Juan 15

Jechu judi to tarumi̧ da tara, pio ju̧i̧iämo̧i̧ cjo̧ro̧täreji̧ri̧rea̧rȩ

1Ado Jechu judi ado ni̧bärëremȩdejȩrȩ jibëa̧ jadü ji̧ri̧. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

—Danȩrȩ ca̧ jadü, uva to taru tjamo̧mi̧ dari̧ cjiarequede —yo̧a̧dejȩrȩ—. Ado ca̧ Ama̧i̧ judi pio jiro to oa jidamȩmi̧ dade. Tjado jidamȩmi̧ dade. 2Ado eami̧ a̧ üdë jurarea̧ chiadërä judi, jabechji̧ tuti dedejȩ. Jabo jurarea̧ chiamȩ a̧ pio ju̧i̧ chjadëri̧ jidadejȩ. Chjadëri̧ jëdano̧dejȩ chjacjiamȩri̧ cjiapea̧ oa, ji̧dë u̧i̧ ji̧ra̧ oa chiapea̧ oa. Pio ju̧i̧iä oëra̧ baämȩ a̧ bori̧ pio ji̧ri̧ ütara̧mi̧ tuti dedejȩrȩ, to üdë coëmape bagapea̧ oa, a̧dë chjäte ji̧ra̧ri̧ chiape jäpea̧ oa. 3Ado peaja̧dimi̧ dari̧ cjianȩrȩ cüdë dibë a̧ra̧ano̧a̧ ma̧ȩ pio ju̧i̧iä. Peaja̧di jëdano̧a̧ oa cjianȩrȩ —yo̧a̧dejȩrȩ—. Peaja̧di chjacjiamȩri̧ cjiami̧ dari̧ cjianȩrȩ. 4Danȩrȩ ca̧ jadü, ca̧ea̧ri ja̧nȩrȩ. Ado peaja̧di dibëa̧ri ja̧requede. Pio ju̧i̧iä ji̧dë ma taruri pio judiri a̧ji̧ri̧mi̧ dari̧ cjo̧ro̧täreji̧ri̧nȩrȩ —yo̧a̧dejȩrȩ—. To a̧ üdë jibëa̧ma̧i̧ cjiarä judi, taruri pio judiri ja̧dëmi̧ dari̧ cjiarä judi, jurarea̧ oa chiarea̧mi̧dëde. Jabo taruri pio judiri cjiarä judi, jurarea̧ ji̧ra̧ oa chiapade. Peaja̧dimi̧ dari̧ cjianȩrȩ mȩnȩro̧. Dibëa̧ma̧i̧ cjiami̧ dari̧ cjiarä judi, ca̧ea̧ri ja̧dëji̧ri̧mi̧ dari̧ cjiarä judi, jabechji̧ jurarea̧ chiadëji̧ri̧mi̧ dari̧ cjiadiäpanȩrȩ. Jabo pio coaiä cjo̧ro̧rä judi, taruri pio judiri a̧ji̧ri̧mi̧ dari̧ cjo̧rorä judi, jabechji̧ jurarea̧ ji̧ra̧ tjamo̧ oa chiaji̧ri̧mi̧ dari̧ cjo̧ro̧panȩrȩ —yo̧a̧dejȩrȩ.

5—Danȩrȩ ca̧ jadü, uva to tarumi̧ dari̧ cjiarequede cüdë. Ado mȩnȩro̧ a̧mi̧ darenȩrȩ. Ado eami̧ pumȩ üdë pio coaiä cjo̧ro̧rä judi, taruri pio judiri a̧mi̧ dari̧ cjo̧ro̧rä judi, jabechji̧ jurarea̧ ji̧ra̧ tjamo̧ oa chiamȩmi̧ dari̧ cjo̧ro̧pade —yo̧a̧dejȩrȩ—. Jabo jibëa̧ma̧i̧ cjiarä judi, pio coaiä cjo̧ro̧dërä judi, jurarea̧ chiadëmȩmi̧ dari̧ cjo̧ro̧pade. Jabechji̧ taruri ja̧dëmȩmi̧ dari̧ cjiadiäpade, eami̧ oa japarea̧ decjiari̧. 6Pio coaiä cjo̧ro̧dëmȩ judi, pio coaiä cjiadiädëmȩ judi, jabechji̧ yarëa̧ oa cjiamȩ a̧mi̧ dade. Ado chjaodëri̧ gaüpe jämi̧ dari̧ cjiade. Ado tjado ana̧mȩ judi ¿tjana̧ japadejȩ gaüpea̧mȩ a̧ oa? Tjana̧dë, a̧dopa ëte cäadejȩ. Jabechji̧ jurarea̧ oa chiarea̧mi̧dë tara caädejȩ. 7Jabo mȩnȩro̧ pio coaiä cjo̧ro̧rä judi, ado ca̧ ma̧ȩ üdë dibëa̧ chji̧rä charä judi, jabechji̧ mȩnȩro̧ ea̧mi̧ cjo̧dëparenȩro̧coe. Ado pio coaiä cjo̧dëa̧mi̧ mitërea̧ dapanȩrȩ —yo̧a̧dejȩrȩ—. 8Danȩrȩ ca̧ jadü, mȩnȩro̧ jurarea̧ ji̧ra̧ tjamo̧ oa chiami̧ dari̧ cjo̧ro̧a̧ oaiä, chjadëri̧ na̧rȩa̧ oa cjiapade ca̧ Ama̧i̧ ja̧ chjacjiamȩrea̧ üdë. Jabechji̧ mȩnȩro̧ ja̧di dari̧ cjo̧ro̧a̧ oaiä, ‘Aja̧, pio judiro̧diro̧da, Jechu ja̧ jadü pio judiro̧ tjamo̧diro̧da’ quëna̧ jo̧rȩtarea̧mi̧ dari̧ jo̧rȩtapadirȩ o judiro̧. 9Aja̧, mȩnȩro̧ ca̧ jadü tara, dibë idami̧ dari̧ earequededibe. Ca̧ Ama̧i̧ pio judi coa eami̧ dari̧ earequededibe. Ado pio ju̧i̧iä yo̧requededibe. Jabechji̧ cüdë dibë ea̧ chja̧oerä cjo̧ro̧chji̧vä. 10Danȩrȩ, cüdë ca̧ Ama̧i̧ pio ju̧i̧ ta̧rëdiäa̧ oaiä cjo̧ro̧requede judi ea̧ chja̧oerä. Ado peaja̧di dari̧ cjo̧ro̧panȩrȩ. Aja̧, cüdë dibë yo̧a̧ pio ju̧i̧ ta̧rëdiäa̧ oaiä, jabechji̧ cüdë ea̧ chja̧oerä cjo̧ro̧panȩrȩ peaja̧di —yo̧a̧dejȩrȩ Jechu judi.

11Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧:

—Aja̧, ja̧di ta̧rëri̧ yo̧mȩrȩ a̧ra̧ano̧requededibe mȩnȩro̧ ma̧ chiadëri̧ cjiari̧ jo̧rȩtaji̧ri̧rȩ cjo̧ro̧pea̧ oa, pio cüdëmi̧ dari̧ —yo̧a̧dejȩrȩ—. Danȩrȩ, a̧dë chjäte ma̧ chiadëri̧ cjiamȩrȩ cjo̧ro̧requede. Ado pio cüdë jo̧rȩtami̧ dari̧ jo̧rȩtatä earequededibe peaja̧di jo̧rȩtarea̧ goaera̧, jabëdiärea̧ decjiari̧ cjiamȩ jo̧rȩtarea̧ra̧, tjuri cjiari̧ cjiamȩ jo̧rȩtarea̧ goaera̧. 12Danȩrȩ, ja̧di ta̧rëri̧ yo̧requededibe mȩnȩro̧ chjadëri̧ ta̧rëdiätä. Jabechji̧ cüdë dibë ea̧ra̧ pio ju̧ri̧ra̧ eachji̧vä dibëa̧ dëbëti̧ra̧ chia —yo̧a̧dejȩrȩ—. 13Ado eami̧ pumȩ üdë jibëa̧ jadü pio ju̧i̧ chjiari ano̧ mire ja̧borä judi, jibëa̧ icjara oa ano̧ mire ja̧bopea̧ oa yürürä judi, jabechji̧ a̧dë chjäte ana̧ri̧ earea̧ra̧ cjo̧ro̧de. Jabechji̧ ado cja̧rȩmo̧rȩ nö̧tarea̧mi̧dëri̧ eamȩrȩ yürüde —yo̧a̧dejȩrȩ—. 14Danȩrȩ, ca̧ pumȩnȩrȩ mȩnȩro̧. Cüdë dibë yo̧a̧ pio ju̧i̧ ta̧rëdiärä judi, jabechji̧ ca̧ pumȩnȩrȩ. 15“Ca̧ mu̧i̧tjoi̧nȩrȩ” yo̧rërea̧ ji̧, yo̧dë marequededibe yaba̧. Jabechji̧ mu̧i̧tjoi̧ judiro̧ jibëa̧ ano̧mȩ judi japapea̧ pio ju̧i̧ chjiari tjamo̧ri̧ dabadëdirȩ. Judi ütarë jo̧rȩta̧ pio ju̧i̧ chjiari tjamo̧ri̧ dabadëdirȩ. Jabo ja̧didënȩrȩ mȩnȩro̧. Dabanȩrȩ. Ca̧ Ama̧i̧ judi coa yo̧a̧ chjö̧na̧i̧ oa yo̧a̧requededibe. Jabechji̧ ca̧ pumȩpea̧ oaiä cjapi ëba cjo̧ro̧dërequededibe —yo̧a̧dejȩrȩ—. 16Jabechji̧ mitëa̧requededibe. Pio mȩnȩro̧ coa mitëdëa̧renȩro̧coe, jabo pio cüdë mitëa̧requededibe dibë. Ado dibë mitë ëte, chjadüa̧requededibe —yo̧a̧dejȩrȩ—. Mȩnȩro̧ ba chia oa ja̧bepapea̧ oa, jurarea̧ ji̧ra̧ tjamo̧ oa chiaji̧ri̧mi̧ dari̧ cjo̧ro̧pea̧ oa, bucho ana̧ cjiamȩ jurarea̧ ji̧ra̧ tjamo̧ oa chiaji̧ri̧mi̧ dari̧ ja̧bepapea̧ oa chjadüa̧requededibe —yo̧a̧dejȩrȩ—. Ado ja̧di tara mȩnȩro̧ Ama̧i̧ tjamo̧ pio ju̧i̧iä eami̧ oa cjo̧dërä, ca̧ quȩ oaiä cjo̧dërä, jabechji̧ mȩnȩro̧ cjo̧dëa̧mi̧ yürüpadidibe —yo̧a̧dejȩrȩ—. 17Ado yaba̧ yo̧requededibe ado. Jabechji̧ dibëa̧ dëbëti̧ra̧ chia eariä cjo̧ro̧chji̧vä —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧.

Jechu judi conȩda̧ oa cjiarërea̧mi̧ conȩda oa cjiapadire peaja̧di jadü judiro̧

18Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧:

—Danȩrȩ, dai chirirä cjo̧ro̧ji̧ri̧ judiro̧ pio dibëiäpȩmo̧ goëdëri̧ cjia dapai̧ dadiro̧dibe. Jabo ana̧ri̧ jo̧rȩtadëchji̧vä —yo̧a̧dejȩrȩ—. Jabechji̧ dibëa̧ yaboi̧ goëdëri̧ cjia darëreji̧ri̧diro̧coe. 19Jabo dëdë, mȩnȩro̧ dai chirirä ja̧ pumȩrä judi, ba chia datäreji̧ri̧diro̧dibe. Jabechji̧ jibëa̧ pumȩ pio ji̧ri̧ eaji̧ri̧rȩ datäreji̧ri̧diro̧dibe. Jabo ja̧didënȩrȩ yaba̧. Mitëa̧requededibe —yo̧a̧dejȩrȩ—. Dai chirirä cjo̧ro̧ji̧ri̧ oa mitëa̧requededibe, dai chiriri ja̧dëpe bagari̧. Ado ji̧ri̧ ja̧ pumȩdëpe baga̧ oaiä, jabechji̧ goëdëri̧ cjia dapadiro̧dibe, ja̧di dari̧ dadërërea̧ ji̧. 20Danȩrȩ, cüdë dibë mu̧i̧tjoi̧ pio ju̧i̧ chjiari yo̧a̧ pio ju̧i̧ ado chjereno̧ jo̧rȩtachji̧vä. “Aja̧, mu̧i̧tjoi̧ judi jibëa̧ ano̧mȩ ju̧i̧ u̧i̧ ba chiadëde” yo̧a̧requededibe. Ado mȩnȩro̧ ca̧ mu̧i̧tjoi̧ tara, peaja̧di conȩda̧ oa cjiapanȩrȩ dibëa̧ Ano̧mȩ pio judi conȩda̧ oa cjiarërea̧mi̧. Danȩrȩ, dibëa̧ Ano̧mȩ pio ju̧i̧ conȩda̧diro̧coe —yo̧a̧dejȩrȩ—. Ado pio coa conȩdarërea̧mi̧, conȩdapadiro̧dibe peaja̧di. Ado pio coa ta̧rëdiärërea̧mi̧, ta̧rëdiäpadiro̧dibe peaja̧di. Tjamo̧ davä. Cüdë a̧ra̧ano̧a̧ ji̧, ta̧rëdiäa̧diro̧coe o judiro̧. Ado mȩnȩro̧ a̧ra̧ano̧rä, peaja̧di ta̧rëdiäpadiro̧dibe o judiro̧. 21Jabo o judiro̧, jabechji̧ ma̧i̧ dari̧ japapadiro̧dibe, mȩnȩro̧ ca̧ea̧pea̧ tara. Jabechji̧ pio coa chjadüa̧mȩ pio ju̧i̧ dabadë tara, ja̧di dari̧ japajadiro̧dibe —yo̧a̧dejȩrȩ—. 22Jabo danȩrȩ, cüdë pio jiro pumȩ pio ji̧ri̧bo a̧ra̧ano̧pea̧ oa biradëa̧rä judi, jabechji̧ ta̧rëdëa̧täreji̧ri̧diro̧coe ca̧ ma̧ȩ oa. Ado ta̧rëdëa̧rä judi, 'Aja̧, chjai̧dëri̧ japea̧a̧ro̧da' quëna̧ jo̧rȩtadëa̧täreji̧ri̧dirȩ. Jabo pio coaiä irä ta̧rë chjaoa̧ oaiä, jabechji̧ goadirea̧ dadëdirȩ yaba̧. ‘Chja jabechji̧ pumȩ chjadëquëda’ quëna̧rea̧ dadëdirȩ —yo̧a̧dejȩrȩ—. 23Ado pio judiro̧dirȩ coaiäpȩmo̧ goëdëri̧ cjiaji̧ri̧ judiro̧. Ado pio coaiäpȩmo̧ goëdëri̧ cjiaji̧ri̧ judiro̧, peaja̧di goëdëri̧ cjiadiro̧jo̧ȩ ca̧ Ama̧i̧ pio ju̧i̧iäpȩmo̧. 24Ado pio jiro pumȩ pio ji̧ri̧, jabechji̧ chjadëri̧ na̧rȩtea̧requedejȩrȩ. Ji̧ri̧ ja̧ dachoro ana̧ri̧ na̧rȩtea̧requedejȩrȩ. Jabechji̧ eami̧ pumȩ üdë cja̧rȩmȩ co na̧rȩdërërea̧ra̧ pio ju̧ri̧ra̧ na̧rȩtea̧requedejȩrȩ, jauëchja cjiari̧ japamȩrȩ. Jabo cjäri̧ madirȩ. Pio ji̧ri̧ ana̧ri̧ na̧rȩa̧räbo, jabechji̧ goëdëri̧ cjiadiro̧coe, ca̧ Ama̧i̧ pio ju̧i̧bo. Pio ju̧i̧iä chjadë maearä cjiami̧ dari̧ cjiade davä judiro̧ chjai̧dëri̧ japea̧ üdë, ‘chjai̧dëri̧ japadëa̧quëda’ quëna̧rea̧ decjiari̧. 25Ado pio jiro pumȩ judiro̧ ja̧di dari̧ jiada̧ oaiä, jabechji̧ tjamo̧i̧ cjiari̧ cjiadiäa̧de jabërä go̧ȩpea̧ oa cjiarëremȩ ma̧ȩ üdë, Ütë tjamo̧ ja̧ ma̧ȩ üdë. Ta̧rëchji̧vä:

"Aja̧, cüdë eami̧ chjai̧dë oa japadëa̧räbo, goëdëri̧ cjia darëreji̧ri̧diro̧coe. Jabechji̧ teracabari̧ goëdëri̧ cjia darëreji̧ri̧diro̧coe."

Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Aja̧, Jechu judi jiadaji̧ri̧ pio ji̧ri̧ chjiari yo̧a̧ ma̧ȩ üdë, jabërä go̧ȩpea̧ oa cjiarëremȩde —yo̧a̧dejȩrȩ.

26Ado Jechu judi ji̧dë u̧i̧ ni̧bä chjaomȩrȩ a̧de yo̧rëremȩdejȩrȩ:

—Danȩrȩ, chjadüparequededibe A̧domȩ pio ju̧i̧ —yo̧a̧dejȩrȩ—. Aja̧, tjamo̧i̧ cjiari̧ baämȩ ma̧ȩ pio ju̧i̧ dabarea̧ yürümȩ pio ju̧i̧, Ütë tjamo̧ pio ju̧i̧ chjiari dabarea̧ yürümȩ pio ju̧i̧ chjadüpareconȩ. Jabechji̧ Ama̧i̧ tjamo̧ pio ju̧i̧iä ma̧na̧pade, ado pio coa chjiari ni̧bäpadidibe —yo̧a̧dejȩrȩ—. 27Ado pio mȩnȩro̧borë ni̧bä chjaopea̧ chianȩrȩ pio coa chjiari. Jabechji̧ pio coa nö̧ta ëba cjia marëreji̧ri̧renȩro̧coe cüdë pio yoa chirirä pearä tarupë ja̧bepea̧ pio judiri yurori. Aja̧, no̧mȩ tjamo̧ri ja̧ ca̧ jadünȩrȩ. Ado pio ju̧i̧iä pio coa chjiari ni̧bä chjaopea̧ chianȩrȩ peaja̧di, cjapiri̧ cjo̧ro̧rea̧ decjiari̧ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Currently Selected:

Juan 15: Pume

Highlight

Copy