Matiu 18
18
Akena Tina Ko Mata Go
(Maka 9.33-37; Luka 9.46-48)
1Torana so ṉalu nae, ria disipoloro ia iri lama tana ne Jesu, iri go, “Akena tane tina ko mata ego Too ikoego vari miasoka ia God?”
2Gonae Jesu i korua kaki kameka sale mana ivadegere ze tarakenaqa qira. 3Mana i sine ne qira, “Ma sine ne qamu pata ogoto, ṉalu qamuki kavale kaega vatovato ramu, mana gere qira kaega salero suka gogo ne, ramu tamuniki mazala kaega keba zana Too de ikoego vari miasoka ia God. 4Ka Basoe i vaqoqore too ia mana gere sale suka dena, tina ko mata ego Too ikoego vari miasoka ia God. 5Mana ka basoe i va velaka ne sale suka i gere go ia dena, loborona vitoṉoqu era, basoe nae i mamaligara nava era.”
Pataro I Mazala Go Va Soru Zena Vasakata Pata Basoe Ne
(Maka 9.42-48; Luka 17.1-2)
6Jesu igo napu dena, “Ṉalu kaki basoe i va soru ze vasakata pata de ikoego kakiaro salero suka iri vaogoto ava go era, basoe nae i tora mara doki ze kameka ipaka lavata kokolina mana va zunu zaqe maeara ne. 7Manava sakata de iri koego basoero na vudu pua dena, tanego sauna pataro iri vasoru qirae vasakata pata basoero ne, tina sadaka bana so, do basoe izazu ne go pataro igcgo ne tina miasoka go.
8Ṉalu karisimu ba makemu i va soru zigoe vasakata pata, ono koboro vakazuki ne mana vanaqe go! I velaka so ṉalu qo vana ne kaki dia tokamamu mana pala too ogoto. Ianae i lete velaka sivala ne ṉalu karua karisimu mana karua makemu iosi nigo mana iri vana zigoe nako iki rove go kaega le ne. 9Mana ṉalu matamu i vasoru zigoe vasakata pata, lobiki vakuziki ne mana vanaqe go! I velaka so ṉalu qo vana ne kaki dia tokamamu mana pala too ogoto. Ianae ilete velaka sivala ne ṉalu to sotia karua matamu mana iri vana zigoe nako iki rove go kaega le.”
Seko Vapadapada Na Sipi I Rore Go
(Luka 15.3-7)
10Jesu igo napu dena, “Muna miasoka, muniki mia vapatavolomo qira salero suka ro. Ma sine ne qamu, aqelo ro ria iri ko tavise Mamae tepa rani ne. 11Era Tuna basoe qa lama ne vakavele qira vano iri rore go.
12Avana to qamu nanao go, ṉalu kaki basoe i toṉove kameka vasa sipi mana kaki kameka i rore go. Ia tina tarua iaṉaulu kaia sipi ro ne kubolo iri ṉaṉa ego, mana tina za taqia kameka sipi i rore go. 13Ma sine ne qamu pata ogoto, kula ia valeke nae i lete sivala ne kula i vae ne qira go iaṉaulu kaia sipi ia iriki rove go kaega. 14Igere napua so Tamaqamu ikoego rani ne, iki soko kaega kaki kameka ria salero suka ia tarina rore go.”
Avana Tono Zazu Ne Ṉalu Togamu Ba Kaemu I Vasakata Pata Go
15Jesu igo napu dena, “Ṉalu togamu i kebu e deqo koego, zae de ikoego mana vamia ze kebu ro ia. Do buru na zazu vamiki neso tanuqaburu. Ṉalu ia i gata go pataro qo sine go aro, raburu qaburu vari vakameka napu tamakena. 16Do ṉalu ia iki gata go kaega, ono ule napu za de ikoego ia mana ono lulua kameka ba karua basoe go, tanego Buka tabo ne igo, ‘Ṉalu kaki basoe i vatubi zigoe kakia pata, karua, ba kapisa basoe tarina koloku tavisi, go tarina gata go pataro iri vari va legu ne go.’ 17Do ṉalu basoe nae iki toqe ne so kaega pataro iri sine nego ria ne, ṉalu nae, sine vasadaka ze de iri koego vano ne eklesia ne. Mana ṉalu ia iki toqe neso kaega gata na pataro iri sine go vano na eklesia ne, ono mia vagere ze to ia kaki basoe rodoko ba basoe palapala takisi go. 18Ma sine ne qamu pata ogoto, pata qamuki vamao ze kaega ramu vudu pua dena, God iki vamao napu ze kaega rani ne, mana pata qamu vamao ze ramu vudu pua dena, God tina va mao napu ze tepa rani ne.
19Mana ma sine napu ne qamu, ṉalu kaki tararua raburu qaburu vari toqe ne pene na kaki pata. Mamae ikoego rani ne tina teke ne qaburu pata qaburu pene go. 20Tanego ṉalu karua ba kapisa basoe iri kameka qoqoṉo ego loborona vitoṉoqu era, era qa koe loboro qira.”
Seko Vapadpada Na Basoe Iki Nanao Ule Ne Kaega Vakitaka Ia
21Gonae Pita i lamae de ikoego Jesu, mana itana ne ia, igo, “Batu! Ṉalu go togaqu i kebu taru e de qa koego era, ava via ṉalu tuna nanao ule ne ia? Torana kavitu ṉalu?”
22Do Jesu ivataule ne ia, “Kavitu ṉalu kaega, do vituṉaulu kavitu ṉalu, 23tanego Too ikoego vari miasoka ia God i gere ṉalu kaki batu lavata i soko rove na de go vano zazu ia iri miasoka go kesa ro ia. 24Ṉalu iara vatupia so ia, iri lulu valame kameka basoe zazu ia i lepulepu bana ne torana manoga mao kesa, 25Do basoe zazu ia ne, i makure to kavala vaule na kesa i lepulepu nego, iago batu lavata ne i sine ne qira tarina pala valeke ne, qole ia mana osina salero ia mana volivoli palu zeto osina pataro i toṉove go, go tina lepu vaule ze go kesa i lepulepu ne go. 26Valeke zazu ne i koloku tutuṉu e tarakenaqara batu lavata ne i dae mana igo de, ‘Ke! batu, mo teke nava me desuka ṉalu, go era tuna pada ne vae lupo na osina pata qa lepulepu zigoe go aro!’ 27Iago batu lavata ne i nanao ule ne ia, mana osina to lepulepu iago, goto nae i vatalupase ia.
28Do ṉalu basoe zazu dena i siporo, i za soba kameka valeke zazu i lepulepu banae de ikoego torana kameka vasa kesa. I pala ia mana i kila kunu ze kokolina i sine ne, ‘Ono lepu vaule to pata qo lepulepu ze go de qa koego era!’ 29Valeke zazu ne i soru e tarakenaqana ia, i dae mana igo de, ‘Ke, mo teke nava me desuka ṉalu, mana era tuna kavala vaule nigo osina lepulepu aro!’ 30Do valeke ne, iki soko to kaega ara piri, iago i sine ne qira tarina taru ze valeke ne bara ne go na soka luposo lepulepu ia. 31Ṉalu ria kero ne vano zazu ne iri mia pata i doka go, iri lete maqata, gonae iri za sine ne batu lavata ne osina pata i doka go. 32Iago batu lavata ne i koru vakeba napua valeke zazu ne, ‘Qo valeke sakata i vane! Era qa nanao ule ne osina to lepulepu aro de qa koego, tanego qo pene ava. 33Do aro, avigo tane qoki nanao ule ne kaega valeke nae, gere na era qa nanao ule nigo na?’ 34Batu lavata ne, i lete muma, mana i va zao ze bara valeke zazu ne go tina za kimata, go tina soka vaule lupo so osina kesa ro ne.”
35Iago Jesu igo, “Mamae ikoego rani ne tina go napu so, ṉalu qamuki nanao ule ogoto ne qira kaega onotoqamu ro.”
Currently Selected:
Matiu 18: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
