Taruparea̧ Ma̧ȩ 32

Jacobo judi bücjüri̧ cjiarëremȩde Echau ju̧i̧ dëbëdiäpea̧ ji̧

1Ado Jacobo judi no̧bo baäa̧mȩ oa, Ütë tjamo̧ ja̧ mu̧i̧tjoi̧ judiro̧, a̧dëri ji̧ri̧ pio judiro̧ dëbëdiäa̧diro̧jo̧ȩ no̧i̧dërë. 2Ado Jacobo judi pio ji̧ri̧ daea̧ oaiä, 'Aja̧, Ütë tjamo̧ ja̧ guadiadiro̧da, yo̧a̧ri̧ bubadiro̧da' quëna̧ jo̧rȩtamȩrȩ yo̧rëremȩde. Ja̧di tara Manima quȩra̧ pio ju̧ri̧ra̧ quȩparëremȩdejȩ pio jiro chiri oa, jënȩ Ütë tjamo̧ ja̧ mu̧i̧tjoi̧ buba daea̧räpȩ.

3Ado Jacobo ja̧ omȩ judi, Echau pio judi cjo̧ro̧rëremȩde Chera quȩmȩräpȩ, Edomo̧ quȩmȩ chiriräpȩ. Ado Jacobo judi jibëa̧ pumȩ pio ji̧ri̧iä ma̧ȩ chjadürëremȩdejȩ ja̧ omȩ pio ju̧i̧iäpȩmo̧. 4Ado yo̧a̧dejȩrȩ jibëa̧ pumȩ ji̧ri̧:

—Aja̧, ja̧di ta̧rëri̧ yo̧chji̧jo̧ȩ ca̧ ayima̧i̧ oa, Echau pio ju̧i̧: “Danȩ ayima̧i̧, Jacobo pio judirequede cüdë. Na̧ mu̧i̧tjoi̧mi̧ darequede. Danȩ, Aba̧ pio ju̧i̧ nöta japamitë ana̧ri̧ cjo̧ro̧rëremȩrequede. 5Ji̧ra̧ri̧ goamȩpea̧requede. Baca goamȩpea̧requede. Buro goamȩpea̧requede. Ado oveja peaja̧di goamȩpea̧requede. Ado peaja̧di ëbamȩpea̧requedejȩrȩ ca̧ mu̧i̧tjoi̧ ji̧ri̧. Ivi mu̧i̧tjoi̧ ji̧ri̧, oari mu̧i̧tjoi̧ ji̧ri̧ ëbamȩpea̧requedejȩrȩ. Pio yoa ma̧ȩ oa chjadürequedemȩ pio mȩa, mȩnȩ pio coaiäpȩmo̧ cjäri̧ri̧ cjia jo̧rȩtapea̧ oa.” Aja̧, ja̧di ta̧rëri̧ yo̧tä earequededibe ca̧ omȩ oa —yo̧mȩrȩ yo̧rëremȩdejȩrȩ ma̧ȩ yüre jäpaji̧ri̧ pio ji̧ri̧iä Jacobo judi.

6Ado jäpaji̧ri̧ judiro̧ järëreji̧ri̧dirȩ Echau pio ju̧i̧iäpȩ. Dadäräa̧diro̧jo̧ȩ. Ma̧ȩ yürüa̧diro̧jo̧ȩ. Jacobo pio judi yo̧a̧mi̧ yo̧a̧diro̧jo̧ȩ. Ado ja̧dëa ji̧ jäa̧ji̧ri̧ pio judiro̧ ado chjereno̧ cuchupë ma̧na̧rä, ja̧di ta̧rëri̧ yo̧a̧diro̧jo̧ȩ Jacobo ju̧i̧:

—Aja̧, jäa̧rea̧rȩ na̧ omȩ pio ju̧i̧ dapea̧ oa. Echau pio ju̧i̧ daea̧rea̧ro̧jo̧ȩ. Ado pio judi jana̧de mȩa irä dapea̧ oa, mȩa jeapea̧ oa. Aja̧, jana̧de. Jibëa̧ma̧i̧ jana̧dëde jabo 400 oari pio ji̧ri̧ nö̧ta jana̧de —yo̧ji̧ri̧rȩ yo̧a̧diro̧jo̧ȩ Jacobo ju̧i̧.

Jacobo judi bücjüri̧ cjia tjamo̧mȩrȩ ni̧bärëremȩdejȩ Ütë tjamo̧ pio ju̧i̧

7Ado Jacobo judi pio ju̧i̧ ta̧rëa̧ oaiä uapa tjamo̧mȩpea̧de. Bücjüri̧ cjia tjamo̧pea̧de. Pio ju̧i̧iämȩrȩ yo̧a̧ri̧ bubape bagari̧ mitërëremȩdejȩrȩ jibëa̧ pumȩ ji̧ri̧. Ado jibëa̧ baca oa, jibëa̧ cameyo oa peaja̧di yo̧a̧ri̧ bubape bagari̧ mitëa̧dejȩrȩ, jibëa̧ ovejabo. 8‘Aja̧, Echau judi ibë acji jana̧ jirodiibëda, jabo cja̧rȩmȩ buba maea oa cho̧rë jäpa jirodida, ado cja̧rȩmo̧ bubarë chjadëri̧ goadi baärea̧ dapai̧ da jirodiro̧da’ quëna̧ jo̧rȩtamȩrȩ yo̧a̧ri̧ bubape bagari̧ mitërëremȩdejȩrȩ jibëa̧ pumȩ ji̧ri̧. 9Ado ji̧dë duri oa Jacobo judi ni̧bämȩpea̧dejȩ Jeova pio ju̧i̧. Ja̧di ta̧rëri̧ yo̧mȩrȩ ni̧bärëremȩdejȩ:

—Jeova, ca̧ jadama̧i̧ pio ju̧i̧ ja̧ Ütë oa ni̧bärequedemȩ, Abaraa̧ quȩmȩ ja̧ Ütë oa. Ca̧ ama̧i̧ ja̧ Ütë oa, Icha quȩmȩ pio ju̧i̧ ja̧ Ütë oa ni̧bärequedemȩ. Danȩ, pio mȩnȩ yo̧a̧ pio ju̧i̧iä baärequede ca̧ chiriräpȩ, ca̧ pumȩiäpȩ. Pio mȩnȩ yo̧a̧ pio ju̧i̧iä, “Aja̧, chjadëri̧ a̧doparequedemȩ” yo̧a̧ pio ju̧i̧iä, jabechji̧ baärequede. 10Danȩ, cüdë chjadëri̧ japea̧ ba oa chjadëri̧ japadërenȩque, jabo jabechji̧ na̧ea̧ ma̧na̧ri̧ jo̧rȩtamȩrȩ chjadëri̧ jape chjaorenȩque nö̧tadëmȩ oa, pumȩ ba chiadëmȩ oa. Aja̧, na̧ea̧ ma̧na̧ri̧ jo̧rȩtamȩrȩ ji̧dë ma cjäri̧ri̧ cjiamȩrȩ darema̧coe pio mȩnȩmo̧ marë. Jabechji̧ na̧ mu̧i̧tjoi̧requede cüdë. Ado cüdë pio yoa bea oa, bea Joroda̧ pearä chjätärërea̧ ji̧, jabechji̧ ca̧ tai̧rea̧ to pio ju̧i̧mo̧i̧ goamȩrȩ chjätärëremȩreconȩ. Ado yaba̧ ji̧ra̧ri̧ goamȩpea̧requede. Jabechji̧ pio mȩnȩ yürüa̧ oa ji̧ra̧ri̧ goamȩpea̧requede cüdë. Yo̧a̧ri̧ buba oa goamȩpea̧requede. 11Ado yaba̧ cjo̧dërequedemȩ ca̧ Ütë mȩnȩ coa chjadëri̧ jidatä, pio coa cjäri̧ri̧ cjia datä. Jabechji̧ acji jana̧ jirodique ca̧ ayima̧i̧ judi, Echau pio judi. Ado pio ju̧i̧iä uapa tjamo̧requede. 'Aja̧, pio coa gu̧na̧pea̧ oa acji jana̧ jirodida, ca̧ ivi pio ji̧ri̧bo gu̧na̧pa jirodiji̧ri̧da, ca̧ bori̧ pio ji̧ri̧bo gu̧na̧pa jirodiji̧ri̧da' quëna̧ jo̧rȩtamȩrȩ uapa tjamo̧requede. 12Jabo mȩnȩ coa yo̧ë cji̧därea̧ ma̧ȩ pio ju̧i̧ jo̧rȩtarequede. “Aja̧, chjadëri̧ a̧doparequedemȩ” yo̧a̧ ma̧ȩ pio ju̧i̧ jo̧rȩtarequede. “Aja̧, na̧ea̧ri ja̧ji̧ri̧ pio judiro̧ ütararea̧mi̧dëri̧ cjiadiäpadirȩ” yo̧a̧ ma̧ȩ pio ju̧i̧bo jo̧rȩtarequede. “Ui ana̧ yuroro a̧rȩmȩ dabu pjo̧no̧ üdë ütararea̧mi̧dëri̧ cjiami̧ dari̧ cjiadiäpadirȩ” yo̧a̧ ma̧ȩ pio ju̧i̧bo jo̧rȩtarequede ca̧ Ütë. Ja̧di tara jabechji̧ chjadëri̧ jidatä earequedemȩ —yo̧mȩrȩ ni̧bärëremȩdejȩ Jeova pio ju̧i̧iäpȩmo̧ Jacobo judi.

Pio jȩaiäpȩmo̧ cjäri̧ri̧ cjia dapea̧ oa, jabechji̧ ji̧ra̧ tjamo̧ oa yürürëremȩdejȩ Echau ju̧i̧ Jacobo judi

13Ado gȩnȩpea̧ oaiä, Jacobo judi pio ju̧ri̧pȩ cjiadiäa̧de mo̧a̧pea̧ oa. Aja̧, jënȩ Ütë tjamo̧ ja̧ mu̧i̧tjoi̧ no̧i̧dë oa darërea̧räpȩ ju̧ri̧ cjiadiärëremȩde. Ado dopea̧rä jibëa̧ omȩ ju̧i̧iäpȩmo̧ chjadëri̧ yürüpea̧ oa, Echau pio ju̧i̧ chjadëri̧ yürüpea̧ oa, jabechji̧ tutirëremȩdejȩrȩ jibëa̧ pio ju̧i̧, jabo o oamo̧ oa. 14Aja̧, 200 chivo ivi oa tutia̧dejȩrȩ, 20 chivo oaribo. Ado peaja̧di tutia̧dejȩrȩ 200 oveja ivi oa, 20 oveja oaribo. Aja̧, ja̧di dari̧ tutia̧dejȩrȩ Echau pio ju̧i̧iäpȩmo̧ chjadëri̧ yürüpea̧ oa. 15Peaja̧di 30 cameyo ivi oa, jibëa̧ bori̧bo tutia̧dejȩrȩ. Ado pio ju̧i̧ uëri 40 baca ivi oa, 10 baca oari oa tutia̧dejȩrȩ peaja̧di. Ado 20 buro ivi oa, 10 buro oari oa tutia̧dejȩrȩ peaja̧di. Aja̧, ja̧di dari̧ tutimȩrȩ tutirëremȩdejȩrȩ jibëa̧ omȩ pio ju̧i̧iäpȩmo̧ chjadëri̧ yürüpea̧ oa. 16Ado judi tutia̧ pio ji̧ri̧ tjaoëpai̧ dari̧ tutirëremȩdejȩrȩ buba ji̧ra̧pe bagari̧. Ja̧dëa ji̧ jibëa̧ mu̧i̧tjoi̧ ji̧ri̧, cja̧rȩmȩ oa jida tänȩa̧dejȩrȩ ado cja̧rȩmo̧ buba oa. Ado ja̧di ta̧rëri̧ yo̧mȩrȩ yo̧a̧dejȩrȩ jibëa̧ mu̧i̧tjoi̧ ji̧ri̧:

—Danȩrȩ, ca̧ yaboi̧ ma̧ȩ jächji̧vä mȩnȩro̧ jida̧ pio ju̧i̧. Jabo ji̧mo̧ jäji̧ri̧rȩ ma̧ȩ jädë machji̧vä, jabo jachi chja cjiari̧ ma̧ȩ jächji̧vä mȩnȩro̧ jachi chja cjiari̧ go̧düdäräpea̧ oa ca̧ omȩ pio ju̧i̧iäpȩ. Cja̧rȩmȩrȩ ma̧ȩ jätäremȩde mȩnȩro̧ jida̧ pio ji̧ri̧, ji̧mo̧ go̧düdärärea̧ decjiari̧.

17Ado yabo ma̧ȩ jäpamȩ pio ju̧i̧ yo̧rëremȩdejȩ Jacobo judi:

—Danȩ, mȩnȩ ca̧ omȩ Echau pio ju̧i̧ dëbëdiäa̧rä, jabechji̧ iëno̧ë ta̧rë chjaopa jirodimȩ. Ado danȩ, “¿Chjia ja̧ mu̧i̧tjoi̧renȩ mȩnȩ?” iëno̧ë ta̧rërä judi, “¿Tjana̧räpȩ jänȩ?” iëno̧ë ta̧rërä judi, “Pio jiro buba üdë ¿chjia ja̧de?” iëno̧ë ta̧rërä judi, jabechji̧ chjadëri̧ dëbë yo̧jo̧ȩ. 18Jabechji̧ ja̧di ta̧rëri̧ dëbë yo̧emȩrenȩjo̧ȩ: “Aja̧, pio jiro buba üdë, na̧ mu̧i̧tjoi̧ ja̧de. Jacobo pio ju̧i̧ ja̧ maeade,” yo̧emȩrenȩjo̧ȩ. “Pio mȩaiäpȩmo̧ chjadëri̧ yürüpea̧ oa chjadüa̧dimȩ. Pio yaba̧ ma̧na̧pade judi,” yo̧emȩrenȩ. “Duriräpȩde. Ja̧di tara yo̧era̧pea̧requedemȩ ca̧ ano̧mȩ Echau,” yo̧emȩrenȩ —yo̧mȩrȩ yo̧rëremȩdejȩ yabo ma̧ȩ jäpamȩ pio ju̧i̧ Jacobo judi.

19Ja̧di ta̧rëri̧ yo̧a̧ marëremȩdejȩrȩ Jacobo judi yabo jäpaji̧ri̧ pio ji̧ri̧, jënȩro̧ jida̧ pio ji̧ri̧ jachi chja cjiari̧ ma̧ȩ jäpaji̧ri̧ pio ji̧ri̧. 20Ado judi ji̧ri̧ yo̧a̧ pio ju̧i̧ a̧de yo̧mȩrȩ yo̧a̧dejȩrȩ:

—Danȩrȩ, mȩnȩro̧ ca̧ omȩ Echau pio ju̧i̧ darä, ja̧di ta̧rëri̧ yo̧tä earequededibe peaja̧di. “Danȩ, Jacobo judi, na̧ mu̧i̧tjoi̧ pio judi, ibëa̧ duriräpȩde” yo̧tä earequededibe. “Pio yaba̧ ma̧na̧pade” yo̧tä earequededibe —yo̧mȩrȩ yo̧rëremȩdejȩrȩ jibëa̧ mu̧i̧tjoi̧ ji̧ri̧.

Ado Jacobo judi jo̧rȩtarëremȩde. ‘Aja̧, cüdë ja̧di dari̧ japea̧ oaiä, ca̧ omȩ üdë cjatäcjie jo̧rȩtarea̧ dapai̧ da jirodicoada, cüdë ji̧ra̧ri̧ yürüa̧ oaiä cjatäcjie jo̧rȩtarea̧ dapai̧ da jirodicoada, jabechji̧ coa yabo ma̧ȩ jäji̧ri̧ pio ji̧ri̧iä ji̧ra̧ tjamo̧ oa chjadücuni̧da, ado pio ju̧i̧iä pio coa darä cjäri̧ri̧ cjia dapai̧ da jirodicoada, ado ji̧dë duri oa coa da̧rä, ji̧ra̧ri̧ mitëa̧ oaiä cjäri̧ri̧ cjiamȩrȩ dapai̧ da jirodicoada’ quëna̧ jo̧rȩtarëremȩde Jacobo judi. 21Ja̧di tara ji̧ra̧ri̧ yürüpea̧ oa yabo chjadürëremȩdejȩrȩ jibëa̧ mu̧i̧tjoi̧ ji̧ri̧. Ado Jacobo judi a̧dë cjiadiärëremȩdejȩrȩ jënȩ mo̧a̧pea̧räpȩ.

Jacobo judi goae tarari̧ dëbë japatarëremȩde Ütë tjamo̧ pio ju̧i̧ nö̧ta

22Ado pio jiro gȩnȩrä Jacobo judi bea oa chjätä tänȩrëremȩdejȩrȩ jibëa̧ pumȩ ji̧ri̧ chjätärea̧ no̧räpȩ ju̧ri̧. Jaboca quȩmȩ bea oa chjätä tänȩa̧dejȩrȩ jibëa̧ ivi tjamo̧ oa, yo̧a̧ri̧ oa. Jënȩ a̧de ëba̧ pio ji̧ri̧bo chjätä tänȩa̧dejȩrȩ yo̧a̧ri̧ oa. Ado jibëa̧ u̧ri̧ oa, 11 oa, peaja̧di chjätä tänȩa̧dejȩrȩ. Aja̧, ja̧di dari̧ chjätä tänȩrëremȩdejȩrȩ jibëa̧ pumȩ ütëbo oa bea oëräpȩ. 23Ado jibëa̧ goë oa, jibëa̧ cjo̧ro̧rea̧ oa, jibëa̧ chjö̧na̧i̧ oa chjätä tänȩrëremȩdejȩ peaja̧di bea oëräpȩ. 24Ado ütëbo oa chjätä tänȩ ëte jibëa̧ma̧i̧ cjiadiärëremȩde Jacobo judi. Ado ja̧dëa ji̧ judi daba quëna̧dërä, chjaodëri̧ acji jana̧dejȩ cja̧rȩmȩ üdë pio jȩa nö̧ta japatapea̧ oa. Ado goae tarari̧ japatarëreji̧ri̧dirȩ japamitë ana̧ri̧. Tjamo̧ davä. Dorë cjitëa̧rä yuro japatarëreji̧ri̧dirȩ. 25Jabo idëpea̧ oa cjiaremȩ judi, ‘Jabo cjäri̧ maquëda, pio yoa üi̧ oa boadärärea̧ dadaemȩquëda’ quëna̧ jo̧rȩta̧ oaiä, jabechji̧ gu̧na̧dejȩ jibëa̧ apë ju cjara oa oëra̧ cjiadiäa̧ri̧. 26Ado ja̧dëa ji̧ yo̧a̧dejȩ Jacobo ju̧i̧:

—Mitë ano̧coe. Cjitëdiibe do üdë.

Jabo Jacobo judi dëbë yo̧mȩrȩ yo̧a̧dejȩ:

—Cjäri̧ marequedemȩ. Mitë ano̧dëparequedemȩ. Jabechji̧ mȩnȩ coa chjadëri̧ cjo̧ro̧pea̧ ma̧ȩ oa yürürämo̧ mitë ano̧parequedemȩ —yo̧a̧dejȩ.

27Ja̧dëa ji̧ idëpea̧ oa cjiaremȩ judi iëno̧ë ta̧rëa̧dejȩ:

—¿Yö̧ta quȩmȩrenȩ mȩnȩ?

Ado Jacobo judi:

—Yö̧ta quȩmȩdërequede, Jacobo quȩmȩrequede —yo̧a̧.

28Ado idëpea̧ oa cjiamȩ judi yo̧a̧dejȩ:

—Danȩ, Jacobo quȩmȩdërenȩ yaba̧, jabo ado cja̧rȩmo̧ quȩra̧ ano̧ mire quȩparequedemȩ. Jabechji̧ Icharai quȩmȩrenȩ yaba̧. Jabechji̧ mȩnȩ Ütë tjamo̧ pio ju̧i̧ nö̧ta japataremȩrȩ boadäräa̧ tara, pumȩ pio ji̧ri̧bo boadäräa̧ tara, jabechji̧ Icharai quȩra̧ pio ju̧ri̧ra̧ ano̧ mire quȩparequedemȩ. Aja̧, "Ütë tjamo̧ pio ju̧i̧ nö̧ta japatamȩ" yo̧mȩ quȩra̧ pio ju̧ri̧ra̧ ano̧ mire quȩparequedemȩ —yo̧a̧dejȩ.

29Ado ja̧dëa ji̧ Jacobo judi iëno̧ë ta̧rëa̧dejȩ:

—Ado mȩnȩ, yö̧ta quȩmȩrenȩ mȩnȩ?

Ado idëpea̧ oa cjiaremȩ judi dëbë yo̧mȩrȩ yo̧a̧dejȩ:

—¿Tjana̧ japapea̧ oa iëno̧ë ta̧rërenȩque? —dëbë yo̧a̧dejȩ.

Ado ja̧dëa ji̧ idëpea̧ oa cjiaremȩ judi chjadëri̧ cjo̧ro̧pea̧ ma̧ȩ oa yürürëremȩdejȩ Jacobo ju̧i̧.

30Ja̧dëa ji̧ Jacobo judi pio ju̧ri̧pȩ quȩparëremȩdejȩ. Aja̧, Penue quȩra̧ pio ju̧ri̧ra̧ quȩpea̧dejȩ, "Ütë tjamo̧ ja̧ dacho" yo̧mȩ quȩra̧. Ado ja̧di dari̧ yo̧rëremȩde Jacobo judi:

—Jabechji̧ cüdë Ütë tjamo̧ ja̧ dacho oa irä daea̧mȩborë, jabechji̧ ja̧bodëa̧requede, jabo cjo̧ro̧rea̧ chiarequede —yo̧a̧de.

Aja̧, ja̧bodëa̧de. Ado pio ju̧i̧iä jabechji̧, "Ütë tjamo̧ ja̧ dacho" yo̧mȩ quȩra̧ pio ju̧ri̧ra̧ quȩparëremȩdejȩ jënȩro̧ japata̧räpȩ ju̧ri̧.

31Ado dorë cjitëa̧rä, Jacobo judi bea oëräpȩmo̧ chjätärëremȩde jibëa̧ pumȩ pio ji̧ri̧ nötadiäpea̧ oa. Apë ju oa mu̧i̧ jä mu̧i̧ jä cjiamȩrȩ järëremȩde apë ju cjara gito oaiä. 32Ja̧di tara pio judiri yurori, jabechji̧ icharaita judiro̧ eami̧ chirirä cjo̧ro̧mȩ oa ja̧bo tänȩrä, jënȩro̧ jurapea̧ oa gu̧na̧rä, jabechji̧ apë ju cjara go̧a̧ oa juradë madiro̧jo̧ȩ. Ütë tjamo̧ judi apë ju cjara oa ga̧re tara̧ oaiä, ‘jabechji̧, juradërea̧vedida’ quëna̧ jo̧rȩtaji̧ri̧rȩ juradë madiro̧jo̧ȩ.

Currently Selected:

Taruparea̧ Ma̧ȩ 32: Pume

Highlight

Copy