Juan 16

Jechu ja̧ jadü judiro̧ conȩda̧ oa cjiapea̧ pio ju̧i̧ chjiari jabërä ni̧bä chjaorëremȩdejȩrȩ

1Ado Jechu judi ji̧dë u̧i̧ ni̧bä chjaomȩrȩ a̧de yo̧rëremȩdejȩrȩ jibëa̧ jadü pio ji̧ri̧iäpȩmo̧. Ja̧di ta̧rëri̧ yo̧a̧dejȩrȩ:

—Ja̧di ta̧rëri̧ yo̧mȩrȩ ni̧bä chjaorequededibe ca̧ jadü, mȩnȩro̧ ji̧dë ma chjuari̧ quëna̧pea̧ oa, a̧rȩdärämi̧ dari̧ cjiachea oa —yo̧a̧dejȩrȩ—. 2Danȩrȩ, conȩda oa cjiapanȩrȩ. Mȩnȩro̧ judiorë a̧doparea̧ bëräpȩ a̧dope chjaorërea̧ ji̧, a̧doparea̧ yürüdëpadiro̧dibe. A̧doparea̧ bëräpȩ yu̧a̧rea̧ yürüdëpadiro̧dibe. Ado japamitë chjätä ëte, järipadirȩ davä pio dibë ja̧bo tänȩpea̧ ji̧ —yo̧a̧dejȩrȩ—. Jabechji̧ oëra̧ jo̧rȩtaji̧ri̧rȩ ja̧di dari̧ jo̧rȩtapadirȩ. ‘Aja̧, ja̧bo tänȩtäreji̧ri̧a̧ro̧ji̧ri̧da, Ütë tjamo̧ pio ju̧i̧ ja̧ oa ja̧bepaa̧ro̧da, ado pio jiro pumȩ pio ji̧ri̧ ja̧bo tänȩa̧ üdë goae tjamo̧padiji̧da’ quëna̧ jo̧rȩtapadirȩ davä pio dibë chjiari. 3Jabechji̧ Ama̧i̧ tjamo̧ pio ju̧i̧ dabadë tara, ja̧di dari̧ jo̧rȩtapadirȩ, pio coabo dabadë tara. 4Aja̧, jabërä pio yoa ma̧ȩ oa yo̧requededibe mȩnȩro̧ dabadëchea oa mȩnȩro̧ chjai̧dëri̧ chjätäpea̧ pio ju̧i̧ chjiari. Ado ja̧dëa ji̧ japamitë chjätä ëte mȩnȩro̧ conȩda̧ oa cjo̧ro̧ro, ‘Aja̧, tjamo̧ri̧ yo̧a̧diibëda, judi yo̧a̧mi̧ chjai̧dë oa chjätäa̧ro̧da yaba̧’ quëna̧ jo̧rȩtapanȩrȩ —yo̧mȩrȩ a̧de ni̧bä chjaorëremȩdejȩrȩ jibëa̧ jadü ji̧ri̧ Jechu judi, judiro̧ chjai̧dë oa chjätäpea̧ pio ju̧i̧ chjiari.

Tjo tjamo̧ judi ba chiari̧ ja̧bepapade

Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧:

—Danȩrȩ, cüdë pio dibë nö̧ta pearä ëba cjo̧ro̧rërea̧ ji̧, dibë a̧dë baäpea̧ pio ju̧i̧ chjiari ni̧bä chjaodëa̧requededibe. 5Jabo yaba̧ coa chjadüa̧mȩ pio ju̧i̧iäpȩ baäpea̧ ji̧ querediä tara, jabechji̧ ni̧bä chjaopea̧ chiarequededibe —yo̧a̧dejȩrȩ—. "¿Jabo tjana̧räpȩ baäpanȩ?” yo̧ji̧ri̧rȩ iëno̧ ta̧rëdë marenȩro̧coe. 6Ado yaba̧ cüdë dibë yo̧a̧ pio oaiä, jabechji̧ odai̧ dari̧ jo̧rȩtanȩrȩ. 7Jabo tjamo̧i̧ cjiari̧ yo̧requededibe. Jabechji̧ ji̧dë u̧i̧ chjadëde davä cüdë dibë a̧dë baäpea̧ üdë —yo̧a̧dejȩrȩ—. Tjamo̧ davä. Cüdë baädërä judi, ma̧na̧na̧ra̧dëpadidibe A̧domȩ judi. Jabo cüdë baäa̧rämo̧i̧ chjadürea̧ dapareconȩ Tjo tjamo̧ pio ju̧i̧. 8Ado judi ma̧na̧rä, jabechji̧ chiriräpȩti̧ oa cjo̧ro̧ji̧ri̧ pio ji̧ri̧ coëma cjiari̧ jo̧rȩta tänȩpadejȩrȩ. Tjamo̧ davä. Jënȩro̧ chjai̧dëri̧ japea̧ pio ju̧i̧ chjiari, ado coëma cjiari̧ cjo̧ro̧rea̧ pio ju̧i̧ chjiari jo̧rȩta tänȩpadejȩrȩ. Ado Ütë tjamo̧ judi bape chjaopea̧ pio ju̧i̧ chjiaribo jo̧rȩta tänȩpadejȩrȩ, ana̧ri̧ jo̧rȩta tänȩmȩrȩ —yo̧a̧dejȩrȩ—. 9Tjamo̧ davä. Pumȩ judiro̧ chjai̧dëri̧ japea̧ pio ju̧i̧ chjiari jo̧rȩta tänȩpadejȩrȩ, jënȩro̧ pio coaiäpȩmo̧ quëna̧dë oaiä. 10Ado peaja̧di jo̧rȩta tänȩpadejȩrȩ pio coaiä jabechji̧parȩa̧ oa cjiapea̧ pio ju̧i̧ chjiari. Danȩrȩ, cüdë Ama̧i̧ tjamo̧ pio ju̧i̧iäpȩ baäa̧rä, dadëparenȩro̧coe. Jabo cüdë pio ju̧i̧iäpȩ baäa̧rä, chjadüpareconȩ Tjo tjamo̧ pio ju̧i̧. Ado pio judi chjadëri̧ jo̧rȩta tänȩpadejȩrȩ pumȩ ji̧ri̧ jabechji̧parȩa̧ oa cjiapea̧ pio ju̧i̧ chjiari, pio coaiä jabechji̧parȩa̧ oa cjiapea̧ pio ju̧i̧ chjiari. 11Ado Tjo tjamo̧ judi ma̧na̧rä, peaja̧di jo̧rȩta tänȩpadejȩrȩ pumȩ ji̧ri̧ bape chjaopea̧ pio ju̧i̧ chjiari. Jabechji̧ pio yoa chirirä tjamo̧ yo̧mȩ judi bape chjaopea̧ maearë cjia tara, Ichiae pio judi bape chjaopea̧ maearäpȩ cjia tara, jabechji̧ pio ju̧i̧ chjiari̧bo chjadëri̧ jo̧rȩta tänȩpadejȩrȩ pumȩ ji̧ri̧ —yo̧a̧dejȩrȩ Jechu judi.

12Ado ji̧dë u̧i̧ yo̧mȩrȩ a̧de ni̧bärëremȩdejȩrȩ jibëa̧ jadü ji̧ri̧:

—Ado yaba̧ cjiadiäparequede. Pio dibë ji̧dë u̧i̧ ni̧bä chjaotärea̧ ji̧, jabë pjärämȩ cjiadiäa̧mȩ pio ju̧i̧bo ni̧bä chjaotärea̧ ji̧, jabechji̧ cjiadiäparequede —yo̧a̧dejȩrȩ—. Dibëa̧ chji̧ üdë tjuri cjiami̧ dari̧ cjia oaiä, chjadëri̧ dabaparea̧mi̧dë oaiä, jabechji̧ cjiadiäparequede. 13Jabo Tjo tjamo̧ pio judi ma̧na̧rä, are iëmi̧ dari̧ daba tänȩpadidibe tjamo̧i̧ cjiari̧ baämȩ ma̧ȩ chjö̧na̧i̧ oa. Jabechji̧ yabo ëba baämȩmi̧ dari̧ jo̧rȩta tänȩpadidibe. A̧ra̧ano̧padidibe. Ado dibë a̧ra̧ano̧ro, jibëa̧ ma̧na̧ri̧ jo̧rȩtamȩrȩ a̧ra̧ano̧dëpadidibe, jabo Ütë tjamo̧ pio judi yürüa̧ duri maea oa a̧ra̧ano̧padidibe. Peaja̧di dabarea̧ yürüpadidibe jabë ma̧na̧dëa̧ pio ju̧i̧ chjiari, ji̧dë duri oa ma̧na̧pea̧ pio ju̧i̧ chjiari. 14Aja̧, Tjo tjamo̧ pio judi a̧ra̧ano̧padidibe. Cüdë a̧ra̧ano̧a̧ pio ju̧i̧ a̧ra̧ano̧padidibe, ca̧ chjacjiamȩrea̧ üdë chjadëri̧ na̧rȩa̧ oa cjiapea̧ oa —yo̧a̧dejȩrȩ—. 15Danȩrȩ, ca̧ Ama̧i̧ ja̧ üdë chjö̧na̧i̧rȩ ca̧ea̧bode. Ado pio ju̧i̧iä yo̧a̧requededibe pio yabo. Tjo tjamo̧ judi pio coaiä ta̧rëa̧ duri maea oa yo̧padidibe —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧.

Jechu judi ja̧boa̧ oaiä ana̧ri̧ jo̧rȩtapadirȩ

16Ado Jechu judi jibëa̧ jadü pio ji̧ri̧ ji̧dë u̧i̧ ni̧bä chjaomȩrȩ a̧de yo̧rëremȩdejȩrȩ:

—Danȩrȩ, japamitë boi̧chji̧ chjätä ëte, dadëparenȩro̧coe. Ado ja̧dëa ji̧ ji̧dë duri oa ado chjereno̧ daparenȩro̧coe —yo̧a̧dejȩrȩ Jechu judi.

17Jabo jibëa̧ jadü judiro̧ orë pio ju̧i̧ ta̧rëa̧ oaiä, ‘¿tjana̧ yo̧cjivadi’ quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

—¿Jabo tjana̧ yo̧de? —iëno̧ë ta̧rëa̧dirȩ—. “Japamitë boi̧chji̧ chjätä ëte dadëparenȩro̧coe, jabo ji̧dë duri oa ado chjereno̧ daparenȩro̧coe, ca̧ Ama̧i̧ pio ju̧i̧iäpȩ baäpa tara” yo̧a̧ üdë, ¿tjana̧ yo̧de? 18Judi “japamitë boi̧chji̧” yo̧a̧rea̧ üdë, ¿tjana̧ yo̧de? 'Aja̧, pio ju̧i̧ yo̧ jirodiibëda' quëna̧ dabadë marea̧rȩ —yo̧a̧dirȩ.

19Jabo Jechu judi dabarëremȩde pio ji̧ri̧ chjiari. ‘Aja̧, iëno̧ë ta̧rëtämi̧ cjiadiro̧coada’ quëna̧ dabamȩrȩ ja̧di ta̧rëri̧ yo̧a̧dejȩrȩ:

—Danȩrȩ, cüdë dibë pio yabo yo̧a̧ pio ju̧i̧ chjiari jo̧rȩta jironȩrȩ. “Japamitë boi̧chji̧ chjätä ëte dadëparenȩro̧coe” yo̧a̧ pio ju̧i̧ chjiari jo̧rȩta jironȩrȩ. Ado “Ji̧dë duri oa ado chjereno̧ daparenȩro̧coe” yo̧a̧ pio ju̧i̧ chjiaribo jo̧rȩta jironȩrȩ. 20Danȩrȩ, tjamo̧i̧ cjiari̧ yo̧requededibe —yo̧a̧dejȩrȩ—. Pumȩ judiro̧ pio coa ja̧bo tänȩa̧ duri oa gito ana̧ri̧ jo̧rȩtapanȩrȩ. Ena̧diä ëna̧diä ejaro cjiapanȩrȩ. Jabo dai chiriräji̧ri̧ judiro̧, jabechji̧ ma̧ chiadëri̧ cjiapadirȩ. Jabechji̧ pio coa ja̧bo tänȩa̧ oaiä, ma̧ chiadëri̧ cjiapadirȩ. Jabo mȩnȩro̧ odai̧ tarari̧ jo̧rȩtapanȩrȩ. Jabo danȩrȩ, cjatäcjie jo̧rȩtarea̧ dapanȩrȩ ma̧ chiadëri̧ cjiari̧ cjo̧ro̧rea̧mi̧ dari̧. 21Danȩrȩ, iei̧ jini̧ bo arapea̧ ji̧ querediärä, gitori̧ jo̧rȩtanȩ ana̧ri̧ tara̧ pio ju̧i̧iä. Jabo ja̧dëa ji̧ ara̧rä, cjatäcjie jo̧rȩtarea̧ danȩ ma̧ chiadëri̧ cjiape bagari̧. Jabechji̧ boi̧chji̧ üdë ara̧ oa cjia̧ oaiä ma̧ chiadëri̧ cjianȩ. 22Peaja̧dimi̧ dari̧ cjiapanȩrȩ mȩnȩro̧. Gito ana̧ri̧ jo̧rȩtanȩrȩ yaba̧, cüdë dibë a̧dë baäpea̧ yo̧a̧ oaiä. Jabo danȩrȩ, daparequededibe ado chjereno̧ —yo̧a̧dejȩrȩ—. Ado judirä, a̧dë chjäte ma̧ chiadëri̧ cjiapanȩrȩ, o judiro̧ dibë tja̧rȩparȩrea̧mi̧dëri̧, o judiro̧ dibë ma̧ chiadëri̧ cjiadëpe baga tänȩrea̧mi̧dëri̧. 23Ado pio jiro doro ji̧dë duri oa A̧domȩ pio judi dibëa̧ icjararä bëpea̧rä, jabechji̧ pio coaiä eami̧ oa cjo̧dëdëparenȩro̧coe. Jabechji̧ pio coaiä irä cjo̧dë chjaorërea̧ ji̧, cjo̧dëdëparenȩro̧coe, jabo Ama̧i̧ tjamo̧ pio ju̧i̧iä ano̧ mire cjo̧dëparenȩro̧jo̧ȩ. Tjamo̧ri̧ yo̧requededibe —yo̧a̧dejȩrȩ—. Ca̧ quȩrä cjo̧dëparenȩro̧jo̧ȩ Ama̧i̧ tjamo̧ pio ju̧i̧iä. Ado ca̧ quȩrä cjo̧dëa̧mi̧ yürüpadidibe. 24Ado pio ju̧i̧iä jabechji̧, mȩnȩro̧ ca̧ Ama̧i̧ ju̧i̧iä ca̧ quȩrä eami̧ oa cja̧rȩmȩ co cjo̧dëdërërea̧ ji̧, jabechji̧ cjo̧dëchji̧jo̧ȩ yaba̧, mȩnȩro̧ mitërea̧ dapea̧ oa. Aja̧, mȩnȩro̧ a̧dë chjäte ma̧ chiadëri̧ cjiarea̧ dapea̧ oa, pjärämȩ cjiadiädëri̧ ma̧ chiadëri̧ cjiari̧ jo̧rȩtapea̧ oa, jabechji̧ cjo̧dëchji̧jo̧ȩ —yo̧mȩrȩ a̧de ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jechu judi boadärärëremȩdejȩ dai chirirä ja̧ jo̧rȩtarea̧ pio ju̧i̧

25Ado Jechu judi jibëa̧ jadü ji̧ri̧ ji̧dë u̧i̧ ni̧bä chjaomȩrȩ a̧de yo̧rëremȩdejȩrȩ:

—Danȩrȩ, cüdë dibë ni̧bä chjaoa̧ ji̧, na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaoa̧requededibe —yo̧a̧dejȩrȩ—. Jabo japamitë chjätä ëte, ja̧di dari̧ ni̧bä chjaodëparequededibe. Jabechji̧ ja̧di dari̧ ni̧bä chjaorërea̧ ji̧, chjadë maearä cjiarea̧mi̧ dari̧ ano̧ mire ni̧bä chjaoparequededibe Ama̧i̧ tjamo̧ pio ju̧i̧ chjiari —yo̧a̧dejȩrȩ—. 26Ado pio jiro do üdë ma̧na̧na̧ra̧rä, jabechji̧ Ama̧i̧ pio ju̧i̧iä cjo̧dë chjaoparenȩro̧jo̧ȩ ca̧ quȩrä. Aja̧, pio coaiämo̧i̧ cjo̧dë chjaorërea̧ ji̧, Ama̧i̧ tjamo̧ pio ju̧i̧iäbo cjo̧dëparenȩro̧jo̧ȩ. Ado pio ju̧i̧iä ca̧ Ama̧i̧ ju̧i̧iä pio dibë chjiari ji̧dë ma cjo̧dërërea̧ ji̧, cjiadiämi̧ dari̧ cjiadiäparequede. Jabechji̧ pio mȩnȩro̧ Ama̧i̧ tjamo̧ pio ju̧i̧iä cjo̧dërea̧ dapanȩrȩ —yo̧a̧dejȩrȩ—. 27Aja̧, Ama̧i̧ tjamo̧ pio ju̧i̧iä cjo̧dëparenȩro̧jo̧ȩ pio dibë tjamo̧ri̧ eamȩ pio ju̧i̧iä. Jabechji̧ mȩnȩro̧ pio coa ea tjamo̧ tara, mȩnȩro̧ pio coa chjiari coëma cjiari̧ quëna̧ tara, ‘Ama̧i̧ tjamo̧ pio judi chjadüa̧ oa ma̧na̧diibëda’ quëna̧ tara, jabechji̧ ea tjamo̧didibe Ama̧i̧ tjamo̧ judi. 28Aja̧, Ama̧i̧ tjamo̧ pio judi chjadüa̧ oa birë ma̧na̧requede —yo̧a̧dejȩrȩ—. Birë ma̧na̧requede dai chiriräpȩ cjo̧ro̧pea̧ oa. Jabo pio yoa chiri oa a̧dë baäpareconȩ ado chjereno̧, Ama̧i̧ pio ju̧i̧iäpȩ baäpea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧.

29Pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧diro̧jo̧ȩ Jechu jadü judiro̧:

—Aja̧ chjadë maeade yaba̧ —yo̧a̧diro̧jo̧ȩ—. Jabechji̧ chjadë maeari̧ ta̧rëa̧rea̧ro̧mȩ mȩnȩ na̧rȩrea̧ ma̧ȩdëra̧ ni̧bä chjaoa̧ oaiä. 30Ado pio ju̧i̧iä ji̧dë u̧i̧ na̧e chiapea̧rea̧rȩ pio mȩa chjiari. 'Jabechji̧ chjö̧na̧i̧därä oa dabamȩdida’ quëna̧ jo̧rȩtaji̧ri̧rȩ na̧e chiapea̧rea̧rȩ yaba̧ pio mȩa chjiari —yo̧a̧diro̧jo̧ȩ—. Jabechji̧ pumȩ judiro̧ mȩa jabë iëno̧ë ta̧rëdëa̧rä dabarenȩ pio ji̧ri̧ chjiari, judiro̧ mȩa iëno̧ë ta̧rëpea̧ pio ju̧i̧ chjiari. Ado pio ju̧i̧ daba̧ oaiä, jabechji̧ ji̧dë u̧i̧ chjuari̧ quëna̧rea̧ro̧mȩ yaba̧, Ütërë chjadüa̧ oa ma̧na̧mȩ pio ju̧i̧ —yo̧a̧diro̧jo̧ȩ Jechu ju̧i̧ jibëa̧ jadü judiro̧.

31Ado pio ju̧i̧ ta̧rëa̧ oaiä, Jechu judi iëno̧ë ta̧rëa̧dejȩrȩ:

—¿Tjamo̧ri̧ quëna̧renȩro̧coe yaba̧? 32Danȩrȩ, mȩnȩro̧ chjuchjupechäpea̧ do üdë quërediä tjamo̧didibe. Jabechji̧ ma̧na̧na̧ra̧didibe yaba̧. Ca̧ea̧ma̧i̧ cjiadiäri̧ oëra̧ti̧ oa a̧dë bagurëno̧panȩro̧coe dibëa̧ bëräpȩ. Jabo tjamo̧ri̧ ca̧ea̧ma̧i̧ cjiadiädëparequede —yo̧a̧dejȩrȩ—. Jabechji̧ Ama̧i̧ tjamo̧ judi pio coadimȩ tara, ca̧ea̧ma̧i̧ cjiadiädëparequede. 33Ado pio coadimȩ tara, ja̧di ta̧rëri̧ ni̧bä chjaorequededibe mȩnȩro̧ pio coaiä chji̧ goaera̧ ma̧ chjupi̧ cjiari̧ jo̧rȩtarea̧ dapea̧ oa. Danȩrȩ, dai chirirä ja̧ jo̧rȩtarea̧ra̧ jo̧rȩtaji̧ri̧ judiro̧, dëdë, conȩdapadiro̧dibe. Jabo ja̧di dari̧ japea̧räbo, järichji̧vä. Uapadëchji̧vä. Jabechji̧ dai chirirä ja̧ chjai̧dë pio ju̧i̧ boadäräa̧reconȩ chjö̧na̧i̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Currently Selected:

Juan 16: Pume

Highlight

Copy