ȩ Eria quȩmȩrea̧ pio ju̧i̧. Pio mȩa nö̧ta ëba cjiamȩ pio ju̧i̧ daea̧rea̧ro̧jo̧ȩ ya̧mi̧räpȩmȩ oa. Jabo na̧ea̧ ja̧ oa chjadëri̧ jëdano̧mi̧ dari̧ japatärea̧ ji̧, pumȩ judiro̧ pio mȩaiäpȩmo̧ chjadëri̧ quëna̧pea̧ oa jëdano̧mi̧ dari̧ japatärea̧ ji̧, eami̧ oa japadëa̧de. Jabechji̧ ado chjereno̧ a̧dë cjarapea̧diibe. Ado pio ju̧i̧iä iëno̧ë ta̧rërea̧ro̧mȩ. ¿Tjana̧ ju̧i̧iä ja̧di ta̧rëri̧ a̧ra̧ano̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧ Eria quȩmȩ pio ju̧i̧ chjiari? ⁠—⁠iëno̧ë ta̧rëa̧diro̧jo̧ȩ⁠—⁠. “Aja̧, Ütë tjamo̧ judi Chjätä Tänȩmȩ pio ju̧i̧ chjadübea yaboi̧, jabechji̧ Eria quȩmȩ pio judi yabochjarë chjadüpea̧de” a̧ra̧ano̧dirȩ. “Jabërä chjö̧na̧i̧ oa chjadëri̧ jëdano̧mi̧ dari̧ japapea̧ oa, Chjätä Tänȩmȩ pio ju̧i̧ ja̧ oa jabërä chjadëri̧ jëdano̧mi̧ dari̧ japapea̧ oa yabochjarë chjadüpea̧de Eria judi” yo̧ji̧ri̧rȩ a̧ra̧ano̧dirȩ. ¿Jabo tjana̧ ju̧i̧iä ja̧di ta̧rëri̧ a̧ra̧ano̧dirȩ? ⁠—⁠iëno̧ë ta̧rëa̧diro̧jo̧ȩ.

11Jabo Jechu judi dëbë yo̧mȩrȩ yo̧a̧dejȩrȩ:

⁠—⁠Tjana̧ ju̧i̧iädë, jabechji̧ tjamo̧ri̧ a̧ra̧ano̧dirȩ ⁠—⁠dëbë yo̧a̧dejȩrȩ⁠—⁠. Eria pio judi yabochjarë ma̧na̧pea̧ chiarëremȩde chjö̧na̧i̧ oa chjadëri̧ jëdano̧mi̧ dari̧ japapea̧ oa Ütë tjamo̧ judi chjadüpea̧ pio ju̧i̧ ja̧ oa. 12Jabo danȩrȩ, peadë ma̧na̧rëremȩde. Tjamo̧ davä. Peadë ma̧na̧rëremȩde Eria pio judimi̧ darë. Ütërë ea jana̧ chjadüa̧ oa ni̧bämȩ judi peadë ma̧na̧rëremȩde Eria pio judimi̧ darë. Peadë ma̧na̧rëremȩde chjö̧na̧i̧ oa jëdano̧mi̧ dari̧ japapea̧ oa. Jabechji̧ peadë jëdano̧a̧ oa cjiami̧ dari̧ cjia maeade. ‘Jabo pio judidida’ quëna̧ dadëa̧diro̧jo̧ȩ pumȩ judiro̧. Jabechji̧ pio ju̧i̧ chjadëri̧ datärea̧ ji̧, jabechji̧ jënȩro̧ jo̧rȩta̧mi̧ ma̧i̧ dari̧ conȩdarëreji̧ri̧diro̧jo̧ȩ. Ado peaja̧di dari̧ japapadiro̧coe, Pumȩrȩ Ara̧ Tjamo̧ pio ju̧i̧. Peaja̧di jënȩro̧ jo̧rȩta̧mi̧ conȩdapadiro̧coe ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

13Ado Jechu judi ja̧di ta̧rëri̧ yo̧a̧ oaiä, na̧e chiapea̧dirȩ Eria pio ju̧i̧ chjiari. ‘Aja̧, Eria yo̧a̧ ji̧, jabechji̧ Juan pio ju̧i̧ chjiari yo̧rea̧dida, uirä chudamȩ pio ju̧i̧ chjiari yo̧rea̧dida’ quëna̧ jo̧rȩtaji̧ri̧pea̧dirȩ.

Yaröca chiamȩ üi̧ pëi̧ chja pio ju̧i̧ chjaparȩrëremȩdejȩ Jechu judi

Marco 9:14-29; Uruca 9:37-43

14Ado judiro̧ ya̧mi̧ uëri pio judiri biraji̧ri̧rȩ dëbëdiärëreji̧ri̧diro̧jȩrȩ pumȩ buba oa, pio jibë jidataji̧ri̧ oa. Ado pumȩ üi̧ judi jidataremȩrȩ chjaodëri̧ jädärärëremȩde Jechu pio ju̧i̧iäpȩ. Ado pio ju̧i̧ ja̧ dëbëräpȩ ju chatura̧ cjiadäräa̧mȩrȩ yo̧a̧dejȩ:

15⁠—⁠Ano̧mȩ, cjäri̧ri̧ cjia dajo̧ȩ ca̧ ja oa ⁠—⁠yo̧a̧dejȩ⁠—⁠. Ma̧i̧ dari̧ conȩda̧ oa cjiade. Jabechji̧ yaröca üdë babui̧ra̧ boadärä chjaodejȩ cjarari̧ cjiape bagarea̧mi̧ dari̧. Jabechji̧ pio ju̧i̧ ma̧i̧ dari̧ i ma̧na̧gura chjaomȩrȩ bübürepe chjao tänȩdejȩ icjara nö̧tai̧ oa. Pio ju̧i̧iä babui̧ra̧ cjatä chjao tänȩdejȩ cjo̧dëräpȩ. Ado peaja̧di ui cjücjüräpȩ peaja̧di cjatä chjao tänȩdejȩ, jemu̧i̧ ja̧bopai̧ dari̧. Pio ju̧i̧iä yo̧requedemȩ ⁠—⁠yo̧a̧dejȩ⁠—⁠. A̧docoe. Cjäri̧ri̧ cjia dajo̧ȩ ca̧ ja pio ju̧i̧. 16Jabechji̧ ëba jätea̧reconȩ na̧ jadü pio ji̧ri̧iäpȩ, jabo cjäri̧ madiro̧jo̧ȩ, chjaparȩrea̧ dadëa̧diro̧jo̧ȩ ⁠—⁠yo̧a̧dejȩ.

17Ado Jechu judi ja̧di ta̧rëri̧ ta̧rëa̧ oaiä, ja̧di ta̧rëri̧ yo̧a̧dejȩrȩ pumȩ ütëbo oa:

⁠—⁠Jabo cjäri̧ manȩrȩ, pio yaba̧mȩ yoaiä cjo̧ro̧ji̧ri̧ pio mȩnȩro̧ chjadëri̧ jo̧rȩtarea̧ chiadëti̧nȩrȩ ⁠—⁠yo̧a̧dejȩrȩ⁠—⁠. Ji̧dë ma chjai̧dëri̧ jape chjaonȩrȩ. Jaboti̧ri̧ jiadarenȩro̧coe. ¿Naparä quëna̧parenȩro̧coe? ¿Napai̧rä yuro chjuari̧ jiadaparenȩro̧coe? ¿Napai̧rä yuro jidatapea̧ chiarequededibe mȩnȩro̧ quëna̧pea̧ ji̧? Jabë japamitë ana̧ri̧ ëba cjiapea̧ chia jirorequededibe, mȩnȩro̧ chjadëri̧ dabapea̧rä yuro ⁠—⁠yo̧mȩrȩ yo̧rëremȩdejȩrȩ ütëbo oa.

Ado Jechu judi pumȩ pio ji̧ri̧iäpȩmo̧ ja̧di ta̧rëri̧ yo̧ ëte, yo̧a̧dejȩ yaröca chiamȩ ja̧ jäjäa pio ju̧i̧iäpȩmo̧:

⁠—⁠Ëba jana̧jo̧ȩ jauëräpȩmo̧ na̧ ja pio ju̧i̧ ⁠—⁠yo̧a̧dejȩ.

18Ado Jechu judi chjaodëri̧ ya̧mi̧ ta̧rëri̧ ni̧bärëremȩdejȩ yaröca pio ju̧i̧. Ado chjaodëri̧ go̧deno̧a̧de. Ado pëi̧ chja pio judi chjapea̧ oa cjiadiäa̧de.

19Ji̧dë duri oa pio judiro̧mo̧rȩ cjiadiäa̧rä, Jechu ja̧ jadü pio judiro̧ iëno̧ë ta̧rëa̧diro̧jo̧ȩ Jechu ju̧i̧ yaröca pio ju̧i̧ chjiari:

⁠—⁠¿Jabo tjana̧ ju̧i̧iä baä tänȩrea̧ dadëa̧rea̧ro̧jo̧ȩ yaröca pio ju̧i̧? ⁠—⁠iëno̧ë ta̧rëa̧diro̧jo̧ȩ⁠—⁠. Baä tänȩtea̧rea̧ro̧jo̧ȩ jabo baädëa̧de. ¿Tjana̧ ju̧i̧iä baä tänȩrea̧ dadëa̧rea̧ro̧jo̧ȩ? ⁠—⁠iëno̧ë ta̧rëa̧diro̧jo̧ȩ.

20-21Ado Jechu judi dëbë yo̧a̧dejȩrȩ:

⁠—⁠Tjana̧ ju̧i̧iädë, 'jabechji̧ Ütë tjamo̧ judi pio yoa yaröca oa tjamo̧ri̧ baä tänȩpai̧ dadiji̧da, Ütë tjamo̧ pio judi jauëchja tjamo̧dida’ quëna̧ jo̧rȩtatärea̧ ji̧, ja̧di dari̧ quëna̧dë oaiä, jabechji̧ baä tänȩrea̧ dadëa̧renȩro̧jo̧ȩ. Tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Mȩnȩro̧ jabëtari̧mi̧ oa quëna̧ji̧ri̧borë, jabechji̧ cüdë dibë yo̧a̧ pio ju̧i̧ japarea̧ dapai̧ danȩrȩ ⁠—⁠yo̧a̧dejȩrȩ⁠—⁠. Danȩrȩ, motacha quȩmȩ cho üdë, jabomo̧ boi̧chji̧ tjamo̧de. Ado mȩnȩro̧ quëna̧ üdë peaja̧di boi̧chji̧mi̧ dade. Jabo danȩrȩ, mȩnȩro̧ quëna̧ üdë boi̧chji̧mi̧ daräbo, mȩnȩro̧ quëna̧ üdë ji̧ra̧ tjamo̧dëräbo, jabomo̧ motacha quȩmȩ cho pio judimi̧ daräbo, jabechji̧ dami̧ti̧ oa japarea̧ oa dapai̧ danȩrȩ ⁠—⁠yo̧a̧dejȩrȩ⁠—⁠. Ado pio ju̧i̧iä mȩnȩro̧ pio yoa ya̧mi̧ ana̧ oa ano̧ mire china̧ tänȩtä earä judi, peaja̧di yo̧pai̧ darenȩro̧jo̧ȩ. “Aja̧, pio idëpȩ ano̧ mire china̧ oa cjiavä” yo̧ji̧ri̧rȩ yo̧pai̧ danȩrȩ. Ado mȩnȩro̧ quëna̧ji̧ri̧rȩ yo̧rä judi, ‘Aja̧, Ütë tjamo̧ judi a̧dë chjäte jauëchjamȩdida’ quëna̧ jo̧rȩtaji̧ri̧rȩ yo̧rä judi, jabechji̧ ano̧ mire china̧ oa cjiapai̧ dade ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jechu judi ja̧bopea̧ pio ju̧i̧ chjiari ado ni̧bärëremȩdejȩrȩ

Marco 9:30-32; Uruca 9:44-45

22Ado Jechu judi jibëa̧ jadü pio ji̧ri̧ nö̧ta Garirea quȩmȩ chiriräpȩ a̧dopea̧rä, ja̧di ta̧rëri̧ yo̧rëremȩdejȩrȩ:

⁠—⁠O judiro̧ yürüpadiro̧coe Pumȩrȩ Ara̧ Tjamo̧ pio ju̧i̧ tjamo̧ yo̧ji̧ri̧ pio ji̧ri̧iäpȩmo̧ ⁠—⁠yo̧a̧dejȩrȩ⁠—⁠. 23Pio coa ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpadiro̧coe. Jabo judiro̧ pio coa ja̧bo tänȩa̧ duri oa, jabechji̧ bëdüparequede tjarari̧ do chjätä ëte ⁠—⁠yo̧a̧dejȩrȩ.

Ado Jechu ja̧ jadü pio judiro̧ pio ju̧i̧ ta̧rëa̧ oaiä, gito ana̧ri̧ jo̧rȩtaji̧ri̧pea̧dirȩ.

Jechu judi ba ano̧rëremȩde Ütë tjamo̧ ja̧ bë oa jidapea̧ oa

24Ado Jechu judi, jibëa̧ jadü pio judiro̧borë Capanau̧ quȩmȩ bë ma̧ri̧räpȩ go̧düdäräa̧rä, chëre boa tai̧ji̧ri̧ pio judiro̧ goëdepea̧diro̧jo̧ȩ Pedro ju̧i̧. Tjamo̧ davä. Ütë tjamo̧ ja̧ bë oa chjadëri̧ jidapea̧ oa chëre boaji̧ri̧ pio judiro̧ goëdepea̧diro̧jo̧ȩ. Ado iëno̧ë ta̧rëa̧diro̧jo̧ȩ:

⁠—⁠Danȩ, a̧ro̧rȩ Ütë tjamo̧ ja̧ bë oa chjadëri̧ jidapea̧ oa, chëre boarea̧rȩ pumȩ pio ji̧ri̧iä ⁠—⁠yo̧a̧diro̧jo̧ȩ⁠—⁠. Ado danȩ, ¿dibë a̧ra̧ano̧mȩ pio judiborë ba ano̧dëde? Ütë tjamo̧ ja̧ bë oa chjadëri̧ jidapea̧ oa ba oa ¿ba ano̧dëde? ⁠—⁠iëno̧ë ta̧rëa̧diro̧jo̧ȩ.

25Ado Pedro judi dëbë yo̧a̧dejȩrȩ:

⁠—⁠Dë, tjamo̧ri̧ ba ano̧de.

Ado pio ji̧ri̧ dëbë yo̧a̧ duri oa, Pedro judi bëräpȩ baärëremȩde Jechu pio ju̧i̧ nö̧ta ni̧bä chjaopea̧ oa chëre ba pio ju̧i̧ chjiari. Jabo judi jabë iëno̧ë ta̧rërea̧ dadëa̧rä, Jechu pio judi chjaodëri̧ iëno̧ë ta̧rëa̧dejȩ yabochja:

⁠—⁠Danȩ Pedro ⁠—⁠yo̧a̧dejȩ⁠—⁠, ¿yö̧ta dari̧ jo̧rȩtarenȩ? Chiriräpȩ cjo̧ro̧ji̧ri̧ ütëti̧ pio judiro̧, chiri ütë cjo̧ro̧ji̧ri̧ pio judiro̧ ¿chjia ji̧ri̧iä boa chjaodirȩ chëre oa jibëa̧ chirirä cjo̧ro̧a̧ ba oa? ¿Jabo jibëa̧ u̧ri̧ pio ji̧ri̧iä, jabo jibëa̧ u̧ri̧dë pio ji̧ri̧iä? ¿Yö̧ta dari̧ jo̧rȩtarenȩ?

26Ado Pedro judi dëbë yo̧a̧dejȩ:

⁠—⁠Yö̧ta dari̧ jo̧rȩtadë, jabechji̧ jibëa̧ u̧ri̧dë pio ji̧ri̧iä boa chjao jirodirȩ.

Ado Pedro judi ja̧di ta̧rëri̧ dëbë yo̧a̧ oaiä, “Jibëa̧ u̧ri̧dë pio ji̧ri̧iä boa chjao jirodirȩ” dëbë yo̧a̧ oaiä, jabechji̧ ja̧di ta̧rëri̧ dëbë yo̧a̧dejȩ Jechu judi:

⁠—⁠Ja̧dirä judi chiri ütë cjo̧ro̧ji̧ri̧ ja̧ u̧ri̧ pio judiro̧ ba ano̧dëpea̧ chiadirȩ jabechji̧. Ado peaja̧direa̧rȩ a̧ro̧rȩ ⁠—⁠yo̧a̧dejȩ⁠—⁠. Jabechji̧ Ütë tjamo̧ pio ju̧i̧ ja̧ u̧ri̧rea̧rȩ. Pio ju̧i̧ ja̧ u̧ri̧dë ma ja̧didë, jabo pio ju̧i̧ ja̧ u̧ri̧rea̧rȩ. Ado pio ju̧i̧iä jabechji̧ ba ano̧dëpea̧ chiarea̧rȩ, judiro̧ Ütë tjamo̧ ja̧ bë oa jida̧ ba oa. Judi jibëa̧ u̧ri̧dë pio ji̧ri̧iämo̧i̧ cjo̧dëa̧ oaiä, jibëa̧ u̧ri̧ pio ji̧ri̧iä cjo̧dëdë oaiä, jabechji̧ ba ano̧dëpea̧ chiarea̧rȩ. 27Jabo chëre boaji̧ri̧ pio judiro̧ ana̧ri̧ jo̧rȩtachea oa, jabechji̧ tjaräpȩ jävä na̧ cho̧ mu̧i̧rea̧ amaio cai̧ra̧. Ado jabechji̧ mu̧i̧ ajo̧ȩ na̧ amaio oa. Ado mȩnȩ pearä mu̧i̧a̧ cho̧ pio ju̧i̧ mu̧i̧jo̧ȩ. Ado cho̧ ja̧ yarä chëre daemȩrenȩ. Pio ju̧i̧ a̧de jäjo̧ȩ pio ibë chjiari ba ano̧pea̧ oa ⁠—⁠yo̧mȩrȩ yo̧rëremȩdejȩ Pedro ju̧i̧ Jechu judi.

Currently Selected:

Mateo 17: Pume

Highlight

Copy