Jona̧ 1
1
Jona̧ judi a̧dë goadi baätarëremȩdejȩ Jeova ju̧i̧
1Ado Jeova judi ma̧ȩ yürürëremȩdejȩ Jona̧ quȩmȩ pio ju̧i̧iäpȩmo̧, Amitai pio ju̧i̧ ja̧ joja pio ju̧i̧iäpȩmo̧. Ja̧di ta̧rëri̧ yo̧mȩrȩ yo̧rëremȩdejȩ:
2—Danȩ, cjitëno̧vä. Ninive quȩmȩ bë ma̧ri̧räpȩ jätä earequedemȩ, bë ma̧ri̧ ba chia tjamo̧räpȩ. Jabechji̧ ji̧dë ma dae chjaorequede davä judiro̧ a̧dë chjäte chjai̧dëri̧ japea̧ pio ju̧i̧. Pio ju̧i̧iä ca̧ ërecjia̧ üdë pio ji̧ri̧iäpȩmo̧ acji cjatäpai̧ dadejȩrȩ. Pio ju̧i̧iä jabechji̧ jätä earequedemȩ pio ji̧ri̧iäpȩmo̧ chjadëri̧ a̧ra̧ano̧pea̧ oa —yo̧mȩrȩ yo̧rëremȩdejȩ Jeova judi Jonás pio ju̧i̧iäpȩmo̧.
3Jabo Jona̧ judi Ütë tjamo̧ ja̧ ma̧ȩ oa chjadëri̧ ta̧rëdiätärea̧ ji̧, Ninive quȩmȩ bë ma̧ri̧räpȩmo̧ chjaodëri̧ jätärea̧ ji̧, cjäri̧ made, jädërëremȩde. Ado cja̧rȩmo̧ chiriräpȩmo̧ jäëno̧tarëremȩde. Jabechji̧ Jeova pio ju̧i̧ a̧dë jachipadärätämi̧ cjiamȩrȩ a̧dë baätarëremȩdejȩ. Ado pio ju̧i̧iä Jope quȩmȩ bë ma̧ri̧räpȩ go̧düdärärëremȩde ui ana̧ yuroro cjiamȩ bë ma̧ri̧räpȩ. Ado ju̧ri̧pȩ go̧düdärämȩrȩ dadäräa̧dejȩ chara ana̧ oa, Tachi quȩmȩ bë ma̧ri̧räpȩmo̧ baäpea̧ querediämȩ oa. Ado chara ana̧ra̧ järea̧ ba oa ba ano̧ ëte chjaodëri̧ bua̧de. Aja̧, Jeova pio ju̧i̧ a̧dë baäpea̧ oa bueno̧tarëremȩde. Ado chara ana̧ üdë dabu yuroro pjurërërea̧ ji̧, go̧dürëremȩde ui ana̧räpȩ.
4Jabo Jeova judi uapai̧ dari̧ pupuripa tänȩrëremȩdejȩ ui ana̧räpȩ. Ado gö̧ma̧ üdë ma̧i̧ da tjamo̧ oaiä, chara ana̧ üdë yarepai̧ dari̧ cjiarëremȩde. 5Pio ju̧i̧iä uapa tjamo̧pea̧dirȩ chara ana̧rä ja̧bepaji̧ri̧ pio judiro̧, dacho üdë bërebërea mape bagari̧. Ado jibëa̧ ütëbea pio ju̧i̧iäpȩmo̧, judiro̧ boi̧chji̧ri ja̧ quëna̧rërea̧ ütë pio ju̧i̧iäpȩmo̧ goë tuti cjo̧dëtarëreji̧ri̧diro̧jo̧ȩ pio jibë chjiari tuti japatä. Ado ja̧dëa ji̧ chara ana̧ pio ju̧i̧ bücjüchjaparȩpea̧ oa, jabechji̧ judiro̧ chia baäa̧ pio ju̧i̧ aeno̧a̧diro̧jo̧ȩ uiräpȩmo̧. Jabo pio ju̧i̧ ja̧ cjararä, Jona̧ judi birarëremȩde chara ëteräpȩ cjiamȩ jo̧ tjoräpȩ ju̧ri̧ a̧rȩpea̧ oa. Ado chjaodëri̧ mo̧a̧mȩpea̧de.
6Ado chara ana̧ tjamo̧ tai̧mȩ judi Jona̧ pio ju̧i̧ daea̧ oaiä, na̧rȩno̧a̧dejȩ. Ado bëdüa̧mȩ oa iëno̧ë ta̧rëa̧dejȩ:
—¿Jabo tjana̧pea̧ oa mo̧a̧ cjianȩ? Danȩ, na̧ Ütë pio ju̧i̧iäpȩmo̧ goë tuti cjo̧dëno̧jo̧ȩ, judi pio ibëiäpȩmo̧ cjäri̧ri̧ cjia dapea̧ oa, a̧ro̧rȩ uirä jemu̧i̧ ja̧bochea oa. Cjo̧dëno̧jo̧ȩ —yo̧a̧dejȩ.
7Ja̧dëa ji̧ chara ana̧rä ja̧bepaji̧ri̧ judiro̧ uapa tjamo̧ji̧ri̧rȩ jibëa̧ dëbëti̧ra̧ yo̧ji̧ri̧pea̧dirȩ:
—Danȩrȩ, dabarea̧mi̧dë pio ju̧i̧ chjadëri̧ dabapea̧ oa, ta̧dëra̧ pio ju̧ri̧ra̧ chjaocjiami̧ dari̧ japatäreji̧ri̧rea̧rȩ chjadëri̧ ütarapea̧ oa. 'Aja̧, pio judidida, pio judi chjai̧dëri̧ japea̧ oaiä chjai̧dë oa chjätäa̧ro̧da, pio judi jibëa̧ Ütë pio ju̧i̧iäpȩmo̧ chjai̧dëri̧ japea̧diji̧da, pio ju̧i̧iä uapai̧ dari̧ chjätäa̧ro̧da' quëna̧ dabapea̧ oa japatäreji̧ri̧rea̧rȩ ta̧dëra̧ —yo̧a̧dirȩ.#1:7 Danȩrȩ ca̧ pumȩ, no̧mȩ cjo̧ro̧rëreji̧ri̧ judiro̧ ta̧dë bori̧ra̧ pio ju̧ri̧ra̧ chjaocjiami̧ dari̧ japarëreji̧ri̧dirȩ tjamo̧ri̧ chjaocjiadëji̧ri̧rȩ. Dabarea̧mi̧dë pio ju̧i̧ chjadëri dabapea̧ oa, pio judi chjai̧dëri̧ japea̧ jirodida quëna̧ dabapea̧ oa japarëreji̧ri̧dirȩ. Jabechji̧, pumȩ ütëbo ja̧ quȩ pio ju̧i̧ go̧ȩparëreji̧ri̧dirȩ ta̧dërä. Ja̧dëa ji̧, ta̧dë oa jibëa̧ ichira̧ mitëji̧ri̧rȩ, goë jëdëji̧ri̧rȩ gua gua cürëa̧diro̧jo̧ȩ ta̧dë oa. Ja̧di dari̧ japa ëte quibë cürëa̧diro̧jo̧ȩ daburäpȩmo̧. Ja̧dëa ji̧, jibëa̧ dacho oa ina̧ji̧ri̧rȩ mitëa̧diro̧jo̧ȩ cja̧rȩmȩ ta̧dë oa. Ado pumȩ ja̧ quȩ pio ju̧i̧ go̧ȩ ni̧bäa̧ oaiä, Aja̧, pio judidida, chjai̧dëri̧ japea̧mȩ pio judida quëna̧ jo̧rȩtaji̧ri̧pea̧dirȩ.
Ado pio ju̧i̧iä ja̧di dari̧ japarëreji̧ri̧dirȩ ütëborë. Ado ta̧dë oa ütarë daea̧ oaiä, 'Aja̧, Jona̧ pio judida, jibëa̧ Ütë pio ju̧i̧iäpȩmo̧ chjai̧dëri̧ japea̧ jirodiji̧da' quëna̧ jo̧rȩtaji̧ri̧rȩ cjoai̧tä daji̧ri̧pea̧diro̧jo̧ȩ ütëborë. 8Ado pio ju̧i̧iä ana̧ri̧ jo̧rȩtaji̧ri̧rȩ iëno̧ iëno̧ cjia̧diro̧jo̧ȩ, ja̧di ta̧rëri̧ yo̧ji̧ri̧rȩ:
—Jabo chjadëri̧ yo̧ibe. ¿Tjana̧ ju̧i̧iä ma̧i̧ da chjai̧dë oa chjätärea̧rȩ? ¿Chjiaiäpȩmo̧ chjai̧dë oa japea̧ oa uapai̧ dari̧ cjiarea̧rȩ? ¿Tjana̧pea̧ oa tai̧nȩ pio ibë nö̧ta? ¿Yö̧ta quȩmȩ chiririmȩrenȩ? ¿Tjana̧ pumȩrenȩ? Chjadëri̧ yo̧diibe —yo̧a̧diro̧jo̧ȩ.
9Ado pio jȩaiäpȩmo̧ iëno̧ iëno̧ cjia̧ oaiä, jabechji̧ Jona̧ judi dëbë yo̧a̧dejȩrȩ:
—Danȩrȩ, goadidëparequededibe. Jabechji̧ ebereo quȩmȩ pumȩrequede cüdë. Ado Jeova quȩmȩ pio ju̧i̧iäpȩmo̧ chjacjiamȩri̧ jo̧rȩtamȩrȩ cjo̧ro̧requede, a̧dëräpȩmȩ oa, Ütë tjamo̧ pio ju̧i̧. Aja̧, chiri chjö̧na̧i̧därä oa pareapamȩ pio judide, ui ana̧bo —yo̧a̧dejȩrȩ.
10Ado ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ jënȩ goadi ma̧na̧tea̧ pio ju̧i̧ chjiari, Jeova pio ju̧i̧ a̧dë goadi ma̧na̧tea̧ pio ju̧i̧ chjiari.
Ado chara ana̧rä ja̧bepaji̧ri̧ pio judiro̧ pio ju̧i̧ ta̧rëa̧ oaiä, cjäri̧ madirȩ ji̧dë u̧i̧ uapaji̧ri̧pea̧dirȩ uapa tjamo̧rërea̧ ji̧. Ado yo̧a̧diro̧jo̧ȩ:
—Jabo cjäri̧ marenȩ, ma̧i̧ dari̧ japea̧renȩ. Ja̧di dari̧ japadëa̧täremȩrenȩ —yo̧a̧diro̧jo̧ȩ.
11Ado tocoi̧mi̧ cjatäcjiatärea̧ ji̧, ji̧dë u̧i̧ uapai̧ dari̧ pupuriparëremȩdejȩrȩ mai̧ da gö̧ma̧pe bagari̧. Ado pio ju̧i̧iä chara ana̧rä ja̧bepaji̧ri̧ judiro̧ iëno̧ë ta̧rëa̧diro̧jo̧ȩ Jona̧ ju̧i̧:
—Jabo danȩ, ¿tjana̧ japatäreji̧ri̧rea̧ro̧mȩ? A̧ro̧rȩ ütëborë ja̧bopai̧ dari̧ cjiarea̧rȩ. Chara üdë yarëpai̧ dari̧ cjiadiibe. Ado pio mȩnȩrenȩ na̧ Ütë pio ju̧i̧iäpȩmo̧ chjai̧dëri̧ japea̧mȩ judi. Pio ju̧i̧iä iëno̧ë ta̧rërea̧ro̧mȩ. ¿Tjana̧ japatäreji̧ri̧rea̧ro̧mȩ cjatäcjiarea̧ dapea̧ oa? Chjadëri̧ yo̧ibe —yo̧a̧diro̧jo̧ȩ.
12Ado Jona̧ judi dëbë yo̧a̧dejȩrȩ:
—Tjana̧ japadë, jabechji̧ arë cürëchji̧coe uiräpȩmo̧. Ja̧di dari̧ japea̧ oaiä, jabechji̧ goepa cjiapade ma̧i̧ dari̧ pupuripamȩ üdë. Jabechji̧ pio cüdë chjai̧dëri̧ japea̧ oaiä goae tarari̧ pupuripadidibe. Pio ju̧i̧ tjamo̧ri̧ dabarequede. Pio ju̧i̧iä yo̧requededibe. Jabechji̧ uiräpȩmo̧ idë cürëchji̧coe —yo̧a̧dejȩrȩ.
13Jabo cjäri̧ madiro̧jo̧ȩ, Jona̧ pio ju̧i̧ uiräpȩmo̧ idë cürëdëri̧ cjiaji̧ri̧rȩ ado mitëno̧a̧diro̧jo̧ȩ tai̧to oa. Ado ji̧dë u̧i̧ to̧bari̧ tai̧pea̧ ji̧ järi tjamo̧pea̧dirȩ chara ana̧ oa chjadëri̧ baädärä tänȩpea̧ oa chiriräpȩmo̧. Jabo cjäri̧ madirȩ, dae jädëa̧dirȩ. Jabechji̧ pupuripamȩ üdë a̧dë chjäte pjaepea̧ oaiä, uapai̧ dari̧ jape chjaoa̧ oaiä, eami̧ oa japarea̧ dadëa̧dirȩ. Jabechji̧ ütëborë ja̧bopai̧ dari̧ cjiarëreji̧ri̧dirȩ. 14Ado pio ju̧i̧iä Jeova pio ju̧i̧iäpȩmo̧ ni̧bäji̧ri̧rȩ yo̧a̧diro̧jo̧ȩ:
—Danȩ Jeova, a̧ro̧rȩ pio yoa pumȩ oa uiräpȩmo̧ idë cürërä judi, jabechji̧ cjäri̧ri̧ cjia daibe. Ja̧di dari̧ japea̧ ba oa ba eadëibe. Ado pio yodëje pio mȩaiäpȩmo̧ chjai̧dëri̧ japadëa̧rä, chjadëri̧ dabarenȩ. Jabechji̧ Jeova pio judirenȩ. Ado pio mȩnȩ tänȩa̧ oa jabechji̧ idë cürëparea̧ro̧jo̧ȩ —yo̧a̧diro̧jo̧ȩ.
15Ado ja̧di dari̧ yo̧ ëte, mitëa̧diro̧jo̧ȩ Jona̧ ju̧i̧. Ado uiräpȩmo̧ idë cürëa̧diro̧jo̧ȩ. Ado chjaodëri̧ goepapea̧de ui üdë. 16Pio ju̧i̧ daea̧ oaiä, chara ana̧rä ja̧bepaji̧ri̧ pio judiro̧ a̧dë chjäte ba chiari̧ jo̧rȩtaji̧ri̧pea̧diro̧jo̧ȩ Jeova pio ju̧i̧. Ado goe gu̧rori̧ cäë yürürëreji̧ri̧diro̧jo̧ȩ. Ado yo̧ë cji̧däa̧diro̧jo̧ȩ pio ju̧i̧ ja̧ oa ja̧bëpe yürüpea̧ oa pio ju̧i̧ chjiari. 17Ado Jona̧ judi uirä jemu̧i̧ ja̧botärea̧ ji̧, jemu̧i̧ ja̧bodëa̧de. Jabechji̧ Jeova pio judi cho̧ boi̧dë tjamo̧ oa chjadüa̧ oa codë oa tjürüa̧dejȩ. Ado tjarari̧ do nö̧ta, tjarari̧ gȩnȩ nö̧ta pio jiro cho̧ acärärëremȩde.
Currently Selected:
Jona̧ 1: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
