Jona̧ 3
3
Niniveräpȩ cjo̧ro̧ji̧ri̧ pio judiro̧ ano̧ mire jo̧rȩtaji̧ri̧pea̧dirȩ
1Ja̧dëa ji̧ Jeova judi ado ma̧ȩ yürürëremȩdejȩ Jona̧ ju̧i̧. Ja̧di ta̧rëri̧ yo̧mȩrȩ yo̧a̧dejȩ:
2—Danȩ, cjitëno̧vä. Ninive quȩmȩ bë ma̧ri̧räpȩ jätä earequedemȩ, bë ma̧ri̧ ba chia tjamo̧räpȩ. Pio jiro bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ ma̧ȩ yürütä earequedemȩ. Cüdë mȩa yürüa̧ ma̧ȩra̧ pio ju̧ri̧ra̧ goae tarari̧ ni̧bä chjaotä earequedemȩ —yo̧a̧dejȩ.
3Ado Jona̧ judi pio ju̧i̧ ta̧rëa̧ oaiä goadi järërea̧ ji̧, chjaodëri̧ järëremȩde, ta̧rëdiämȩrȩ. Ado Ninive bë ma̧ri̧ üdë boi̧dë tjamo̧rëremȩde. Pumȩ no̧i̧dë tjamo̧rȩ cjo̧ro̧rëreji̧ri̧dirȩ pio ju̧ri̧pȩ. Cja̧rȩmȩ codë go̧a̧ti̧ a̧rȩri̧ cjiarëremȩde. Ado bë ma̧ri̧ oëräpȩmo̧ chjätäpea̧ oa tjarari̧ dorëremȩde. Aja̧, boi̧dë tjamo̧rëremȩde. 4Ado Jona̧ judi pio ju̧ri̧pȩ go̧düdärämȩrȩ yu̧a̧rëremȩde. Ado bë ma̧ri̧ tjoräpȩmo̧ jämȩrȩ tai̧rëremȩde cja̧rȩmȩ do nö̧ta. Ado ja̧di dari̧ japa ëte, to̧bari̧ ni̧bä chjaopea̧ ji̧ taruparëremȩde. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ, to̧bari̧ ni̧bämȩrȩ:
—Danȩrȩ, 40 do chjätä ëte, Jeova pio judi ja̧bo tänȩpadidibe Niniveräpȩ cjo̧ro̧ji̧ri̧ pio ji̧ri̧ mȩnȩro̧ pio ju̧i̧iäpȩmo̧ chjai̧dëri̧ japea̧ oaiä —yo̧mȩrȩ ni̧bä chjaoa̧dejȩrȩ.
5Ado pio ju̧i̧ ta̧rëa̧ oaiä, Niniveräpȩ cjo̧ro̧ji̧ri̧ pio judiro̧ ana̧ri̧ jo̧rȩtaji̧ri̧pea̧dirȩ. Ado chjaodëri̧ quëna̧ji̧ri̧pea̧diro̧jo̧ȩ Ütë tjamo̧ ja̧ ma̧ȩ oa. Ado judiro̧ chjai̧dëri̧ japea̧ pio ju̧i̧ chjiari ana̧ri̧ jo̧rȩta̧ oaiä, jabechji̧ juradëji̧ri̧pea̧dirȩ. Ado ma̧i̧ da töcamȩ chjibora̧ pio ju̧ri̧ra̧ ano̧ mire ina̧ji̧ri̧pea̧dirȩ peaja̧di. Aja̧, ja̧di dari̧ japarëreji̧ri̧dirȩ jënȩro̧ gitori̧ jo̧rȩta̧ pio ju̧i̧ chjiari chjadëri̧ na̧rȩpea̧ oa, jënȩro̧ ano̧ mire jo̧rȩta̧ pio ju̧i̧ chjiari chjadëri̧ na̧rȩpea̧ oa. Aja̧, ütëborë ja̧di dari̧ japarëreji̧ri̧dirȩ, o judiro̧mo̧rȩdë. Tjamo̧ cjo̧ro̧ji̧ri̧ judiro̧ ado mu̧i̧tjoi̧ pio judiro̧borë japa marëreji̧ri̧dirȩ. 6Ado japamitë chjätä ëte Ninive cjo̧ro̧mȩ ütë pio judiborë ta̧rërëremȩdejȩ Jona̧ ju̧i̧. Ado ana̧ri̧ jo̧rȩtamȩrȩ chjaodëri̧ birarëremȩde ütërë charea̧ ba chia tjamo̧ri pio judiri. Ado ma̧i̧ da töcamȩ chjibora̧ pio ju̧ri̧ra̧ ano̧ mire ina̧rëremȩde peaja̧di. Ado pio ju̧i̧ uëri chadärärëremȩde cjo̧dë tja maräpȩ, achäcä maräpȩ. Jabechji̧ ja̧di dari̧ japarëremȩde jënȩ ano̧ mire jo̧rȩta̧ pio ju̧i̧ chjiari chjadëri̧ na̧rȩpea̧ oa.
10Ado Ütë tjamo̧ judi darëremȩdejȩrȩ. Ano̧ mire jo̧rȩtaji̧ri̧ oa darëremȩdejȩrȩ. Chjai̧dë oa japadëji̧ri̧pea̧ji̧ri̧ oa darëremȩdejȩrȩ. Pio ju̧i̧iä ja̧bo tänȩdëa̧dejȩrȩ. Jabechji̧ judiro̧ chjai̧dëri̧ japea̧ ba oa bape chjaotärea̧ ji̧ ano̧ mire jo̧rȩtamȩpea̧de Ütë tjamo̧ judi. Pio ju̧i̧iä eami̧ oa japadëa̧de. Aja̧, jënȩ jabërä Jona̧ ju̧i̧iäpȩmo̧ yo̧a̧ pio ju̧i̧ japadërëremȩde.
Currently Selected:
Jona̧ 3: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
